Chapter Twelv
Mining Bilong Baptism Bilong Iu
1. Why nao iumi wanwan shud interest long wei for baptaes long wata?
LONG year 29 C.E., Jesus hem baptaes taem John Baptaesa baptaesim hem anda long Jordan River. Jehovah seleva lukluk and talemaot hem appruvim hem. (Matthew 3:16, 17) Long datfala taem Jesus showim example wea evri disaepol bilong hem bae followim. Thri and haf year bihaen, Jesus talem disfala instruction long olketa disaepol bilong hem: “Evri paoa nao mi kasem long heven and long earth. So go and mek disaepol long pipol bilong evri nation, baptaesim olketa long nem bilong Father and bilong Son and bilong holy spirit.” (Matthew 28:18, 19) Waswe, iu followim datfala komand bilong Jesus and baptaes finis? Sapos nomoa, waswe, iu mek redy for duim olsem?
2. Wanem nao olketa kwestin wea needim ansa saed long baptism?
2 Nomata wanem, wei for barava savve long mining bilong baptism hem important for evriwan wea want for servem Jehovah and stap insaed raeteous niu world bilong hem. Olketa kwestin wea needim ansa nao olsem: Waswe, Christian baptism distaem garem sem mining olsem baptism bilong Jesus? Wanem nao hem minim for baptaes “long nem bilong Father and bilong Son and bilong holy spirit”? Wanem nao insaed long wei for garem living wea fitim mining bilong Christian baptism?
Olketa Baptism wea John Duim
3. Baptism bilong John hem for hu?
3 Samting olsem sixfala month bifor Jesus hem baptaes, John Baptaesa go preach long wilderness bilong Judea and sei: “Repent, from kingdom bilong heven hem kam klosap nao.” (Matthew 3:1, 2) Pipol herem and followim samting wea John talem. Olketa talemaot sin bilong olketa, repent, and then kam long John for hem baptaesim olketa long Jordan River. Datfala baptism hem for olketa Jew nomoa.—Luke 1:13-16; Acts 13:23, 24.
4. Why nao olketa Jew long first century need for repent kwiktaem?
4 Olketa Jew hia barava need for repent kwiktaem. Long Maunt Sinai long year 1513 B.C.E., olketa laen dadi bilong olketa mekem wanfala covenant—wanfala important agreement—witim Jehovah God. Bat bikos long bigfala sin wea olketa duim, olketa no fulfillim responsibility bilong olketa anda long datfala covenant, so diswan showaot olketa guilty nao. Taem Jesus hem long earth, living bilong olketa hem barava nogud. “Bigfala day bilong Jehovah wea mekem man fraet” wea Malachi talem profesi abaotem hem klosap. Long 70 C.E., datfala “day” hem kam taem army bilong Rome distroem Jerusalem, temple bilong hem, and killim dae winim wan million Jew. John Baptaesa, wea strong for tru worship, hem go firstaem “for redyim for Jehovah wanfala pipol wea prepare finis” bifor datfala wei for distroe hem happen. Olketa need for repent from olketa sin wea olketa duim againstim Law covenant bilong Moses and redy for acceptim Son bilong God, Jesus, wea Jehovah sendem long olketa.—Malachi 4:4-6; Luke 1:17; Acts 19:4.
5. (a) Taem Jesus kam for baptaes, why nao John no sure abaotem datwan? (b) Wanem nao baptism bilong Jesus piksarem?
5 Jesus seleva tu kam long John for baptaes. Bat why nao olsem? From John hem savve Jesus no garem eni sin for talemaot, hem sei: “Mi nao man wea iu need for baptaesim, so why nao iu kam long mi?” Bat baptism bilong Jesus hem for piksarem difren samting. Dastawe Jesus ansa olsem: “Duim disfala samting distaem, bikos long disfala wei bae iumi savve duim evri samting wea raeteous.” (Matthew 3:13-15) Bikos Jesus no garem sin, baptism bilong hem no piksarem wei for repent long sin; and tu hem no need for dedicatem hemseleva long God, from hem member bilong wanfala nation wea dedicate finis long Jehovah. Bat, baptism bilong hem taem hem 30 year hem spesol, and hem piksarem wei for givim hemseleva long Dadi bilong hem long heven for duim will bilong Hem long bigfala wei moa.
