Hao, Bible Savve Helpem Mi Taem Mi Garem Problem Saed lo Selen and Kaon?

Ansa from Bible

Yes. Tingim fofala Bible principle hia wea savve helpem iu taem iu garem problem saed lo selen and kaon:

1. Planim haomas selen iu bae spendem. “Man wea waka hard, olketa plan blo hem bae gohed gud, bat olketa man wea hariap for duim samting, bae olketa poor nomoa.” (Proverbs 21:5 NW) No hariap for baem samting bikos price blo datwan hem go daon. Tingting gud abaotem wat iu needim and haomas selen iu fit for spendem, and spendem nomoa wanem iu fit for spendem.

2. Trae for no garem kaon. “Man tekem kaon hemi slev blong man givim kaon.” (Provebs 22:7) Sapos iu garem kaon finis and faendem hem hard for peim bak, story witim olketa wea givim kaon lo iu for mekem niu plan for peim datwan. Gohed ask. Followim advaes wea Bible givim lo man wea no wise wea promis for peim aot kaon blo nara man: “Yu mas hambol an go kuiktaem fo aotem promis blong yu. . . . Yu mas no slip, yu mas duim distaem nao.” (Provebs 6:1-5) Nomata sapos olketa no acceptim wanem iu askem, gohed askem olketa for mekem niu plan.

3. Garem balance tingting abaotem selen. “No selfish and laekem tumas for rich. Bae iu kasem nogud samting winim wanem iu savve tingim.” (Proverbs 28:22, Contemporary English Version) Wei for jealous and greedy savve mekem man poor bat hem savve spoelem wei wea iumi fren witim God tu.

4. Satisfae lo wanem iu garem. “Sapos iumi garem kaikai, kaleko, and ples for stap, iumi mas satisfae nomoa witim olketa samting hia.” (1 Timothy 6:8) Nomata man garem selen, datwan no minim hem bae hapi or satisfae. Pipol wea hapi tumas nao hem olketa wea no garem staka selen. Olketa hapi bikos famili and olketa fren lovem olketa and olketa fren gud witim God.​—Provebs 15:17; 1 Peter 5:6, 7.