Chapter 24
Purpose bilong Jehovah Win Every Bit
1, 2. (a) Wanem nao purpose bilong Jehovah for everywan wea hem create-im? (b) Hu nao insaed long famili bilong God wea garem wan mind for worshipim hem? (c) From diswan, wanem question nao each wan mas askim hemseleva?
EVERYWAN wea God create-im they wan mind long tru worship and everywan enjoyim nambawan freedom bilong olketa pikinini bilong God—hem nao wise and loving purpose bilong Jehovah. And tu hem nao samting wea pipol wea love-im raeteous fashion they barava wantim.
2 Jehovah start for fulfillim disfela nambawan purpose taem hem start for create-im every samting. Firstfela samting wea hem create-im hem wanfela Son, wanfela wea “showim aot glory bilong hem and fashion bilong hem every bit.” (Heb. 1:1-3) Dis wan hem different every bit, from God nomoa create-im hem. Thru long hem otherfela son they kamap—firstaem, olketa angel long heven, then olketa man long earth. (Job 38:7; Luke 3:38) Every son hia they wanfela famili long universe. Jehovah nao hem God bilong them, Man wea they mas worshipim. Hem nao Sovereign bilong Universe. And tu hem loving Father bilong them. Waswe, hem Father bilong yu, and waswe, yu wanfela pikinini bilong hem? Hem nambawan samting for fren olsem withim hem!
3. (a) Why nao no anywan long yumi born kam olsem son bilong God? (b) But wanem loving samting nao Jehovah provide-im for olketa pikinini bilong Adam?
3 Nomata olsem, yumi mas luksavvy hao taem firstfela dadi and mami bilong yumi kasem judgment for dae from they mean for duim sin, God aotem them from Eden and no hapi withim them. They no part moa long famili bilong Jehovah long universe. (Gen. 3:22-24; lukim Deuteronomy 32:4, 5.) From yumi everywan kam from laen bilong Adam wea sin, yumi born kam withim fashion for duim sin. From yumi olketa pikinini bilong tufela wea they raosem from famili bilong God, yumi no savvy say yumi olketa son bilong God from yumi born kam olsem man. But Jehovah savvy samfela long laen bilong Adam bae love-im raeteous fashion, and Hem provide-im loving samting mekem olketa hia savvy kasem nambawan freedom olsem olketa pikinini bilong God.—Rom. 8:20, 21.
Gudfela Position bilong Israel
4. (a) Long wanem faondeson nao olketa Israelite they “olketa son” bilong God? (b) Wanem nao diswan no meanim?
4 Samting olsem 2,500 year bihaen hem workim Adam, Jehovah givim moa long samfela man, datfela privilege for fren withim hem olsem olketa son bilong hem. For fitim covenant bilong hem withim Abraham, Jehovah choosim Israel for kamap pipol bilong hem. Dastawe, taem hem toktok withim Pharaoh bilong Egypt, hem kolem Israel “son bilong mi.” (Ex. 4:22, 23; Gen. 12:1, 2) Bihaen hem givim Israel Law bilong hem long Maunt Sinai, hem mekem them kamap olsem wanfela nation and use-im them for purpose bilong hem. From they “spesel sekson” bilong Jehovah, olsem wanfela nation they “olketa son” bilong God. (Deut. 14:1, 2; Isa. 43:1) And tu, from hem deal withim samfela insaed long datfela nation long spesel way, Jehovah kolem them olketa son bilong hem. (1 Chron. 22:9, 10) Diswan hem from they garem spesel covenant withim God. But, hem no meanim they enjoyim nambawan freedom wea Adam garem taem hem wanfela son bilong God. They still slave long sin and dae.
5. Hao nao Israel lusim way for stap gud withim God?
5 Nomata olsem, from they olketa son bilong God they fit for stap gud withim hem. They garem responsibility tu for respectim Father bilong them and work followim purpose bilong hem. Jesus mek hae long way wea hem barava important for they duim diswan—no for say God hem Father bilong them nomoa, but ‘prove-im themseleva’ olsem olketa son bilong hem. (Matt. 5:43-48; Mal. 1:6) But, olsem wanfela nation, olketa Jew they fail long diswan. So, insaed olketa lastfela year bilong ministry bilong Jesus long earth, taem olketa Jew wea trae for killim Jesus they say, “Mifela garem wanfela Father, God,” Jesus talem them stret hao samting wea they duim and fashion bilong them show aot they liar. (John 8:41, 44, 47) Long 33 C.E. God hem finisim Law covenant, and faondeson bilong datfela spesel way for fren wea Israel garem, hem finis. Nomata olsem, Jehovah no finis for garem samfela man for olsem olketa son bilong hem.
