Chapter Twenti
Tingim Evritaem Day Bilong Jehovah
1. Taem iu firstaem lanem hao wei for sev from olketa nogud samting bilong disfala olo system hem klosap, hao nao iu feel?
WANFALA first samting wea iu lanem from Bible hem hao purpose bilong Jehovah nao for full earth kamap wanfala paradaes. Insaed datfala niu world, war, criminal fasin, poor living, sik, wei for safa, and dae bae nomoa. Olketa wea dae finis tu bae laef bak. Olketa hia nambawan hope! Iumi moa sure hao evri samting hia hem klosap from pruv wea showimaot hao Christ stap moa and rul olsem King long heven finis start long 1914 and start long datfala taem iumi stap insaed olketa last bilong disfala wicked world. Long end bilong olketa last day hia, Jehovah bae distroem disfala system and mekem niu world wea hem promisim for kamap!
2. Wanem nao “day bilong Jehovah”?
2 Bible kolem disfala taem for distroe “day bilong Jehovah.” (2 Peter 3:10) Hem “day bilong kros bilong Jehovah” againstim full world bilong Satan. (Zephaniah 2:3) Hem kasem barava end bilong hem long “war bilong bigfala day bilong God Olmaeti . . . , wea olketa kolem long Hebrew Har–Magedon [Armageddon],” wea “olketa king bilong full earth” bae distroe evribit. (Revelation 16:14, 16) Waswe, wei bilong living bilong iu showaot iu biliv disfala “day bilong Jehovah” hem klosap?—Zephaniah 1:14-18; Jeremiah 25:33.
3. (a) Wanem taem nao day bilong Jehovah bae kam? (b) Hao nao wei wea Jehovah no showim “datfala day and hour” hem gudfala samting?
3 Bible no talem iumi barava date wea Jesus Christ bae kam olsem Man for Mekem Judgment bilong Jehovah kasem system bilong Satan. Jesus hem sei: “No eniwan hem savve datfala day and hour, nomata angel long heven, nomata Son tu, bat Father nomoa hem savve.” (Mark 13:32) Eniwan wea no lovem Jehovah bae garem tingting for sei day bilong hem farawe yet and bae olketa aftarem olketa samting bilong world. Bat olketa wea really lovem Jehovah bae servem hem witim full soul, nomata wanem taem nao disfala wicked system bae finis.—Psalm 37:4; 1 John 5:3.
4. Wanem nao Jesus talem olsem wanfala warning?
4 Jesus givim wanfala warning for olketa wea lovem Jehovah taem hem sei: “Go ahed for lukluk, go ahed for wekap, from iufala no savve long taem wea set finis.” (Mark 13:33-37) Hem encouragem iumi for no letem wei for kaikai and drink or “wari bilong living” for mekem iumi busy tumas gogo iumi no luksavve long wei wea iumi stap insaed long barava important taem.—Luke 21:34-36; Matthew 24:37-42.
5. Olsem Peter explainim, wanem nao bae happen long day bilong Jehovah?
5 Olsem tu, Peter givim kaonsel long iumi for tingim evritaem hao “day bilong Jehovah bae stap, wea thru long diswan heven wea bone long fire bae finis, and olketa part bilong hem wea hot tumas bae melt!” Evri gavman bilong man—“heven”—bae distroe, and tu wicked pipol—“earth”—and “olketa part bilong hem,” olketa idea and nogud samting bilong disfala world, olsem tingting for independent from God, and tu living wea dirty and wea main goal hem for kasem material samting. Evri samting hia bae finis and “olketa niu heven [Kingdom bilong God long heven] and niu earth [wanfala niu community long earth]” wea insaed “raeteous fasin bae stap” nao bae kamap. (2 Peter 3:10-13) Seknomoa olketa samting hia wea affectim full earth bae start long day and hour wea planti no expectim.—Matthew 24:44.
Keepim Saen Front Long Iumi Olowe
6. (a) Long wanem wei nao ansa bilong Jesus for kwestin bilong olketa disaepol fitim end bilong system bilong olketa Jew? (b) Wanem part long ansa bilong Jesus nao storyim olketa samting wea happen and tingting bilong man wea kamap start long 1914?
