Chapter 23
Tingting Everytaem long Day bilong Jehovah
1. (a) Taem yu first learn abaot hao olketa problem bilong disfela old system hem klosap for finis, hao nao yu feel? (b) Wanem nao olketa question abaotem diswan wea yumi mas tingting strong long them?
TRU NAO, wanfela long olketa first samting wea yu learnim taem yu studyim Bible hem hao klosap nao, olketa problem long living insaed disfela system bae finis. (Luke 21:28) Yu luksavvy purpose bilong God hem for whole earth kamap wanfela Paradaes. Raf fashion, war, sik and dae bae no moa, and olketa wea yu love-im wea dae finis bae laef back moa. Datwan hem nambawan hope! Way wea diswan hem klosap tumas hem show aot klia long olketa samting wea prove-im presence bilong Kraest olsem King hem start long year 1914 C.E. Start long datfela taem yumi stap insaed long olketa lastfela day bilong disfela badfela world. Waswe, datfela savvy hem mekem yu change-im living bilong yu? Waswe, living bilong yu really show aot yu believim “day bilong Jehovah” hem klosap for kam?
2. (a) Wanem taem nao “day bilong Jehovah” bae kam? (b) Hao nao way wea Jehovah no talemaot “day or hour” bringim gudfela samting?
2 Olketa Scripture showim aot klia hao datfela “genereson” wea lukim start bilong presence bilong Kraest bae lukim tu “bigfela day bilong Jehovah” wea hem bae bringim judgment againstim everywan wea duim samting wea no raeteous. (Matt. 24:34; Zeph. 1:14–2:3) Datfela “genereson” they olo distaem. But Bible no talem barava day wea Jesus Kraest bae kam olsem man bilong Jehovah for finisim every bit system bilong Satan long disfela earth. “No anywan savvy long datfela day or hour, nomata angel long heven, nomata Son tu, but Father nomoa hem savvy,” Jesus hem say. (Mark 13:32) Diswan barava bringim gudfela samting. Long wanem way? Hem helpem yumi for savvy wanem samting nao insaed long heart bilong pipol. Sapos anywan no really love-im Jehovah, they bae tingim “day” bilong hem insaed long mind bilong them olsem samting farawe and aftarem samting wea heart bilong them wantim. Jehovah hem only approve-im olketa wea barava love-im hem olsem servant bilong hem, wea showim aot diswan long way for servim hem withim whole soul, nomata wanem taem end bilong disfela badfela system bae kam. God and Son bilong hem no approve-im olketa wea hafhaf or garem double tingting.—Rev. 3:16; Ps. 37:4; 1 John 5:3.
3. Wanem warning nao Jesus givim long yumi abaot diswan?
3 Jesus warnim olketa wea love-im Jehovah taem hem tok olsem: “Go ahed for lukaot, go ahed for wekap, from yufela no savvy wanem taem hem markem.” (Mark 13:33-37) Hem encouragim yumi for no letem way for kaikai and drink or “worry bilong living” for pullim every tingting bilong yumi mekem yumi no tingting long way wea distaem hem barava important taem.—Luke 21:34-36; Matt. 24:37-42.
4. Olsem Peter meanim, wanem nao “day bilong Jehovah” bae bringim?
4 Bihaen, aposol Peter kaonselem everywan wea garem trufela faith for ‘waitim and tingting everytaem long day bilong Jehovah, from fire bae finisim olketa heven, and olketa other samting bae melt from they hot tumas.’ Way wea “day bilong Jehovah” hem klosap tumas for kam hem samting wea no anywan long yumi mas ting nating long hem. Olketa gavman wea olsem heven and badfela system bilong man bae finis and “niufela heven and wanfela niufela earth” bae change-im wea God nao workim, and “olketa otherfela samting” wea join withim disfela system—independent tingting bilong hem, living wea garem dirty fashion and aftarem material samting—bae finis every bit from hot bilong “day bilong Jehovah.” (2 Pet. 3:10-13) Yumi need for lukluk gud, from yumi savvy olketa bigfela samting hia savvy start long any taem.—Matt. 24:44.
Lukluk Gud for Olketa Samting Wea Fulfillim Datfela Saen
5. (a) Long wanem way nao answer bilong Jesus long question wea stap long Matthew 24:3 hem fitim end bilong system bilong olketa Jew? (b) Wanem part long answer bilong hem nao fitim olketa samting wea happen start long 1914 C.E.?
5 From taem wea yumi stap insaed, yumi mas savvy gud long olketa samting wea insaed long datfela saen wea garem planti part, wea showim aot klia “olketa last day,” or “end bilong disfela system.” For luksavvy long datfela saen long stretfela way, yumi mas tingting everytaem hao answer wea Jesus givim long olketa disaepol bilong hem long Matthew 24:3, hem fitim end bilong system bilong olketa Jew long first century long samfela way, but main samting wea bae fulfill hem bihaen long datfela taem. Samting wea hem talem long Mt 24 verse 4 go kasem 22 hem fulfill long smallfela way midlwan long 33 and 70 C.E. But profesi hia hem fulfill long bigfela way long taem bilong yumi and showim aot klia taem wea start long 1914 C.E. olsem taem bilong “presence” bilong Kraest and “end bilong disfela system.” (And tu Mark 13:5-20 and Luke 21:8-24) Matthew 24:23-28 talem yumi samting wea bae happen start long 70 C.E. kam kasem taem bilong presence bilong Kraest. (And tu Mark 13:21-23) Olketa samting wea Matthew 24:29–25:46 go kasem end bilong chapter 25 story abaot they point go long taem wea start long 1914 C.E.—And tu Mark 13:24-37 and Luke 21:25-36.