Jehovah Mekem Pipol bilong Hem Garem Wan Mind
6. Wanem “administration” nao Paul story abaot long Ephesians 1:9, 10, and wanem nao goal bilong hem?
6 Aposol Paul hem raet for olketa Kristian long Ephesus abaotem program bilong Jehovah for mekem pipol bilong hem garem wan mind—samting wea God arrangim for olketa wea showim aot faith savvy kamap olketa member bilong famili bilong Hem, taem hem say olsem: “[God] talem yumi disfela holy secret bilong will bilong hem. Hem hapi nao for decide for wanfela administration [way for rulim haos] long taem wea hem markem finis, for hipim ap moa every samting insaed long Kraest, olketa samting long heven and olketa samting long earth.” (Eph. 1:9, 10) Disfela “administration” point go long Jesus Kraest. Thru long hem, olketa man fit for stap gud front long God—samfela withim hope for stap long heven; otherfela, long earth—for serve long wan mind withim olketa angel wea they son bilong God wea loyal long Jehovah.
7. Wanem nao “olketa samting long heven,” and wanem nao way for hipim them ap hem meanim for them?
7 Firstfela samting, start long Pentecost bilong 33 C.E., hem readyim way for “olketa samting long heven,” hem nao, olketa wea bae rul withim Kraest long Kingdom bilong heven. Long faondeson bilong faith bilong them long sakrifaes bilong Jesus, God talemaot way wea they raeteous. (Rom. 5:1, 2) Then they “born again,” or kamap olsem olketa son bilong God withim hope for laef long heven. (John 3:3; 1:12, 13) God mekem wanfela niufela covenant withim disfela spiritual nation. Go-go, olketa Jew and Gentile tu they insaed long disfela sekson, and full namba bilong them bae kasem 144,000.—Gal. 3:26-29; Rev. 14:1.
8. Hao nao way for fren midlwan long olketa wea bae rul insaed Kingdom and Father, hem different from olketa Jew wea stap under long Law bilong Moses?
8 Nomata they still no perfect long body, remnant bilong olketa wea bae rul insaed Kingdom long heven they enjoyim nambawan klos way for fren withim Father. Paul hem raet abaot diswan: “From yufela olketa son, God hem sendem spirit bilong Son bilong hem insaed long heart bilong yumi and hem singaot olsem: ‘Abba, Father!’ So, then, yu no wanfela slave moa but wanfela son; and sapos yu wanfela son, yu wanfela wea bae rul tu thru long God.” (Gal. 4:6, 7) Datfela toktok “Abba” hem meanim “dadi” long Aramaic langwis, but hem toktok wea show aot love—olsem smallfela pikinini use-im for dadi bilong hem. From nambawan sakrifaes bilong Jesus and kaenfela fashion bilong God, olketa Kristian hia wea spirit anointim they barava fren gud withim God winim any man wea stap under long Law hem fit for duim. But, samting wea stap front long them hem moabeta.
9. They mas duim wanem samting for kamap really son?
9 Sapos they faithful go kasem dae, they bae kamap really son taem they resurrect for laef long heven wea they bae no dae moa. Long there they bae garem privilege for serve long wan mind withim Jehovah God. Fewfela nomoa long olketa son bilong God hia still stap long earth.—Rom. 8:14, 23; 1 John 3:1, 2.
Hipim Ap “Olketa Samting long Earth”
10. (a) Wanem nao “olketa samting long earth,” and start long wanem taem nao they hipim them tugeta for worship? (b) Wanem way for fren stap midlwan long them and Jehovah?
10 Datfela sem “administration” wea mekem way for they hipim ap olketa man insaed long famili bilong God for laef long heven, hem lukluk long “olketa samting long earth” tu. Diswan hem moa tru start kam long year 1935 C.E. wea they hipim ap olketa wea garem faith long sakrifaes bilong Kraest and hope for laef olawe long earth. Tugeta withim olketa bilong anointed class wea still stap, they mek hae long nem bilong Jehovah and worship bilong hem. (Zeph. 3:9; Isa. 2:2, 3) Withim bigfela respect, olketa hia tu kolem Jehovah “Father,” they luksavvy long hem olsem Man Wea Givim laef, and they trae hard for showim aot olketa fashion bilong hem, olsem hem wantim olketa son bilong hem for duim. They enjoyim way for stap gud front long hem long faondeson bilong faith bilong them long blood bilong Jesus wea hem givim. (Matt. 6:9; Rev. 7:9, 14) But they savvy, hapi wea they bae kasem olsem olketa pikinini bilong God hem still stap long future.
11. (a) Wanem nao Romans 8:19-21 promisim for olketa man? (b) Wanem nao disfela “taem wea olketa son bilong God they show aot klia” wea they barava waitim?
11 Olsem Romans 8:19-21 show aot, they barava waitim “taem wea olketa son bilong God they show aot klia,” bikos long datfela taem nao olketa man hia bae “kamap free from way for slave long badfela fashion.” Datfela taem for “show aot klia” bae happen taem olketa man long earth lukim samting wea prove-im olketa anointed son bilong God wea kasem reward bilong them long heven, they start for duim work bilong them withim Lord, Jesus Kraest. Diswan bae show aot taem disfela badfela system hem finis every bit, then bihaen olketa blessing bilong Wan Thousand Year Rul bilong Kraest bae kamap, wea “olketa son bilong God” bae share withim hem olsem king and priest.—Rev. 2:26, 27; 20:6.
