Chapter 2
Buk wea Showim Aot Savvy Bilong God
1, 2.Why nao yumi needim Creator for guide-im yumi?
HEM fitim loving Creator bilong yumi for provide-im wanfela buk wea givim instruction and samting for guide-im olketa man. And waswe, yu agree hao olketa man needim samwan for guide-im them?
2 Winim 2,500 year bifor, wanfela profet and man wea raetem history hem say: “Hem no fitim man wea wakabaot for stretem go-go bilong hem.” (Jeremiah 10:23) Distaem, way wea datfela toktok hem tru hem show aot klia tumas. Dastawe, man for raetem history, Professor William H. McNeill hem say: “Living bilong man long earth kam kasem disfela taem hem nao bigfela trabel olawe and diswan spoelem gudfela living bilong every pipol.”
3, 4. (a) Long wanem kaen way nao yumi mas studyim Bible? (b) Wanem nao yumi bae duim for lukluk long Bible?
3 Bible talem every wise samting wea yumi needim for guide-im yumi. Hem tru, planti pipol ting Bible hem hardfela buk tumas taem they lukluk firstaem insaed long hem. Hem wanfela big buk, and samfela part bilong hem, they hard for meanim. But sapos yu kasem wanfela important pepa wea talem wanem yu mas duim for kasem wanfela samting wea garem hae price, waswe, bae yu spendem taem for studyim gud? Sapos yu no meanim gud samfela part bilong datfela pepa, yu bae askim samwan wea savvy gud for helpem yu. Hem gud tumas sapos yu tingting olsem abaotem way for studyim Bible. (Acts 17:11) Samting wea moa important hem insaed long diswan winim way for kasem material samting. Olsem yumi learnim long firstfela chapter, disfela savvy bilong God bae lead go long laef olawe.
4 Letem yumi lukluk long buk wea showim aot savvy bilong God. Firstaem yumi bae lukluk long samfela main point bilong Bible. Then yumi bae story abaotem olketa reason why pipol wea garem savvy they believe hem nao Word bilong God.
SAMTING WEA STAP INSAED BIBLE
5. (a) Wanem nao insaed long olketa Hebrew Scripture? (b) Wanem nao insaed long olketa Greek Scripture?
5 Bible hem garem 66 buk wea divaed long tufela sekson, wea planti taem pipol kolem Old Testament and Niu Testament. They raetem thirty-naen Bible buk long Hebrew langwis and 27 long Greek langwis. Olketa Hebrew Scripture, wea start long Genesis go kasem Malachi, story abaotem creation and firstfela 3,500 year long history bilong olketa man. Taem yumi lukluk long disfela part bilong Bible, yumi savvy learn abaotem way wea God hem deal withim olketa Israelite—from taem wea they start olsem wanfela nation long mek-16 century B.C.E. go kasem mek-5 century B.C.E.a Olketa Greek Scripture, wea garem buk bilong Matthew go kasem Revelation, story abaotem olketa teaching and samting wea Jesus Kraest and olketa disaepol bilong hem they duim insaed long first century C.E.
6.Why nao yumi mas studyim full Bible?
6 Samfela say “Old Testament” hem for olketa Jew and “Niu Testament” hem for olketa Kristian. But olsem 2 Timothy 3:16 hem talem, “every Scripture kam from God and hem gud.” So, for studyim olketa Scripture long proper way hem meanim for studyim full Bible. Tru nao, tufela part bilong Bible they barava fitim each other, they work tugeta for meanim wanfela main theme.
7.Wanem nao theme bilong Bible?
7 Maet yu attendim olketa service long religion bilong yu for planti year finis and yu herem taem they readim samfela part bilong Bible. Or yuseleva maet readim samfela part. Waswe, yu savvy Bible hem garem wanfela theme wea joinim Genesis go kasem Revelation? Yes, wanfela theme nao insaed long Bible. Wanem nao datfela theme? Hem nao way for prove-im every bit God nomoa fit for rulim olketa man and hao loving purpose bilong hem thru long Kingdom bilong hem bae kamap tru. Bihaen, yumi bae lukim hao God bae fulfillim datfela purpose.
8.Bible showim aot wanem samting abaotem fashion bilong God?
