Trufala Teaching wea God Hapi Long Hem

FOR mekem evri man long earth savve long trufala teaching wea God hapi long hem, hem mas talemaot tingting bilong hem long olketa. Hem mas mekem wei tu for evriwan kasem datwan. Sapos nomoa, hao nao bae man savve wanem kaen teaching, worship, and fasin nao God hapi long hem? Waswe, God givim kaen information olsem? Sapos olsem, long wanem wei?

Waswe, eniwan long iumi man wea laef for shortfala taem fit for story for God long evri man long world? Nomoa. Bat buk hem fit for duim datwan. Dastawe, hem barava fitim for God talemaot tingting bilong hem insaed wanfala buk. Wanfala buk from bifor wea hemseleva sei hem kam from God, hem nao Bible. Wanfala long olketa man wea raet insaed hem sei: “Full Bible hem kam from God and hem gud for teachim man, for givim kaonsel, for stretem evri samting, for givim discipline long raeteous fasin.” (2 Timothy 3:16) Iumi lukluk insaed Bible and lukim sapos hem nao garem trufala teaching.

Bible Stap Finis for Haomas Year?

Bible hem wanfala long olketa barava oldfala buk bilong religion. Olketa first part bilong hem olketa raetem samting olsem 3,500 year go finis. Olketa finis for raetem long 98 C.E.a Nomata 40-fala man raetem insaed samting olsem 1,600 year, evri toktok wea stap insaed Bible hem agree witim each other. Diswan bikos really God nao givim kam Bible.

Long full history bilong man, Bible nao buk wea kasem staka ples and hem stap long staka languis winim eni nara buk. Evri year, samting olsem 60 million copy bilong full Bible or part long hem kasem pipol raonem world. Full Bible or samfala part long hem stap long winim 2,300 languis. Winim 90 percent long olketa man long full world savve kasem Bible, or kasem samfala part long Bible long languis bilong olketa. Pipol acceptim disfala buk nomata wanem kala skin, or wanem tribe or kantri olketa kam from.

Wanem Nao Insaed?

Sapos iu garem Bible, iu savve openem and lukluk insaed.b Fastaem, lukim list bilong olketa buk long Bible. Plande Bible garem disfala list long front, wea garem nem bilong olketa buk and namba bilong page wea buk hia stap. Bae iu lukim hao Bible hem garem staka difren kaen buk insaed, wea each wan garem nem. Fasfala buk hem Genesis, and lastfala buk hem Revelation. Olketa buk hia olketa divaedem long tufala sekson. From olketa raetem fasfala 39 buk long Hebrew languis olketa kolem disfala sekson, olketa Hebrew Scripture. Nara 27-fala buk olketa raetem long Greek languis and hem kamap olketa Greek Scripture. Samfala kolem tufala sekson hia, Old Testament and Niu Testament.

Olketa buk long Bible garem olketa chapter and verse wea mekem isi for faendem olketa scripture. Taem iu lukim olketa scripture insaed disfala magasin, fasfala namba wea kamap bihaen long nem bilong datfala buk, hem nao chapter, and nara namba hem nao verse. Olsem example, disfala scripture, “2 Timothy 3:16” hem minim mek-tu buk bilong Timothy, chapter 3, verse 16. Trae faendem datwan insaed Bible.

Best wei for savve long Bible hem for readim evritaem! Samfala faendem hem isi for start long buk bilong Matthew long olketa Greek Scripture. Sapos iu readim thrifala go kasem faevfala chapter evriday, iu savve readim full Bible insaed wanfala year. Bat hao nao iu savve trustim hao samting wea iu readim long Bible hem barava kam from God?

Iu Fit for Trustim Bible?

