Chapter 12
Meaning bilong Baptism bilong Yu
1, 2. (a) Why nao each wan long yumi interest long wata baptism? (b) Hao nao yu savvy answerim olketa question wea stap long paragraf 2?
LONG year 29 C.E., Jesus hem baptaes long Jordan River. Jehovah seleva hem lukluk kam and talemaot hao hem hapi long diswan. (Matt. 3:16, 17) Three and haf year bihaen, bihaen long resurrection bilong hem, Jesus givim instruction long olketa disaepol bilong hem, taem hem say: “Every power bilong heven and long earth mi kasem finis. Go and mekem disaepol long pipol bilong every nation, baptaesim them.” (Matt. 28:18, 19) Waswe, yu baptaes finis for fitim samting wea Jesus talem long there? Or waswe, yu mek ready for baptaes?
2 Nomata yu baptaes finis or no yet, way for savvy gud long meaning bilong baptism hem important. Hem gud for tingting gud long olketa question hia: Waswe, baptism bilong olketa Kristian distaem hem garem sem meaning olsem baptism bilong Jesus? Waswe, every samting wea Bible talem abaot baptism hem fitim yu? Wanem nao insaed long way for garem living wea fitim meaning bilong Kristian wata baptism?
Baptism wea John Duim
3. Baptism bilong John hem for hu nomoa?
3 Samting olsem six month bifor Jesus hem baptaes, John the Baptist go long wilderness bilong Judea, and preach olsem: “Repent, from kingdom bilong heven hem kam klosap nao.” (Matt. 3:1, 2) Pipol from everywea long datfela ples they herem samting wea John talem, they talemaot sin bilong them and hem baptaesim them long Jordan. Datfela baptism hem for olketa Jew.—Acts 13:23, 24; Luke 1:13-16.
4. (a) Why nao olketa Jew barava need for repent kwiktaem? (b) Sapos they no want for kasem disfela ‘baptism withim fire,’ wanem nao they need for duim?
4 Olketa Jew hia they barava need for repent kwiktaem. Long year 1513 B.C.E. long Maunt Sinai, olketa laen dadi bilong them mekem wanfela covenant withim Jehovah God. But they no fulfillim olketa responsibility bilong them under long datfela covenant so they kasem judgment olsem olketa wea sin. Laef bilong them stap long danger. “Bigfela day bilong Jehovah wea fit for mekem man fraet” wea Malachi hem profesi abaot hem klosap for kam, and hem kam long year 70 C.E. taem Jerusalem hem finis every bit. John the Baptist, wea strong for supportim trufela worship olsem Elijah, hem givim warning firstaem abaot datfela taem for finisim every samting “for readyim wanfela sekson bilong pipol for Jehovah.” They need for repent from olketa sin bilong them againstim Law covenant, and ready long heart and mind for acceptim Son bilong God, wea Jehovah hem sendem long them. (Mal. 4:4-6; Luke 1:17; Acts 19:4) Olsem John hem talem, Son bilong God bae baptaes withim holy spirit (olketa faithful disaepol they kasem disfela baptism for firstaem long Pentecost bilong 33 C.E.) and withim fire (wea kasem olketa wea no repent taem everywan finis every bit long year 70 C.E.). (Luke 3:16) For no kasem disfela ‘baptism withim fire’ olketa first-century Jew hia need for baptaes long wata for show aot they repent, and they mas kamap olketa disaepol bilong Jesus Kraest taem way hem open for them.
5. (a) Taem Jesus ready for baptaes, why nao John askim question abaotem datwan? (b) Way wea Jesus baptaes long wata hem piksarem wanem samting? (c) Hao nao Jesus ting long way for fulfillim will bilong God for hem?
5 Jesus seleva tu kam long John for baptaes. But why nao olsem? John savvy Jesus no garem any sin for talemaot, and so hem say: “Mi nao needim yu for baptaesim mi, so why nao yu kam long mi?” But baptism bilong Jesus hem piksarem different samting. So hem answer olsem: “Go ahed, distaem, from hem fit for yumi duim olsem for followim raeteous way.” (Matt. 3:13-15) Baptism bilong Jesus hem no piksarem way for repent from sin; and hem no need for dedicate-im hemseleva long God, from hem member bilong wanfela nation wea dedicate long Jehovah finis. But, baptism bilong hem, taem hem kasem 30 year old, hem piksarem way for givim hemseleva long Father bilong hem long heven for duim will bilong Hem. Will bilong God for datfela “man, Kraest Jesus,” hem meanim work wea join withim Kingdom, and tu way for givim laef bilong hem olsem wanfela perfect man olsem ransom and faondeson for wanfela niufela covenant. (Luke 8:1; 17:20, 21; Heb. 10:5-10; Matt. 20:28; 26:28; 1 Tim. 2:5, 6) Jesus barava ting hevi long samting wea wata baptism bilong hem piksarem. Hem no letem otherfela samting for pullim tingting bilong hem. Go kasem end bilong laef bilong hem long earth, hem duim every bit will bilong God.—John 4:34.