8 For join withim way for talemaot olketa purpose bilong God, Bible showim aot fashion bilong God tu. For example, yumi learnim from Bible hao God hem garem feeling and olketa samting wea yumi choosim they important long hem. (Psalm 78:40, 41; Proverbs 27:11; Ezekiel 33:11) Psalm 103:8-14 say God hem “garem mercy and hem kaenfela, hem no savvy kros kwiktaem and hem fulap withim loving-kaeness.” Hem garem fashion for feel sorry long yumi, and hem ‘remember hao yumi kam from dust’ and bae yumi go back long dust taem yumi dae. (Genesis 2:7; 3:19) Hem showim aot olketa nambawan fashion! Waswe, hem nao datkaen God wea yu want for worshipim?
9.Hao nao Bible talem klia long yumi olketa mark bilong God, and hao nao yumi savvy kasem gudfela samting from diskaen savvy?
9 Bible hem showim aot klia olketa mark bilong God. Samfela taem they raetem olsem olketa law. But, planti taem, they olketa principle wea show aot long samfela samting wea really happen. God mekem pipol raetem samfela samting wea happen long history bilong Israel bifor for helpem yumi. Olketa stretfela story hia showim aot samting wea happen taem pipol duim samting followim purpose bilong God, and no gud samting wea kamap taem they followim tingting bilong themseleva. (1 Kings 5:4; 11:4-6; 2 Chronicles 15:8-15) Taem yumi readim olketa story olsem wea really happen, diswan bae affectim heart bilong yumi. Sapos yumi trae for piksarem olketa samting wea happen, yumi savvy feel olsem pipol wea insaed long olketa samting hia. Then, olketa gudfela example savvy helpem yumi and yumi savvy stap klia long olketa trap wea pipol wea duim rong they fall daon insaed. But, disfela important kwestin hem needim wanfela ansa: Hao nao yumi savvy sure samting wea yumi readim insaed long Bible hem kam from God?
YU SAVVY TRUSTIM BIBLE?
10. (a) Why nao samfela say Bible hem no fitim taem bilong yumi? (b) Wanem nao 2 Timothy 3:16, 17 talem yumi abaotem Bible?
10 Maet yu luksavvy hao planti buk wea givim advice they useless bihaen samfela year. Waswe long Bible? Hem barava oldfela buk, and klosap 2,000 year go past finis from taem wea they raetem lastfela toktok insaed. So samfela say hem no fitim taem bilong yumi. But sapos Bible hem kam from God, advice bilong hem bae fitim anytaem nomata hem olo tumas. Olketa Scripture mas still “gud for teach, for givim kaonsel, for stretem every samting, for discipline long raeteous fashion, mekem man bilong God hem fit every bit, barava ready for duim every gudfela work.”—2 Timothy 3:16, 17.
11-13. Why nao yumi savvy say Bible hem fitim taem bilong yumi?
11 Sapos yumi lukluk gud insaed, yumi bae lukim hao olketa Bible principle they fitim distaem olsem they fitim taem wea they raetem tu. For example, taem hem story abaotem fashion bilong olketa man, Bible barava talem samting wea fitim every genereson bilong olketa man. Yumi savvy lukim diswan long Sermon bilong Jesus long Maunten wea stap long buk bilong Matthew, chapter 5 go kasem 7. Wanfela bigman from India wea dae finis, Mohandas K. Gandhi hem barava laekem tumas disfela sermon and hem talem wanfela bigman long Britain: “Taem kantri bilong yu and kantri bilong mi start for followim olketa teaching wea Kraest talem long Sermon long Maunten, then yumi savvy stretem olketa problem long kantri bilong yumi tufela and bilong whole world tu.”
12 Dastawe pipol they ting hae long olketa teaching bilong Jesus! Long Sermon long Maunten, hem showim yumi way for kasem trufela hapi. Hem talemaot hao for stretem olketa rowa. Jesus provide-im instruction long hao for pray. Hem talemaot wisefela tingting abaotem olketa material need bilong yumi and hem givim Golden Rul bilong stretfela way for fren withim otherfela pipol. Insaed long datfela sermon hem story tu abaotem hao for luksavvy long olketa giaman man bilong religion and for garem gudfela future.
