Wanfala Administration for Fulfillim Plan Bilong God

“[God] hem duim evri samting for followim direction bilong will bilong hem.” —EPHESIANS 1:11.

1. Why nao evri kongregeson bilong Olketa Jehovah’s Witness bae hipap long April 12, 2006?

LONG Wednesday evening, April 12, 2006, samting olsem 16 million pipol bae hipap for celebratem Evening Kaikai bilong Lord. Long each ples, bae wanfala tebol stap wea olketa putim bred wea no garem yeast and red wine tu. Bred hia piksarem body bilong Christ and datfala red wine hem piksarem blood bilong hem. Gogo for end bilong tok abaotem mining bilong Memorial bilong dae bilong Jesus, bae olketa pasim raon bred and wine hia. Long tu-thri kongregeson bilong Olketa Jehovah’s Witness nomoa wanfala or samfala bae kaikaim bred and drinkim wine. Bat, long plande narawan, no eniwan bae duim diswan. Why nao smol namba bilong olketa Christian hia, wea olketa nao garem hope for go long heven, olketa kaikaim bred and drinkim wine, bat staka wea garem hope for laef olowe long earth no duim datwan?

2, 3. (a) Wanem nao olketa first samting wea Jehovah creatim followim plan bilong hem? (b) Why nao Jehovah creatim earth and olketa man?

² Jehovah hem God wea garem plan. Taem hem fulfillim plan bilong hem, hem “duim evri samting for followim direction bilong will bilong hem.” (Ephesians 1:11) Firstaem, hem creatim only Son bilong hem. (John 1:1, 14; Revelation 3:14) Then, thru long disfala Son, Jehovah creatim wanfala famili bilong olketa spirit son and gogo, hem creatim full universe, insaed diswan hem earth and olketa man tu.—Job 38:4, 7; Psalm 103:19-21; John 1:2, 3; Colossians 1:15, 16.

³ Jehovah no wakem earth olsem wanfala ples for testim man for faendaot sapos hem fit for go long heven and stap witim olketa spirit son bilong hem, wea hem nao teaching bilong plande church wea sei olketa Christian. Hem garem plan taem hem wakem earth, hem nao for “pipol stap long hem.” (Isaiah 45:18) God creatim earth for man stap long hem, and hem creatim man for stap long earth. (Psalm 115:16) Plan bilong hem for full earth kamap paradaes, and hem bae fulap witim olketa raeteous pipol, and olketa bae lukaftarem gud. No enitaem God talem long Adam and Eve hao gogo tufala savve go ap long heven.—Genesis 1:26-28; 2:7, 8, 15.

Kwestinim Plan Bilong Jehovah

4. Hao nao kwestin abaotem wei wea Jehovah rul hem kamap long start long history bilong olketa man?

⁴ Wanfala spirit son bilong God bighed and barava want for spoelem plan bilong Jehovah taem hem iusim long rong wei present bilong free will wea God givim long hem. Hem spoelem peace bilong evriwan wea love nao muvim olketa for stap anda long sovereign rul bilong Jehovah. Satan leadim first man and woman for startim wei for independent from God. (Genesis 3:1-6) Hem no sei Jehovah no garem paoa, bat hem kwestinim wei wea Jehovah showimaot sovereign rul bilong hem, wea minim Satan kwestinim right wea Jehovah garem for rul. So, long start long history bilong olketa man, wei for kwestinim sovereign rul bilong Jehovah kamap hia long earth.

5. Wanem mek-tu samting nao Satan hem kwestinim and from diswan, faithful fasin bilong hu nao hem kwestinim?

⁵ Samting wea barava join witim datfala main kwestin nao hem datfala mek-tu samting wea Satan kwestinim long taem bilong Job. Satan kwestinim reason why olketa man and angel stap anda long Jehovah and servem Hem. Satan talem toktok wea showimaot hem tingse olketa man garem selfish reason for servem Jehovah and sapos olketa kasem hard taem, bae olketa againstim God. (Job 1:7-11; 2:4, 5) Hem tru, samting wea toktok bilong Satan showimaot hem saed long wanfala servant bilong Jehovah hia long earth, nomata olsem, datwan showimaot hao Satan kwestinim tu olketa spirit son bilong God, and tu, only Son wea Jehovah seleva wakem.

