Selen
Taem pipol followim olketa Bible principle, datwan savve helpem olketa for iusim gud selen.
PLAN LO HAO FOR IUSIM SELEN
BIBLE PRINCIPLE: “Planem gud wanem yu wande duim, evrisamting bae stret nomoa ya.” —Provebs 4:26.
WANEM HEM MINIM: Hem gud for garem plan lo hao iu bae iusim selen. Wakem budget and followim datwan. Maet hem hard for garem selen for peim evri samting iu laekem. So tingting firstaem bifor iu peim samting.
SAMTING IU SAVVE DUIM:
Followim budget blo iu. Markem haomas selen for spendem lo olketa samting olsem kaikai, kaleko, rent, and olketa nara samting olsem. Sapos iu spendem winim wanem iu markem for wanfala samting, then iusim selen wea iu markem for nara samting for datwan. Olsem example, sapos iu spendem winim wanem iu budgetim for paoa, bae iu iusim samfala selen wea iu markem for kaleko for peim datwan.
Trae for no kaon. Sapos fitim, traem best for no garem kaon. Hem gud for keepim selen firstaem gogo bae iu peim wanem iu laekem. Sapos iu garem kaon, changem bak kwiktaem mekem iu no peim bigfala interest. Sapos iu garem bigfala kaon, markem haomas iu bae peim bak evri month, and duim datwan.
Wanfala report sei pipol wea iusim olketa credit card savve spendem winim wanem olketa garem. So sapos iu garem credit card, kontrolem hao iu iusim.
GAREM OLKETA GUDFALA WEI
BIBLE PRINCIPLE: “Lesibon hemi no plantem gaden, so taem hemi lukaotem kaikai hemi faendem nating nomoa.”—Provebs 20:4.
WANEM HEM MINIM: Sapos man hem lesy, bae hem no garem selen. So waka hard, and trae for keepim lelebet selen for eni samting wea maet kamap lo future.
SAMTING IU SAVVE DUIM:
Waka hard. Sapos iu waka hard and boss trustim iu, bae iu keepim waka blo iu and gohed for kasem selen. Olketa boss laekem man wea waka hard.
Honest. No stealim olketa samting lo waka ples. Sapos iu steal, pipol savve faendaot iu kaen man olsem and bae no eniwan laekem iu for waka for olketa.
No laekem tumas selen. Sapos iu waka hard for kasem staka selen, datwan savve spoelem health blo iu and affectim famili blo iu. Tingim, hem no selen nomoa wea hem important samting lo laef.
OLKETA NARA BIBLE PRINCIPLE
Iu savve readim Bible online lo jw.org and hem lo staka handred languis
NO WEISTIM SELEN.
“Olketa spakmasta an olketa hu kaikai tumas, bae olketa kamap puaman, an garem ravis kaleko nomoa.”—PROVEBS 23:21.
NO WARI TUMAS ABAOTEM SELEN.
“No wari abaotem wanem iufala bae kaikaim and drinkim or wanem iufala bae werem.”—MATTHEW 6:25.
NO OVA TUMAS FOR KASEM SELEN.
“Man holetaet long olketa samting blong hem an faetem dola nomoa, hem no save dat seknomoa bae hemi pua tumas.”—PROVEBS 28:22.