Chapter 4
Jesus Kraest—Key Long Savvy Bilong God
1, 2. Hao nao olketa religion long world they spoelem key long savvy bilong God?
YU STAND AP aotsaed long haos bilong yu, and trae for openem door withim olketa key bilong yu. Hem rain for gud, and yu want for kwiktaem go insaed long ples wea hem drae—but key hia no openem. Hem luk olsem stretfela key, but lock long door no open. Yu start for feel kros nao! Yu luk moa long olketa key bilong yu. Waswe, yu use-im stret wan? Waswe, samwan hem spoelem disfela key?
2 Diswan hem olsem stretfela tok piksa hao olketa religion long disfela world wea konfius they affectim savvy bilong God. Hem olsem planti religion spoelem key wea openem way for yumi meanim samting—Jesus Kraest. Samfela religion they aotem datfela key, they no want for luksavvy long Jesus. Otherfela pipol they change-im work bilong Jesus, and worshipim hem olsem Olmaeti God. Tru nao, yumi kanduit for meanim savvy bilong God sapos yumi no garem stretfela savvy abaotem datfela main wan, Jesus Kraest.
3. Why nao yumi fit for say Jesus hem key long savvy bilong God?
3 Yu maet rememberim disfela toktok bilong Jesus: “Diswan nao meanim laef olawe, for olketa mas kasem savvy long yu, only trufela God, and long dat wan wea yu sendem kam, Jesus Kraest.” (John 17:3) Taem hem talem diswan, Jesus hem no tok proud. Planti taem olketa Scripture they mek hae long need for kasem stretfela savvy abaotem Kraest. (Ephesians 4:13; Colossians 2:2; 2 Peter 1:8; 2:20) Aposol Peter hem say: “Long [Jesus Kraest] every profet they givim witness.” (Acts 10:43) And aposol Paul hem raet olsem: “Every samting wea garem hae price long wisdom and savvy hem stap haed withim [Jesus].” (Colossians 2:3) Paul say tu hao every promis bilong Jehovah they kamap tru thru long Jesus. (2 Corinthians 1:20) So Jesus Kraest nao hem barava key long savvy bilong God. Savvy wea yumi garem abaotem fashion and work bilong Jesus insaed long arrangement bilong God hem mas no olabaot. But why nao olketa follower bilong Jesus ting long hem olsem main wan insaed olketa purpose bilong God?
PROMIS MESSIAH
4, 5. Wanem nao olketa hope wea pipol garem abaotem Messiah, and hao nao olketa disaepol bilong Jesus ting long hem?
4 Start kam from taem bilong faithful man Abel, olketa servant bilong God they luk forward long datfela Seed wea Jehovah God seleva hem profesi abaotem. (Genesis 3:15; 4:1-8; Hebrews 11:4) They savvy hao disfela Seed bae fulfillim purpose bilong God olsem Messiah, wea meanim “Anointed Wan.” Hem bae “finisim sin,” and olketa psalm profesi abaotem olketa nambawan samting wea Kingdom bilong hem bae duim. (Daniel 9:24-26; Psalm 72:1-20) Hu nao bae kamap Messiah?
5 Tingim hapi feeling bilong wanfela youngfela Jew wea nem bilong hem Andrew, taem hem listen long olketa toktok bilong Jesus wea kam from Nazareth. Andrew kwiktaem ran go long brata bilong hem Simon Peter and say: “Mifela faendem Messiah finis.” (John 1:41) Olketa disaepol bilong Jesus barava believe hem nao promis Messiah. (Matthew 16:16) And olketa trufela Kristian they willing for dae for way wea they believim Jesus nao hem trufela Messiah, or Kraest wea profesi tok abaotem. Wanem proof nao they garem? Bae yumi lukluk long threefela proof.
PROOF WEA SHOW AOT JESUS HEM MESSIAH
6. (a) Promis Seed bae kam from laen bilong hu, and hao nao yumi savvy Jesus hem kam from datfela famili laen? (b) Why nao hem hard for anywan wea stap bihaen long 70 C.E. for say hem nao Messiah?
