Hao Nao Iu Savvy Luk Aftarem Wanfela Famili?

1. Why nao way for luk aftarem famili distaem hem hard tumas?

“LUKLUK bilong disfela world hem go ahed for change.” (1 Corinthians 7:31) They raetem toktok hia winim 1,900 year finis, and they barava tru tumas distaem! Evri samting really change, and diswan hem barava tru long famili laef. Samting wea pipol tingim olsem gudfela samting 40 or 50 year go finis, they no samting wea pipol acceptim distaem. From diswan, way for luk aftarem gud wanfela famili hem olsem bigfela challenge. Nomata olsem, sapos iu followim olketa kaonsel from Scripture, iu savvy winim olketa challenge hia.

GAREM LIVING WEA FITIM IU

2. Wanem nao olketa hardfela samting long saed bilong shilling wea savvy mekem hevi kamap insaed long famili?

² Distaem, planti pipol no satisfy withim famili laef wea simple. Taem olketa bisnis mekem moa and moa samting and they savvy tumas for sweetim pipol, planti million dadi and mami spendem staka hour long work mekem they savvy baem olketa samting hia. Planti million moa they trae hard evriday for kaikai nomoa. They mas spendem moa taem long work winim bifor, maet they garem tufela work mekem they savvy kasem lelebet moa shilling for peim samting wea they needim. And samfela moa bae hapi sapos they faendem work for shilling, from way for no garem work hem bigfela problem evriwea. Yes, laef hem no easy for famili distaem, but olketa Bible principle savvy helpem olketa famili for duim best bilong them for fitim living bilong them.

3. Wanem principle nao aposol Paul talem, and hao nao way for followim bae helpem man for luk aftarem famili long gudfela way?

³ Aposol Paul hem kasem hevi long saed bilong shilling. Taem hem deal withim olketa problem hia, hem learnim wanfela important samting wea hem talem insaed leta bilong hem for fren bilong hem Timothy. Paul raet olsem: “Iumi no bringim eni samting insaed long world, and iumi bae no tekem eni samting aot. So, sapos iumi garem kaikai and kaleko, iumi mas satisfy withim olketa samting hia.” (1 Timothy 6:7, 8) Hem tru, famili needim moa samting winim kaikai and kaleko nomoa. They needim wanfela ples for stap. Olketa pikinini needim education. And they needim shilling for peim samting long saed bilong medical and otherfela samting tu. But, datfela principle wea insaed toktok bilong Paul hem fitim. Sapos iumi satisfy withim olketa samting wea iumi needim nomoa and no olketa samting wea iumi wantim, living bae moa easy.

4, 5. Hao nao way for ting raonem samting and plan firstaem savvy help long way for luk aftarem famili?

⁴ Narafela gudfela principle hem stap long wanfela tok piksa bilong Jesus. Hem say: “Hu long iufela nao want for buildim wanfela taoa but hem no sidaon firstaem and kaontem kost, for lukim sapos hem garem inaf shilling for finisim?” (Luke 14:28) Long hia Jesus story abaotem way for ting raonem samting firstaem, plan firstaem. Iumi lukim long wanfela chapter bifor hao diswan savvy helpem youngfela man and woman wea tingting for marit. And bihaen long marit, diswan bae help long way for luk aftarem famili tu. Insaed diswan hem for garem budget, plan firstaem for iusim gud shilling wea iu garem. Long way olsem, famili bae savvy bossim wanem nao they baem, and putim shilling for baem samting wea they needim long each day or each week, and no garem living wea winim shilling bilong famili.

⁵ Long samfela kantri, way for budget olsem maet meanim for no kaonem samting wea man no needim wea hem mas peim back bigfela interest. Long otherfela kantri, maet hem meanim for bossim gud way for iusim credit card. (Proverbs 22:7) Hem maet meanim tu for no kwiktaem for baem samting—and bihaen iu savvy iu no needim, and tu, problem kamaot from diswan. Way for garem wanfela budget bae show aot klia hao way for waste-im shilling for gamble, smoke-im tobacco, and drinkim tumas alcohol hem spoelem famili long saed bilong shilling, and hem againstim olketa Bible principle tu.—Proverbs 23:20, 21, 29-35; Romans 6:19; Ephesians 5:3-5.

6. Wanem nao olketa truth long Bible wea helpem olketa wea poor?

⁶ But, waswe long olketa wea poor? Wanfela samting nao, they savvy kasem comfort taem they savvy disfela problem wea kamap evriwea long world hem for lelebet taem nomoa. Insaed long niu world wea klosap for kam, Jehovah bae finisim way for poor withim otherfela samting wea spoelem olketa man. (Psalm 72:1, 12-16) But long distaem, olketa trufela Kristian, nomata they poor tumas, they no feel olsem they no garem eni hope from they garem faith long disfela promis bilong Jehovah: “Mi bae no lusim iu and mi bae no forgetim iu.” So, wanfela man wea believe savvy sure and say: “Jehovah hem man for helpem mi; Bae mi no fraet.” (Hebrews 13:5, 6) Long olketa hardfela taem distaem, Jehovah hem supportim olketa worshiper bilong hem long planti way taem they live followim olketa principle bilong hem and putim Kingdom bilong hem firstaem long laef bilong them. (Matthew 6:33) Planti long olketa savvy talemaot hao diswan hem tru, taem they talem samting wea aposol Paul hem talem: “Long evri samting and long evri kaen living mi learnim secret bilong way for fulap and way for hangre, way for garem planti samting and for needim samting. Long evri samting mi kasem strong from dat wan wea givim paoa long mi.”—Philippians 4:12, 13.

