Chapter 22
Go Ahed for Talemaot Word bilong God and No Fraet
1. (a) Wanem gud nius nao olketa disaepol bilong Jesus they talemaot start long Pentecost bilong 33 C.E.? Hao nao olketa ruler and older man bilong olketa Jew they ting long diswan? (b) Wanem question nao yumi savvy askim yumi seleva abaot diswan?
FOR winim 4,000 year long history bilong olketa man, olketa samting wea barava important they happen finis. Son bilong God, Jesus Kraest, hem kasem anointing for kamap future King ovarem whole earth. Nomata they killim dae Jesus from olketa enemy bilong hem long religion nao muvim them for duim olsem, Jehovah raisim Son bilong hem from dae. Thru long hem pipol savvy kasem salvation for laef olawe. But taem olketa faithful disaepol bilong Jesus they talemaot disfela gud nius long pablik, planti they strong for againstim them. Firstaem, they putim tufela aposol insaed long prison, then bihaen, everywan long them tu. They whipim them and givim order long them for no toktok long nem bilong Jesus. (Acts 4:1-3, 17; 5:17, 18, 40) Wanem nao they mas duim? Sapos yu long there, wanem nao yu bae duim? Waswe, yu bae go ahed for witness and no fraet?
2. (a) Wanem barava nambawan nius moa yumi need for talemaot long taem bilong yumi? (b) Hu nao garem responsibility for duim diswan?
2 Long year 1914 C.E. samting wea moa important hem happen. Kingdom bilong God long hand bilong Jesus Kraest hem barava start long heven. Then, they throwim Satan and olketa demon bilong hem kam daon long disfela earth. (Rev. 12:1-5, 7-12) Olketa last day bilong disfela badfela system hem start. Bifor everywan bilong datfela genereson wea lukim olketa samting wea happen long year 1914 they dae, God bae finisim every bit system bilong Satan. (Matt. 24:34) Olketa wea winim diswan bae garem hope bilong laef olawe front long them. For fulfillim firstfela purpose bilong God, whole earth bae kamap Paradaes. Sapos yu acceptim disfela gud nius finis, yu garem responsibility for share-im withim other pipol. (Matt. 24:14) But wanem nao piopl bae talem taem yu duim diswan?
3. (a) Taem pipol herem message bilong Kingdom, they waswe? (b) So, wanem question nao yumi mas face-im?
3 Nomata samfela pipol bae welkamim yu olsem man wea talemaot Kingdom, bigfela sekson bae no interest. (Matt. 24:37-39) Other pipol maet mek funny long yu or they maet strong for againstim yu. Jesus givim warning hao olketa relative bilong yu tu maet againstim yu. (Luke 21:16-19) Yu maet kasem diswan long ples wea yu work or long skul tu. Long planti ples long earth, gavman putim tambu long olketa Jehovah’s Witness long way wea no followim justice. Taem yu kasem samfela or every samting hia, waswe, yu bae go ahed for tok abaotem Word bilong God and no fraet?
4. Nomata yumi seleva tingting strong for servim God long faithful way, waswe, diswan bae mekem yumi go ahed?
4 Tru nao, yu want for stap olsem wanfela servant bilong God wea no fraet. But, samfela wea ting say no any samting savvy stopem them, they lusim olketa wea talemaot Kingdom. Long otherfela saed, other pipol, and olketa wea garem fashion for fraet tu, they go ahed olsem olketa strong servant bilong God. Hao nao yu savvy prove-im yu man wea “stand strong long faith”?—1 Cor. 16:13.
No Depend long Strong bilong Yumi Seleva
5. (a) For prove-im yumi olketa faithful servant bilong God, wanem nao main samting yumi mas duim? (b) Why nao olketa meeting they barava important?
5 Hem tru, planti samting insaed long way for go ahed olsem wanfela faithful servant bilong God. But main samting nao, hem way for depend long Jehovah and olketa samting wea hem provide-im. Hao nao yumi showim yumi depend long hem? Wanfela way hem for attendim olketa kongregeson meeting. Bible encouragim yumi for no forgetim them. (Heb. 10:23-25) Olketa wea go ahed olsem faithful witness bilong Jehovah, nomata pipol no interest or they persecutim them, they trae hard for attendim olketa meeting everytaem withim otherfela brata and sista. Savvy bilong yumi abaot Bible bae kamap moa big long olketa meeting hia, but way for interest long olketa niufela samting hem no only samting wea muvim yumi. (Lukim Acts 17:21.) Way wea yumi ting hae long olketa truth wea yumi savvy gud long them bae grow, and yumi bae savvy moa long olketa way for use-im them. Example wea Jesus showim aot for yumi hem kamap moa strong insaed mind and heart bilong yumi. (Eph. 4:20-24) Yumi kamap moa klos long olketa Kristian brata bilong yumi thru long way for worship withim wan mind and yumi each wan kasem strong for go ahed for duim will bilong God. Spirit bilong Jehovah leadim yumi thru long kongregeson, and thru long datfela spirit Jesus hem stap midlwan long yumi taem yumi hipap insaed nem bilong hem.—Rev. 3:6; Matt. 18:20.