6 Laen wea Jesus kam from nao hem firstfela faondeson for prove-im hem nao promis Messiah. Jehovah talem finis long servant bilong hem Abraham hao promis Seed bae kam from famili bilong hem. Son bilong Abraham, Isaac, son bilong Isaac, Jacob, son bilong Jacob, Judah they kasem sem kaen promis tu. (Genesis 22:18; 26:2-5; 28:12-15; 49:10) Planti hundred year bihaen, laen bilong Messiah hem show aot klia taem King David hem herem hao dis Wan bae kamaot from famili laen bilong hem. (Psalm 132:11; Isaiah 11:1, 10) Story bilong Matthew and Luke they talemaot stret hao Jesus hem kam from datfela famili laen. (Matthew 1:1-16; Luke 3:23-38) Nomata Jesus garem planti no gud enemy, no anywan long them tok againstim laen wea hem kam from wea planti pipol savvy abaotem. (Matthew 21:9, 15) So, tru nao, laen wea hem kam from hem wanfela barava kliafela proof. But, olketa famili record bilong olketa Jew hem finis every bit taem olketa bilong Rome they finisim Jerusalem long 70 C.E. Bihaen long datfela taem, no anywan savvy say hemseleva nao datfela promis Messiah.
7. (a) Wanem nao mek-tu proof wea show aot Jesus nao hem Messiah? (b) Hao nao Micah 5:2 hem fulfill withim Jesus?
7 Profesi wea fulfill finis hem mek-tu proof. Planti profesi wea stap insaed long Hebrew Scripture they story abaotem olketa different kaen samting wea happen long Messiah. Long mek-eit century B.C.E., profet Micah profesi hao disfela nambawan ruler bae born long smallfela taon bilong Bethlehem. Tufela taon long Israel nao garem nem Bethlehem, but disfela profesi hem tok abaotem wanfela long tufela: Bethlehem Ephrathah, ples wea King David hem born. (Micah 5:2) Dadi and mami bilong Jesus, Joseph and Mary, they stap long Nazareth, samting olsem 90 mile long north saed bilong Bethlehem. But taem Mary hem babule, ruler bilong Rome, Caesar Augustus, hem orderim every pipol bilong Israel for register long hom taon bilong them.a So Joseph mas tekem waef bilong hem wea babule long Bethlehem, wea Jesus hem born.—Luke 2:1-7.
8. (a) Long wanem taem and wanem samting nao happen taem 69 “week” hem start? (b) Hao long nao 69 “week,” and wanem nao happen long end bilong hem?
8 Long mek-six century B.C.E., profet Daniel profesi abaotem way wea “Messiah datfela Leader” bae kam long 69 “week” bihaen they talemaot order for buildim back Jerusalem. (Daniel 9:24, 25) Each wan long olketa “week” hia hem sevenfela year.b History bilong Bible and bilong world, say they talemaot order for buildim back Jerusalem long 455 B.C.E. (Nehemiah 2:1-8) So Messiah bae kam long 483 (69 taems 7) year bihaen long 455 B.C.E. So datwan mekem yumi kasem 29 C.E., barava year wea Jehovah anointim Jesus withim holy spirit. So Jesus kamap “datfela Kraest” (wea meanim “Anointed Wan”), or Messiah.—Luke 3:15, 16, 21, 22.
9. (a) Hao nao Psalm 2:2 hem fulfill? (b) Wanem nao samfela otherfela profesi wea fulfill long Jesus? (Lukim chart.)
9 Hem tru, no everywan they acceptim Jesus olsem promis Messiah, and olketa Scripture they profesi finis abaotem diswan. King David, wea God use-im for profesi, hem say olsem long Psalm 2:2: “Olketa king bilong earth stand ap and olketa bigman hipap tugeta olsem wanfela sekson for againstim Jehovah and againstim anointed wan bilong hem.” Disfela profesi hem show aot hao olketa leader from olketa different ples bae join tugeta for attackim Anointed Wan bilong Jehovah, or Messiah. And datwan nao samting wea happen. Olketa bigman long religion bilong olketa Jew, King Herod, governor bilong Rome Pontius Pilate, everywan they share for killim dae Jesus. Herod and Pilate wea enemy bifor they start for kamap gudfela fren long datfela taem. (Matthew 27:1, 2; Luke 23:10-12; Acts 4:25-28) For moa proof wea show aot Jesus hem Messiah, please lukim chart wea garem title “Samfela Nambawan Profesi Abaot Messiah.”
