Showim Respect lo Olketa Narawan

1. Why nao iumi savve hapi taem pipol showim respect lo iumi? (Proverbs 22:1)

HAO nao iu feel taem pipol showim respect lo iu? For sure, iu barava hapi lo datwan. Iumi evriwan needim respect. Iumi feel gud taem iumi kasem respect. Dastawe Bible sei, “For pipol respectim man hem beta winim silver and gold”!—Readim Proverbs 22:1.

2-3. Hu nao iumi shud showim respect lo olketa, and why nao datwan no isi samfala taem?

² Hem no evritaem isi for iumi showim respect lo olketa narawan. Wanfala reason hem bikos iumi lukim mistek blo olketa. And tu, staka pipol distaem no savve showim respect. Bat iumi mas no olsem olketa. Why nao olsem? Bikos Jehovah laekem iumi for honorim, or showim respect lo “evri difren kaen man.”—1 Pet. 2:17.

³ Lo disfala article, bae iumi lanem wat nao hem minim for respectim olketa narawan and hao nao iumi savve showim datwan lo (1) olketa famili member, (2) olketa spiritual brata and sista, and (3) olketa wea no worshipim Jehovah. And bae iumi storyim tu hao for iumi showim respect nomata lo taem wea hem no isi.

WAT NAO HEM MINIM FOR RESPECTIM OLKETA NARAWAN?

4. Wat nao hem minim for respectim narawan?

⁴ Wat nao respect hem minim? Lo samfala languis tufala word hia “respect” and “honor,” hem klosap semsem. Hao? “Respect” hem join witim hao iumi ting lo samwan. Hem minim iumi ting lo datfala person olsem samwan wea hem fit for kasem datfala respect, maet bikos lo olketa quality wea hem garem, wat hem duim, or position blo hem. “Honor” hem join witim hao iumi treatim samwan. Taem iumi honorim samwan, hem minim iumi treatim hem lo wei wea mekem hem feel important, iumi tinghae lo hem, and respectim hem. Bat, for showim tru honor, datwan mas kam from heart.—Matt. 15:8.

5. Wat nao savve helpem iumi for showim respect lo olketa narawan?

⁵ Jehovah laekem iumi for showim respect lo olketa narawan. And hem talem iumi for showim diswan lo “olketa wea garem authority for rul.” (Rom. 13:​1, 7) Bat samfala maet sei, “Mi hapi for showim respect lo pipol, if olketa duim samting wea mekem olketa fit for kasem respect.” Hao, datkaen tingting hem stret? Iumi olketa servant blo Jehovah luksavve respect wea iumi garem for pipol hem no depend nomoa lo wat olketa duim. Hem depend lo love blo iumi for Jehovah and wei wea iumi laek for mekem hem hapi, wea datwan nao samting wea barava important.—Josh. 4:14; 1 Pet. 3:15.

6. Hao, iumi fit for showim respect lo samwan wea no respectim iumi? Explainim. (Lukim tu piksa.)

⁶ Samfala maet ting, ‘Hao, iumi fit for respectim samwan wea no respectim iumi?’ Yes. Tingim samfala example. King Saul mek shame lo son blo hem Jonathan front lo olketa narawan. (1 Sam. 20:​30-34) Nomata olsem, Jonathan respectim and sapotim dadi blo hem for go faet, go kasem day wea Saul hem dae. (Ex. 20:12; 2 Sam. 1:23) Hae Priest Eli accusim Hannah for sei hem drunk. (1 Sam. 1:​12-14) Nomata olsem, Hannah story lo Eli witim respect, nomata staka Io Israel savve dat Eli no duim gud waka blo hem olsem wanfala dadi and hae priest. (1 Sam. 1:​15-18; 2:​22-24) And olketa man lo Athens tok spoelem aposol Paul, and kolem hem “man for toktok tumas.” (Acts 17:18) Nomata olsem, Paul story lo olketa witim respect. (Acts 17:22) So hem klia, strongfala love for Jehovah and wei for fraet lo hem savve muvim iumi for showim respect lo olketa narawan, no lo taem wea hem isi nomoa, bat lo taem wea hem no isi tu. Distaem, bae iumi storyim hu nao iumi shud respectim and why nao olsem.

