Forgive

“TAEM MI SMOL, FAMILI BILONG MI SAVVE EVRITAEM RAOA AND TOK NOGUD LONG EACH OTHER.” Hem nao wanem wanfala woman wea nem bilong hem Patricia talem. Hem sei tu: “Taem mi big, mi no willing for forgivim narawan. Mi gohed for tingim samting wea narawan duim long mi and mi no savve sleep gud long naet.” Man wea keepim kros and evritaem feel nogud bae no hapi and no healthy. Samfala research showimaot pipol wea no willing for forgivim narawan savve . . .

• Spoelem wei wea olketa fren witim narawan and diswan savve mekem olketa lonely

• Kwiktaem feel nogud, wari, or sorre tumas

• Evritaem tingim nogud samting wea narawan duim and datwan mekem olketa no hapi

• Feel guilty bikos olketa savve wei for forgive hem stret samting for duim

• Wari tumas and isi for kasem sik, olsem hae blood, heart problem, and pain long body olsem arthritis and headachea

WANEM NAO HEM MINIM FOR FORGIVIM NARAWAN? Man wea forgivim narawan bae no gohed feel nogud, keepim kros, or laek for pei bak. Diswan no minim man hia acceptim datfala rong samting, ting nating long hem, or act olsem no eni samting nomoa happen. Bat wei for forgive, hem samting wea man ting raonem firstaem then hem disaed for duim datwan. Hem duim olsem bikos hem lovem and laek for stap gud witim narawan and gohed fren witim hem.

Man wea forgivim narawan showimaot hem luksavve iumi evriwan savve mekem mistek long wanem iumi talem and duim. (Rome 3:23) Dastawe Bible sei: “Nomata sapos eniwan long iufala hem feel nogud long narawan, hem mas no kros bat mas evritaem forgivim hem.”—Colossae 3:13.

Wanfala important wei for showimaot love hem for forgivim narawan. And love hem “barava mekem pipol for wan mind.” (Colossae 3:14) Website bilong Mayo Clinic hem sei wei for forgive savve helpem pipol for . . .

• Fren gud tugeta, and for tingim feeling bilong man wea mekem olketa feel nogud, sorre long hem, and minim hem

• Hapi and garem peace witim God

• No wari, stress, or feel nogud

• No feel sorre tumas

NO GOHED FOR FEEL GUILTY. Datfala magasin Disability & Rehabilitation sei: “Hem barava important for saed long health bilong iumi for no gohed feel guilty. Nomata olsem, maet hem barava no isi for iumi lusim wei for feel guilty.” Wanem nao savve helpem iu for no gohed for feel guilty?

• No tingse no enitaem bae iu mekem mistek. Iumi evriwan no perfect.—Eklesiastes 7:20

• Lane from mistek bilong iu mekem iu no duim moa olketa sem mistek

• Iu mas patient. Hem tek taem for lusim olketa nogud wei.—Ephesus 4:23, 24

• Fren witim pipol wea bae encouragem iu and kaen long iu, bat bae no hol bak for stretem iu.—Provebs 13:20

• Sapos iu luksavve iu mekem samwan feel nogud, kwiktaem for sei sorre. Taem iu mek peace, iu tu bae garem peace.—Matthew 5:23, 24

OLKETA BIBLE PRINCIPLE BARAVA HELPEM MAN!

Tingim moa Patricia, wea iumi storyim finis. Hem studyim Bible and datwan helpem hem for forgivim narawan. Hem sei: “Wei for kros barava spoelem mi, bat distaem mi barava feel free nao. Mi no safa nao, and mi no mekem olketa narawan safa tu. Olketa Bible principle showimaot God lovem iumi and hem laekem iumi for kasem gud samting.”

Wei for followim olketa Bible principle helpem Ron for hapi. Hem sei: “Mi no savve kontrolem wanem olketa narawan tingim or duim. Bat mi savve kontrolem miseleva. Mi luksavve hem bae hard for mi hapi, sapos mi gohed for keepim kros tu.”