12. Bihaen long great tribulation, wanem singsing bilong praise nao olketa anointed son bilong God wea win bae singim? Wanem nao diswan hem meanim?
12 Hem bae gud tumas taem great tribulation hem finis and olketa son bilong God wea wan mind withim Kraest they praisim God, taem they singaot olsem: “Jehovah God, Olmaeti Wan, olketa work bilong yu big tumas and they nambawan. Olketa way bilong yu raeteous and tru, King bilong olawe. Hu nao bae no fraet long yu, Jehovah, and givim glory long nem bilong yu, from yu nomoa yu loyal? Every nation bae kam and worshipim yu, from olketa raeteous rul bilong yu they show aot klia”! (Rev. 15:3, 4) Tru nao, every man, wea kam from every nation bilong bifor, bae worshipim tru God withim wan mind. Olketa insaed long grave tu bae resurrect and garem chance for praisim Jehovah.
13. Wanem nambawan freedom nao olketa wea winim great tribulation bae enjoyim?
13 Satan bae no “god bilong disfela system” moa. Hem bae no spoelem moa olketa wea worshipim Jehovah hia long earth. (2 Cor. 4:4; Rev. 20:1-3) False religion bae no giaman moa for stand for loving God bilong yumi and divaedem olketa man. Olketa bigman long gavman bae no spoelem moa or deal withim olketa servant bilong tru God long no gud way. Every samting hia meanim olketa wea winim great tribulation bae kasem nambawan freedom!
14. Thru long wanem samting nao they bae kamap free from sin and every samting wea hem bringim?
14 Olsem “Lamb bilong God wea tekem awe sin bilong world,” Jesus Kraest bae use-im sakrifaes bilong hem for aotem every sin wea olketa man duim bifor. (John 1:29) Long earth, taem Jesus talem hao hem forgivim sin bilong man, hem healim man hia tu for prove-im diswan. (Matt. 9:1-7) Long sem way, from heven, hem bae duim mirakel for healim olketa wea blind, earpass, no savvy toktok, olketa wea cripple, olketa wea mental and other kaen sik. Go-go, taem they faithful for followim olketa raeteous way bilong God, everywan wea willing and obey bae no garem moa “law bilong sin” insaed long themseleva, so, every samting wea they duim, tingting bilong them and samting wea heart bilong them wantim bae mekem themseleva and God hapi. (Rom. 7:21-23; lukim Isaiah 25:7, 8 and Revelation 21:3, 4.) Bifor end bilong Wan Thousand Year Rul, they bae kamap perfect pipol. They bae free every bit from sin and every no gud samting wea hem bringim. Long proper way they bae showim aot ‘fashion bilong God’ insaed long wanfela Paradaes earth wea coverim whole earth.—Gen. 1:26.
15. Long end bilong Wan Thousand Year Rul, wanem nao Kraest bae duim? Wanem nao goal bilong diswan?
15 Taem Kraest hem mekem olketa man kamap perfect, hem bae givim go back long Father, datfela power wea hem kasem for duim disfela work. Olsem profesi long 1 Corinthians 15:28 talem: “Taem every samting stap under long hem [Son] finis, then Son bae putim hemseleva under long dat Wan wea putim every samting under long hem, for mekem God mas kamap every samting long everywan.”
16. Wanem nao olketa man wea perfect bae kasem, and why nao olsem?
16 Then, olketa man wea perfect bae garem chance for showim aot they choose for servim only tru God for olawe. So, bifor hem adoptim them olsem olketa son bilong hem thru long Jesus Kraest, Jehovah bae letem every man hia wea perfect for kasem wanfela lastfela test. Satan and olketa demon bae kam aot from hol wea deep tumas. Long olketa wea really love-im Jehovah, diswan bae no spoelem them for olawe. But anywan wea no loyal for obey long Jehovah bae finis every bit for olawe withim datfela first wan wea no obey and olketa demon bilong hem.—Rev. 20:7-10.
17. For fulfillim purpose bilong Jehovah, wanem kaen living nao everywan wea hem create-im bae garem moa?
17 Then long loving way Jehovah bae adoptim olsem olketa son bilong hem, thru long Kraest, every man wea perfect wea stand strong long datfela lastfela test. Then they bae share every bit long “nambawan freedom bilong olketa pikinini bilong God.” (Rom. 8:21) They bae kamap part long famili bilong God wea garem wan mind long universe, wea Jehovah nomoa bae God for olawe, Sovereign bilong Universe, and loving Father bilong them. Then everywan wea Jehovah create-im, long heven and earth, bae wan mind moa for worshipim disfela only tru God.
Samting for Review
● Bifor they againstim God long Eden, wanem kaen way for fren stap midlwan long Jehovah and everywan wea worshipim hem?
● Wanem responsibility nao olketa son bilong God garem?
● Hu nao olketa son bilong God distaem? Hu nao bae kamap olketa pikinini bilong God? Hao nao diswan join withim purpose bilong Jehovah for garem wan mind long worship?