Hao Nao Pipol Ting lo Respect for Narawan?

**WHY RESPECT FOR NARAWAN HEM IMPORTANT**

Wei for respectim narawan savve stopem raoa and no mekem raoa kamap worse.

Wanfala Bible proverb sei: “Wanfala kaen ansa hem katem daon kros, bat raf toktok mekem man kros go moa.” (Proverbs 15:1) Toktok and akson wea no showimaot respect hem olsem man addim petrol lo wanfala fire, wea staka taem datwan savve mekem big problem kamap.
Jesus sei: “Samting wea man tingting tumas abaotem nao bae hem storyim.” (Matthew 12:34) Toktok wea iumi talem wea no showimaot respect hem showim problem wea stap finis lo heart blo iumi, wea hem nao hao iumi ting abaotem pipol from difren race, tribe, kantri, or baekgraon.

Lo wanfala survey no longtaem go nomoa, olketa askem 32,000 pipol lo 28 kantri, and 65 percent lo olketa sei distaem wei for no showim respect hem barava worse winim enitaem bifor.

WAT IU SAVVE DUIM

Nomata lo skul or waka ples, respectim evriwan, nomata iu garem difren tingting from olketa. Luk for olketa samting wea iufala evriwan savve agree lo hem. Datwan bae helpem iu for no againstim or judgem narawan.

“Iufala mas no judgem narawan mekem God no judgem iufala.”—Matthew 7:1.

Treatim olketa narawan lo sem wei wea iu laekem olketa for treatim iu. Sapos iu kaen and tingim narawan, olketa bae duim sem samting for iu tu.

“So samting wea iufala laekem pipol for duim long iufala, sem samting nao iufala mas duim long olketa.”—Luke 6:31.

Mas forgive. Garem positive tingting abaotem narawan lo wei for no tingim nogud toktok or samting wea man duim.

“Wei for minim samting savve helpem man for daonem kros blo hem, And pipol bae tinghae lo hem sapos hem no tingim rong samting wea samwan duim lo hem.”—Proverbs 19:11.

Insaed Kingdom Hall blo Olketa Jehovah’s Witness bifor wanfala kongregeson meeting. Pipol wea garem difren age and baekgraon story and welkamim each other.

WAT OLKETA JEHOVAH’S WITNESS DUIM

Lo olketa community wea olketa stap and waka, Olketa Jehovah’s Witness mekhae lo wei for respectim narawan.

Mifala offerim free Bible instruction for evri pipol bat mifala no forcem biliv or tingting blo mifala lo olketa narawan. Mifala followim olketa kaonsel from Bible lo wei for talemaot message lo wei wea kaen and “showimaot bigfala respect.”—1 Peter 3:15; 2 Timothy 2:24.

Mifala no ting daonem eniwan and mifala welkamim pipol from evri difren kaen baekgraon wea laek for lanem wat Bible teachim lo olketa kongregeson meeting blo mifala. Mifala waka hard for acceptim and for ‘showimaot mifala barava respectim evriwan.’—1 Peter 2:17, New International Version.

Mifala respectim olketa wea garem paoa lo gavman wea mifala stap anda. (Rome 13:1) Mifala obeyim law and peim tax. And nomata mifala neutral saed lo politik, mifala respectim raet blo olketa narawan for mekem own disison blo olketa saed lo politik.