Parents, Helpem Olketa Pikinini blo Iufala for Lovem Jehovah

1-2. Why nao maet samfala taem olketa Bible principle barava fitim iumi winim olketa nara taem?

LO WEDDING day blo wanfala boy and gele, tufala lisin lo wanfala Bible tok wea storyim subject abaotem marit. Olketa Bible principle wea tufala herem lo datfala tok, tufala herem finis staka taem bifor. Bat start lo datfala day, tufala need for followim olketa principle hia lo marit blo tufala.

² Datwan semsem tu taem tufala wea marit kamap parents. Staka taem finis, tufala herem olketa tok wea storyim hao for lukaftarem gud and trainim pikinini. Bat distaem from tufala garem pikinini, tufala need for followim olketa principle hia. Datwan hem big responsibility! Tru nao, taem laef hem change samfala Bible principle bae barava fitim iumi. Datwan nao wanfala reason why pipol blo Jehovah readim and ting raonem Bible evritaem, olsem olketa king lo Israel bifor kasem instruction for “mas ridim olowe” Law.​—Diutronomi 17:19.

3. Wat nao bae iumi storyim lo disfala article?

³ Olketa dadi and mami garem nambawan privilege for teachim olketa pikinini abaotem Jehovah. Iufala laekem olketa pikinini blo iufala for savve abaotem Jehovah, bat iufala laekem olketa for lovem Jehovah tu. So hao nao iufala savve helpem pikinini for barava lovem Jehovah? Disfala article bae storyim fofala Bible principle wea savve helpem parents for duim datwan. (2 Tim. 3:16) And tu, bae iumi storyim samfala dadi and mami wea kasem gud samting taem olketa followim advaes lo Bible.

FOFALA BIBLE PRINCIPLE WEA SAVVE HELPEM PARENTS

4. Wat nao wanfala Bible principle wea parents savve followim for helpem pikinini lovem Jehovah? (James 1:5)

⁴ First Bible principle: Lukaotem advaes from Jehovah. Askem Jehovah for givim iufala wisdom mekem iufala helpem pikinini lovem hem. (Readim James 1:5.) Jehovah nao best wan wea savve givim advaes. Why nao iumi sei olsem? Bae iumi storyim tufala reason. First reason, Jehovah hem fit for givim advaes bikos hem wanfala dadi. (Sams 36:9) And mek-tu reason, olketa advaes blo hem bae evritaem helpem iumi.​—Aesaea 48:17.

5. (a) Wat nao organization blo Jehovah provaedem for help iufala olketa parents? (b) Olsem iumi lukim lo video, wat nao iufala parents lanem from hao Brata and Sista Amorim trainim olketa pikinini blo tufala?

⁵ Jehovah iusim Bible and organization blo hem for givim dadi and mami staka information wea olketa savve iusim for helpem pikinini for lovem Jehovah. (Matt. 24:45) For example, parents savve faendem gudfala advaes lo olketa article wea stap bifor insaed Awake! magasin wea garem title “Help for the Family.” Distaem staka article olsem stap lo sekson “Marit and Famili” lo jw.org. And tu, staka video stap lo jw.org wea savve helpem iufala for followim advaes blo Jehovah taem iufala trainim pikinini blo iufala.b​—Provebs 2:4-6.

6. Hao nao tingting blo wanfala dadi and mami abaotem olketa advaes wea kam from organization blo Jehovah?

⁶ Staka dadi and mami storyim hao olketa tinghae lo help wea olketa kasem from organization blo Jehovah. Wanfala dadi wea nem blo hem Joe sei: “Hem no isi samting for teachim thrifala pikinini blo mitufala for lovem Jehovah. Mi and waef blo mi evritaem prea lo Jehovah for helpem mitufala. And staka taem mitufala feel olsem wanfala article or video just kam lo raet taem bikos hem helpem mifala for deal witim samting wea kamap lo famili. Mitufala evritaem depend lo olketa advaes blo Jehovah.” Joe and waef blo hem luksavve hao olketa article and video olsem, helpem olketa pikinini blo tufala for fren gud witim Jehovah.

7. Why nao hem important for parents showimaot gud example for pikinini? (Rome 2:21)

⁷ Mek-tu Bible principle: Showim gud example. Olketa pikinini savve lukim wanem dadi and mami duim and staka taem olketa bae followim wanem olketa lukim. Hem tru, olketa dadi and mami no perfect. (Rome 3:23) Nomata olsem olketa shud traem best for showim gud example lo pikinini blo olketa. (Readim Rome 2:21.) Wanfala dadi sei olsem abaotem olketa pikinini: “Olsem pis matres hem isi for sakem wata, olketa pikinini tu bae followim wanem parents duim. And sapos parents no duim wanem olketa teachim pikinini for duim, pikinini bae luksavve lo datwan.” So sapos parents laekem pikinini for lovem Jehovah, pikinini mas luksavve olketa barava lovem Jehovah tu.