6. Long ples wea gavman tambuim work bilong olketa Jehovah’s Witness, wanem nao they duim long saed bilong olketa meeting?
6 Waswe, yu attendim every meeting everytaem? Waswe, yu followim seleva olketa samting wea yu herem? Taem gavman tambuim work, samfela taem they need for havem olketa meeting long olketa smallfela grup long haos bilong samfela brata. Ples for meet and taem wea they havem meeting maet change and hem no easy for attendim, from they maet havem samfela meeting long midlnaet. But, nomata hem hard or danger kamap, olketa faithful brata and sista they barava trae hard for attendim each meeting.
7. (a) Wanem nao narafela way wea yumi savvy showim aot yumi depend long Jehovah? (b) Hao nao diswan savvy helpem yumi for go ahed for no fraet for tok?
7 Way for depend long Jehovah hem show aot tu taem yumi pray everytaem long hem—no olsem samting wea yumi duim everytaem and no ting hae long hem, but yumi duim from yumi barava luksavvy from heart bilong yumi hao yumi needim help bilong God. Waswe, yu duim datwan? Jesus pray everytaem long ministry bilong hem long earth. (Luke 3:21; 6:12, 13; 9:18, 28; 11:1; 22:39-44) And long naet bifor they hangim hem, hem encouragim olketa disaepol bilong hem olsem: “Go ahed for lukaot and for pray, mekem no any test pullim yufela.” (Mark 14:38) Sapos planti pipol no interest long message bilong Kingdom, yumi savvy kasem test for slow daon long ministry bilong yumi. Sapos pipol mek funny long yumi or yumi kasem bigfela persecution, yumi savvy kasem test for stap quiet mekem yumi misstim diswan. But sapos yumi pray strong for spirit bilong God for helpem yumi for go ahed for no fraet for tok, diswan bae protectim yumi for no fall daon long test.—Luke 11:13; Eph. 6:18-20.
Wanfela Story bilong Fashion for No Fraet for Witness
8. (a) Why nao yumi barava interest long story wea stap insaed buk bilong Acts? (b) Answerim olketa question wea stap long end bilong disfela paragraf, strongim hao disfela information savvy helpem yumi.
8 Yumi barava interest long story wea stap insaed buk bilong Acts. Hem talem yumi abaot hao olketa aposol and firstfela disaepol, they pipol wea garem feeling olsem yumi, they winim olketa problem and show aot they olketa faithful witness bilong Jehovah wea no fraet. Letem yumi lukluk long wanfela part bilong datfela story withim olketa question long daon and olketa scripture wea they raetem. Taem yumi duim olsem, tingting abaot hao yuseleva savvy kasem gudfela samting from wanem yu readim.
Waswe, olketa aposol they go long bigfela skul? Waswe, they pipol wea garem fashion for no fraet, nomata wanem samting happen? (Acts 4:13; John 18:17, 25-27; 20:19)
Wanem nao helpem Peter for no fraet for tok front long kot bilong olketa Jew wea just judge-im Son bilong God long samfela week bifor? (Acts 4:8; Matt. 10:19, 20)
Wanem nao olketa aposol duim insaed long olketa week bifor they kam front long Sanhedrin? (Acts 1:14; 2:1, 42)
Taem olketa ruler givim order long them for finis for preach long nem bilong Jesus, wanem nao Peter and John they talem? (Acts 4:19, 20)
Bihaen they kamap free, hu nao they luk go moa long hem for help? Waswe, they barava askim hem for finisim persecution, or wanem nao they duim? (Acts 4:24-31)
Wanem nao Jehovah use-im for helpem them taem pipol wea againstim them trae for stopem preaching work? (Acts 5:17-20, 33-40)
Hao nao olketa aposol showim aot they savvy why nao they kamap free? (Acts 5:21, 41, 42)
Nomata taem planti disaepol they stap long planti different ples from persecution kamap big tumas, wanem nao they go ahed for duim? (Acts 8:3, 4; 11:19-21)
9. (a) Wanem nambawan samting kamap from ministry bilong olketa firstfela disaepol? (b) Hao nao yumi insaed long diswan tu?