6 Bikos long taem wea iumi stap insaed, iumi shud savve gud long evri difren part long datfala saen wea showimaot olketa last day—taem bilong “end bilong disfala system.” Tingim hao taem Jesus ansarem kwestin bilong olketa disaepol bilong hem, wea stap long Matthew 24:3, samfala samting wea hem storyim long verse 4 go kasem 22 hem fulfill long smol wei long system bilong olketa Jew midolwan long 33 go kasem 70 C.E. Bat datfala profesi hem fulfill long bigfala wei start kam from 1914, long taem wea Christ “stap moa and end bilong disfala system.” Matthew 24:23-28 talem wanem bae happen from 70 C.E. go kasem taem wea Christ bae stap moa. Olketa samting wea happen long Matthew 24:29–25:46 happen insaed taem bilong end.
7. (a) Why nao iumi wanwan shud no missim wei wea olketa samting wea happen distaem hem fulfillim datfala saen? (b) Ansarem olketa kwestin long end bilong paragraf, long wei for showimaot hao datfala saen hem fulfill finis start kam long 1914.
7 Iumi wanwan shud go ahed for lukluk gud long olketa samting wea happen and tingting bilong pipol wea fulfillim datfala saen. Wei for joinim olketa samting hia witim profesi bilong Bible bae helpem iumi for tingim evritaem day bilong Jehovah. Hem bae mekem iumi fit tu for muvim pipol taem iumi warnim olketa abaotem wei wea datfala day hem klosap. (Isaiah 61:1, 2) Tingim olketa goal hia taem iu reviewim olketa kwestin wea point go long olketa part long datfala saen, wea stap long Matthew 24:7 and Luke 21:10, 11.
Long wanem spesol wei nao profesi abaotem ‘nation againstim nation and kingdom againstim kingdom’ hem start for fulfill long 1914? Saed long olketa war, wanem nao happen bihaen long datfala taem?
Long 1918, wanem sik nao killim dae moa pipol winim World War I? Nomata man garem savve saed long medicine, wanem nao samfala sik wea still killim dae staka million pipol?
Hao big nao wei for hangre hem affectim earth nomata science hem muv ahed insaed long wan handred year wea go pas?
Wanem nao mekem iu sure 2 Timothy 3:1-5, 13 hem storyim, no living from taem bifor kam, bat living wea kakamap moa worse from iumi muv go for end bilong olketa last day?
Separatem Pipol
8. (a) Wanem samting moa wea Jesus storyim long Matthew 13:24-30, 36-43 nao Jesus sei bae happen long taem bilong end bilong disfala system? (b) Wanem nao tokpiksa bilong Jesus hem minim?
8 Olketa narafala big samting kamap tu wea Jesus sei olketa bae happen long taem bilong end bilong disfala system. Wanfala long olketa nao hem wei for separatem “olketa son bilong kingdom” from “olketa son bilong wicked wan.” Jesus story abaotem diswan insaed parabol bilong hem abaotem wheat field wea wanfala enemy hem growim tu rabis grass insaed. “Wheat” long tokpiksa bilong hem stand for olketa tru anointed Christian. “Rabis grass” nao olketa wea sei olketa Christian bat pruvim hao olketa “olketa son bilong wicked wan” bikos olketa hol strong long world wea Devil nao hem rulim. Olketa aotem sekson hia from “olketa son bilong Kingdom [bilong God]” and olketa kasem mark for distroe. (Matthew 13:24-30, 36-43) Waswe, disfala wei for separate hem happen finis?
9. (a) Bihaen World War I, wanem bigfala wei for divaed nao kamap for evriwan wea sei olketa Christian? (b) Hao nao olketa anointed Christian givim pruv hao olketa nao trufala servant bilong datfala Kingdom?
9 Bihaen World War I, evriwan wea sei olketa Christian divaed long tufala sekson: (1) Olketa bigman bilong Christendom and pipol wea followim olketa, wea strong for saportim League of Nations (distaem hem United Nations) nomata olketa still hol strong long wei for loyal long kantri bilong olketa seleva, and (2) olketa tru Christian wea laef bihaen datfala war, wea saportim evribit Messiah Kingdom bilong God, and no olketa nation bilong disfala world. (John 17:16) Olketa hia pruvim wei wea olketa nao trufala servant bilong Kingdom bilong God taem olketa duim waka for preachim “gud nius bilong kingdom” evriwea long earth. (Matthew 24:14) Wanem nao kamaot from datwan?
10. Wanem nao first samting wea kamaot from waka for preach abaotem Kingdom?
10 First samting hem wei for hipimap remnant bilong olketa wea spirit bilong God anointim, wea garem hope for stap witim Christ olsem part bilong datfala Kingdom long heven. Nomata olketa hia stap long olketa nation, olketa kasem wan mind long wei for organize. Lastfala sealing bilong olketa anointed wan hia hem klosap tumas.—Revelation 7:3, 4.