8-9. Wat nao parents savve lanem from wanem Andrew and Emma talem?

⁸ Staka difren wei hem stap for parents helpem pikinini for lovem Jehovah. Andrew, wanfala brata wea 17 years, hem sei: “Evritaem parents blo mi teachim mi hao hem barava important for prea. Evri naet dadi bae prea witim mi, nomata maet miseleva prea finis. Evritaem dadi and mami bae talem mi and sista blo mi: ‘Iu savve story witim Jehovah enitaem nomoa.’ From dadi and mami teachim mifala for evritaem prea, distaem mi laekem tumas for prea lo Jehovah bikos mi tingim hao hem Dadi blo mi wea barava lovem mi.” Parents tingim, from iu lovem Jehovah, datwan bae helpem olketa pikinini blo iu for lovem hem tu.

⁹ Tingim tu, example blo Emma. Taem dadi blo Emma lusim famili blo olketa, dadi blo hem garem big kaon wea mami mas changem. Emma sei: “Staka taem mami no garem inaf selen, bat hem evritaem storyim hao Jehovah lukaftarem and provaedem wanem pipol blo hem needim. Mami teachim mifala for trustim Jehovah for lukaftarem mifala, and mi lukim hem barava trustim Jehovah for lukaftarem mifala.” Diswan showimaot hao nomata laef hem no isi, gud example blo parents savve helpem pikinini.​—Gal. 6:9.

10. Olketa wanem chance nao olketa Israelite parents garem for story witim pikinini blo olketa? (Diutronomi 6:6, 7)

¹⁰ Mek-thri Bible principle: Spendem taem for story witim pikinini. Jehovah talem olketa Israelite for iusim evri chance for teachim pikinini abaotem hem. (Readim Diutronomi 6:6, 7.) Olketa Israelite garem staka chance for story witim pikinini and for teachim olketa for lovem Jehovah. For example, wanfala smol boy maet spendem staka taem witim dadi blo hem for waka lo garden or harvestim garden. And wanfala smol gele maet helpem mami for sewim kaleko, weavim olketa samting, and duim olketa nara waka lo haos. Taem dadi and mami waka tugeta witim pikinini, hem chance for olketa storyim olketa spiritual samting witim pikinini. For example, parents savve storyim olketa gudfala samting wea Jehovah duim and storyim hao Jehovah helpem famili blo olketa.

11. Wat nao wanfala chance wea olketa parents garem for story witim pikinini?

¹¹ Distaem laef hem difren from laef blo olketa Israelite bifor. Lo staka kantri, parents and pikinini no savve spendem taem tugeta lo day bikos parents lo waka, and olketa pikinini lo skul. So parents mas trae for faendem eni nara taem for story witim pikinini blo olketa. (Ephesus 5:15, 16; Phillipi 1:10) Famili worship nao hem chance for duim datwan. Alexander, wanfala young brata hem sei: “Dadi evritaem mek sure mifala duim famili worship, and hem no letem eni samting for disturbim datwan. Bihaen famili worship mifala savve story gud tugeta.”

12. Wat nao parents shud no duim lo taem blo famili worship?

¹² Parents, wat nao iu savve duim for mekem olketa pikinini enjoyim famili worship? Maet hem gud for parents studyim datfala niu buk Enjoyim Laef for Olowe! witim olketa pikinini. Datfala buk savve mekem hem isi for famili story gud tugeta. From iu laekem olketa pikinini for storyim feeling and wanem olketa wari abaotem, no iusim taem blo famili worship for kaonselem or stretem olketa pikinini. And sapos pikinini talem samting wea no stret followim Bible, no kros lo olketa. Iu shud hapi from olketa no hol bak for storyim tingting blo olketa lo iu. Taem iu savve lo tingting blo olketa nao bae iu fit for helpem olketa.

13. Wat nao nara samting parents savve duim for teachim pikinini for savve gud lo Jehovah?

¹³ Parents, iusim eni chance wea kamap for helpem pikinini blo iu for savve gud lo Jehovah. Iu no need for weit nomoa for taem blo Bible study for teachim olketa pikinini abaotem God. Tingim wanem wanfala mami wea nem blo hem Lisa talem: “Mi and hasband blo mi iusim olketa samting raonem mifala for teachim olketa pikinini abaotem Jehovah. For example, taem olketa pikinini laf lo eni fani samting wea puppy blo mifala duim, mitufala bae storyim hao Jehovah hem wanfala hapi God, dastawe hem wakem olketa samting olsem for mekem iumi hapi and laflaf tu.”