6. Hao nao Jehovah faithful saed long plan bilong hem and nem bilong hem?

⁶ From Jehovah faithful for fulfillim plan bilong hem, and tu, hem faithful saed long mining bilong nem bilong hem, hem mekem hemseleva kamap wanfala Profet and Man for sevem olketa man.a Hem sei olsem long Satan: “Mi bae putim fasin for heit midolwan long iu and long woman and midolwan long seed bilong iu and seed bilong hem. Hem bae killim iu long hed and iu bae killim hem long leg.” (Genesis. 3:15) Thru long Seed bilong “woman” bilong hem, wea minim organization bilong hem long heven, Jehovah bae givim ansa long Satan and givim olketa pikinini bilong Adam hope for kasem laef.—Romans 5:21; Galatians 4:26, 31.

“Holy Secret Bilong Will Bilong Hem”

7. Wanem plan nao Jehovah showimaot thru long aposol Paul?

⁷ Long leta wea aposol Paul raetem for olketa Christian long Ephesus, hem explainim long nambawan wei hao Jehovah directim evri samting for fulfillim plan bilong hem. Paul raet olsem: “Hem showimaot long iumi datfala holy secret bilong will bilong hem. For followim plan bilong hem, hem hapi for garem wanfala administration long barava taem wea hem markem finis, for hipimap moa evri samting insaed long Christ, olketa samting long heven and olketa samting long earth.” (Ephesians 1:9, 10) Nambawan plan bilong Jehovah hem for mekem evriwan wea stap long full universe garem wan mind and stap anda long sovereign rul bilong hem from love nao muvim olketa. (Revelation 4:11) Datwan bae mekem nem bilong hem kamap holy, hem bae showimaot tu hao Satan hem man for laea, and will bilong God bae kamap “long earth, olsem long heven.”—Matthew 6:10.

8. Wanem nao mining bilong word wea olketa transleitim “administration”?

⁸ Samting wea Jehovah “hem hapi” long hem, wea minim plan bilong hem, bae fulfill thru long “wanfala administration.” Long hia, Paul iusim wanfala word wea really minim “wei for mek sure evri samting gohed gud long haos.” Hem no minim wanfala gavman, olsem datfala Messiah Kingdom, bat hem minim wei for mek sure evri samting gohed gud.b Nambawan samting wea Jehovah bae duim for mek sure plan bilong hem fulfill hem join witim wanfala “holy secret” wea bae isisi showaot insaed plande handred year.—Ephesians 1:10; 3:9, olketa footnote.

9. Hao nao Jehovah isisi showimaot holy secret bilong will bilong hem?

⁹ Thru long olketa covenant, Jehovah isisi showimaot wei wea plan bilong hem bae fulfill saed long datfala Seed wea hem promisim long Eden. Covenant bilong hem witim Abraham showimaot hao datfala Seed bae kam long earth thru long laen bilong Abraham, and thru long hem nao “evri nation bilong earth” bae barava blessim olketa seleva. Datfala covenant hem showimaot tu hao olketa narawan bae join witim datfala main part bilong seed. (Genesis 22:17, 18) Law covenant wea Jehovah mekem witim olketa Israelite showimaot hao plan bilong Jehovah hem for garem “wanfala kingdom bilong olketa priest.” (Exodus 19:5, 6) Covenant wea hem mekem witim David showimaot hao datfala Seed bae Hed bilong wanfala Kingdom for olowe. (2 Samuel 7:12, 13; Psalm 89:3, 4) Bihaen Law covenant hem leadim olketa Jew go long Messiah, Jehovah showimaot samfala samting moa wea hem bae duim for fulfillim plan bilong hem. (Galatians 3:19, 24) Olketa wea join witim datfala main part bilong seed bae insaed long wanfala “kingdom bilong olketa priest” and bae insaed long “wanfala niu covenant,” from olketa kamap datfala niu “Israel,” wea hem wanfala spiritual nation.—Jeremiah 31:31-34; Hebrews 8:7-9.c

10, 11. (a) Hao nao Jehovah showimaot datfala Seed wea profesi story abaotem? (b) Why nao only Son wea God seleva wakem hem kam long earth?