11. (a) Wanem waka for hipimap pipol nao hem go ahed, and diswan hem fitim wanem profesi? (b) Wei wea disfala profesi fulfill hem minim wanem?
11 Then, anda long direction bilong Christ, wei for hipimap “wanfala big crowd . . . wea kamaot from evri nation and tribe and pipol and languis” hem go ahed. Olketa hia part bilong “nara sheep” wea bae winim “datfala big trabol” and go insaed niu world bilong God. (Revelation 7:9, 14; John 10:16) Disfala waka for preachim Kingdom Bilong God bifor end kam hem go ahed kam kasem distaem. Long loyal wei, datfala big crowd bilong nara sheep, wea distaem kasem planti million, helpem olketa anointed remnant for talemaot datfala important message bilong Kingdom. Disfala message hem go kasem evri nation.
Wanem Nao Bae Happen Long Future?
12. Haomas preaching waka nao bae go ahed yet bifor day bilong Jehovah hem kam?
12 Evri pruv wea iumi just storyim showaot iumi stap klosap long end bilong olketa last day and day bilong Jehovah hem klosap tumas. Bat waswe, samfala nara profesi bae fulfill bifor datfala day wea mekem man fraet hem start? Yes. Wanfala samting nao, waka for separatem pipol wea saed witim Kingdom hem no finis yet. Long samfala area wea pipol strong for againstim disfala waka for planti year, distaem namba bilong olketa niu disaepol hem go ahed for grow. Nomata long ples wea pipol rejectim gud nius, mercy bilong Jehovah hem showaot long wei wea iumi givim witness. So go ahed long disfala waka! Jesus promisim iumi hao taem datfala waka hem finis, end bae kam.
13. Olsem 1 Thessalonians 5:2, 3 hem talem, wanem important samting nao no happen yet, and wanem nao datwan bae minim for iumi?
13 Narafala important Bible profesi sei olsem: “Long taem wea olketa sei: ‘Peace and sef living!’ then seknomoa, wei for distroe bae kwiktaem kasem olketa olsem pain bilong babule woman; and olketa bae no savve ranawe.” (1 Thessalonians 5:2, 3) Iumi bae weit for lukluk hao nao datfala toktok “peace and sef living” hem kamap. Bat datwan nating minim olketa leader bilong world bae really stretem olketa problem bilong man. Olketa wea tingim evritaem day bilong Jehovah bae no letem datfala toktok giamanim olketa. Olketa savve hao stretawe bihaen, wei for distroe evribit bae kam.
14. Wanem nao olketa samting wea happen long datfala big trabol, and followim wanem order?
14 Long start bilong datfala big trabol, olketa ruler bae tan againstim Bigfala Babylon, world rul bilong giaman religion, and bae finisim hem evribit. (Matthew 24:21; Revelation 17:15, 16) Bihaen datwan, olketa nation bae tan againstim olketa wea saportim sovereign rul bilong Jehovah, and diswan bae mekem kros bilong Jehovah kasem olketa gavman bilong politik and pipol wea saportim olketa, and bae hem distroem olketa evribit. Datwan nao bae hem Armageddon wea end bilong datfala big trabol. Then, Satan and olketa demon bilong hem mas go insaed hol wea deep tumas and no garem paoa for spoelem olketa man. Diswan nao bae endim day bilong Jehovah taem nem bilong hem kamap hae.—Ezekiel 38:18, 22, 23; Revelation 19:11–20:3.
15. Why nao hem no wise for sei day bilong Jehovah hem farawe yet?
15 End bilong disfala system bae kam long barava taem bilong hem, followim schedule bilong God. Hem bae no leit. (Habakkuk 2:3) Remember, wei wea Jerusalem distroe long 70 C.E. hem kam kwiktaem, taem olketa Jew no expectim, taem olketa tingse danger hem finis. And waswe long Babylon bifor? Hem strong, pipol trustim, and hem garem olketa barava maeti wall. Bat hem foldaon insaed wanfala naet nomoa. Olsem tu, disfala wicked system bae seknomoa finis evribit. Bifor datwan happen, iumi mas wan mind long tru worship, from iumi tingim evritaem day bilong Jehovah.
Review
• Why nao hem important for tingim evritaem day bilong Jehovah? Hao nao iumi savve duim datwan?
• Hao nao wei for separatem pipol wea go ahed for happen distaem hem affectim iumi?
• Wanem nao bae happen bifor day bilong Jehovah hem start? So, wanem nao iumi wanwan shud go ahed for duim?
[Piksa long page 180, 181]
Klosap nao olketa last day bae finis taem system bilong Satan hem distroe evribit