11 Waka Hard

WANEM HEM MINIM

Pipol wea willing for waka hard bae laek for duim waka. Bat olketa bae hapi for waka hard for provaedem need bilong olketa and helpem olketa narawan, nomata olketa duim kaen waka wea pipol ting daonem.

WHY HEM IMPORTANT

Iumi evriwan garem waka wea iumi mas duim. Staka pipol distaem no laek for waka hard, bat sapos iumi willing for waka hard iumi bae kasem gud samting.—Eklesiastes 3:13.

“Mi luksavve taem mi waka hard, diswan mekem mi feel hapi and satisfae. Datwan helpem mi for enjoyim waka wea mi duim. Sapos iu duim gud waka bilong iu, olketa narawan bae tinghae long waka wea iu duim.”—Reyon.

BIBLE PRINCIPLE: “Wakahad an bae yu garem gud samting.”—Provebs 14:23.

WANEM IU SAVVE DUIM

Olketa samting hia bae helpem iu for garem stretfala tingting abaotem waka.

Lane for duim gud waka bilong iu. Nomata iu duim waka long haos, duim homwok bilong iu, or waka for selen, duim best bilong iu long datfala waka. Taem iu savve hao for duim gud wanfala waka, trae for gohed kamap gud long datfala waka, maet duim gud moa or finisim kwiktaem. Taem iu savve gud hao for duim waka, iu bae barava enjoyim.

BIBLE PRINCIPLE: “Man save tumas long waka blong hem, hemi no duim waka blong olketa man nating, bat bae hemi duim waka blong bikman.”—Provebs 22:29.

Tingim hao waka bilong iu savve helpem narawan. Evritaem wea iu duim gud waka wea iu shud duim, datwan bae helpem olketa narawan. Olsem example, taem iu waka hard for duim waka long haos, iu mekem waka hem no hevi tumas for olketa narawan insaed famili.

BIBLE PRINCIPLE: “Man wea givim samting hem barava hapi winim man wea kasem samting.”—Acts 20:35.

Willing for duim moa samting. No just duim nomoa wanem iu shud duim, bat trae for duim moa samting winim datwan. Taem iu duim olsem, hem olsem iu willing for duim moa samting no bikos narawan forcem iu, bat bikos iu laek duim.—Matthew 5:41.

BIBLE PRINCIPLE: “Gud samting wea iu bae duim hem no from mi forcem iu for duim datwan, bat bikos iuseleva nao laek for duim.”—Philemon 14.

Mas balance. Pipol wea willing for waka hard bae laek for duim waka, and olketa bae no ova tumas for waka. Olketa bae garem wei for balance, and hapi long hard waka wea olketa duim and hapi taem olketa rest tu.

BIBLE PRINCIPLE: “Hemi moabeta fo yumi waka lelebet an garem lelebet samting nomoa, winim yumi garem staka samting from yumi barava wakahad tumas olsem yumi aftarem nomoa win.” —Eklesiastes 4:6.