God Iusim Messiah for Sevem Olketa Man!
“From samting wea Adam duim evriwan hem dae. Bat from samting wea Christ duim evriwan bae laef.”—1 COR. 15:22.
1, 2. (a) Wanem nao Philip and Andrew duim taem olketa meetim Jesus? (b) Why nao iumi fit for sei iumi garem staka moa information distaem for pruvim Jesus nao Messiah winim olketa long first century?
ANDREW talem olsem long brata bilong hem Peter: “Mifala faendem nao datfala Messiah.” Hem barava bilivim Jesus bilong Nazareth nao man wea God anointim. Philip tu bilivim diswan and hem lukaotem fren bilong hem Nathanael. Hem sei: “Mifala faendem nao datfala man wea Moses hem raet abaotem long Law, and wea olketa profet raet abaotem tu. Man hia, hem Jesus, son bilong Joseph. Hem bilong Nazareth.”—John 1:40, 41, 45.
2 Waswe, iu barava bilivim Jesus hem datfala Messiah wea God promis for sendem kam, wea hem nao ‘Man wea Jehovah markem for sevem pipol’? (Heb. 2:10) Distaem iumi garem staka moa information for pruvim datwan winim wanem olketa follower bilong Jesus long first century garem. Bible storyim olketa samting wea happen long laef bilong Jesus start long taem wea Jesus born go kasem taem hem laef bak. Olketa story hia barava pruvim Jesus nao Christ. (Readim John 20:30, 31.) Bible showimaot Jesus bae gohed duim waka bilong Messiah long heven tu. (1 Cor. 15:22; John 6:40) From samting wea iu lanem long Bible, iu savve talem tu mi “faendem nao Messiah.” Bat firstaem, bae iumi storyim wanem nao mekem olketa firstfala disaepol tingse olketa faendem datfala Messiah.
“Holy Secret” Abaotem Messiah Hem Isisi Showaot
3, 4. (a) Wanem nao mekem olketa disaepol long first century fit for ‘faendem Messiah’? (b) Why nao iumi savve sei Jesus nomoa savve mekem evri profesi abaotem Messiah kamap tru?
3 Wanem nao mekem olketa disaepol bilong Jesus long first century barava bilivim hem nao Messiah? Jehovah iusim olketa profet for isisi givim information abaotem hao for luksavve long Messiah wea bae kam. Tingim sapos staka man wea no eniwan savve long narawan tekem kam wanfala timba for wakem haos. Sapos size bilong evri timba hia barava fit gud and gogo olketa buildim frame bilong haos and no need for katem eni timba hia, bae iu tingse masbi eni man katem timba hia firstaem and givim for olketa man hia. Olsem olketa timba hia, evri profesi abaotem Messiah givim important information abaotem hem.
4 So hao, evri profesi abaotem Messiah savve kamap tru long wanfala man nomoa? Wanfala savveman sei hem hard tumas for evri profesi abaotem Messiah kamap tru long Jesus sapos no eniwan planim firstaem. Bat long history, evri profesi hia kamap tru long Jesus nomoa.
5, 6. (a) Hao nao God bae judgem Satan? (b) Long wanem wei nao God hem isisi showimaot laen bilong datfala “pikinini” wea Jehovah promis for sendem kam?
5 Olketa profesi abaotem Messiah join witim wanfala “holy secret” wea hem barava important for evriwan long universe. (Col. 1:26, 27; Gen. 3:15) Long datfala holy secret God judgem Satan wea hem nao “datfala snek bilong firstaem” wea mekem olketa man sin and dae. (Rev. 12:9) Hao nao bae hem duim datwan? Jehovah talem finis “pikinini” bilong wanfala “woman” bae killim hed bilong Satan. “Pikinini” hia bae smasem hed bilong datfala snek wea datwan nao bae finisim wei for bighed, sik, and dae. Bat firstaem, God bae letem Satan for killim leg bilong “pikinini” bilong woman.
6 Jehovah isisi givim information abaotem hu nao datfala “pikinini” wea hem promis for sendem kam. God hem promis olsem long Abraham: “From samting wea pikinini bilong iu duim, evriwan long earth bae kasem blessing.” (Gen. 22:18) Moses hem sei pikinini hia “bae wanfala profet” wea winim hem. (Deut. 18:18, 19) Profet Nathan talem David, Messiah bae wanfala pikinini long laen bilong hem and hem tu bae king and hem bae rul for olowe. Olketa nara profet bihaen talem sem samting.—2 Sam. 7:12, 16; Jer. 23:5, 6.