10. Wanem nao samfela way wea Jehovah show aot Jesus nao Anointed Wan wea hem promisim?
10 Proof wea kam from Jehovah God hem mek-three proof wea supportim way wea Jesus hem Messiah. Jehovah sendem olketa angel for talem pipol abaotem way wea Jesus nao hem promis Messiah. (Luke 2:10-14) Tru nao, taem Jesus hem stap long earth, Jehovah seleva hem tok kam from heven, and talemaot hao hem hapi long Jesus. (Matthew 3:16, 17; 17:1-5) Jehovah God givim paoa long Jesus for duim olketa mirakol. Each wan long olketa mirakol hia they samfela moa proof from God for show aot Jesus nao hem Messiah, from God kanduit for givim paoa for duim mirakol long wanfela man for giamanim pipol. Jehovah use-im tu holy spirit bilong hem for muvim olketa man for raetem olketa Gospel, mekem proof wea show aot Jesus hem Messiah mas kamap part bilong Bible, buk wea pipol transletim and givim aot winim any otherfela buk long history.—John 4:25, 26.
11. Haomas proof nao stap wea showim aot Jesus hem Messiah?
11 Insaed long olketa proof hia, planti hundred trufela samting they stap wea showim aot Jesus olsem promis Messiah. Dastawe olketa trufela Kristian stret for ting long hem olsem ‘dat wan wea every profet givim witness’ and they ting long hem olsem key long savvy bilong God. (Acts 10:43) But samting moa stap for learnim abaotem Jesus Kraest, no just proof wea show aot hem nao Messiah. Wea nao hem kam from? Wanem nao fashion bilong hem?
LAEF BILONG JESUS LONG HEVEN BIFOR
12, 13. (a) Hao nao yumi savvy Jesus stap long heven bifor hem kam long earth? (b) Hu nao datfela “Word,” and wanem nao hem duim bifor hem kamap wanfela man?
12 Yumi savvy divaedem laef bilong Jesus long threefela part. First wan hem start longfela taem bifor hem born long earth. Micah 5:2 say start bilong Messiah hem “from taem bifor kam, from olketa day bifor yet.” And Jesus talem klia hao hem kam from “olketa ples on top,” hem nao, from heven. (John 8:23; 16:28) Hao long nao hem stap long heven bifor hem kam daon long earth?
13 Jesus hem “only Son” bilong God bikos Jehovah seleva create-im hem. (John 3:16) Then from hem “firstborn bilong olketa creation,” God use-im Jesus for create-im every other samting. (Colossians 1:15; Revelation 3:14) John 1:1 say “Word” (Jesus taem hem laef long heven bifor) hem stap withim God “long firstaem.” So Word hem stap withim Jehovah taem hem create-im “heven and earth.” God hem story withim datfela Word taem Hem say: “Yumi bae workim man olsem yumi.” (Genesis 1:1, 26) And tu, datfela Word hem “nambawan workman,” wea God love-im tumas wea Proverbs 8:22-31 say hem showim aot wisdom every bit, hem work withim God for mekem every samting. Bihaen Jehovah create-im hem, datfela Word spendem staka year withim God long heven bifor hem kam long earth olsem wanfela man.
14. Why nao they kolem Jesus “image bilong God wea yumi no savvy lukim”?
14 Dastawe Colossians 1:15 say Jesus hem “image bilong God wea yumi no savvy lukim”! From hem stap withim God for planti thousand year, disfela Son wea obey hem kamap olsem Father bilong hem, Jehovah. Diswan nao narafela reason why Jesus hem key long savvy bilong God wea savvy givim laef. Every samting wea Jesus duim taem hem stap long earth hem followim tingting bilong Jehovah. So, way for savvy long Jesus hem mekem grow savvy bilong yumi abaotem Jehovah tu. (John 8:28; 14:8-10) So, hem klia hao hem important for savvy moa abaotem Jesus Kraest.