Waswe, iu ting buk wea God givim for evri pipol, hem shud garem advaes wea no savve change? Bible storyim samting wea fitim evri genereson bilong man, and olketa principle bilong hem fitim iumi kam kasem distaem. Iumi savve lukim diswan long toktok bilong Jesus Christ, man wea startim Christian Wei. Olketa toktok hia stap long Matthew chapter 5 go kasem chapter 7. Plande kolem diswan Sermon Long Maunten, and hem showim hao for kasem trufala hapi and hao for stretem olketa raoa, hao for prea, hao for garem stretfala tingting abaotem olketa material need, and plande samting moa. Datfala sermon and full Bible tu barava talem klia wanem for duim and for stap klia long hem for mekem God hapi. And tu, hem talem hao for mekem laef bilong iumi kamap moabeta.

Narafala reason for trustim Bible hem from samting wea hem talem hem barava stret witim science. Olsem example, Bible iusim disfala toktok “circle bilong earth,” nomata plande pipol long datfala taem biliv earth hem flat.c (Isaiah 40:22) And winim 3,000 year bifor datfala scientist Sir Isaac Newton explainim hao gravity nao mekem olketa planet stap long air, Bible talem hao ‘earth no hange long eni samting.’ (Job 26:7) Lukim tu samting wea Bible talem abaotem wata cycle long earth samting olsem 3,000 year go finis: “Evri river gogo long sea, bat sea seleva no full. Long ples wea olketa river start kam long hem, long there nao olketa go bak mekem olketa gogo moa.” (Ecclesiastes 1:7) Tru nao, Creator bilong disfala universe givim kam Bible tu.

Wei wea Bible stret saed long history hem showimaot hem kam from God. Olketa samting wea Bible storyim hem no olketa kastom story. Olketa join witim taem, nem bilong pipol, and olketa ples. Olsem example, Luke 3:1 talem tru samting taem hem storyim “mek-fiftin year long rul bilong Tiberius Caesar, taem Pontius Pilate hem governor bilong Judea, and Herod hem ruler long distrik bilong Galilee.”

Plande taem olketa man wea raetem history raet nomoa abaotem wei wea olketa ruler winim olketa faet and gud saed bilong olketa, bat olketa man wea raetem Bible honest and no hol bak for talemaot tu mistek bilong olketa seleva. Olsem example, King David sei olsem: “Mi barava duim bigfala sin taem mi duim datfala samting. . . . Mi duim krangge samting.” Datfala honest toktok stap insaed Bible. (2 Samuel 24:10) And Moses wea raetem Bible, hemseleva raet abaotem taem wea hem no showimaot loyal fasin long tru God.—Numbers 20:12.

Nara pruv moa stap wea showimaot Bible hem kam from God. Datfala pruv hem olketa profesi wea fulfill finis. Samfala long olketa profesi hia hem abaotem Jesus Christ. Olsem example, winim 700 year bifor Jesus born, olketa Hebrew Scripture talem olketa profesi wea barava stret abaotem datfala Promis Wan wea bae born ‘long Bethlehem long Judea.’—Matthew 2:1-6; Micah 5:2.

Lukim nara example. Bible hem sei long 2 Timothy 3:1-5: “Insaed long olketa last day nogud taem wea hard for deal witim bae stap. From olketa man bae lovem olketa seleva, lovem selen, mekhae long seleva, bighed, tok daonem God, no obeyim dadi and mami, no savve sei thankiu, no loyal, no garem love, no savve agree, tok laea againstim narawan, no savve kontrolem seleva, raf tumas, no lovem gudfala fasin, brekem trust, followim mind bilong seleva, fulap long praod fasin, lovem hapitaem winim wei for lovem God, olketa luk olsem olketa worshipim God bat olketa nating followim hem.” Diswan barava showimaot fasin bilong staka pipol distaem, bat aposol Paul raetem toktok hia long year 65 C.E., winim 1,900 year go finis!

Bible Teach Iumi Wanem?

