Chapter Naentin
No Fraet for Go Ahed Talemaot Word Bilong God
1. (a) Wanem gud nius nao olketa disaepol bilong Jesus talemaot, bat wanem nao samfala Jew duim taem olketa herem? (b) Wanem nao olketa kwestin wea iumi savve askem?
KLOSAP 2,000 year go finis, Son bilong God, Jesus Christ, kasem anointing olsem future King ovarem full earth. Olketa enemy bilong Jesus long religion mekem wei for killim hem dae, bat Jehovah resurrectim hem from dae. Thru long Jesus, wei for laef olowe hem open. Bat, taem olketa disaepol bilong Jesus talemaot disfala gud nius long pablik, persecution hem kamap. Pipol putim samfala long prison, whipim olketa tu and komandim olketa for finis for story abaotem Jesus. (Acts 4:1-3, 17; 5:17, 18, 40) Wanem nao bae olketa duim? Sapos iu witim olketa, wanem nao bae iu duim? Waswe, bae iu no fraet for go ahed witness?
2. (a) Wanem nambawan nius nao pipol need for herem distaem? (b) Hu nao garem responsibility for preachim gud nius?
2 Long 1914, King long Kingdom bilong God, Jesus Christ, hem kamap king long heven for rul ‘midolwan long olketa enemy bilong hem.’ (Psalm 110:2) Then, hem torowem Satan and olketa demon bilong hem long earth. (Revelation 12:1-5, 7-12) Diswan hem start bilong olketa last day bilong disfala wicked system. Long end bilong disfala sekson bilong taem, God bae distroem full system bilong Satan. (Daniel 2:44; Matthew 24:21) Hope for laef olowe insaed long paradaes earth hem stap front long olketa wea laef thru long datfala taem. Sapos iu acceptim disfala gud nius, bae iu laek tumas for sharem witim nara pipol. (Matthew 24:14) Bat wanem kaen ansa nao iu bae expectim from pipol?
3. (a) Hao nao pipol ting long message bilong Kingdom? (b) Wanem kwestin nao iumi mas feisim?
3 Taem iu talemaot gud nius bilong Kingdom, samfala pipol bae acceptim bat planti bae les for herem. (Matthew 24:37-39) Samfala maet mek fani or againstim iu. Jesus warnim hao olketa relative bilong iu tu maet againstim iu. (Luke 21:16-19) Maet diswan kasem iu tu long ples wea iu waka or long skul. Long samfala part long earth, gavman tambuim waka bilong Olketa Jehovah’s Witness. Taem iu feisim kaen samting olsem, waswe, bae iu go ahed for no fraet for talemaot word bilong God and “stand strong long faith”?—1 Corinthians 16:13.
No Depend Long Strong Bilong Iumiseleva
4. (a) For kamap olketa faithful servant bilong God, wanem nao wanfala important samting iumi mas duim? (b) Why nao olketa Christian meeting barava important?
4 Wanfala important samting for stap faithful olsem servant bilong Jehovah hem for depend long olketa samting wea hem provaedem. Wanfala long olketa hia nao olketa meeting bilong kongregeson. Bible encouragem iumi for no fail for attend. (Hebrews 10:23-25) Olketa wea go ahed for olsem faithful Witness bilong Jehovah traem best bilong olketa for evritaem attendim olketa meeting witim olketa narafala worshiper. Long olketa meeting hia, savve bilong iumi long Bible hem grow. And tu, wei wea iumi minim olketa main truth hem grow, and wei for luksavve long hao for iusim olketa hem kamap moa sharp. Iumi kamap moa klos long olketa Christian brata for wan mind long worship and kamap strong for duim will bilong God. Spirit bilong Jehovah directim iumi thru long kongregeson, and thru long datfala spirit, Jesus hem stap midolwan long iumi.—Matthew 18:20; Revelation 3:6.
5. Taem pipol tambuim waka bilong Olketa Jehovah’s Witness, wanem nao olketa duim saed long olketa meeting?
5 Waswe, iu evritaem attendim evri meeting, and iu followim wanem iu herem long there? Samfala taem, taem pipol tambuim waka bilong Olketa Jehovah’s Witness, need hem kamap for olketa smol grup nomoa duim olketa meeting long haos bilong samfala. Olketa ples and taem for meet maet change and maet long taem wea no fitim iu. Olsem example, samfala meeting kamap long naet taem. Bat nomata hem hard or danger samting, olketa faithful brata and sista waka hard for go long evri meeting.