6. (a) Why nao yumi seleva mas lukluk gud long hao olketa samting wea happen distaem they fulfillim “datfela saen”? (b) Answerim olketa question long end bilong disfela paragraf for showim aot hao “datfela saen” hem fulfill start kam long year 1914.
6 Yumi seleva need for lukluk gud long olketa samting wea happen distaem wea fulfillim “datfela saen.” Way wea yumi joinim olketa samting hia withim Bible profesi bae helpem yumi for “tingting everytaem” long day bilong Jehovah. Hem bae helpem yumi tu for barava story gud long other pipol taem yumi talem warning abaotem way wea “day for God bilong yumi for pay back” hem klosap for kam. (Isa. 61:1, 2) Taem yumi tingim olketa goal hia, reviewim olketa different part bilong “datfela saen.”
Long wanem spesel way nao profesi abaot way wea ‘nation bae againstim nation and kingdom againstim kingdom’ hem fulfill start long 1914 C.E.? Wanem nao happen long olketa month wea just go past finis wea join withim way wea datwan hem fulfill?
Hao nao way wea kaikai hem short hem affectim everywea long earth nomata man garem bigfela savvy long saed bilong science long disfela mek-20 century?
Waswe, start long year 1914, namba bilong olketa earthquake wea happen hem change winim taem bifor?
Long year 1918, wanem sik nao killim dae planti pipol winim olketa wea dae long world war? Nomata olketa man garem bigfela savvy long saed bilong medicine, wanem sik nao kamap moa big distaem?
Wanem nao mekem yu believim olketa samting wea 2 Timothy 3:1-5 story abaot they no way bilong living everytaem, but they go ahed for kamap moa worse taem yumi muv go long end bilong olketa last day?
Divaedem Pipol
7. (a) Wanem narafela samting, wea Jesus story abaot long Matthew 13:36-43, hem join withim end bilong disfela system? (b) Wanem nao datfela tok piksa meanim?
7 Jesus tok abaot samfela otherfela important samting tu wea join withim end bilong disfela system. Wanfela long olketa hia hem way for divaedem “olketa son bilong kingdom” from olketa “son bilong badfela man.” Jesus tok abaot diswan long tok piksa bilong hem abaot wanfela gaden wheat wea wanfela enemy hem plantim rabis gras tu insaed. “Wheat” insaed long tok piksa bilong hem piksarem olketa trufela anointed Kristian. Olketa “rabis gras” they olketa giaman Kristian. Long end bilong disfela system, olketa “rabis gras”—olketa wea say they Kristian but they prove-im hao they olketa “son bilong badfela man” from they hold strong long world wea Devil rulim—they different from “olketa son bilong kingdom,” and they kasem mark for finis every bit. (Matt. 13:36-43) Waswe, diswan really happen finis?
8. (a) Bihaen long World War I, wanem bigfela way for divaedem olketa wea say they Kristian nao hem kamap? (b) Hao nao olketa trufela anointed Kristian they prove-im they nao “olketa son bilong kingdom”?
8 Tru nao, bihaen long World War I, bigfela way for divaedem everywan wea say they Kristian long tufela sekson hem kamap: (1) Olketa bigman bilong Kristendom and olketa follower bilong them, wea strong for supportim League of Nations (distaem hem United Nations), and long sem taem they still strong for supportim nation bilong them. (2) Fewfela tru anointed Kristian wea stap bihaen long war, wea supportim every bit Messiah Kingdom bilong God. From they barava supportim olketa gavman bilong world olsem way for kasem peace and safe living, firstfela sekson showim aot klia hao they no olketa trufela Kristian. (John 17:16) But, olketa servant bilong Jehovah they stret for luksavvy long League of Nations olsem “no gud samting wea spoelem every samting” bilong distaem, wea Matthew 24:15 hem story abaot. They show aot they olketa trufela “son bilong kingdom [bilong God],” taem they preachim “disfela gud nius bilong kingdom . . . everywea long world.” (Matt. 24:14) Wanem nao kamaot from diswan?
9. Wanem nao firstfela samting wea kamaot from disfela Kingdom-preaching work?
9 First samting, hem way for hipim ap remnant bilong olketa Kristian wea spirit anointim. Nomata they stap long planti different nation, under long olketa angel they kam insaed long wanfela organization wea garem wan mind.
10. (a) Hao nao narafela work for divaedem pipol hem go ahed? Wanem profesi nao fitim diswan? (b) Way wea olketa profesi hia fulfill meanim wanem samting?