Wanem Nao Showimaot Jesus Hem Fit for Kamap Messiah?
7. Long wanem wei nao Jesus lusim datfala “woman” bilong God and kam long earth?
7 Long firstaem, Jesus hem insaed long organization bilong Jehovah long heven wea datwan olsem waef bilong Jehovah. Then God sendem go Son bilong hem, wea hem nao first samting wea hem wakem, for kamap datfala “pikinini” wea hem promis for sendem kam. For duim olsem, disfala spesol Son bilong God mas ‘lusim heven’ and born long earth olsem wanfala perfect man. (Phil. 2:5-7; John 1:14) Holy spirit “protectim” Mary wea datwan bae mekem pikinini bilong hem “holy and olketa bae kolem hem Son bilong God.”—Luke 1:35.
8. Taem Jesus hem go for baptaes, long wanem wei nao datwan mekem profesi abaotem Messiah kamap tru?
8 Olketa profesi abaotem Messiah storyim long wea and long wanem taem nao Jesus bae kamap Messiah. Jesus born long Bethlehem olsem profesi hem talem. (Mic. 5:2) Long first century olketa Jew barava hope for datfala Messiah bae helpem olketa. From olketa barava luk forward for hem kam, samfala talem olsem abaotem John Baptaesa: “Maet man hia nao hem Christ.” Bat John hem sei: “Man wea bae kam hem garem paoa winim mi.” (Luke 3:15, 16) Jesus hem kam long John long 29 C.E. for hem baptaes. Long datfala taem hem 30 year, hem kam for startim waka bilong hem olsem Messiah wea datwan hem long barava taem wea profesi hem storyim. (Dan. 9:25) Long datfala taem, Jesus startim nao ministry bilong hem and hem sei: “Distaem nao hem taem wea God markem, and kingdom bilong God hem kam klosap.”—Mark 1:14, 15.
9. Nomata olketa disaepol bilong Jesus no garem evri information, olketa biliv strong long wanem samting?
9 Bat samting wea pipol tingim abaotem Messiah hem no stret. Pipol tok tru taem olketa singaot and sei Jesus hem King, bat long datfala taem olketa no barava minim hem bae rul long heven long future. (John 12:12-16; 16:12, 13; Acts 2:32-36) Nomata olsem, taem Jesus askem Peter, “Waswe iufala, iufala tingse mi hu nao ia?” Semtaem nomoa Peter hem sei: “Iu nao datfala Christ, wea hem Son bilong datfala God wea laef.” (Matt. 16:13-16) Peter talem sem samting taem olketa narawan lusim Jesus bikos long samting wea hem teachim.—Readim John 6:68, 69.
Herem Samting wea Messiah Talem
10. Why nao Jehovah mekhae long wei for herem samting wea Son bilong hem talem?
10 Taem spesol Son bilong God stap long heven hem wanfala maeti spirit. Jesus kam long earth for ‘duim wanem Dadi bilong hem laekem.’ (John 16:27, 28) Hem sei: “Samting wea mi teachim long pipol hem no bilong mi bat hem bilong God wea sendem mi kam.” (John 7:16) Long taem wea Jesus shaen braet tumas long maunten, Jehovah showimaot Jesus hem datfala Messiah taem hem sei: “Iufala mas herem samting wea hem talem.” (Luke 9:35) So, olketa mas herem disfala man wea Jehovah hem chusim wea minim olketa mas obeyim hem. For duim olsem olketa mas garem faith and duim olketa gud samting. Tufala samting hia hem barava important for mekem God hapi and for kasem laef olowe.—John 3:16, 35, 36.
11, 12. (a) Why nao olketa Jew long first century les for Jesus hem Messiah? (b) Hu nao olketa wea biliv strong long Jesus?
11 Nomata staka samting hem pruvim Jesus hem Messiah, staka long olketa Jew long first century les for hem nao Messiah bilong olketa. Hao nao olsem? Bikos tingting bilong olketa abaotem Messiah hem difren, olketa tingse Messiah hem wanfala leader wea bae helpem olketa for kamap free from nogud rul bilong Rome. (Readim John 12:34.) Olketa no interest long kaen Messiah wea mekem olketa profesi abaotem Messiah kamap tru. Olketa profesi hia sei pipol bae heitim hem, bae no interest long hem, bae hem safa, bae hem savve gud long sik, and gogo olketa bae killim hem dae. (Isa. 53:3, 5) Nomata samfala long olketa disaepol bilong Jesus wea faithful tu bat feel nogud bikos hem no helpem olketa kamap free from rul bilong Rome. Nomata olsem, olketa gohed faithful, and gogo, olketa minim gud why nao hem no duim olsem.—Luke 24:21.