6. Hao nao iumi showaot iumi depend long Jehovah, and hao nao diswan savve helpem iumi for no fraet for go ahed preach?
6 Wei for depend long Jehovah hem grow taem iumi prea evritaem long hem from heart from iumi luksavve iumi needim help bilong God. Waswe, iu duim datwan? Taem Jesus go ahed long ministry bilong hem long earth hem prea evritaem. (Luke 3:21; 6:12, 13; 22:39-44) And long naet bifor olketa nilam hem long post, hem encouragem olketa disaepol bilong hem olsem: “Go ahed for luk aot and prea, for mekem iufala no go insaed long temptation.” (Mark 14:38) Sapos pipol no interest long Kingdom message bilong iumi, maet wei for slow daon long ministry kamap wanfala test. Sapos pipol tok spoelem or persecutim iumi, maet diswan mekem iumi want for no preach, mekem iumi no kasem eni problem. Bat sapos iumi prea strong for spirit bilong God helpem iumi for go ahed for no fraet for preach, bae iumi kasem protection againstim wei wea iumi givap from olketa test.—Luke 11:13; Ephesians 6:18-20.
Record Bilong Wei for No Fraet for Witness
7. (a) Why nao iumi garem spesol interest long record bilong Acts? (b) Ansarem olketa kwestin wea stap long end bilong disfala paragraf, and talem hao information hia savve helpem iumi.
7 Iumi garem spesol interest long record wea stap insaed buk bilong Acts. Hem showim hao olketa aposol and olketa first disaepol, wea garem feeling olsem iumi, winim olketa hardfala samting and go ahed olsem olketa witness bilong Jehovah wea faithful and no fraet. Bae iumi lukluk long part long datfala record witim help bilong olketa kwestin and scripture long daon. Taem iumi duim diswan, tingim hao iuseleva savve kasem gud samting from wanem iu readim.
Waswe, olketa aposol olketa man wea garem big education? Waswe, hem natural wei bilong olketa for no fraet, nomata wanem samting happen? (John 18:17, 25-27; 20:19; Acts 4:13)
Wanem nao mekem Peter no fraet for witness front long kot bilong olketa Jew wea killim dae Son bilong God? (Matthew 10:19, 20; Acts 4:8)
Wanem nao olketa aposol duim long olketa week bifor pipol tekem olketa front long Sanhedrin? (Acts 1:14; 2:1, 42)
Taem olketa ruler komandim olketa aposol for mas stop for preach long nem bilong Jesus, wanem ansa nao Peter and John talem? (Acts 4:19, 20)
Bihaen olketa kamap free, olketa aposol luk moa go long hu for kasem help? Waswe, olketa prea for persecution for stop, or hao? (Acts 4:24-31)
Jehovah givim help thru long wanem samting taem olketa enemy trae for stopem preaching waka? (Acts 5:17-20)
Hao nao olketa aposol showaot olketa minim reason why olketa kamap free? (Acts 5:21, 41, 42)
Nomata taem planti long olketa disaepol go long nara ples bikos long persecution wea kamap, wanem nao olketa go ahed for duim? (Acts 8:3, 4; 11:19-21)
8. Wanem nambawan samting nao kamaot from ministry bilong olketa first disaepol, and hao nao iumi tu share insaed diswan?
8 Waka for preachim gud nius hem no hard waka nating. Samting olsem 3,000 disaepol baptaes long Pentecost 33 C.E. “Olketa wea biliv long Lord go ahed for joinim olketa, staka man and woman.” (Acts 2:41; 4:4; 5:14) Gogo, wanfala wea strong tumas for againstim pipol bilong God, Saul bilong Tarsus, kamap wanfala Christian and no fraet for witness abaotem truth. Planti kolem hem aposol Paul. (Galatians 1:22-24) Kasem distaem datfala waka wea start long first century hem no stop. Hem kamap moa big long olketa last day distaem and hem go kasem evri part bilong earth. Iumi garem privilege for share long hem, and taem iumi duim olsem, iumi savve lane from example bilong olketa wea serve bifor iumi.