¹⁰ For mek sure disfala plan bilong God hem fulfill, gogo hem kasem taem nao for datfala Seed wea profesi story abaotem for kam long earth. Jehovah sendem angel Gabriel for talem Mary hem bae bornem wanfala son wea hem mas nemim hem Jesus. Angel hia hem sei: “Hem bae kamap nambawan and olketa bae kolem hem Son bilong Most Hae; and Jehovah God bae givim hem throne bilong dadi bilong hem, David, and hem bae rul olsem king ovarem laen bilong Jacob for olowe, and kingdom bilong hem bae no savve finis.” (Luke 1:32, 33) Long datfala taem nao hem klia hu nao datfala Seed wea Jehovah promisim.—Galatians 3:16; 4:4.

¹¹ Only Son wea Jehovah seleva wakem mas kam long earth mekem faithful fasin bilong hem kasem test evribit. Long datfala taem Jesus garem nambawan chance for givim ansa for olketa samting wea Satan kwestinim thru long samting wea hem duim long earth. So kwestin long datfala taem hem: Waswe, bae hem gohed faithful long Dadi bilong hem? Diswan hem join witim wanfala holy secret. Bihaen, aposol Paul explainim part wea Jesus duim long wei olsem: “Holy secret bilong disfala fasin for lovem God hem nambawan: ‘Hem kamap man long earth, God showimaot hem raeteous taem hem resurrectim hem olsem spirit, olketa angel lukim hem, pipol preach abaotem hem long olketa nation, olketa long world bilivim hem, and God acceptim hem bak long heven witim glory.’” (1 Timothy 3:16) Tru nao, from Jesus barava faithful go kasem taem hem dae, hem givim klia ansa for samting wea Satan kwestinim. Nomata olsem, olketa narafala information abaotem datfala holy secret hem no showaot yet.

“Holy Secret Bilong Kingdom Bilong God”

12, 13. (a) Wanem nao wanfala part long “datfala holy secret bilong kingdom bilong God”? (b) Wanem nao insaed wei wea Jehovah chusim wanfala smol namba bilong olketa man for go long heven?

¹² Long wanfala taem wea Jesus go preach long Galilee, hem showimaot hao datfala holy secret hem barava join witim Messiah Kingdom gavman wea hem bae rulim. Hem sei olsem long olketa disaepol bilong hem: “Iufala nao kasem wei for minim olketa holy secret bilong kingdom bilong heven [“kingdom bilong God,” Mark 4:11].” (Matthew 13:11) Wanfala part long datfala secret hem wei wea Jehovah chusim wanfala “smolfala sekson” from earth, wea hem nao 144,000, for stap witim Son bilong hem olsem part bilong datfala seed, for rul witim hem long heven.—Luke 12:32; Revelation 14:1, 4.

¹³ From Jehovah creatim olketa man for stap long earth, wei wea samfala bae go long heven hem minim Jehovah mas mekem “wanfala niu creation.” (2 Corinthians 5:17) Aposol Paul wea hem wanfala wea garem disfala spesol hope for go long heven, hem raet olsem: “Blessim God and Father bilong Lord bilong iumi, Jesus Christ, from thru long bigfala mercy bilong hem, hem givim iumi niufala wei for born for wanfala really hope thru long resurrection bilong Jesus Christ from dae, for kasem wanfala laef wea no savve finis, wea klin evribit and wea no savve lus. Diswan stap redi for iufala long heven.”—1 Peter 1:3, 4.

14. (a) Hao nao olketa wea no Jew join insaed “holy secret bilong kingdom bilong God”? (b) Hao nao iumi fit for minim olketa “deep samting bilong God”?

¹⁴ Datfala holy secret hem garem narafala part saed long datfala Kingdom gavman long future. Will bilong God nao hem for olketa wea no Jew for kamap part bilong datfala smol sekson wea bae rul witim Christ long heven. Paul hem explainim disfala part bilong “administration” bilong Jehovah, wea hem nao wei for mek sure plan bilong hem fulfill, taem hem sei olsem: “Long olketa narafala genereson disfala secret no showaot long olketa son bilong man olsem hem showaot distaem long olketa holy aposol and profet bilong hem thru long spirit, hem nao, for pipol bilong olketa nation shud sharem and kamap member bilong datfala body and join witim iumi long datfala promis wea wan mind witim Christ Jesus thru long gud nius.” (Ephesians 3:5, 6) Jehovah hem showimaot mining bilong disfala part bilong datfala holy secret long “olketa holy aposol.” Long distaem hem semsem tu, sapos iumi no kasem help from holy spirit, bae iumi nating minim olketa “deep samting bilong God” olsem.—1 Corinthians 2:10; 4:1; Colossians 1:26, 27.