13 Long Sermon long Maunten and long every other page bilong hem, Bible barava talem yumi wanem for duim and wanem for stap klia long hem for mekem living bilong yumi kamap beta. From kaonsel bilong hem gud tumas, wanfela teacher hem say: “Nomata mi man for givim kaonsel long secondary skul and mi garem bachelor and master degree and mi readim finis planti buk abaotem tingting and mind bilong man, mi faendem kaonsel bilong Bible long olketa samting olsem way for garem gudfela marit, way for stopem olketa young pipol for brekem law and hao for kasem and keepim olketa fren, hem winim any samting wea mi readim or studyim long college.” Withim gudfela kaonsel wea fitim taem bilong yumi, Bible hem buk wea man fit for depend long hem.
STRET AND MAN FIT FOR TRUSTIM
14. Wanem nao showim aot Bible hem stret long saed bilong science?
14 Nomata Bible hem no wanfela science buk, hem stret withim science. For example, long taem bifor wea planti pipol believim disfela earth hem flat, profet Isaiah say hem wanfela “circle” (Hebrew, chugh, wea meanim samting olsem “ball”). (Isaiah 40:22) Planti thousand year bihaen long taem bilong Isaiah, pipol start for say earth hem olsem ball. And tu, Job 26:7—wea they raetem winim 3,000 bifor—say God “no hangim earth long any samting.” Wanfela savvyman wea studyim Bible hem say: “Way wea Job savvy long truth, wea show aot long olketa samting long skae, and way wea earth hem hang seleva, hem wanfela kwestin wea olketa wea say Holy Scripture no kam from God they kanduit for ansarem.”
15. Hao nao way for trust long Bible hem kamap moa strong long hao they raetem datfela buk?
15 Way wea they raetem Bible hem strongim tu trust bilong yumi long disfela oldfela buk. Olketa story bilong Bible talem stret nem bilong pipol and date, no olsem olketa kastom story. (1 Kings 14:25; Isaiah 36:1; Luke 3:1, 2) And nomata olketa man wea raetem history bifor they ova tumas for story abaot way wea they win and mek hae long olketa ruler bilong them and haedem way wea they lus and olketa mistek bilong them, olketa man wea raetem Bible they tok stret and they honest—and they raet abaotem bigfela sin bilong olketa seleva tu.—Numbers 20:7-13; 2 Samuel 12:7-14; 24:10.
WANFELA BUK BILONG PROFESI
16. Wanem nao barava strongfela proof wea show aot Bible hem kam from God?
16 Olketa profesi wea fulfill they givim barava strongfela proof wea show aot Bible hem kam from God. Bible garem planti profesi wea fulfill every bit. Tru nao, olketa man seleva nating savvy duim diswan. So, wanem nao bihaenem olketa profesi hia? Bible seleva say “no anytaem profesi kamap from will bilong man, but olketa man talem samting wea kam from God, taem holy spirit [or paoa bilong God] leadim mind bilong olketa.” (2 Peter 1:21) Tingim samfela example.
17. Wanem nao olketa profesi abaotem way wea rul bilong Babylon bae finis, and hao nao olketa hia fulfill?
17 Rul bilong Babylon hem finis. Isaiah and Jeremiah they profesi abaotem way wea rul bilong Babylon bae finis long hand bilong olketa Media and Persia. But, taem Isaiah raetem disfela profesi, hem 200 year bifor Babylon hem finis! Olketa samting wea happen long disfela profesi they raetem finis long olketa buk bilong history: way wea Euphrates River kamap drae from they tanem wata hia for mekem wanfela lake (Isaiah 44:27; Jeremiah 50:38); way wea they no guardim gud olketa gate long river bilong Babylon (Isaiah 45:1); and disfela ruler wea win hem Cyrus.—Isaiah 44:28.
18. Hao nao profesi bilong Bible hem fulfill long taem wea “king bilong Greece” hem start and finis?
18 Taem wea “king bilong Greece” hem start and finis. Long wanfela vision, Daniel lukim wanfela man goat hem killim dae wanfela man sheepsheep, man goat hia hem brekem tufela horn bilong man sheepsheep. Then bigfela horn bilong datfela goat hem brek, and fofela horn kamap for change-im. (Daniel 8:1-8) Diswan nao samting wea Daniel herem: “Man sheepsheep wea yu lukim wea garem tufela horn they piksarem king bilong Media and Persia. And man goat wea garem staka hair hem piksarem king bilong Greece; and bigfela horn wea stap midlwan long tufela eye bilong hem, datwan piksarem firstfela king. And from datwan hem brek, fofela bae stand ap for change-im, fofela kingdom from nation bilong hem bae stand ap, but they no garem paoa olsem hem.” (Daniel 8:20-22) For fitim disfela profesi, samting olsem tu hundred year bihaen, “king bilong Greece,” Alexander the Great, hem aotem Kingdom wea garem tufela horn, Medo-Persia. Alexander hem dae long 323 B.C.E. and fofela bigman long army bilong hem nao they change-im hem. But, no anywan long olketa kingdom bilong them garem paoa olsem kingdom bilong Alexander.
