LESON 4
Kamap Man For Waka
HAO FOR KAMAP MAN FOR WAKA
Sapos iu man for waka, pipol bae trustim iu. Olketa bae depend long iu for duim gud waka, and finisim long barava taem.
Smol pikinini savve lane for duim gud wanem parents askem hem. Wanfala buk sei: “Taem pikinini 1 years 3 month, hem followim wanem parents talem. And taem hem 1 years 6 month, hem laek for duim sem samting parents duim.” Buk sei tu: “Long staka ples, taem pikinini between faev and seven years, parents teachim hem for duim waka long haos wea fitim hem, and hem savve duim gud datwan.”
WHY HEM IMPORTANT FOR PIKININI LANE FOR DUIM WAKA
Long samfala ples, olketa young wan laek for stap difren from parents bat gogo olketa faendem hard saed long selen, so olketa go bak moa long parents. Maet diswan happen bikos parents no teachim pikinini for kamap man for waka, iusim gud selen, and hao for keepim haos.
Hem gud for teachim pikinini for duim waka taem hem young mekem hem fit for lukaftarem hemseleva taem hem big. Nara buk sei: “Nogud iu duim evri samting for pikinini, gogo taem hem 18 years hem nating savve hao for lukaftarem hemseleva.”
TEACHIM PIKININI HAO FOR WAKA
Markem waka for pikinini duim.
BIBLE PRINCIPLE: “Wakahad an bae yu garem gud samting.”—Provebs 14:23.
Olketa pikinini savve laek for waka witim parents. From pikinini laek for waka, iusim datfala chance for trainim hem for duim samfala waka long haos.
Samfala parents no givim waka long haos long pikinini bikos olketa tingse hem garem staka homwok finis for duim.
Bat pikinini wea duim waka long haos bae duim gud skul waka bikos hem lane finis for duim gud and finisim waka bilong hem. Wanfala buk sei sapos parents no letem pikinini for helpem olketa taem hem smol, maet hem tingse hem no important for helpem narawan. And tu, bae hem expectim narawan nao for duim evri samting for hem.
Olsem datfala buk showimaot, pikinini wea waka long haos bae lane for helpem olketa narawan and for no selfish. Famili bae tinghae long hem and hem bae luksavve evriwan shud duim waka, and hem gud samting for duim.
Helpem pikinini for luksavve hem mas deal witim olketa mistek bilong hem.
BIBLE PRINCIPLE: “Lisin long advaes, herem gudfala toktok, go-go bae yu waes.”—Provebs 19:20.
Taem pikinini bilong iu duim mistek olsem hem brekem eniting bilong narawan, hem gud for teachim hem for stretem wanem hem duim. Maet hem sei sorre or changem datwan.
Taem pikinini no haedem samting hem duim wea no stret, hem lane for
honest and talemaot mistek
no blamem narawan
no mekem excuse
sei sorre