SHOWIM RESPECT LO OLKETA FAMILI MEMBER

7. Why nao maet hem no isi for iumi showim respect lo olketa famili member?

⁷ Why hem no isi. Iumi savve spendem staka taem witim famili. From datwan, iumi savve lo olketa gud quality and wik point blo olketa. Samfala lo famili maet garem sik wea mekem hem no isi for iumi lukaftarem olketa, or maet olketa stress or wari tumas. And samfala maet talem and duim samting wea mekem iumi feel nogud. Samfala lo famili kosim problem taem olketa no treatim each other witim respect, so olketa no hapi and garem peace lo haos. Taem olsem, famili no waka gud tugeta. Olsem hao sik arthritis savve spoelem olketa join lo body and mekem body no waka gud tugeta, wei for no showim respect insaed famili, savve spoelem hao famili waka gud tugeta. Iumi hard for barava finisim arthritis, bat wei for no showim respect insaed famili hem samting wea iumi savve stop for duim.

8. Why nao hem important for showim respect lo olketa famili member? (1 Timothy 5:​4, 8)

⁸ Why nao iumi shud showim respect? (Readim 1 Timothy 5:​4, 8.) Lo first leta blo Paul for Timothy, Paul storyim hao olketa famili member shud lukaftarem each other. Hem explainim dat main reason for honorim olketa famili member hem no just bikos hem responsibility blo iumi, bat hem bikos iumi “faithful lo God.” Disfala toktok “faithful lo God” hem minim for loyal for worshipim God and servem hem. Jehovah nao startim famili arrangement. (Eph. 3:​14, 15) So taem iumi showim honor lo wanfala famili member, iumi really showim honor lo Jehovah, man wea startim famili. (Lukim English study note lo 1 Timothy 5:4.) Datwan barava important reason why iumi shud showim respect lo olketa famili member!

9. Hao nao hasband and waef savve showim respect lo each other? (Lukim tu piksa.)

⁹ Hao for showim respect. Hasband wea honorim waef bae showim dat waef blo hem spesol lo hem nomata taem tufala stap seleva or between staka pipol. (Prov. 31:28; 1 Pet. 3:7) Hem no killim waef, mek shame lo hem, or mekem hem feel iusles. Ariel,a wanfala brata lo Argentina, sei: “Bikos waef blo mi hem sik, samfala taem hem savve talem olketa samting wea mekem mi feel nogud. Lo olketa taem olsem, mi tingim dat wat hem talem hem no really feeling blo hem. Taem situation hem tumas for mi, mi tingim 1 Corinthians 13:​5, datwan helpem mi for story lo wei for showim respect and no tok daonem hem.” (Prov. 19:11) Waef wea honorim hasband savve talem gud samting abaotem hem lo olketa narawan. (Eph. 5:33) Hem no tok spoelem, tok daonem, and kolem enikaen nem lo hasband blo hem. Hem luksavve datkaen wei hem olsem rust wea savve spoelem marit. (Prov. 14:1) Wanfala sista lo Italy wea hasband blo hem stragol for deal witim stress, hem sei: “Samfala taem, mi feel dat hasband blo mi ova tumas for wari. Lo bifor, toktok and feis blo mi savve showim dat mi no respectim hem. Bat mi faendem dat taem mi evritaem associate witim olketa wea story abaotem olketa narawan lo wei wea showim respect, datwan helpem mi for barava respectim hasband blo mi.”

