Leson 8
Famili Laef wea Mekem God Hapi
Wanem nao work bilong hasband insaed long famili? (1)
Hao nao hasband mas deal withim waef bilong hem? (2)
Wanem nao dadi mas provide-im? (3)
Wanem nao waef mas duim insaed long famili? (4)
Wanem nao God talem dadi, mami, and pikinini for duim? (5)
Wanem nao Bible talem abaot way for separate and for divorce? (6, 7)
1. Bible say hasband hem hed long famili bilong hem. (1 Corinthians 11:3) Hasband mas garem wanfala waef nomoa. Marit bilong tufala mas stret for fitim law.—1 Timothy 3:2; Titus 3:1.
2. Hasband mas love-im waef bilong hem olsem hemseleva. Hem mas deal withim hem long sem way wea Jesus deal withim olketa follower bilong hem. (Ephesians 5:25, 28, 29) Hem mas no hitim waef bilong hem or duim no gud samting long hem long eni way. But, hem mas honorim and respectim waef.—Colossians 3:19; 1 Peter 3:7.
3. Dadi mas work hard for luk aftarem famili bilong hem. Hem mas provide-im kaikai, kaleko, and haos for waef and pikinini bilong hem. Dadi mas provide-im samting wea famili needim tu long spiritual way. (1 Timothy 5:8) Hem nao mas lead for helpem famili for learn abaotem God and olketa purpose bilong Hem.—Deuteronomy 6:4-9; Ephesians 6:4.
4. Waef mas gudfala helper for hasband bilong hem. (Genesis 2:18) Hem mas helpem hasband for teachim and trainim pikinini bilong tufala. (Proverbs 1:8) Jehovah talem waef for luk aftarem famili withim love. (Proverbs 31:10, 15, 26, 27; Titus 2:4, 5) Hem mas garem bigfala respect for hasband bilong hem.—Ephesians 5:22, 23, 33.
5. God talem pikinini for obeyim dadi and mami bilong hem. (Ephesians 6:1-3) Hem talem dadi and mami for teachim and stretem pikinini bilong tufala. Dadi and mami need for spendem taem withim pikinini and studyim Bible withim olketa, luk aftarem samting wea olketa needim long spiritual way and long saed bilong feeling. (Deuteronomy 11:18, 19; Proverbs 22:6, 15) Dadi and mami mas no disciplinim pikinini long raf way or way wea spoelem hem.—Colossians 3:21.
6. Taem hasband and waef garem problem long way for fren gud tugeta, tufala mas trae for followim kaonsel bilong Bible. Bible kaonselem iumi for showim aot love and forgivim narafala man. (Colossians 3:12-14) Word bilong God no say way for separate hem gud for stretem olketa smallfala problem. But waef maet decide for lusim hasband bilong hem sapos (1) hasband hem go ahed for no supportim famili bilong hem and no willing for change, (2) hasband hem raf tumas wea mekem health and laef bilong waef stap long danger, or (3) hasband strong tumas for againstim waef wea mekem waef kanduit worshipim Jehovah.—1 Corinthians 7:12, 13.
7. Hasband and waef mas faithful long each other. Adultery hem wanfala sin againstim God and againstim marit partner. (Hebrews 13:4) Way for havem sex withim samwan wea iu no maritim hem only reason from Bible wea letem man for divorce and marit moa. (Matthew 19:6-9; Romans 7:2, 3) Jehovah barava nating laekem taem pipol divorce long way wea no fitim Bible, and marit different moa.—Malachi 2:14-16.
[Olketa Piksa long page 16, 17]
God talem dadi and mami for teachim and stretem pikinini bilong tufala
[Piksa long page 17]
Wanfala loving dadi provide-im samting wea famili needim long material and spiritual way