19. Wanem nao samfela profesi wea fulfill long Jesus Kraest?
19 Laef bilong Jesus Kraest. Olketa Hebrew Scripture garem planti profesi wea fulfill long taem wea Jesus hem born, ministry bilong hem, dae, and resurrection bilong hem. For example, winim 700 year bifor hem happen, Micah profesi hao Messiah, or Kraest, bae born long Bethlehem. (Micah 5:2; Luke 2:4-7) Isaiah wea stap long sem taem withim Micah, hem profesi hao pipol bae hitim Messiah and spit long hem. (Isaiah 50:6; Matthew 26:67) Faev hundred year bifor hem happen, Zechariah profesi hao they bae givim go Messiah for 30 silver shilling. (Zechariah 11:12; Matthew 26:15) Winim wan thousand year bifor hem happen, David profesi abaotem olketa samting wea join withim dae bilong Jesus datfela Messiah. (Psalm 22:7, 8, 18; Matthew 27:35, 39-43) And samting olsem faev hundred year bifor hem happen, profesi bilong Daniel showim aot taem wea Messiah bae kam and hao long nao ministry bilong hem and taem bilong dae bilong hem. (Daniel 9:24-27) Olketa hia they samfela nomoa long olketa profesi wea fulfill long Jesus Kraest. Yu bae kasem gud samting taem yu readim planti moa samting abaotem hem bihaen.
20. Way wea olketa profesi insaed long Bible fulfill every bit hem mekem yumi trustim wanem samting?
20 Planti Bible profesi wea point go long planti different taem, they fulfill finis. ‘But,’ yu maet ask, ‘hao nao diswan affectim laef bilong mi?’ Well, sapos samwan talem yu trufela samting for planti year finis, waswe bae yu daotem hem taem hem talem yu niu samting? No moa nao! God hem talem trufela samting insaed long full Bible. So waswe, diswan fit for buildim ap trust bilong yu long olketa samting wea Bible promisim, olsem olketa profesi abaotem paradaes wea bae kamap long earth? Tru nao, yumi savvy garem sem kaen trust olsem Paul, wanfela disaepol bilong Jesus wea say ‘God hem kanduit for liar.’ (Titus 1:2) And tu, taem yumi read insaed long olketa Scripture and followim kaonsel bilong them, yumi showim aot wisdom wea olketa man no savvy kasem seleva, from Bible hem buk wea showim aot disfela savvy bilong God wea lead go long laef olawe.
“BARAVA WANTIM” SAVVY BILONG GOD
21. Wanem nao yu mas duim sapos samfela samting wea yu learnim from Bible luk olsem they hard tumas?
21 Taem yu studyim Bible, bae yu learnim olketa samting wea different from wanem they teachim yu bifor. Yu maet lukim hao samfela kastom long saed bilong religion wea yu ting hae long them, they samting wea no mekem God hapi. Yu bae learnim hao olketa mark bilong God long olketa samting wea stret and rong, they moa hae winim olketa mark bilong disfela world wea easy tumas. Maet firstaem diswan hem luk olsem hem hard tumas. But yu mas patient! Lukluk gud long olketa Scripture for faendem savvy bilong God. Acceptim way wea kaonsel bilong Bible maet mekem yu need for change-im tingting bilong yu and samting wea yu duim.
22. Why nao yu studyim Bible, and hao nao yu savvy helpem otherfela pipol for meanim diswan?
22 Olketa fren and wantok bilong yu wea ting for helpem yu maet againstim way wea yu studyim Bible, but Jesus hem say: “Everywan wea talemaot long olketa man hem garem wan mind withim mi, mi bae talemaot mi garem wan mind withim hem front long Father bilong mi long heven; but anywan wea say hem no savvy long mi front long olketa man, mi bae say mi no savvy long hem tu front long Father bilong mi long heven.” (Matthew 10:32, 33) Samfela maet say yu bae join insaed long wanfela cult or bae kamap wanfela kranky man. But really samting hem nao, yu trae for kasem stretfela savvy bilong God and truth abaotem hem. (1 Timothy 2:3, 4) For helpem otherfela pipol for meanim diswan, story gud, no rowa, taem yu toktok withim them abaotem olketa samting wea yu learnim. (Philippians 4:5) Remember hao planti wea they “winim them,” they duim diswan “no long toktok” but from olketa hia lukim proof hao savvy bilong Bible hem really helpem pipol.—1 Peter 3:1, 2.