10. Hao nao olketa young wan savve showim respect lo parents blo olketa?

¹⁰ Iufala olketa young wan, obeyim olketa famili rul wea parents markem for iufala. (Eph. 6:​1-3) Story lo wei wea showim respect lo parents blo iufala. (Ex. 21:17) Taem parents blo iufala start for olo, olketa maet needim moa help. Duim best blo iufala for lukaftarem olketa. Tingim example blo María, wea dadi blo hem no wanfala Jehovah’s Witness. Taem dadi blo hem sik, wei blo hem mekem hem hard for María lukaftarem hem. María sei: “Mi prea lo Jehovah for helpem mi respectim dadi blo mi and for showimaot datwan. Mi ting if Jehovah askem mi for honorim parents blo mi, hem minim hem savve givim mi strong for duim datwan. Isisi mi luksavve dat dadi blo mi no need for changem wei blo hem bifor mi savve showim respect lo hem.” Taem iumi honorim olketa famili member blo iumi nomata olketa garem wik point, datwan showim iumi respectim arrangement blo Jehovah.

SHOWIM RESPECT LO OLKETA BRATA AND SISTA

11. Why nao maet hem no isi for showim respect lo olketa brata and sista?

¹¹ Why hem no isi. Olketa brata and sista traem best for followim olketa standard lo Bible. Nomata olsem, samfala taem samwan maet no kaen lo iumi, judgem iumi, or mekem iumi feel nogud. If wanfala brata or sista duim samting wea mekem iumi “garem reason for feel nogud,” maet hem no isi for iumi gohed showim respect lo hem. (Col. 3:13) Hao nao iumi savve deal witim datwan?

12. Why nao hem important for showim respect lo olketa brata and sista? (2 Peter 2:​9-12)

¹² Why nao iumi shud showim respect? (Readim 2 Peter 2:​9-12.) Lo second leta blo Peter, hem storyim hao samfala lo Christian kongregeson lo first century, olketa talem samting wea no showim respect abaotem “olketa wea kasem glory from God,” wea datwan hem olketa Christian elder. Taem olketa faithful angel lukim datwan, wat nao olketa duim? Olketa no talem eni negative toktok againstim olketa man hia “bikos lo respect wea olketa garem for Jehovah.” Tingim datwan! Olketa perfect angel hia no laek for tok againstim olketa bighed man hia. Bat olketa leavim for Jehovah nao judgem and tok strong lo olketa. (Rom. 14:​10-12; comparem Jude 9.) Iumi savve lanem wanfala leson from olketa angel hia. If iumi shud no disrespectim olketa wea againstim iumi, then iumi shud no disrespectim olketa brata and sista blo iumi tu, iumi shud barava respectim olketa. Really, iumi nao “mas lead for showim honor” lo olketa. (Rom. 12:10) Taem iumi duim datwan, iumi showim iumi respectim Jehovah.

13-14. Hao nao iumi savve showim respect lo olketa insaed kongregeson? Storyim example. (Lukim tu piksa.)

¹³ Hao for showim respect. Olketa elder, traem best for teachim narawan lo wei wea showimaot love. (Philem. 8, 9) If iu need for givim kaonsel lo samwan, duim lo kaenfala wei and no lo taem iu kros. Olketa sista, iufala savve helpem evriwan lo kongregeson for showim respect, taem iufala no join lo eni negative gossip or for talem olketa laea wea spoelem narawan. (Titus 2:​3-5) Iumi evriwan savve showim respect lo olketa elder lo kongregeson taem iumi willing for waka tugeta witim olketa, and talem thankiu for hard waka wea olketa duim for conductim meeting, lead lo preaching waka, and helpem olketa wea “start for go difren.”—Gal. 6:1; 1 Tim. 5:17.

¹⁴ Wanfala sista wea nem blo hem Rocío, storyim hao wantaem hem no isi for hem respectim wanfala elder wea givim kaonsel lo hem. Hem sei: “Mi feel dat hem tok stret tumas lo mi. Taem mi kasem haos, mi talem olketa negative samting abaotem hem. Nomata mi trae for no showim hao mi feel, mi ting dat hem nating kea abaotem mi and mi no laek followim advaes blo hem.” Wat nao helpem Rocío? Hem sei: “Taem mi duim Bible reading, mi kam akrosim 1 Thessalonians 5:​12, 13. Mi luksavve dat mi no showim respect for datfala brata, and konsens blo mi start for pokem mi. Mi prea lo Jehovah and duim research lo olketa pablikeson for faendem samfala specific information for helpem mi for changem attitude blo mi. Gogo mi luksavve hao datfala brata wea givim kaonsel hem no rong, bat mi nao mi praod. Distaem mi minim dat respect hem join witim wei for hambol. Mi still need for improve, bat taem mi gohed traem best for showim respect, mi garem peace witim Jehovah.”