12 Nara samting wea mekem pipol les for Jesus hem Messiah hem bikos olketa no laekem samting wea hem teachim. For olketa go insaed long Kingdom ‘olketa mas givim laef bilong olketa for God,’ “kaikaim” body and drinkim blood bilong Jesus, olketa mas “born moa,” and olketa mas “no olsem pipol long world.” (Mark 8:34; John 3:3; 6:53; 17:14, 16) Long tingting bilong olketa wea praod, wea rich, and wea laea long wei bilong olketa, hem hard tumas for followim teaching bilong Jesus. Bat olketa Jew wea hambol laekem tumas for Jesus hem Messiah. Samfala Samaritan tu garem tingting olsem and olketa sei: “Mifala barava savve hem nao man wea bae sevem olketa pipol long world.”—John 4:25, 26, 41, 42; 7:31.
13. Hao nao datfala profesi wea sei Satan bae killim leg bilong Jesus hem kamap tru?
13 Jesus hem sei olketa chief priest bae judgem hem and olketa wea no Jew bae nilam hem long post, bat long mek-thri day hem bae laef bak moa. (Matt. 20:17-19) Taem hem talem datfala Hae Kot bilong olketa Jew hem “nao datfala Christ, Son bilong God” olketa sei hem talem barava nogud samting. (Matt. 26:63-66) Pilate “no faendem hem guilty long eni samting” bat olketa Jew sei hem againstim gavman, so Pilate hem “sendem Jesus go for dae.” (Luke 23:13-15, 25) Nomata staka pruv hem stap for showimaot God sendem hem kam, olketa hia “les long hem” and plan for killim dae “man wea God markem for givim laef long pipol.” (Acts 3:13-15) Profesi talem finis, Messiah bae “dae.” Olketa nilam hem long post long Pasova Day long 33 C.E. (Dan. 9:26, 27; Acts 2:22, 23) Kaen nogud wei for dae olsem nao hem mekem datfala profesi long Genesis 3:15 for kamap tru wea sei Satan bae killim “leg” bilong Jesus.
Why Messiah Mas Dae
14, 15. (a) Jehovah letem Jesus dae for wanem tufala reason? (b) Wanem nao Jesus hem duim bihaen hem laef bak?
14 Jehovah letem Jesus for dae for tufala important reason. First wan nao, wei wea Jesus faithful go kasem taem hem dae hem join witim datfala “holy secret” long wanfala important wei. Hem barava pruvim wanfala perfect man savve gohed ‘faithful long God’ and sapotim rul bilong God nomata Satan barava traem hem. (1 Tim. 3:16) Mek-tu samting, “Jesus kam . . . for givim laef bilong hem, wea datwan hem price for sevem pipol.” (Matt. 20:28) ‘Dae bilong Jesus’ hem mekem iumi kamap free from sin wea iumi kasem from Adam. For olketa wea bilivim God hem sendem Jesus for sevem pipol, dae bilong Jesus mekem wei for olketa savve kasem laef olowe.—1 Tim. 2:5, 6.
15 Christ hem laef bak bihaen thrifala day wea hem stap insaed grev. Insaed 40 day hem kam long olketa disaepol bilong hem wea pruvim hem laef bak. Taem hem story long olketa hem talem samfala samting moa for olketa duim. (Acts 1:3-5) Bihaen datwan hem go bak long heven. Jehovah hem acceptim sakrifaes bilong hem and Jesus hem weit for kamap datfala Messiah King wea God hem markem finis taem for hem startim datwan. Go kasem taem wea hem bae King, Jesus garem plande samting for duim.
Finisim Waka Bilong Hem for Messiah
16, 17. Wanem nao Messiah hem duim bihaen hem go bak long heven?
16 Long plande handred year bihaen Jesus resurrect, Jesus hem faithful for leadim waka bilong Christian kongregeson wea hem rulim. (Col. 1:13) Long taem wea God markem, Jesus hem start for showimaot paoa bilong hem for King long Kingdom bilong God. Olketa Bible profesi and samting wea happen long world showimaot hem start for rul long 1914, and long datfala year tu, hem start bilong taem wea “world hem gogo for finis.” (Matt. 24:3; Rev. 11:15) No longtaem bihaen, Jesus and olketa angel torowem Satan and olketa demon bilong hem go aot from heven.—Rev. 12:7-10.