15, 16. Why nao Jehovah chusim wanfala sekson from earth for rul witim Christ?

¹⁵ Bible talem hao God “baem from earth” datfala “wan handred and foti-foa thousand” wea standap witim “Lamb” long Maunt Zion, “from midolwan long olketa man olsem olketa firstfala frut for God and for datfala Lamb,” Christ Jesus. (Revelation 14:1-4) Jehovah chusim firstfala son bilong hem long heven for kamap main part bilong seed wea hem promisim long Eden, bat why nao hem chusim olketa wea bae rul witim Christ from earth? Aposol Paul explainim hao disfala smol namba hem “olketa wea [Jehovah] markem for followim plan bilong hem,” “followim will bilong hem wea hem barava want for duim.”—Romans 8:17, 28-30; Ephesians 1:5, 11; 2 Timothy 1:9.

¹⁶ Plan bilong Jehovah hem for mek holy long nambawan and holy nem bilong hem and for vindicatem rul bilong hem long universe. Thru long barava wisefala “administration” bilong hem, wea hem nao wei for mek sure evri samting gohed gud, Jehovah sendem firstborn Son bilong hem long earth wea kasem test evribit. And tu, Jehovah disaedem hao samfala from earth wea sapotim sovereign rul bilong Hem go kasem taem olketa dae, bae rul insaed disfala Messiah Kingdom gavman wea Son bilong hem rulim.—Ephesians 1:8-12; Revelation 2:10, 11.

17. Why nao iumi hapi for savve hao Christ and olketa wea bae rul witim hem olketa laef long earth bifor tu?

¹⁷ Jehovah showimaot bigfala love bilong hem for olketa pikinini bilong Adam taem hem sendem Son bilong hem long earth, and taem hem chusim samfala long earth for rul witim Son bilong hem insaed datfala Kingdom gavman. Hao nao diswan savve helpem olketa narawan wea faithful long Jehovah, start long Abel kam kasem distaem? From olketa man wea no perfect kamap slave long sin and dae taem olketa born, olketa needim spiritual and physical healing and need for kamap perfect, for fitim datfala first plan bilong Jehovah for olketa man. (Romans 5:12) Evriwan wea luk forward for laef olowe long earth kasem bigfala comfort for savve King bilong olketa bae showimaot sem love and feeling olsem hem duim for olketa disaepol bilong hem taem hem stap long earth! (Matthew 11:28, 29; Hebrews 2:17, 18; 4:15; 7:25, 26) Wei wea Christ and olketa wea bae king and priest witim hem long heven olketa faithful man and woman wea stragol tu witim olketa wik point and feisim olketa hard taem long laef olsem iumi, hem barava encouragem iumi!—Romans 7:21-25.

Plan Bilong Jehovah wea Nating Savve Fail

18, 19. Why nao toktok bilong Paul long Ephesians 1:8-11 hem moa klia long iumi, and wanem nao bae iumi storyim long next article?

¹⁸ Distaem iumi minim gud go moa toktok bilong Paul for olketa anointed Christian, wea stap long Ephesians 1:8-11. Hem talem hao Jehovah showimaot long olketa “datfala holy secret bilong will bilong hem,” hao hem markem olketa for “rul witim” Christ, and hao hem ‘chusim olketa finis followim plan bilong hem wea hem duim evri samting for followim direction bilong will bilong hem.’ Iumi luksavve wei wea diswan hem join witim nambawan “administration” bilong Jehovah for fulfillim plan bilong hem. Diswan helpem iumi tu for minim why nao tu-thri Christian nomoa wea attendim Evening Kaikai bilong Lord, olketa kaikaim bred and drinkim wine.

¹⁹ Long next article bae iumi storyim wanem nao Memorial bilong dae bilong Christ hem minim for olketa Christian wea hope bilong olketa hem for go long heven. Bae iumi lanem tu why plande million wea hope for laef long earth olowe shud barava interest tumas long samting wea datfala Memorial hem piksarem.

[Footnotes]

Review

• Why nao Jehovah creatim earth and putim man insaed?

• Why nao only Son wea Jehovah seleva wakem mas kasem test long earth?

• Why nao Jehovah chusim sekson wea bae rul witim Christ from olketa man long earth?