Young Pipol Ask . . .

Hao Nao Mi Savve Stap Klia Long Sex Bifor Marit?

“Taem mi 19, mi sleep witim wanfala boy wea mitufala bin skul tugeta. Mi barava feel shame long datwan. Bihaen, mi feel olsem mi iusles.”—Laci.a

BIBLE komandim iumi for “ranawe from fornication.” (1 Corinthians 6:18) Bat, luk olsem staka young wan distaem no willing for obeyim datfala komand from Bible for no duim sex bifor marit. Samfala, olsem Laci, no kontrolem feeling for laekem sex and from diswan olketa kasem hevi and spoelem conscience bilong olketa.

Hem tru, hem no isi for kontrolem feeling for laekem sex. Olsem datfala buk Adolescent Development hem sei, wei wea olketa hormone mekem body change hem mekem “feeling for laekem sex kamap moa big.” Paul hem sei: “Samfala taem, seknomoa tingting abaotem sex hem kam long mind bilong mi.”

Bat, Howard Kulin, wanfala professor bilong sik wea kasem pikinini, hem sei: “Barava staka moa samting affectim fasin [bilong young pipol] winim olketa hormone nomoa.” Hem explainim hao staka samting and tingting bilong pipol tu insaed long diswan. Tru nao, tingting bilong pipol, and especially olketa wea sem age, savve barava affectim young pipol.

Long buk bilong hem A Tribe Apart, woman for raet, Patricia Hersch, talem hao “young pipol garem community bilong olketa seleva. . . . Hem no just wanfala grup wea fren tugeta nomoa, hem wanfala sekson wea stap difren [from olketa wea full-grown] and garem olketa standard bilong hemseleva.” Bat planti taem, “olketa standard” bilong staka young wan distaem hem no for kontrolem feeling for laekem sex bat for duim samting body laekem nomoa. So, planti kasem hevi for traem sex bifor marit.

Nomata olsem, olketa young Christian wise for disaed strong for stap klia long evrikaen dirty fasin from olketa savve God tok strong againstim diswan olsem wanfala “samting wea kamaot from sin.”b (Galatians 5:19) So, hao nao iu savve stap klia from diswan taem iu kasem olketa hevi olsem?

Luk Aotem Olketa Wise Fren

Hem tru, pipol savve affectim iu long nogud wei, bat long narasaed, wei for fren witim gudfala pipol savve helpem iu tu. Hem olsem Bible talem: “Man wea wakabaot witim wise pipol bae kamap wise.” (Proverbs 13:20; 1 Corinthians 15:33) Wanfala report from World Health Organization (WHO) talem hao “young pipol wea fren gud witim parents, nara full-grown pipol wea garem fasin for kea, and olketa wea sem age” and young pipol “wea garem samfala spialaen long laef bilong olketa . . . staka taem no traem sex.”

For fren gud witim parents savve barava helpem iu. Joseph hem ting bak, “Parents bilong mi barava helpem mi for againstim olketa hevi for traem sex.” Tru nao, parents wea laek mekem God hapi savve markem olketa spialaen for iu wea garem faondeson long Word bilong God. (Ephesians 6:2, 3) Olketa savve helpem iu for stap klia from dirty fasin.

Hem tru, maet hem hard firstaem for story witim olketa abaotem sex. Bat maet iu sapraes for savve olketa minim feeling bilong iu. Olketa tu young bifor. Dastawe, Sonja encouragem olketa nara young wan olsem: “Go long parents bilong iu, and no feel shame for story witim olketa abaotem sex.”

Waswe sapos parents bilong iu no followim olketa Bible standard? Nomata iu honorim olketa, maet iu need for luk aotem advaes from samwan wea no part long famili. Paul, wea iumi readim toktok bilong hem finis, hem sei moa, “Mi kasem help saed long diswan from olketa mature Christian hasband and waef.” Kenji, wanfala young girl wea mami no garem sem biliv olsem hem, hem sei tu, “For kasem advaes, mi askem nomoa olketa mature wan wea savve encouragem mi long spiritual wei.” Bat hem talem disfala warning, “Mi no askem olketa wea no followim hae standard saed long fasin, nomata sapos olketa sei olketa garem sem biliv olsem mi.”

Samfala taem, maet iu need for keakea long hu nao iu kaban witim insaed long Christian kongregeson. Bible talem iumi hao insaed eni big grup pipol, samfala wea stap bae no garem gudfala fasin. (2 Timothy 2:20) Wanem nao iu shud duim sapos iu faendaot samfala young wan long kongregeson bilong iu “haedem really fasin bilong olketa”? (Psalm 26:4) No fren klos witim olketa, and luk aotem olketa fren wea bae sapotim disison bilong iu for stap klia long dirty fasin.