6. Jesus hem ting hao long wei for duim will bilong God for hem?
6 Insaed long will bilong God for Christ Jesus hem for duim waka wea join witim Kingdom. (Luke 8:1) Hem minim tu wei for sakrifaesim perfect laef bilong hem olsem man for olsem wanfala ransom and faondeson for wanfala niu covenant. (Matthew 20:28; 26:26-28; Hebrews 10:5-10) Jesus ting long mining bilong baptism bilong hem long wata olsem samting wea barava serious. Hem no letem interest bilong hem tan go long eni nara samting. Go kasem end long laef bilong hem long earth, hem faithful for duim will bilong God, hem mekem wei for preach abaotem Kingdom bilong God olsem main waka bilong hem.—John 4:34.
Wata Baptism Bilong Olketa Christian Disaepol
7. Start long Pentecost 33 C.E., wanem nao olketa Christian mas duim saed long baptism?
7 John baptaesim long wata olketa first disaepol bilong Jesus and then hem leadim olketa go long Jesus olsem olketa wea fit for kamap member bilong Kingdom long heven. (John 3:25-30) Jesus directim olketa disaepol for baptaesim samfala tu, wea garem sem mining olsem baptism bilong John. (John 4:1, 2) Bat, start long Pentecost 33 C.E., olketa start for fulfillim komand for baptaes “long nem bilong Father and bilong Son and bilong holy spirit.” (Matthew 28:19) Bae iu kasem gudfala samting sapos iu reviewim mining bilong datwan.
8. Wanem nao hem minim for baptaes long “nem bilong Father”?
8 Wanem nao hem minim for baptaes “long nem bilong Father”? Hem minim for acceptim nem, position, paoa, purpose, and olketa law bilong hem. Tingim wanem nao insaed diswan. (1) Saed long nem bilong hem, Psalm 83:18 sei: “Iu wea nem bilong iu Jehovah, iu nomoa Most Hae ovarem full earth.” (2) Saed long position bilong hem, 2 Kings 19:15 sei: “O Jehovah . . . , iu nomoa datfala trufala God.” (3) Saed long paoa bilong hem, Revelation 4:11 talem iumi: “Iu nao fit, Jehovah, God bilong mifala, for kasem glory and honor and paoa, from iu creatim evri samting, and from will bilong iu nao evri samting hia stap and kamap.” (4) Iumi mas luksavve tu wei wea Jehovah hem Man for Givim Laef, wea purpose bilong hem nao for sevem iumi from sin and dae: “Salvation hem bilong Jehovah.” (Psalm 3:8; 36:9) (5) Iumi need for acceptim Jehovah olsem Most Hae Wan for Givim Law: “Jehovah hem Judge bilong iumi, Jehovah hem Man for Givim Law long iumi, Jehovah hem King bilong iumi.” (Isaiah 33:22) From hem garem evri position hia, diswan encouragem iumi olsem: “Iu mas lovem Jehovah God bilong iu witim full heart bilong iu and witim full soul bilong iu and witim full mind bilong iu.”—Matthew 22:37.
9. Wanem nao hem minim for baptaes “long nem . . . bilong Son”?
9 Wanem nao baptism “long nem . . . bilong Son” hem minim? Hem minim for luksavve long nem, position, and paoa wea Jesus Christ garem. Nem bilong hem, Jesus, minim “Jehovah Hem Salvation.” Hem kasem position bilong hem bikos hem nao only-born Son bilong God, first samting wea God creatim. (Matthew 16:16; Colossians 1:15, 16) John 3:16 sei olsem abaotem Son bilong hem: “God lovem world [bilong olketa man wea hem savve baem bak] tumas dastawe hem givim only-born Son bilong hem, mekem evriwan wea showimaot faith long hem no need for dae bat kasem laef olowe.” Bikos Jesus hem faithful go kasem dae, God resurrectim hem from dae and givim hem moa paoa. Aposol Paul sei God “putim [Jesus] long wanfala hae position” long universe, mek-tu long Jehovah. Dastawe “long nem bilong Jesus evri knee mas bend . . . and evri tongue mas talemaot Jesus Christ nao hem Lord for givim glory long God wea hem Father.” (Philippians 2:9-11) Datwan minim for obeyim olketa komandment bilong Jesus, wea kam from Jehovah.—John 15:10.