SHOWIM RESPECT LO OLKETA WEA NO WORSHIPIM JEHOVAH

15. Why nao maet hem no isi samfala taem for showim respect lo olketa wea no worshipim Jehovah?

¹⁵ Why hem no isi. Staka taem lo ministry, iumi savve meetim pipol wea luk olsem olketa no laek for herem truth lo Bible. (Eph. 4:18) Samfala disaed for no lisin lo gud nius bikos lo teachim wea olketa kasem taem olketa smol. And maet iumi deal witim olketa boss or skul teacher wea no kaen and olketa workmate or skulmate wea hard for deal witim. Isisi, maet respect wea iumi garem for olketa hem gogo daon, and gogo iumi no treatim olketa olsem hao iumi laekem olketa for treatim iumi.

16. Why nao hem important for showim respect lo olketa wea no worshipim Jehovah yet? (1 Peter 2:12; 3:15)

¹⁶ Why nao iumi shud showim respect? Remember, Jehovah hem lukluk lo hao iumi treatim olketa wea no worshipim hem. Aposol Peter remindim olketa Christian dat gudfala wei blo olketa maet mekem samfala for “praisem God.” From datwan, hem sei taem olketa explainim biliv blo olketa, olketa “mas no raf and showimaot bigfala respect.” (Readim 1 Peter 2:12; 3:15.) Nomata sapos olketa Christian mas go lo kot bikos lo faith blo olketa or mas explainim biliv blo olketa lo wanfala neiba, olketa Christian mas treatim olketa wea no worshipim Jehovah witim respect, and duim datwan olsem olketa standap front lo God. Jehovah hem gohed lukluk and lisin lo wat iumi talem and hao iumi talem. Datwan hem barava important reason why iumi shud treatim olketa wea no worshipim Jehovah witim respect!

17. Hao nao iumi savve showim respect lo olketa wea no worshipim Jehovah?

¹⁷ Hao for showim respect. Taem iumi lo ministry, iumi no laek for duim eni samting for mekem olketa narawan tingse iumi ting daonem olketa from olketa no savve gud lo Bible. Instead, iumi laek for ting lo olketa narawan olsem olketa spesol lo God and important winim iumi. (Hag. 2:7; Phil. 2:3) If samwan tok spoelem iu bikos lo biliv blo iu, traem best for no changem bak, olsem for talem eni kleva toktok for endim hem. (1 Pet. 2:23) If iu talem samting wea iu regretim, kwiktaem sei sorre. Hao nao iu savve showim respect lo olketa wea iu waka witim? Duim gud waka blo iu and trae for garem positive tingting abaotem olketa wea iufala waka tugeta and abaotem olketa boss blo iu. (Titus 2:​9, 10) Taem iu honest, waka hard, and duim gud waka blo iu, for sure bae iu mekem God hapi, nomata maet samfala taem pipol no hapi lo iu.—Col. 3:​22, 23.

18. Why nao hem important for iumi evritaem showim respect lo olketa narawan?

¹⁸ Iumi garem staka gud reason for gohed showim respect lo olketa narawan! Iumi lanem dat taem iumi showim respect lo famili blo iumi, iumi honorim famili Hed blo iumi, Jehovah. Olsem tu, taem iumi showim respect lo olketa spiritual brata and sista blo iumi, iumi honorim Dadi blo iumi lo heven. And taem iumi showim respect lo olketa wea no worshipim Jehovah, datwan savve mekem olketa for laek praisem, or honorim, nambawan God blo iumi. Even if samfala no enitaem showim respect lo iumi, hem important for iumi evritaem showim respect lo olketa. Why nao olsem? Bikos Jehovah bae blessim iumi. Hem promis olsem: “Olketa wea honorim mi bae mi honorim olketa.”—1 Sam. 2:30.