Rejectim Olketa Rong Idea

Iu mas duim samting tu for protectim iuseleva from olketa dirty piksa or samting wea garem dabol mining insaed olketa buk, magasin, music video, movie, and Internet. Television, radio, and olketa niuspepa storyim sex bifor marit olsem gud samting, samting for enjoyim and wea no garem eni danger. Hao nao diswan affectim pipol? Kenji, wea iumi storyim finis, hem sei: “Mi lukim finis samfala show long TV wea olketa ting nating long dirty fasin, and wea join witim homosexual fasin. From diswan, mi start for forgetim hao olketa samting hia serious tumas long Jehovah.”

For tok stret, hapitaem olsem hem planti taem haedem long kleva wei nogud samting wea kamaot from sex bifor marit—wei for babule nating, marit taem man no mature, and sik wea kamaot from dirty fasin. So no bilivim olketa “wea sei gud samting hem nogud and nogud samting hem gud.”—Isaiah 5:20.

No forgetim toktok long Proverbs 14:15: “Eniwan wea no garem savve hem bilivim evri toktok, bat man wea wise hem ting raonem wanem hem duim.” Sapos iu lukim olketa piksa or samting saed long sex taem iu read, iusim Internet, or lukluk TV, duim samting stretawe! Satem datfala buk, offem computer or television! Then tanem tingting bilong iu long samting wea savve buildimap man. (Philippians 4:8) Taem iu duim olsem iu savve stopem feeling for laekem samting wea rong bifor hem kamap strong.—James 1:14, 15.

Keakea Long Samting wea Lead Go Long Dirty Fasin

Waswe, iu frenim samwan? Sapos olsem, iu need for careful. Bible warnim iumi: “Heart hem savve trikim man winim eni nara samting and hem nating hol bak.” (Jeremiah 17:9) Hem isi for letem wei for showimaot iu laekem samwan for lead go long dirty fasin. For protectim iuseleva, no stap long ples wea iutufala seleva nomoa stap. Stap klia long samting wea isi for mekem iu foldaon long dirty fasin.

Bat maet iu engage for marit and ting hem olraet for hol hand. Nomata olsem, wanfala WHO report givim warning olsem: “Taem olketa klosap for marit, staka woman duim sex, nomata hem barava tambu long kantri bilong olketa.”c So, markem olketa spialaen saed long wei for showimaot feeling and bae iu no sorre.

Maet iu seke for herem hao planti taem samwan forcem or switim planti young wan, especially olketa young girl, for duim sex. Wanfala report showimaot hao “60 percent bilong olketa young girl long United States wea duim sex bifor olketa 15 year, hem from samwan nao forcem olketa.” Planti taem, olketa man mekius long wei wea olketa strong winim olketa girl hia. (Ecclesiastes 4:1) Olsem example, Bible talem iumi hao son bilong King David, Amnon, hem “lovem” haf sista bilong hem Tamar and iusim trik for forcem hem for duim sex witim hem.—2 Samuel 13:1, 10-16.

Diswan no minim no wei nao for stopem rape or wei wea samwan forcem narawan for duim sex. Iu savve duim planti samting for protectim iuseleva taem iu luksavve long danger, stap klia long samting wea lead go long dirty fasin, and duim samting kwiktaem taem danger kamap.d

“Full Heart Bilong Iu”

Mifala hope olketa idea wea iumi storyim hia bae helpem iu for stap klia long sex bifor marit. Bat, gogo, bae iu duim wanem nao insaed long heart bilong iu. Jesus sei, “samting wea kamaot from heart nao . . . fornication.” (Matthew 15:19) So iu mas faet againstim wei for garem heart wea hafhaf or for garem ‘dabol heart’ (hypocrite fasin) saed long disfala important samting.—Psalm 12:2; 119:113.

Sapos enitaem heart bilong iu start for laekem nogud samting, prea olsem David taem hem ask: “Mekem full heart bilong mi fraet long nem bilong iu.” (Psalm 86:11) Bihaen, duim samting wea join witim prea bilong iu long wei for studyim Bible and olketa Bible pablikeson and duim samting followim wanem iu lanem. (James 1:22) Lydia hem sei, “Samting wea helpem mi for stand strong againstim dirty fasin hem wei wea mi evritaem tingim hao ‘man wea duim fornication or man wea no klin no garem eni ples insaed long kingdom bilong God.’”—Ephesians 5:5.

Maet hem no isi for stap klia long wei for duim sex bifor marit. Bat witim help bilong Jehovah iu savve stap klia long diswan and stap klia tu long wei for iu and narawan kasem sorre and nogud samting.—Proverbs 5:8-12.

[Olketa Footnote]

[Piksa long page 29]

Wei for storyim feeling bilong iu witim parents savve helpem iu for stap klia long dirty fasin

[Piksa long page 30]

Protectim iuseleva long wei for no stap seleva taem iutufala fren