Taem iu readim Bible, bae iu lukim hem garem wisdom wea moa hae. Hem givim olketa gudfala ansa for olketa kwestin olsem: Hu nao God? Devil hem really stap? Hu nao Jesus Christ? Why nao olketa man safa? Wanem nao happen long iumi taem iumi dae? Olketa ansa wea bae iu herem hem depend long kastom and biliv bilong pipol. Bat, Bible storyim trufala samting saed long olketa samting hia and plande nara samting. Bible garem tu best advaes saed long fasin and hao for deal witim olketa narawan and olketa wea garem paoa.d

Wanem nao Bible talem abaotem plan bilong God for earth and olketa man? Hem promis olsem: “Klosap nao wicked wan bae finis. . . Bat olketa wea garem kwaet fasin bae kasem earth olsem present, and olketa bae kasem nambawan hapi long bigfala peace.” (Psalm 37:10, 11) “God bae stap witim olketa [man]. And hem bae aotem krae from eye bilong olketa, and dae bae nomoa, sorre and singaot and pain bae nomoa tu. Evri samting bifor hem finis nao.” (Revelation 21:3, 4) “Olketa wea raeteous bae kasem earth olsem present, and olketa bae stap olowe long hem.”—Psalm 37:29.

Bible storyim tu hao klosap nao war, criminal fasin, raf fasin, and wicked fasin bae finis. Sik, wei for olo, and dae bae nomoa tu. Bae man laef olowe long paradaes long earth. Hem barava nambawan samting! And evri samting hia showimaot love bilong God for olketa man!

Iu Bae Duim Wanem?

Bible hem barava nambawan present from Creator bilong iumi. Disfala buk shud muvim iu for duim wanem? Wanfala man wea followim Hindu teaching, hem bilivim hao toktok bilong God mas samting wea stap kam long start bilong olketa man, mekem hem fit for helpem evri man. Taem hem luksavve samfala part long Bible barava old winim plande old raeting bilong Hindu religion wea olketa kolem olketa Veda, hem disaed for lukluk insaed Bible.e Wanfala university teacher long United States luksavve tu hao hem need for readim fastaem disfala buk wea stap evriwea long world, bifor hem savve talem eni samting abaotem datwan.

Wei for readim and followim wanem Bible teachim bae mekem iu kasem staka gud samting. Bible hem sei: “Hapi nao man . . . [wea] laekem tumas law bilong Jehovah, and hem read smol long law bilong hem day and naet. And hem bae kamap olsem wanfala tree wea olketa plantim klosap long plande smol wata, wea garem frut long taem bilong hem and wea leaf bilong hem no savve dae, and evri samting wea hem duim bae win.”f (Psalm 1:1-3) Wei for studyim Bible and ting raonem bae mekem iu hapi bikos iu satisfaem spiritual need bilong iu. (Matthew 5:3) Bible bae showim iu hao for garem gudfala laef and hao for win long wei for deal witim olketa problem. Tru nao, “wei for keepim [olketa law bilong God wea stap long Bible] bae givim bigfala reward.” (Psalm 19:11) And tu, for trustim olketa promis bilong God bae mekem iu kasem staka blessing distaem and bae givim naesfala hope for future.

Bible encouragem iumi for kamap “olsem baby wea just born, [and] mekem grow feeling for barava hangre for datfala klinfala milk wea hem nao toktok bilong God.” (1 Peter 2:2) Wanfala baby hem depend long milk and hem mek sure hem kasem datwan. Olsem tu, iumi depend evribit long savve bilong God. Dastawe, iumi mas “mekem grow feeling for barava hangre,” wea minim for barava laekem Word bilong hem. Bible nao buk wea garem trufala teaching bilong God. Markem goal for studyim Bible evriday. Olketa Jehovah’s Witness long community bilong iu bae hapi for helpem iu for kasem gudfala samting from study bilong iu. Mifala hapi for invaetem iu for story long olketa. Or iu savve raet go long olketa wea pablisim disfala magasin.

[Olketa Footnote]

[Piksa long page 7]

“Mekem grow feeling for barava hangre” for Word bilong God. Studyim Bible evriday

[Piksa Credit Line long page 5]

NASA photo