23. Hao nao yu savvy “barava wantim” savvy bilong God?
23 Bible encouragim yumi: “Olsem pikinini wea hem just born, yufela mas barava wantim klinfela milk bilong datfela word.” (1 Peter 2:2) Wanfela baby wea just born hem depend long kaikai from mami bilong hem and hem barava wantim datwan. Long sem way tu, yumi depend long savvy from God. “Barava wantim” Word bilong hem taem yu go ahed long study bilong yu. Tru nao, putim goal for readim Bible everyday. (Psalm 1:1-3) Diswan bae givim yu olketa richfela blessing, from Psalm 19:11 hem say olsem abaotem olketa law bilong God: “Way for keepim them bae givim bigfela reward.”
[Footnote]
a B.C.E. hem meanim “bifor Common Era,” wea hem moa stret winim B.C. (“bifor Kraest”). C.E. hem meanim “Common Era,” wea planti taem they raetem olsem A.D., for anno Domini, wea meanim “insaed long year bilong Lord bilong yumi.”
TESTIM SAVVY BILONG YU
Wanem nao samfela way wea Bible hem different every bit from any other buk?
Why nao yu savvy trustim Bible?
Wanem nao prove-im long yu hao Bible hem Word bilong God?
[Box long page 14]
SAVVY GUD LONG BIBLE BILONG YU
Hem no hard for savvy gud long Bible. Use-im page wea garem list bilong olketa buk bilong Bible for learnim order and ples wea they stap.
Olketa buk bilong Bible garem olketa chapter and verse wea mekem easy for faendem them. They divaedem long olketa chapter long mek-13 century, and wanfela man long France wea savvy printim olketa buk hem divaedem olketa Greek Scripture long olketa verse long mek-16 century. Firstfela full Bible for garem olketa namba bilong chapter and verse hem wanfela French langwis edition wea they pablisim long 1553.
Taem they talem olketa scripture insaed disfela buk, firstfela namba hem meanim chapter and nextfela namba meanim verse. For example, disfela scripture “Proverbs 2:5” meanim buk bilong Proverbs, chapter 2, verse 5. Taem yu tan go long olketa scripture wea they talem, bae yu kwiktaem savvy hao for faendem olketa Bible scripture.
Best way for savvy gud long Bible hem for readim everyday. Firstaem diswan maet olsem hardfela samting. But sapos yu readim threefela go kasem faevfela chapter insaed wanfela day, hem depend long olketa chapter hia, yu bae readim full Bible insaed wanfela year. Waswe, yu laek for start tuday?
[Box long page 19]
BIBLE—NO ANY BUK SEMSEM WITHIM
• Bible hem “kam from God.” (2 Timothy 3:16) Nomata olketa man nao raetem, God nao leadim tingting bilong them, so Bible hem really “word bilong God.”—1 Thessalonians 2:13.
• They raetem Bible insaed 1,600 year, and samting olsem 40 pipol wea kam from different ples nao they raetem. Nomata olsem, full Bible hem garem wan mind from start go kasem end bilong hem.
• Planti pipol rowa abaotem Bible winim any other buk but hem still stap yet. Long 500 go kasem 1,500 A.D., they burnim planti pipol long post from they garem wanfela copy bilong olketa Scripture.
• Bible nao hem main buk wea planti pipol they buyim everywea long world. They transletim full wan or samfela part bilong hem, insaed long winim 2,000 langwis. They printim planti billion copy, and klosap every ples long earth garem Bible.
• Barava oldfela part bilong Bible hem from mek-16 century B.C.E. Diswan hem bifor taem wea they raetem buk bilong olketa Hindu, Rig-Veda (long samting olsem 1300 B.C.E.), or buk bilong olketa Buddhist “Canon of the Three Baskets” (mek-faev century B.C.E.), or Koran bilong olketa Islam (mek-seven century C.E.), and Nihongi bilong olketa Shinto (720 C.E.).
[Full piksa long page 20]