Baptism long Dae
6. Wanem narafela baptism nao Jesus kasem and hao long nao diswan go ahed?
6 For fitim samting wea wata baptism bilong Jesus hem piksarem, hem kasem narafela baptism tu. Hem savvy assignment wea God markem hem for duim bae lead go long way for givim laef bilong hem olsem sakrifaes but hem bae raise ap olsem spirit long mek-three day. Hem tok abaotem diswan olsem wanfela baptism. Disfela “baptism” start long year 29 C.E. but hem no finis go kasem taem wea hem dae and resurrect. So samting olsem threefela year bihaen hem baptaes long wata hem fit for say olsem: “Mi bae baptaes long wanfela samting, and go kasem taem wea datwan bae happen, diswan givim mi bigfela hevi!”—Luke 12:50.
7. (a) Hu moa they baptaes long dae? (b) Hu nao duim disfela baptism?
7 Olketa wea bae rul withim Kraest insaed Kingdom bilong hem long heven mas baptaes long dae tu. (Mark 10:37-40; Col. 2:12) Taem they dae they lusim laef bilong them olsem man for olawe, olsem Jesus duim. And long resurrection bilong them they join withim hem for rul long heven. Disfela baptism, hem no samting wea any man duim, but God nao duim thru long Son bilong hem wea stap long heven.
8. Wanem nao meaning bilong way wea they “baptaes insaed long Kraest Jesus”?
8 Olketa wea baptaes insaed long dae bilong Jesus they “baptaes insaed long Kraest Jesus” tu. Thru long holy spirit from Kraest they kamap wan mind withim hem, hed bilong them, olsem olketa member bilong kongregeson bilong hem wea spirit anointim, “body” bilong hem. From datfela spirit mekem them fit for showim aot nambawan fashion bilong Kraest, yumi fit for say everywan long them kamap “wanfela insaed long Kraest Jesus.”—Rom. 6:3-5; 1 Cor. 12:13; Gal. 3:27, 28; Acts 2:32, 33.
Wata Baptism bilong Olketa Kristian Disaepol
9. (a) Wanem taem nao baptism wea stap long Matthew 28:19 hem start? (b) Use-im olketa question and scripture long disfela paragraf for lukluk long samting wea Jesus say olketa wea ready for baptaes mas luksavvy long hem.
9 John hem baptaesim olketa firstfela disaepol bilong Jesus long wata and hem leadim them go long Jesus olsem olketa member wea fit for kamap spiritual waef bilong hem. (John 3:25-30) Jesus tu talem them for duim sem kaen way for baptaesim other pipol, wea garem sem meaning olsem baptism bilong John. (John 4:1-3) But, start long Pentecost bilong 33 C.E., they start for fulfillim komand for baptaes long “nem bilong Father and bilong Son and bilong holy spirit.” (Matt. 28:19) Hem bae gud tumas for reviewim meaning bilong datwan, withim olketa scripture and question wea stap long daon:
For baptaes long “nem bilong Father,” wanem nao man mas luksavvy long hem abaot Father? (2 Ki. 19:15; Ps. 3:8; 73:28; Isa. 6:3; Rom. 15:6; Heb. 12:9; Jas. 1:17)
Baptism insaed long nem “bilong Son” meanim way for luksavvy long wanem samting? (Matt. 16:16, 24; Phil. 2:9-11; Heb. 5:9, 10)
Wanem nao man mas believim mekem hem fit for baptaes long nem “bilong holy spirit”? (Luke 11:13; John 14:16, 17; Acts 1:8; 10:38; Gal. 5:22, 23; 2 Pet. 1:21)
10. (a) Wanem nao Kristian wata baptism hem piksarem? (b) Hao nao diswan hem different from baptism bilong Jesus seleva? (c) Taem olketa wea duim samting fitim Scripture they baptaes, they kamap hu nao?
10 Olketa first wan for baptaes followim olketa instruction bilong Jesus they olketa Jew (and olketa Jew proselyte), wea olsem wanfela nation wea dedicate long God finis, and hem deal withim them long spesel way go kasem year 36 C.E. But, taem privilege bilong way for kamap olketa Kristian disaepol hem open for olketa Samaritan and Gentile, bifor they baptaes each wan long them mas dedicate for servim hem every bit olsem olketa disaepol bilong Son bilong hem. For everywan long them, and for olketa Jew tu, diswan nao meaning bilong Kristian wata baptism wea kam kasem taem bilong yumi. Disfela “wanfela baptism” hem fitim everywan wea kamap trufela Kristian. They kamap olketa Kristian witness bilong Jehovah, olketa minister wea God appointim.—Eph. 4:5; 2 Cor. 6:3, 4.