LAEF BILONG JESUS LONG EARTH
15. Hao nao Jesus born olsem wanfela perfect baby?
15 Mek-tu part long laef bilong Jesus hem long disfela earth. Hem willing for obey taem God putim laef bilong hem from heven insaed long bele bilong wanfela faithful young Jew girl wea nem bilong hem Mary. Strongfela holy spirit, or paoa bilong Jehovah hem “stap long” Mary, and mekem hem babule and go-go hem bornim wanfela perfect baby. (Luke 1:34, 35) Jesus no born withim any sin, from laef bilong hem kam from perfect Wan. Hem grow ap long wanfela famili wea garem simple living olsem son wea Joseph wanfela carpenter hem adoptim. Hem firstborn long samfela pikinini moa insaed long datfela famili.—Isaiah 7:14; Matthew 1:22, 23; Mark 6:3.
16, 17. (a) Wea nao Jesus kasem paoa for duim olketa mirakol, and wanem nao samfela wea hem duim? (b) Wanem nao samfela fashion wea Jesus showim aot?
16 Way wea Jesus barava love-im Jehovah God hem show aot finis taem hem 12 year nomoa. (Luke 2:41-49) Bihaen hem grow ap and startim ministry bilong hem taem hem 30 year, Jesus showim aot tu bigfela love for olketa man. Taem holy spirit bilong God givim hem paoa for duim olketa mirakol, hem healim olketa wea sik, cripple, blind, earpass, and olketa wea garem sik leprosy from hem feel sorry long them. (Matthew 8:2-4; 15:30) Jesus feedim planti thousand pipol wea hangre. (Matthew 15:35-38) Hem mekem wanfela bigfela wind for stap kwaet, from wind hia mekem olketa fren bilong hem stap long danger. (Mark 4:37-39) Tru nao, hem resurrectim olketa wea dae finis tu. (John 11:43, 44) Olketa mirakol hia they really samting wea happen long history. Olketa enemy bilong Jesus tu they luksavvy long way wea hem “duim planti saen.”—John 11:47, 48.
17 Jesus hem go long every different ples long kantri bilong hem, for teachim pipol abaotem Kingdom bilong God. (Matthew 4:17) Hem showim aot tu barava nambawan example bilong patient and balance fashion. Nomata taem olketa disaepol bilong hem weak daon, long kaenfela way hem say: “Tru nao, spirit hem willing, but body nao hem weak.” (Mark 14:37, 38) Nomata olsem, Jesus hem no fraet and hem tok stret long olketa wea tok againstim truth and spoelem olketa wea weak. (Matthew 23:27-33) Winim every other samting, long perfect way hem followim example bilong Father bilong hem for showim aot love. Jesus hem willing tu for dae mekem olketa man wea no perfect savvy garem wanfela hope for future. Dastawe yumi fit for say Jesus hem key long savvy bilong God! Yes, hem nao living key! But why nao yumi say wanfela living key? Diswan mekem yumi kam long mek-three part long laef bilong hem.
JESUS DISTAEM
18. Hao nao yumi mas ting long Jesus Kraest distaem?
18 Nomata Bible story abaotem dae bilong Jesus, distaem Jesus hem stap laef! Tru nao, planti hundred pipol wea stap long first century C.E. they lukim withim eye bilong them hao hem resurrect finis. (1 Corinthians 15:3-8) Olsem profesi talem, bihaen long datwan, hem sidaon long raet saed bilong Father bilong hem and wait for kasem paoa olsem King long heven. (Psalm 110:1; Hebrews 10:12, 13) So hao nao yumi mas ting long Jesus distaem? Waswe, yumi mas ting long hem olsem wanfela baby wea lay daon long ples for putim kaikai bilong olketa horse? Or olsem wanfela man wea kasem bigfela pain taem they killim hem dae? No moa. Hem wanfela strongfela King wea go ahed for rul! And klosap nao, hem bae showim aot way wea hem rul ovarem disfela earth wea fulap withim trabel.
19. Wanem samting nao Jesus klosap for duim long future?
19 Revelation 19:11-15 hem story klia abaotem King Jesus Kraest olsem man wea kam withim bigfela paoa for finisim badfela pipol. Disfela loving Ruler long heven hem wantim tumas for finisim way for suffer wea kasem planti million pipol distaem! And hem wantim tumas tu for helpem olketa wea trae hard for followim perfect example wea hem showim aot taem hem stap long earth. (1 Peter 2:21) Hem want for sevem them thru long “war bilong bigfela day bilong God Olmaeti,” wea they kolem Armageddon, wea klosap tumas for kam, mekem they savvy laef olawe long earth under long Kingdom bilong God long heven.—Revelation 7:9, 14; 16:14, 16.
