STRONGIM MARIT BLO IU
Strongim marit blo iu
Bible sei: “Tufala pipol save waka tugeta . . . Sapos wanfala long tufala hemi foldaon, narawan save helpem hem fo stanap moa.” (Eklesiastes 4:9, 10 ) Hasband and waef shud waka tugeta olsem pilot and copilot wea flaem wanfala aeroplane, no olsem tufala pilot lo tufala war plane wea attakim each other.
No letem stress for mekem iutufala for kros lo each other. Wei for patient and acceptim wei blo narawan savve help.
Trae for markem wantaem lo week, for story witim partner blo iu abaotem olketa situation wea iufala need for deal witim. Main samting, hem for stretem datfala problem and no for attakim each other.
Faendem taem for duim samting tugeta wea iutufala enjoyim.
Storyim tugeta olketa gud taem wea iutufala bin garem, maet for lukluk lo olketa wedding photo or olketa nara hapi memory.
“Hasband and waef maet no agree lo evri samting, bat hem no minim tufala no savve waka tugeta olsem team. Wanfala couple savve mekem disison tugeta and then waka tugeta for mekem datwan happen.”—David.
KEEPIM FRENSHIP BLO IU WITIM NARAWAN
Keepim frenship blo iu witim narawan
No tingim nomoa hao iu savve kasem sapot from olketa fren blo iu, bat ting abaotem hao iu savve givim sapot lo olketa. Taem iu strongim narawan, iu strongim iuseleva.
Trae for contactim olketa fren blo iu each day for chekim hao nao olketa.
Askem olketa fren blo iu hao olketa deal witim olketa challenge wea olketa kasem wea semsem witim wat iu feisim.
“Taem iu kasem olketa hard taem wea olsem big wind and rain, olketa fren savve helpem iu for lukim wea for go and hao for kasem help. Olketa savve givim iu stret direction, and remindim iu tu lo olketa samting wea iu savve lo hem finis. Olketa frens kea for iu and olketa savve iu kea abaotem olketa tu.”—Nicole.
SAPOTIM OLKETA PIKININI BLO IU
Sapotim olketa pikinini blo iu
Bible sei: “Mas willing for lisin, no kwiktaem for toktok.” (James 1:19 ) Firstaem, maet pikinini blo iu faendem hem hard for talemaot tingting blo hem and wat hem warim, bat sapos iu patient for lisin, bae iu savve helpem hem for story.
Mekem pikinini blo iu for feel free for storyim feeling blo olketa. Samfala pikinini feel free for story taem olketa relax, olsem taem olketa lo car or wakabaot, winim for sidaon witim parents and story feis-tu-feis.
Mek sure pikinini blo iu no herem tumas olketa nius abaotem olketa nogud samting wea happen.
Talem lo olketa pikinini wat iu duim for mekem famili hem stap sef.
Garem plan for taem blo emergency, and practice witim pikinini blo iu.
“Story lo pikinini blo iu, and letem hem for talem tingting blo hem. Maet pikinini faendem hard for talem hao hem feel fraet, wari, or kros. Talem lo olketa hao iu tu stragol for deal witim sem feeling, and wanem iu duim for deal witim datwan.”—Bethany.