Wanem Samfala Religion Sei

Hindu

bilivim iumi safa from nogud samting iumi duim taem iumi young, or from iumi duim nogud samting taem iumi laef bifor. Olketa sei man bae no safa bihaen hem dae and laef bak staka taem (moksha), and lo datfala taem hem bae no tingim moa olketa physical samting.

Muslim

bilivim pipol safa bikos God panisim olketa for sin wea olketa duim and for testim faith blo olketa. Sayyid Syeed, president blo Islamic Society of North America sei taem iumi kasem nogud samting, “datwan mekem iumi tinghae lo olketa blessing from God, and mekem iumi luksavve iumi mas sapotim olketa wea needim help.”

Jew

bilivim nogud samting wea iumi duim nao mekem iumi safa. Samfala Jew bilivim olketa wea dae bae resurrect then kasem gudfala laef. Wanfala grup blo olketa Jew (Kabbalistic) sei man bae dae and laef bak staka taem mekem hem garem staka chance for repent from sin blo hem.

Buddhist

bilivim tu man bae dae and laef bak staka taem, and bae gohed safa go kasem taem hem lusim nogud tingting and nogud wei blo hem. Sapos man hem wise, duim olketa gudfala samting, and tingim nomoa gud samting, bae hem no safa nao (nirvana).

Confucianist

bilivim pipol safa from olketa duim nogud samting. Olketa bilivim tu sapos iumi duim gud samting, datwan bae helpem iumi for stap gud, bat staka taem iumi no savve kontrolem nogud samting wea happen. Lo taem olsem, iumi mas acceptim datwan nomoa.

Heathen

bilivim olketa spirit kosim olketa for safa. Olketa sei olketa spirit nao savve mekem olketa kasem gud samting or nogud samting and sapos olketa duim samting wea mekem olketa spirit hapi, datwan bae helpem olketa for stap gud. So taem olketa sik, olketa tingse kastom man nao savve helpem olketa or givim spesol medicine for mekem olketa kamap gud.

Christian

bilivim iumi safa bikos Adam and Eve sin, olsem Genesis storyim. Bat samfala Christian addim go idea blo olketa seleva lo datfala teaching. Olsem example, samfala Catholic sei hem gud samting for olketa safa mekem narawan savve lo God and God bae sevem hem.