9 Work bilong them for saed bilong gud nius hem no useless. Samting olsem 3,000 disaepol they baptaes long Pentecost bilong 33 C.E. “Olketa wea believe long Lord they go ahed for joinim them, staka man and woman.” (Acts 2:41; 4:4; 5:14) Go-go, wanfela man wea barava strong for persecutim them, Saul bilong Tarsus, hem kamap wanfela Kristian and go ahed for no fraet for witness. Bihaen they kolem hem aposol Paul. (Gal. 1:22-24) Datfela work wea start long first century hem no finis yet. Hem kamap moa big long olketa “last day” and distaem hem go kasem every part long earth. Yumi garem privilege for share long hem, and taem yumi share insaed, yumi savvy learn from example wea olketa faithful witness wea serve bifor yumi they showim aot.
10. (a) Wanem nao olketa chance wea Paul use-im for witness? (b) Wanem nao samfela way wea yu talemaot message bilong Kingdom long other pipol?
10 Taem Paul learnim truth abaot Jesus Kraest, hem no delay for duim samting. “Kwiktaem . . . hem start for preach abaot Jesus, hao dis Wan nao hem Son bilong God.” (Acts 9:20) Hem ting hae long kaenfela fashion bilong God and hem luksavvy everywan needim gud nius wea hem kasem. For fitim kastom bilong datfela taem, from hem wanfela Jew hem go long olketa synagogue, ples bilong olketa Jew for hipap, for givim witness. Hem preach tu from haos tu haos and hem story withim pipol long maket. And hem willing for muv long olketa niufela territory for talemaot gud nius.—Acts 17:17; 20:20; Rom. 15:23, 24.
11. (a) Hao nao Paul show aot, nomata hem no fraet, hem use-im gudfela tingting tu taem hem witness? (b) Hao nao yumi savvy showim aot datfela fashion taem yumi witness long olketa relative, workfren or skulfren?
11 Paul hem no fraet, but hem use-im gudfela tingting tu, olsem yumi tu mas duim. Hem story long olketa Jew abaotem olketa promis wea God talem long olketa laen dadi bilong them. Hem story long olketa Greek pipol abaot samting wea they savvy gud long hem. Samfela taem hem use-im experience bilong hemseleva for givim witness. Olsem hem talem: “Mi duim every samting for saed bilong gud nius, mekem mi savvy share-im datwan withim other pipol.”—1 Cor. 9:20-23; Acts 22:3-21.
12. (a) Nomata hem no fraet, wanem nao Paul duim mekem hem no rowa withim olketa wea againstim hem? (b) Wanem taem nao hem wise for yumi followim datfela example, and hao nao olsem? (c) Power for no fraet for toktok hem kam from wea?
12 Taem pipol barava againstim gud nius and luk olsem hem beta for muv go long narafela ples or territory for preach, Paul duim olsem winim way for rowa everytaem withim olketa enemy bilong truth. (Acts 14:5-7; 18:5-7; Rom. 12:18) But hem nating feel shame long gud nius. (Rom. 1:16) Nomata Paul no laekem proudfela, and raf-fela way bilong olketa wea againstim hem, hem “kasem way for no fraet from God bilong yumi” for go ahed for preach. Nomata hem kasem olketa hardfela samting, hem say: “Lord hem stap klosap long mi and givim power long mi, mekem disfela preaching work savvy go ahed every bit.” (1 Thess. 2:2; 2 Tim. 4:17) Hed bilong Kristian kongregeson, Lord Jesus, go ahed for provide-im power wea yumi needim for duim work wea hem profesi abaot for taem bilong yumi.—Mark 13:10.
13. Wanem nao show aot Kristian way for no fraet? Wanem nao mekem yumi showim aot diswan?
13 Yumi fit for go ahed for tok abaotem Word bilong God and no fraet, olsem Jesus Kraest and otherfela faithful servant bilong God they duim long first century. Diswan no meanim yumi tok hard or tok againstim pipol. Yumi no need for trae for force-im message long pipol wea no want for herem. But yumi no givap from pipol no interest, or yumi no fraet for tok from pipol againstim yumi. Olsem Jesus, yumi point go long Kingdom bilong God olsem trufela gavman for whole earth. Yumi no fraet for tok, bikos yumi stand for Jehovah, Sovereign bilong Universe, and message wea yumi talemaot hem no from yumi but from hem.—Phil. 1:27, 28; 1 Thess. 2:13.
Samting for Review
● Why nao hem important for share-im message bilong Kingdom for everywan? But yumi savvy samfela pipol bae waswe?
● Hao nao yumi savvy show aot yumi no trae for depend long strong bilong yumi seleva for servim Jehovah?
● Wanem nambawan samting nao yumi learnim from buk bilong Acts?