KWESTIN 7

Hao Sapos Samwan Laekem Mi for Duim Sex?

HEM GUD FOR TING RAONEM DATFALA KWESTIN

Samting iu disaedem abaotem sex savve affectim future bilong iu.

WANEM NAO BAE IU DUIM?

Helen frenim Mike for tufala month nomoa, bat hem feel olsem hem savve long Mike for staka year finis. Tufala textim tufala evritaem and savve storystory for longtaem long mobile. Bat gogo Mike no laek story nomoa, bat hem laekem nara samting moa.

Insaed tufala month hia, Mike and Helen hol hand nomoa. Helen no laek kissim hem or duim eni nara samting olsem, bat hem wari nogud Mike les long hem. Mike evritaem talem Helen hem naesbola, and Helen tingse tufala lovem each other.

Sapos iu kasem age wea hem fitim for iu frenim samwan and iu kasem sem samting olsem Helen, wanem nao bae iu duim?

TINGTING GUD FIRSTAEM!

Man iusim wanfala naes kaleko for klinim haos — Sex hem present wea God givim for pipol wea marit nomoa. For duim sex witim samwan wea iu no maritim, datwan showimaot iu no tinghae long datfala present. Hem olsem iu tekem naes kaleko wea samwan givim long iu and iusim for klinim haos

Sapos iu no laek for obeyim law bilong gravity bae iu kasem nogud samting. Olketa wea no obeyim olketa law bilong Jehovah bae kasem nogud samting tu. Olsem example, Jehovah sei for “no durong.”—1 Thessalonica 4:3.

Wanem nao bae happen sapos iu brekem datfala law? Bible sei: “Man wea durong hem sin againstim body bilong hem.” (1 Corinth 6:18) Wanem nao samfala nogud samting wea iu bae kasem?

Olketa wea duim research sei olketa young wan wea duim sex bifor olketa marit kasem olketa nogud samting hia:

SORRE. Klosap evri young wan wea duim sex bifor olketa marit sorre bikos olketa duim datwan.
NO TRUSTIM NARAWAN. Bihaen tufala duim sex, tufala start for tingting olsem: ‘Ating hem durong finis witim eniwan ia?’
LUS INTEREST. Staka gele laekem samwan for protectim olketa, no for mekius long olketa. And staka boy savve lus interest long gele wea olketa durong witim.
Main point: Sapos iu duim sex bifor iu marit, iu spoelem spesol samting wea iu shud givim nomoa long samwan wea iu maritim. (Rome 1:24) Body bilong iu hem barava spesol!

So “no durong.” (1 Thessalonica 4:3) Sapos iu maritim samwan long future, then iu savve sleep witim hem. And hem samting wea bae mekem iu hapi and no sorre.—Proverbs 7:22, 23; 1 Corinth 7:3.

WANEM NAO TINGTING BILONG IU?

Waswe, samwan wea barava lovem iu bae duim samting wea spoelem body and feeling bilong iu?
Waswe, samwan wea lovem iu bae switim iu for duim samting wea bae spoelem wei wea iu fren witim God?—Hebrew 13:4.