Wisdom wea Helpem Famili for Hapi
Wei for marit and garem pikinini hem spesol present from Creator blo iumi. Hem laekem iumi for garem hapi famili. So from bifor kam, hem givim iumi wanfala buk wea bae gaedem iumi for mekem iumi garem famili laef wea gudfala and hapi. Bae iumi storyim samfala wise kaonsel.
Olketa Hasband, Lovem Waef blo Iufala
“Olketa hasband mas lovem waef bilong olketa long sem wei wea olketa lovem body bilong olketa seleva. Man wea lovem waef bilong hem, hem lovem hemseleva. No eni man heitim body bilong hemseleva bat hem feedim and lovem body bilong hem.”—EPHESUS 5:28, 29.
Hasband hem hed blo famili. (Ephesus 5:23) Bat wanfala gud hasband hem no raf or bossim waef blo hem. Hem tinghae lo waef and lukaftarem olketa material need blo hem and saed lo feeling. And tu, hasband bae traem best for mekem waef hapi, and bae no evritaem duim samting followim tingting blo hemseleva nomoa. (Philippi 2:4) Hem bae story gud and lisin taem waef blo hem story. Hem bae ‘no kros tumas’ lo waef or killim or tok spoelem hem.—Colossae 3:19.
Olketa Waef, Respectim Hasband blo Iufala
“Waef mas barava respectim hasband bilong hem.”—EPHESUS 5:33.
Taem wanfala waef hem respectim hasband blo hem and sapotim disison blo hem, hem mekem famili garem peace. Sapos hasband mekem wanfala mistek, waef no tok daonem hem bat hem hambol and showimaot respect. (1 Peter 3:4) Taem hem need for storyim wanfala problem lo hasband, waef chusim wanfala gud taem for duim datwan, and bae hem story lo wei wea showimaot respect.—Eklesiastes 3:7.
Mas Faithful lo Marit Partner blo Iu
“Man hemi mas . . . joen wetem waef blong hem, an tufala bae i kamap wanfala nomoa.”—JENESIS 2:24.
Taem man and woman marit, tufala kamap wan. So wanfala marit couple mas waka hard for strongim marit blo tufala thru lo wei for story gud tugeta and duim samting for showimaot tufala kaen lo each other. Tufala shud faithful lo each other lo wei for no duim sex witim samwan wea no marit partner blo olketa. Wei for no faithful savve spoelem marit, hem spoelem wei for trustim each other, and hem savve mekem famili brekdaon. —Hebrew 13:4.
Parents, Trainim Pikinini blo Iu
“Tisim pikinini fo falom stretfala wei, taem hemi bikman, bae hemi no lusim.”—PROVEBS 22:6.
God givim responsibility lo parents for trainim pikinini blo olketa. Parents shud teachim olketa pikinini for garem gudfala wei, and shud showimaot gudfala example for olketa. (Diutronomi 6:6, 7) Taem wanfala pikinini noti, parents wea wise bae no kwiktaem for kros. Hem bae “willing for lisin, no kwiktaem for toktok, and no kwiktaem for kros.” (James 1:19) Sapos pikinini hem needim discipline, parents bae disciplinem hem witim love, bat no witim kros.
Olketa Pikinini, Obeyim Parents blo Iufala
“Iufala olketa pikinini mas obeyim dadi and mami bilong iufala . . . ‘Respectim dadi and mami bilong iufala.’”—EPHESUS 6:1, 2.
Olketa pikinini shud obeyim parents blo olketa and treatim olketa lo wei wea showimaot bigfala respect. Taem pikinini respectim parents, datwan mekem famili for hapi and famili bae garem peace and evriwan waka tugeta. Olketa pikinini wea big finis respectim parents blo olketa lo wei for mek sure olketa lukaftarem olketa. Insaed diswan, hem for helpem olketa parents for keepim haos blo olketa and givim selen for helpem olketa.—1 Timothy 5:3, 4.