10 Then, olsem profesi wea Jesus talem, hem start for divaedem pipol bilong every nation, “olsem wanfela shepherd hem divaedem olketa sheepsheep from goat.” Disfela work, wea Kraest hem leadim from throne bilong hem long heven, hem go ahed kam kasem distaem, and hem affectim yu tu. Planti man they rejectim Kingdom bilong God and “olketa son” bilong hem wea spirit anointim so they bae “finis every bit.” But, long otherfela pipol Lord hem invite-im them for stap under long rul bilong Kingdom bilong hem long disfela earth, and kasem laef olawe. Olketa hia wea olsem sheepsheep they hipap tugeta withim olketa anointed “son bilong kingdom,” nomata they kasem bigfela persecution. (Matt. 25:31-46) Long loyal way they helpem them for talemaot important message bilong Kingdom. Wanfela great crowd wea namba bilong them kasem planti million they share insaed disfela work. Pipol everywea long disfela earth they herem message bilong Kingdom. Wanem nao every samting hia meanim? Yumi barava stap klosap long end bilong “olketa last day” and “day bilong Jehovah” hem klosap for kam.
Wanem Nao Bae Happen Bihaen?
11. Waswe, samfela moa preaching work mas go ahed bifor “day bilong Jehovah” kam?
11 Waswe, samfela profesi moa mas fulfill bifor bigfela day bilong Jehovah wea fit for mekem man fraet hem start? Yes! Way for divaedem pipol for datfela Kingdom hem no finis yet. Long samfela ples wea they strong for againstim them for planti year, olketa niufela disaepol just start for kam insaed. And nomata pipol rejectim gud nius, way wea yumi givim witness mek hae long justice and mercy bilong Jehovah. So, go ahed withim disfela work! Jesus promisim yumi, taem hem finis, “end bae kam.”—Matt. 24:14.
12. (a) Olsem 1 Thessalonians 5:2, 3 talem, wanem bigfela samting nao mas happen? (b) Wanem nao diswan bae meanim for yumi?
12 Narafela barava important Bible profesi hem diswan: “Long taem wea olketa say: ‘Peace and safe living!’ then sek nomoa, taem for finis every bit bae kasem them kwiktaem olsem pain wea kasem babule woman wea ready for bornim pikinini; and olketa bae nating savvy ranawe.” (1 Thess. 5:2, 3) Yumi no savvy hao nao datfela toktok “peace and safe living” bae kamap. But diswan no meanim olketa leader bilong world they barava stretem olketa problem bilong olketa man. Olketa wea “tingting everytaem” long day bilong Jehovah bae no letem datfela toktok giamanim them. They savvy, kwiktaem bihaen long datwan, “taem for finis every bit” bae kam.
13. Wanem samting nao bae happen kwiktaem bihaen long disfela toktok “peace and safe living”? Talem wanem order they bae followim.
13 Firstaem, olsem Bible showim aot, every ruler bilong politik long whole world, bae tan againstim Babylon the Great, world rul bilong false religion, and finisim hem every bit. (Rev. 17:15, 16) Tru nao, yumi start for lukim finis no gud tingting wea pipol garem long olketa religion bilong Kristendom. Olketa gavman wea garem strongfela law againstim olketa religion they garem bigfela power finis insaed long United Nations, and pipol wea stap long olketa kantri wea ting hae tumas long religion they lusim olketa religion bilong olketa laen dadi bilong them. Wanem nao every samting hia meanim? Klosap nao false religion bae finis every bit. Bihaen long datwan, taem olketa nation barava tan againstim olketa wea supportim rul bilong Jehovah, kros bilong God bae go againstim olketa gavman and olketa wea supportim them, and finisim them every bit. Then lastfela samting, Satan withim olketa demon bilong hem bae go long hol wea deep tumas, wea they bae no fit for duim any samting long olketa man. Tru nao, diswan bae hem “day bilong Jehovah,” day wea nem bilong hem bae kamap hae.—Ezek. 38:18, 22, 23; Rev. 19:11–20:3.
14. Why nao hem bae no wise for ting say day bilong Jehovah hem farawe yet?
14 Hem bae kam long barava taem bilong hem, for fitim schedule bilong God. Hem bae no late. (Hab. 2:3) Remember, taem wea Jerusalem finis every bit long 70 C.E. hem kam kwiktaem tumas, taem wea olketa Jew no ting hem bae kam, taem they ting danger hem finis nao. And waswe long Babylon bifor? Hem strong for gud, hem garem olketa bigfela wall wea protectim hem. But hem fall daon long wanfela naet. Long sem way tu, “taem for finis every bit” bae kasem disfela system kwiktaem. Taem hem kam, letem yumi garem wan mind long trufela worship, from yumi “tingting everytaem” long day bilong Jehovah.
Samting for Review
● Why nao hem important for “tingting everytaem” long day bilong Jehovah? Hao nao yumi savvy duim datwan?
● Hao nao way for divaedem pipol wea go ahed distaem hem affectim yumi wanwan?
● Wanem nao bae happen bifor day bilong Jehovah hem start? So wanem nao yumi wanwan mas duim distaem?