10. Wanem nao hem minim for baptaes “long nem . . . bilong holy spirit”?
10 Wanem nao hem minim for baptaes “long nem . . . bilong holy spirit”? Hem minim for luksavve and bilivim waka and paoa bilong holy spirit. And wanem nao holy spirit? Hem paoa bilong Jehovah, wea hem iusim for duim olketa purpose bilong hem. Jesus talem olketa follower bilong hem: “Mi bae askem Father and hem bae givim narafala helper for stap witim iufala olowe, disfala spirit bilong truth.” (John 14:16, 17) Diswan bae mekem olketa fit for duim wanem? Jesus talem olketa moa: “Iufala bae kasem paoa taem holy spirit kam long iufala, and iufala bae witness for mi long Jerusalem and long Judea and Samaria and go kasem evri farawe ples long earth.” (Acts 1:8) Thru long holy spirit, Jehovah muvim pipol for raetem Bible tu: “No enitaem profesi kamap from will bilong man, bat olketa man tok kam from God taem holy spirit leadim olketa.” (2 Peter 1:21) So iumi luksavve and bilivim waka bilong holy spirit taem iumi studyim Bible. Narafala wei wea iumi luksavve long holy spirit hem taem iumi askem Jehovah for helpem iumi garem “frut bilong spirit” wea hem “love, hapi, peace, long-safaring, kaenfala fasin, gudfala fasin, faith, kwaet fasin, fasin for kontrolem seleva.”—Galatians 5:22, 23.
11. (a) Wanem nao trufala mining bilong baptism long taem bilong iumi? (b) Hao nao baptism hem olsem wei for dae and laef bak moa?
11 Olketa Jew and olketa wea joinim Jew religion bifor nao first wan for baptaes followim instruction wea Jesus givim, start long 33 C.E. No longtaem bihaen, olketa Samaritan kasem privilege for kamap Christian disaepol. Then, long 36 C.E., invitation hem go tu for olketa Gentile wea no circumcise. Bifor olketa baptaes, olketa Samaritan and Gentile mas each wan seleva dedicate long Jehovah for servem hem olsem disaepol bilong Son bilong hem. Diswan nao hem mining bilong Christian wata baptism kam kasem taem bilong iumi. Wei for go insaed wata evribit hem fitim disfala wei for dedicatem seleva, bikos baptism hem olsem wanfala tokpiksa wei for berem samting. Wei wea iu go andanit long wata showaot iu dae long laef bilong iu bifor. Wei for kamaot from wata piksarem wei wea iumi laef moa for duim will bilong God. Disfala “wanfala baptism” hem fitim evriwan wea kamap olketa tru Christian. Taem olketa baptaes, olketa kamap olketa Christian Witness bilong Jehovah, olketa minister wea God appointim.—Ephesians 4:5; 2 Corinthians 6:3, 4.
12. Christian wei for baptaes long wata hem semsem olsem wanem, and hao nao olsem?
12 Long lukluk bilong God, baptism hem important tumas saed long wei for sevem man. Olsem example, bihaen aposol Peter storyim wei wea Noah buildim ark, wea keepim hem and famili bilong hem sef thru long Flood, hem raet olsem: “Samting wea semsem witim diswan hem sevem iufala tu, wea hem nao wei for baptaes, (no for aotem dirty bilong body, bat for askem God for wanfala klinfala conscience,) thru long resurrection bilong Jesus Christ.” (1 Peter 3:21) Datfala ark hem pruvim wei wea Noah faithful for duim waka wea God markem hem for duim. Bihaen hem wakem ark finis, “world bilong datfala taem hem finis evribit taem bigfala wata kavarem earth.” (2 Peter 3:6) Bat Noah and famili bilong hem, “eitfala soul, stap sef thru long wata.”—1 Peter 3:20.