9. (a) Wanem nao olketa chance wea Paul iusim for witness? (b) Wanem nao olketa wei wea iu talemaot Kingdom message long narafala pipol?
9 Taem Paul lanem truth abaotem Jesus Christ, wanem nao hem duim? “Kwiktaem . . . hem start for preach abaot Jesus, hao Diswan nao hem Son bilong God.” (Acts 9:20) Hem tinghae long kaenfala fasin wea hem no fit for kasem from God, and hem luksavve evriwan needim gud nius wea hem bin kasem. Paul hem wanfala Jew, and for followim wei bilong pipol long datfala taem, hem go long olketa synagogue for givim witness. Hem preach tu from haos tu haos and story gud witim pipol long marketples. And hem willing for muv go long olketa niu territory for preachim gud nius.—Acts 17:17; 20:20; Romans 15:23, 24.
10. (a) Taem hem givim witness, hao nao Paul showimaot hem no fraet, bat long semtaem, hem garem fasin for luksavve tu? (b) Hao nao iumi savve showimaot olketa fasin olsem Paul taem iumi witness long olketa relative, wakfren, or skulfren?
10 Paul hem no fraet bat hem garem fasin for luksavve tu, and iumi tu shud olsem. For pullim olketa Jew hem iusim olketa promis wea God talem long olketa laen dadi bilong olketa. For olketa Greek hem iusim olketa samting wea olketa savve gud long hem. Samfala taem hem iusim experience bilong hemseleva taem hem lanem truth olsem wanfala wei for givim witness. Hem sei: “Mi duim evri samting for saed bilong gud nius, mekem mi savve sharem witim narafala pipol.”—1 Corinthians 9:20-23; Acts 22:3-21.
11. (a) Wanem nao Paul duim for no evritaem raoa witim olketa wea againstim hem? (b) Wanem taem nao hem wise for iumi followim example bilong Paul, and hao nao olsem? (c) Paoa for no fraet for talemaot word hem kam from wea?
11 Taem wei for againstim hem mekem Paul disaed for go and preach long narafala area for lelebet taem, hem duim diswan for missim wei for evritaem mekem raoa kamap witim olketa wea againstim hem. (Acts 14:5-7; 18:5-7; Romans 12:18) Bat no enitaem hem feel shame long gud nius. (Romans 1:16) Nomata Paul feel nogud long nogud samting wea olketa wea againstim hem duim for spoelem hem, hem “kasholem fasin for no fraet thru long God bilong iumi” for go ahed for preach. Hem sei: “Lord hem stand ap klosap long mi and givim mi paoa, mekem thru long mi disfala preaching bae go ahed evribit.” (1 Thessalonians 2:2; 2 Timothy 4:17) Hed bilong Christian kongregeson, Jesus, go ahed for givim paoa wea iumi needim for waka wea hem profesi abaotem for taem bilong iumi.—Mark 13:10.
12. Wanem nao pruvim wei wea Christian no fraet, and wanem nao main reason for diswan?
12 Iumi garem planti reason for no fraet for go ahed talemaot word bilong God, olsem Jesus and olketa faithful servant bilong God duim long first century. Diswan no minim for no tingim pipol or trae for forcem disfala message long olketa wea no laekem. Bat hem minim for no givap bikos pipol no interest; and wei wea pipol againstim iumi no mekem iumi stap kwaet tu. Olsem Jesus, iumi point go long Kingdom bilong God olsem gavman wea fit for rul long full earth. Iumi talemaot witim strong bikos iumi stand for Jehovah, Sovereign Bilong Universe, and bikos message wea iumi talemaot hem no from iumi bat from hem. And love bilong iumi for Jehovah nao main samting wea muvim iumi for praisem hem.—Philippians 1:27, 28; 1 Thessalonians 2:13.
Review
• Why nao hem important for sharem message bilong Kingdom witim evriwan, bat wanem nao iumi shud expectim?
• Hao nao iumi savve showaot iumi no depend long strong bilong iumiseleva for servem Jehovah?
• Wanem nao olketa gudfala leson wea iumi lanem from buk bilong Acts?
[Piksa long page 173]
Olsem long bifor, olketa servant bilong Jehovah distaem no fraet for talemaot word bilong God