Wanfala teenage boy hem feel nogud lo wei wea hem iusim taem blo hem, bikos hem plei soccer and lukluk lo TV bifor hem duim homwok blo hem

OLKETA KWESTIN WEA YOUNG PIPOL GAREM

Hao Nao Mi Savve Iusim Gud Taem blo Mi?

Why nao mi mas iusim gud taem blo mi?

Taem hem olsem selen. Sapos iu weistim, bae iu no garem lo taem wea iu needim. Bat sapos iu iusim gud taem blo iu, bae iu garem taem for duim olketa samting wea iu enjoyim tu!

Bible principle: “Wanem man hu i wakahad hemi laekem, hemi garem. Wanem Lesibon hemi laekem, hemi no garem.”—Provebs 13:4.

Important samting for tingim: Sapos iu iusim gud taem blo iu, bae iu garem moa freedom for duim samting.
Sapos iu lane for followim wanfala schedule, datwan bae helpem iu taem iu adult tu. Hem savve helpem iu for gohed garem waka for selen and for boss no sakem iu. Tingim diswan, sapos iu nao wanfala boss lo company, waswe, bae iu keepim wanfala wakaman wea evritaem arrive leit for waka?

Bible principle: “Man wea faithful long olketa smol samting bae hem faithful long olketa big samting tu.”—Luke 16:10.

Important samting for tingim: Wei wea iu iusim gud taem blo iu showimaot wanem kaen man nao iu.

Bat samfala taem hem no isi for followim wanfala schedule. Tingim samfala samting hia wea savve spoelem taem blo iu.

Spoelem taem #1: Olketa fren

“Sapos olketa fren askem mi for go lo eni ples witim olketa, klosap evritaem mi go witim olketa nomata mi no really garem taem for duim datwan. Mi savve tingting olsem, ‘Taem mi kam bak lo haos, bae mi kwiktaem finisim wanem mi need for duim.’ Batawea, plande taem nogud samting hem happen bikos mi duim olsem.”—Cynthia.

Spoelem taem #2: Busy lo nara samting

“TV hem testim mi. Hem savve isi tumas for lukluk olowe lo olketa show and movie lo TV.”—Ivy.

“Mi savve weistim staka hour taem mi iusim tablet. Mi feel guilty lo datwan only sapos battery hem dae and mi no savve iusim.”—Marie.

Spoelem taem #3: Delay for duim samting

“Mi savve delay for duim olketa skul assignment blo mi and olketa nara samting wea mi need for duim. Mi savve weistim taem for duim samting wea no important gogo mi mas kwiktaem duim assignment blo mi. Mi barava spoelem taem blo mi.”—Beth.

Wanfala teenage boy hem hapi lo schedule wea hem mekem. First samting hem duim hem readim list, then hem duim homwok, and then hem garem taem tu for plei soccer — Sapos iu iusim gud taem blo iu, bae iu garem *moa* freedom for duim samting

Wanem iu savve duim

Raetem wanfala list lo olketa samting wea iu mas duim. Samfala samting wea iu savve raetem lo datfala list hem homwok and olketa waka wea iu mas duim lo haos. Raetem daon haomas taem iu bae needim for finisim evri samting wea iu raetem lo list for datfala week.

Bible principle: “Luksavve long olketa samting wea barava important.”—Philippi 1:10.
Raetem wanfala list lo olketa samting wea iu laek for duim lo free taem blo iu. Maet diswan hem taem wea iu laek iusim lo social networking and for lukluk lo TV. And for diswan tu, raetem daon haomas hour iu iusim for each samting hia for datfala week.

Bible principle: “Iufala mas wise long samting wea iufala duim. . . . Iufala mas iusim gud taem wea iufala garem.”—Colossae 4:5.
Mekem plan. Lukluk lo tufala list wea iu mekem. Waswe, iu markem inaf taem for duim olketa important samting lo list? Waswe, iu need for iusim samfala taem wea iu markem for hapitaem for duim olketa samting hia?

Idea: Lo start blo each day, raetem wanfala list lo evri samting wea iu need for duim, and then putim tick saed lo each wan wea iu finisim.

Bible principle: “Man waka had, bae hemi ris.”—Provebs 21:5.
Followim plan. Samfala taem maet iu no savve acceptim invitation for go lo wanfala hapitaem mekem iu savve duim olketa samting wea moa important. Bat wei for garem schedule bae mekem iu garem moa free taem and iu bae enjoyim datwan.

Bible principle: “Iufala mas no lesy bat iufala mas duim gud waka bilong iufala.”—Rome 12:11.
Waka hard firstaem and then enjoyim hapitaem. Wanfala young woman, Tara, hem sei: “Samfala taem mi finisim tufala samting lo list blo mi, and then mi garem tingting mi bae lukluk lo TV for 15 minute nomoa and bihaen datwan bae mi gohed for duim waka blo mi. Batawea, mi gohed lukluk lo TV gogo mi weistim tufala hour nao!”

Wanem nao iu savve duim? Ting lo hapitaem olsem wanfala reward iu bae kasem bihaen iu finisim olketa samting wea iu raetem daon lo list.

Bible principle: “Hem barava gud for man . . . enjoyim samting wea kamaot from hard waka bilong hem.”—Ecclesiastes 2:24, NW.

Wanem olketa nara young wan talem

“Mi savve raetem wanfala schedule mekem mi savve lukim samting wea mi need for duim. Mi savve markem samfala taem tu for rest. Taem mi garem plan, datwan helpem mi for luksavve wanem mi mas duim and wanem mi savve isisi duim.”—Cheyenne.

“Mi lane for sei no lo olketa samting wea mi no fit for duim. Hem no isi for talem samwan iu no savve duim samting wea olketa laekem iu for duim, bat sapos mi explainim klia mi no savve duim datwan bikos mi no fit for duim witim full strong blo mi, no enitaem olketa kros lo mi.”—Samuel.

“Taem mi busy tumas, mi no savve sleep gud and no savve duim exercise. Bat sapos mi savve sleep for wanfala hour moa lo naet or duim samfala exercise, datwan savve mekem mi hapi and waka gud lo next day. Hem important for lukaftarem health blo iu.”—Brooklyn.