14. Why nao hem important for parents helpem olketa pikinini for garem olketa gudfala fren? (Provebs 13:20)

¹⁴ Mek-foa Bible principle: Helpem pikinini for garem olketa gudfala fren. Bible storyim hao olketa fren blo iumi savve helpem iumi or spoelem iumi. (Readim Provebs 13:20.) Parents, hem important for iu savve hu nao olketa fren blo pikinini blo iu. Hem gud for meetim olketa, mekem iu savve lo olketa. Wat nao iu savve duim for helpem pikinini blo iu for fren witim olketa wea lovem Jehovah? (1 Cor. 15:33) Iu savve invaetem olketa lo kongregeson wea fren gud witim Jehovah for duim samfala samting tugeta witim famili blo iu.​—Sams 119:63.

15. Wat nao parents savve duim for helpem pikinini for garem olketa gudfala fren?

¹⁵ Tingim experience blo Tony, wanfala dadi. Hem storyim wanem hem and waef duim for helpem olketa pikinini for garem olketa gudfala fren. Hem sei: “Mi and waef blo mi savve invaetem staka difren brata and sista lo haos blo mifala nomata olketa young or olo or from difren ples. Olketa savve kaikai witim mifala and joinim famili worship tu. Diswan hem gudfala wei for olketa pikinini savve gud lo olketa wea lovem and hapi for worshipim Jehovah. Samfala wea kam stap lelebet taem witim mifala lo haos tu hem olketa circuit overseer, missionary, and olketa narawan. Olketa pikinini laek for fren gud witim Jehovah from olketa herem olketa experience blo olketa and lukim hao olketa busy and faithful for duim waka blo Jehovah.” Parents, waka hard for helpem pikinini blo iu for garem olketa gudfala fren.

NO LUS HOPE!

16. Wat nao stretfala tingting for garem sapos pikinini sei hem no laek worshipim Jehovah?

¹⁶ Hao sapos pikinini blo iu disaed for no worshipim Jehovah nomata iu waka hard for teachim hem for lovem Jehovah? No tingse iu no duim gud waka blo iu. Jehovah givim iumi evriwan freedom for disaed sapos iumi bae worshipim God or nomoa. Sapos pikinini disaed for no worshipim Jehovah, no lus hope hao wanday maet hem kam bak lo Jehovah. Tingim tokpiksa abaotem datfala prodigal son. (Luke 15:11-19, 22-24) Datfala young man duim staka nogud samting, bat gogo hem kam bak. Samfala maet sei: “Datwan hem tokpiksa nomoa and hem no samting wea savve happen lo real laef.” Bat datwan savve happen! Tingim samting wea happen lo Elie, wanfala young man.

17. Hao nao experience blo Elie encouragem iufala olketa parents?

¹⁷ Elie storyim parents blo hem olsem: “Olketa waka hard for helpem mi for lovem Jehovah and for tinghae lo Bible. Bat taem mi samting olsem 15 years mi start for bighed.” Elie start for garem dabol laef and hem no laek for lisin lo parents blo hem. Gogo hem lusim haos and start for duim olketa nogud samting. Nomata olsem, samfala taem hem savve storyim Bible lo wanfala fren blo hem. Elie sei: “Taem mi story abaotem Jehovah lo fren blo mi, hem mekem mi for tingting moa abaotem Jehovah. Isisi seed blo truth insaed heart blo mi wea parents blo mi waka hard for plantim, hem start for grow.” Gogo Elie kam bak lo truth.c Masbi parents blo Elie barava hapi olketa waka hard for teachim hem for lovem Jehovah start taem hem smol!​—2 Tim. 3:14, 15.

18. Hao nao tingting blo iumi abaotem olketa parents wea waka hard for teachim pikinini blo olketa for lovem Jehovah?

¹⁸ Parents, iufala garem nambawan privilege for teachim pikinini blo iufala for worshipim Jehovah. (Sams 78:4-6) Datwan hem no isi, bat mifala praisem iufala from iufala waka hard for helpem pikinini blo iufala! Sapos iufala gohed duim best for helpem pikinini blo iufala for lovem Jehovah and teachim olketa for obeyim hem, iufala savve sure Jehovah bae hapi lo wanem iufala duim.​—Ephesus 6:4.