Acceptim Advaes From Olketa Mature Wan

HU NAO FIT FOR GIVIM ADVAES LONG PIKININI?

Olketa pikinini needim advaes and help from olketa mature wan. Parents nao mas givim advaes and helpem pikinini, bat olketa nara mature wan savve duim datwan tu.

WHY HEM IMPORTANT FOR KASEM ADVAES FROM OLKETA MATURE WAN

Long staka ples, olketa young wan no spendem taem witim olketa mature wan. Tingim diswan:

• Olketa pikinini spendem staka hour long skul wea olketa student nao staka winim olketa teacher.

• Bihaen skul, samfala pikinini stap seleva long haos bikos parents go waka.

• Long United States, wanfala survey showimaot olketa pikinini wea age bilong olketa between 8 and 12, iusim mobile or tablet for samting olsem 6 hour evriday for lukim TV, lisin long music, and pleim video game.a

Wanfala buk sei distaem staka young wan askem olketa nara young wan for advaes, and no laek kasem help, advaes, or followim example bilong mami, dadi, teacher, and olketa nara mature wan. 

HAO PARENTS SAVVE HELPEM PIKININI

Spendem taem witim pikinini.

BIBLE PRINCIPLE: “Tisim pikinini fo falom stretfala wei, taem hemi bikman, bae hemi no lusim.”—Provebs 22:6.

Olketa pikinini laekem parents for givim advaes and helpem olketa. Olketa savveman sei nomata taem olketa kamap teenager, olketa pikinini laek for kasem advaes from parents winim from olketa nara teenager. Professor Laurence Steinberg sei: “Olketa parents nao main wan for helpem pikinini for garem gudfala wei start from taem olketa smol go kasem taem olketa big.” Hem sei tu: “Olketa young wan laek for savve long tingting bilong parents nomata maet olketa no talem datwan or evritaem agree witim samting parents talem.”

So parents no hol bak for givim advaes long pikinini bilong iu. Spendem taem witim pikinini and storyim tingting bilong iu abaotem olketa samting, wanem hem important long iu, and samting iu lanem long laef.

Askem narawan for helpem pikinini.

BIBLE PRINCIPLE: “Fren wetem waes man, bae yu waes.”—Provebs 13:20.

Trae for tingim wanfala mature fren wea iu tinghae long wei bilong hem and hem gud example for teenager bilong iu. Askem hem for spendem taem witim pikinini bilong iu. Diswan no minim iu laekem hem for duim waka bilong iu olsem mami or dadi. Bat datfala fren wea iu trustim savve encouragem pikinini and help for trainim hem. Bible storyim hao Timothy kasem gud samting taem hem fren witim aposol Paul and Paul tu hapi for fren witim Timothy.—Philippi 2:20, 22.

Distaem olketa aunty, uncle, grani, and olketa nara relative maet no stap klosap long famili bilong olketa or maet stap long nara kantri. Sapos famili bilong iu olsem, mekem chance kamap for teenager savve long olketa mature wan wea garem gudfala wei mekem hem lane from olketa.