11. (a) Kristian wata baptism hem semsem withim wanem samting, and hao nao olsem? (b) Diswan sevem Kristian from wanem samting?
11 God hem barava ting hae long baptism olsem. Bihaen aposol Peter tok abaot way wea Noah buildim ark, wea hem and famili bilong hem stap laef insaed long taem bilong Flood, hem talem moa diswan. Hem raet olsem: “Wanfela samting olsem hem sevem yufela distaem tu, datwan nao hem way for baptaes, (no fashion for lusim every dirty way, but fashion for askim God for kasem klinfela conscience front long hem,) thru long resurrection bilong Jesus Kraest.” (1 Pet. 3:21) Datfela ark hem barava prove-im hao Noah hem dedicate-im hemseleva for duim will bilong God and hem faithful for duim work wea God markem hem for duim. Diswan sevem laef bilong hem. Long sem way, olketa wea dedicate-im themseleva long Jehovah long faondeson bilong faith long Jesus wea resurrect finis, wea baptaes for showim aot datwan and then go ahed for duim will bilong God for olketa servant bilong hem distaem, hem bae sevem them from disfela badfela world. (Gal. 1:3, 4) They no go-go for finis every bit olsem other pipol bilong world. God sevem them from diswan and they kasem gudfela conscience.
Live Followim Responsibility bilong Yumi
12. Why nao way wea man baptaes no meanim hem bae kasem laef nao?
12 Hem rong for ting say taem man baptaes hem bae kasem laef nao. Diswan savvy givim gudfela samting only sapos man hem dedicate-im hemseleva every bit long Jehovah thru long Jesus Kraest and then hem go ahed for duim will bilong God, faithful go kasem end.—Matt. 24:13.
13. (a) Wanem nao will bilong God for olketa Kristian wea baptaes long way wea they use-im laef bilong them? (b) Hao nao yumi mas ting abaotem way for kamap olsem Kristian disaepol?
13 Will bilong God for Jesus hem meanim tu way wea hem use-im laef bilong hem olsem wanfela man. Hem mas givim laef bilong hem olsem wanfela sakrifaes taem hem dae. Yumi givim body bilong yumi long God, for garem living for sakrifaesim yumi seleva. Yumi mas use-im every bit for duim will bilong God. (Rom. 12:1, 2) Tru nao, yumi no savvy duim diswan sapos samfela taem, yumi meanim for showim aot fashion bilong world wea stap raonem yumi or sapos yumi garem living wea lukaotem samting bilong seleva and givim lelebet service nomoa long God. (1 Pet. 4:1-3; 1 John 2:15-17) Taem wanfela Jew askim hem abaot wanem hem mas duim for kasem laef olawe, Jesus talem hem way wea hem important for garem klinfela fashion long living, and then hem showim aot need for kamap wanfela Kristian disaepol, wanfela follower bilong Jesus, olsem main samting long living. Diswan kanduit for kamap mek-tu samting bihaen long way for aftarem material samting.—Matt. 19:16-21.
14. (a) Wanem responsibility wea join withim datfela Kingdom nao every Kristian garem? (b) Olsem piksa long page 101 showim, wanem nao samfela gudfela way for duim disfela work? (c) Sapos yumi barava share insaed disfela work withim whole heart, datwan hem prove-im wanem samting?
14 Hem gud for tingim tu hao will bilong God for Jesus hem meanim tu way for duim work wea join withim Kingdom. Jesus nao hem kamap King. But taem hem stap long earth, hem wanfela strongfela witness bilong Kingdom. Yumi garem sem kaen witnessing work for duim and yumi mas duim withim whole heart. Taem yumi duim olsem, yumi show aot yumi ting hae long rul bilong Jehovah and love bilong yumi for other pipol. And tu, yumi show aot yumi wan mind withim otherfela worshiper everywea long world, wea they olketa witness bilong Kingdom, wea trae hard for kasem goal bilong laef olawe under long rul bilong datfela Kingdom.
Samting for Review
● Wanem nao olketa samting wea semsem and different long baptism bilong Jesus and wata baptism distaem?
● Baptism bilong John hem for hu nao? Hu nao baptaes long dae? And hu nao “baptaes insaed long Kraest Jesus”?
● Wanem nao hem insaed long way for live followim olketa responsibility bilong Kristian wata baptism?
[Box/Piksa long page 101]
Long Wanem Way Nao Yu Talemaot Kingdom?
From door tu door
Way for go back and visitim olketa wea interest
Long olketa hom Bible study
Long street
Long olketa skulfren
Long olketa workfren