17 Waka for preach and for teach wea Jesus startim long 29 C.E. hem klosap finis nao. Klosap nao hem bae judgem pipol. Long datfala taem pipol bae stap wea olsem sheepsheep and wea bilivim Jesus hem man wea Jehovah markem for sevem pipol. God bae “givim long [olketa] datfala kingdom wea hem redyim for olketa start kam long taem bifor yet.” (Matt. 25:31-34, 41) Taem Jesus hem leadim olketa angel long heven for finisim nogud pipol, hem bae killim dae olketa wea les for Jesus hem King. Then Jesus bae torowem Satan and olketa demon go long datfala tokpiksa “hol wea hem deep tumas.”—Rev. 19:11-14; 20:1-3.
18, 19. Wanem nao kamaot from waka bilong Jesus olsem Messiah? Olketa wanem blessing nao olketa man wea obey bae kasem from datwan?
18 Taem Jesus rul for Wan Thousand Year, hem bae barava duim nao waka bilong hem for “Nambawan man for givim kaonsel, Maeti God, Dadi for olowe, and Prince bilong Peace.” (Isa. 9:6, 7) Taem Jesus hem rul, pipol wea stap long datfala taem, witim tu, olketa wea laef bak, bae isisi kamap perfect. (John 5:26-29) Datfala Messiah bae leadim pipol wea willing for obey go long “olketa spring wata bilong laef.” Diswan bae helpem olketa fren gud witim Jehovah. (Readim Revelation 7:16, 17.) Bihaen datfala last test Jesus bae torowem olketa wea againstim rul bilong Jesus witim Satan and olketa demon “go long datfala lake wea bone.” Long datfala taem nao Jesus hem killim hed bilong “datfala snek.”—Rev. 20:10.
19 Jesus barava duim gud nao waka bilong hem for Messiah! Pipol wea Jesus sevem olketa bae stap long paradaes and no enitaem bae olketa sik, and olketa bae hapi for olowe. Evriwan bae mekhae long nem bilong God and no eniwan bae kwestinim nao wei wea Jehovah nomoa hem fit for rul. Olketa wea obeyim disfala Messiah wea God markem savve luk forward long nambawan future!
Waswe, Iu Faendem Nao Datfala Messiah?
20, 21. Why nao iu bae laek for story long nara pipol abaotem Messiah?
20 Start long 1914 kam kasem distaem Jesus hem rul. Nomata iumi no lukim hem rul long Kingdom bilong God bat datwan showaot klia from wanem olketa profesi talem. (Rev. 6:2-8) Staka pipol distaem tu olsem olketa Jew long first century wea no laek bilivim pruv wea showimaot Messiah hem stap. Olketa tu laekem kaen messiah wea joinim politik or wea trae for mekem olketa bigman long gavman duim samting hem laekem. Bat iu lanem finis Jesus hem rul long Kingdom bilong God distaem. Iu barava hapi nao taem iu lanem datwan! Diswan mekem iu talem sem samting wea olketa disaepol long first century talem wea sei: “Mifala faendem nao datfala Messiah.”
21 Taem iu teachim Bible long nara pipol, waswe, iu mekhae long waka bilong Jesus for Messiah? Taem iu duim olsem datwan bae mekem iu tinghae long wanem hem duim finis for iu, samting wea hem duim distaem, and samting hem bae duim long future. Maet iu story long olketa relative and fren bilong iu abaotem Messiah olsem Andrew and Philip duim. Bae hem gud sapos iu gohed for traem best bilong iu for teachim olketa Jesus Christ nao datfala Messiah wea God promisim and wea hem iusim for sevem pipol.
Waswe, Iu Savve Minim Kam?
• Wanem nao mekem olketa disaepol long first century fit for faendem Messiah?
• Jehovah letem Jesus dae for wanem tufala reason?
• From Jesus hem Messiah, wanem moa bae hem duim long future?
[Olketa piksa long page 21]
Wanem nao mekem pipol long first century luksavve Jesus nao Messiah wea God promisim?
[Piksa long page 23]
Taem iu teachim Bible long nara pipol, waswe, iu mekhae long waka bilong Jesus for Messiah?