13. Christian wea baptaes long wata hem sev from wanem?
13 Distaem, olketa wea dedicatem olketa seleva long Jehovah long faondeson bilong faith long Christ wea resurrect finis mas baptaes for showimaot datfala dedication. Olketa go ahed for duim will bilong God for taem bilong iumi and sev from disfala wicked world. (Galatians 1:3, 4) Olketa no gogo for dae witim disfala wicked system. Olketa sev from datwan and God givim olketa gudfala conscience. Aposol John promisim olketa servant bilong God: “World hem redy for finis and evri samting wea hem wantem tu, bat man wea duim will bilong God bae stap olowe.”—1 John 2:17.
Fulfillim Olketa Responsibility Bilong Iumi
14. Why nao baptism nomoa no minim man hem kasem salvation?
14 Hem bae no stret for tingim baptism nomoa hem givim man salvation. Diswan savve helpem man only sapos hem really dedicatem hemseleva long Jehovah thru long Jesus Christ and go ahed for duim will bilong God, faithful go kasem end. “Man wea go ahed strong kasem end hem nao datwan wea bae sev.”—Matthew 24:13.
15. (a) Wanem nao will bilong God distaem for olketa Christian wea baptaes finis? (b) Hao important nao wei for live olsem Christian disaepol?
15 Insaed long will bilong God for Jesus hem wei wea hem iusim laef bilong hem taem hem stap long earth. Hem mas givim laef hia olsem wanfala sakrifaes long wei for dae. For iumi, iumi offerim body bilong iumi long God, and iumi sakrifaesim iumiseleva taem iumi garem living wea duim will bilong God. (Romans 12:1, 2) Iumi bae nating duim will bilong God sapos tu-thri taem iumi min for followim world raonem iumi or putim olketa samting wea iumiseleva laekem olsem main samting, and servem God long lelebet wei nomoa. (1 Peter 4:1-3; 1 John 2:15, 16) Taem wanfala Jew askem Jesus wanem nao hem mas duim for kasem laef olowe, Jesus talem wei wea hem important for garem living wea klin saed long fasin. Bat then hem showimaot samting wea moa important: need for kamap wanfala Christian disaepol, wanfala follower bilong Jesus. Datwan nao mas main samting long living. Hem no savve kamap mek-tu long olketa material samting.—Matthew 19:16-21.
16. (a) Wanem responsibility nao evri Christian garem saed long Kingdom? (b) Olsem olketa piksa long page 116 and 117 showimaot, wanem nao samfala gudfala wei for duim Kingdom waka? (c) Wei wea iumi share insaed witness waka witim full heart hem pruvim wanem?
16 Hem gud for strongim point moa hao insaed will bilong God for Jesus hem important waka wea join witim Kingdom bilong God. Jesus seleva kasem anointing olsem King. Bat taem hem long earth, hem givim strongfala witness abaotem Kingdom tu. Iumi garem semkaen waka for witness, and planti reason stap for iumi duim diswan witim full heart. Taem iumi duim olsem, iumi showimaot wei wea iumi tinghae long sovereign rul bilong Jehovah and lovem tu nara pipol. (Matthew 22:36-40) Iumi showimaot tu hao iumi wan mind witim olketa wea worship witim iumi evriwea long world, from evriwan nao talemaot Kingdom. Raonem full world, witim wan mind, iumi evriwan muv ahed for kasem goal bilong laef olowe anda long rul bilong datfala Kingdom ovarem earth.
Review
• Wanem samting nao wea semsem and wea difren witim baptism bilong Jesus and wata baptism distaem?
• Wanem nao hem minim for baptaes “long nem bilong Father and bilong Son and bilong holy spirit”?
• Wanem nao insaed long wei for live followim olketa responsibility bilong Christian wata baptism?
[Olketa Piksa long page 116 and 117]
SAMFALA WEI FOR TALEMAOT KINGDOM
From door tu door
Long relative
Long wakfren
Long skulfren
Long street
Go bak long olketa wea interest
Long hom Bible study