FOREST

Forest Stap lo Danger

Each year, olketa katem daon staka billion tree and staka taem diswan hem for kliarem land for iusim for agriculture. Since 1940’s, haf blo olketa rain forest lo world no stap nao.

Taem wanfala forest hem distroe, evri gud samting wea iumi kasem from ecosystem blo forest, and evri samting wea hem provaedem hem finis tu.

Planet blo Iumi Design for Stap Olowe

Samfala forest wea olketa katem daon finis hem savve grow bak and hem big go moa. No longtaem go nomoa, olketa ecologist or pipol for studyim olketa plant sapraes for lukim hao olketa ples wea forest stap lo hem bifor hem grow bak seleva and olketa forest hia barava healthy moa. Tingim olketa example hia:

• Olketa man wea duim research studyim olketa land wea bifor pipol katem daon forest and iusim datfala land for farming. Taem olketa studyim 2,200 plot land olsem lo America and West Africa, olketa faendaot soil kamap gud moa, and insaed samting olsem ten year, olketa forest hia hem grow bak and healthy moa.

• Wanfala Science magasin storyim hao olketa wea duim research estimatem insaed samting olsem 100 years, olketa land savve healthy moa and olketa tree savve grow bak and olketa nara samting olsem olketa animal savve stap moa lo forest.

• No longtaem go nomoa, olketa scientist lo Brazil comparem olketa ples wea pipol plantim bak forest, and ples wea forest grow seleva.

• From research blo olketa scientist hia lo Brazil, report from National Geographic sei: “Olketa faendaot hao no eni need hem stap for olketa plantim olketa tree.” Nomata olketa no plantim eni tree lo olketa plot wea olketa testim, insaed lo faevfala year nomoa, ‘olketa tree wea stap lo datfala ples bifor hem grow bak seleva.’

Wat Olketa Man Duim

Evriwea lo world, olketa waka hard for lukaftarem olketa forest wea stap finis and duim samting for mekem olketa forest wea damage for gud bak. From datwan, wanfala report from United Nations sei, insaed winim 25 years wea go pas, “raonem world, distaem, wei for katem daon olketa forest hem slow daon 50 per cent winim bifor.”

Nomata olketa waka hard, datwan hem no inaf for sevem forest blo iumi. Wanfala report wea Global Forest Watch organization pablisim, hem sei: “Insaed olketa year wea go pas, namba blo olketa tropical forest wea distroe hem no barava change tumas.”

Wei wea pipol kasem staka billion dollar from illegal logging and greedy saed lo bisnis, datwan kosim olketa for gohed spoelem tropical forest blo iumi.

Olketa Reason for Hope—Wat Bible Talem

“Jehovaha God mekem olketa tree wea luk naes and gud for kaikaim for grow from graon.”—Genesis 2:9.

Creator blo evri forest hem designim olketa lo wei wea olketa savve recover seleva taem iumi gohed iusim olketa forest lo stret wei. Hem laekem olketa forest for gohed stap and ecosystem wea Hem designim for gohed waka gudfala.

Bible showimaot hao God bae finisim wei wea pipol no iusim gud olketa resource lo earth and bae hem mekem laef and planet blo iumi for gohed stap. Lukim article “God Promisim Planet blo Iumi Bae Stap for Olowe,” lo page 15.