20. Wanem nao Jesus bae duim for olketa man insaed long Wan Thousand Year Rul bilong hem?
20 Insaed long Wan Thousand Year Rul bilong Jesus wea garem peace, hem bae duim planti mirakol for every man. (Isaiah 9:6, 7; 11:1-10; Revelation 20:6) Jesus bae cure-im every sik and hem bae finisim dae. Hem bae resurrectim planti billion pipol mekem olketa tu savvy garem chance for stap olawe long earth. (John 5:28, 29) Yu bae hapi tumas for learnim moa samting abaotem disfela Kingdom bilong Messiah long wanfela chapter bihaen. Believe strong long diswan: Laef bilong yumi under long datfela Kingdom rul bae gud tumas winim any samting wea yumi savvy meanim distaem. Hem important tumas for savvy gud long Jesus Kraest! Tru nao, hem barava important for no forgetim Jesus, datfela living key long savvy bilong God wea lead go long laef olawe.
[Footnote]
a Disfela way for register hem helpem Nation bilong Rome for kasem tax from pipol. So, nomata hem no savvy, Augustus hem help for fulfillim wanfela profesi abaotem wanfela ruler wea ‘mekem wanfela man for askim samting for go thru long datfela kingdom.’ Datfela sem profesi say “Leader bilong covenant,” or Messiah, they bae “brekem” long taem bilong man wea rul bihaen disfela ruler. They killim dae Jesus long taem bilong Tiberius, man wea rul bihaen long Augustus.—Daniel 11:20-22.
b Olketa Jew bifor they savvy kaont followim olketa week bilong year. For example, olsem every mek-seven day hem wanfela Sabbath day, every mek-seven year hem wanfela Sabbath year.—Exodus 20:8-11; 23:10, 11.
TESTIM SAVVY BILONG YU
Hao nao laen wea Jesus kam from hem supportim way wea hem say hem Messiah?
Wanem nao samfela profesi abaotem Messiah wea fulfill long Jesus?
Hao nao God showim klia hao Jesus nao Anointed Wan bilong hem?
Why nao Jesus hem living key long savvy bilong God?
[Chart long page 37]
SAMFELA NAMBAWAN PROFESI ABAOT MESSIAH
PROFESI SAMTING WEA HAPPEN HEM FULFILL
TAEM HEM PIKININI
Isaiah 7:14 Born long wanfela young girl Matthew 1:18-23
Jeremiah 31:15 They killim dae olketa baby Matthew 2:16-18
bihaen hem born
MINISTRY BILONG HEM
Isaiah 61:1, 2 Work bilong hem from God Luke 4:18-21
Isaiah 9:1, 2 Ministry mekem pipol Matthew 4:13-16
lukim wanfela big laet
Psalm 69:9 Strong for John 2:13-17
haos bilong Jehovah
Isaiah 53:1 Pipol no believim hem John 12:37, 38
Zechariah 9:9; Go insaed Jerusalem on top Matthew 21:1-9
Psalm 118:26 wanfela donkey; kasem praise
olsem king and dat wan wea
kam long nem bilong Jehovah
THEY GIVIM HEM GO AND DAE BILONG HEM
Psalm 41:9; 109:8 Wanfela aposol no faithful; Acts 1:15-20
givim go Jesus and narawan change-im hem
Zechariah 11:12 Givim hem go for Matthew 26:14, 15
30 silver shilling
Psalm 27:12 Use-im olketa giaman Matthew 26:59-61
witness againstim hem
Psalm 22:18 Play kura for kaleko John 19:23, 24
bilong hem
Isaiah 53:12 Ting long hem olsem sinner Matthew 27:38
Psalm 22:7, 8 Tok spoelem hem Mark 15:29-32
taem hem dae
Psalm 69:21 Givim hem vinegar Mark 15:23, 36
Isaiah 53:5; Spearim hem John 19:34, 37
Isaiah 53:9 Buryim hem withim Matthew 27:57-60
rich pipol
Psalm 16:8-11, ftn. Raise ap bifor body Acts 2:25-32;
bilong hem rotten 13:34-37
[Piksa long page 35]
God givim paoa long Jesus for cure-im olketa wea sik