SHARE-IM LOAD

7. Wanem toktok bilong Jesus nao, sapos iumi followim, bae help long way for luk aftarem famili long gudfela way?

⁷ Taem hem klosap finisim ministry bilong hem long earth, Jesus hem say: “Iu mas love-im neibor bilong iu olsem iuseleva.” (Matthew 22:39) For followim disfela kaonsel insaed long famili hem barava help long way for luk aftarem famili. Waswe, hem tru hao barava klos neibor bilong iumi wea iumi love-im nao hem famili bilong iumi—hasband and waef, dadi and mami and olketa pikinini? Hao nao olketa famili member savvy showim aot love for each other?

8. Hao nao olketa insaed long famili savvy showim aot love?

⁸ Wanfela way hem for each famili member for share for duim olketa work long haos. So, olketa pikinini need for learn for putim back olketa samting wea they iusim, olsem kaleko or samting wea they play withim. For stretem bed evri morning bae tekem taem and work, but diswan hem bigfela help insaed long way for luk aftarem famili. Hem tru, samfela taem olketa samting long haos bae lelebet olabaot, but evriwan savvy work tugeta for stretem olketa samting long haos, insaed long diswan hem for wasim olketa dish bihaen kaikai. Lazy fasin, ova tumas for duim samting wea man seleva wantim, and way for no willing for duim samting savvy affectim evriwan long no gud way. (Proverbs 26:14-16) Long narasaed, hapi and willing spirit hem mekem hapi insaed long famili kamap moa big. “God love-im man wea hapi for givim samting.”—2 Corinthians 9:7.

9, 10. (a) Wanem hevi nao planti taem woman bilong haos hem garem, and hao nao for hem no hevi tumas? (b) Wanem balance tingting abaotem work long haos nao hem gud?

⁹ Way for ting long each other and showim aot love bae help for stopem bigfela problem insaed samfela famili distaem. Start kam from bifor olketa mami nao main wan wea work long haos. They luk aftarem olketa pikinini, klinim haos, wasim kaleko, and baem and kukim kaikai. Long samfela kantri, olketa woman work long field tu, sellim kaikai long maket, or duim otherfela samting for mekem famili garem shilling. Nomata long olketa ples wea woman no savvy work for shilling bifor, from need hem kamap, planti million woman mas faendem work for shilling. Wanfela waef and mami wea work hard long olketa samting hia fit for kasem praise. Olsem “gudfela waef” wea Bible story abaot, hem busy evritaem. “Bred bilong lazy fasin hem no savvy kaikaim.” (Proverbs 31:10,27) But, diswan no meanim woman nomoa mas work long haos. Bihaen hasband and waef work for shilling for full day, waswe, hem fitim waef seleva for duim evri work long haos taem hasband and olketa other wan insaed famili they relax? No moa nao. (Lukim 2 Corinthians 8:13,14.) So, for example, sapos mami bae readyim kaikai, hem bae hapi tumas sapos otherfela member bilong famili helpem hem for readyim spoon and plate for kaikai, go baem eni samting wea they needim, or klin raonem haos. Yes, evriwan savvy share-im datfela responsibility.—Lukim Galatians 6:2.

¹⁰ Samfela maet say: “Ples wea mi stap hem no fitim kastom for man duim olketa samting olsem.” Datwan maet tru, but hem gud for tingting gud long diswan. Taem Jehovah God startim famili, hem no givim law for samfela work hem for olketa woman nomoa for duim. Wanfela taem, samfela spesel messenger from Jehovah visitim Abraham, and hemseleva share for readyim and servim kaikai for olketa wea visitim hem. (Genesis 18:1-8) Bible givim disfela kaonsel: “Olketa hasband mas love-im waef bilong them olsem themseleva.” (Ephesians 5:28) Sapos long end long day, hasband hem feel tired and want for rest, waswe, iu ting waef feel olsem tu, maet hem feel moa tired? (1 Peter 3:7) So waswe, hem fitim and loving samting sapos hasband helpem hem long haos?—Philippians 2:3, 4.

11. Long wanem way nao Jesus showim aot gudfela example for each member bilong famili?

¹¹ Jesus hem nambawan example bilong man wea mekem God and olketa wea kampani withim hem hapi. Nomata hem nating marit, Jesus wanfela gud example for olketa hasband, and olketa waef and pikinini. Hem say abaotem hemseleva: “Son bilong man hem kam, no for olketa work for hem, but for hem nao work,” wea meanim for servim other pipol. (Matthew 20:28) Olketa famili wea evri member mekem grow fasin olsem they really hapi!

WAY FOR STAP KLIN—WHY NAO HEM IMPORTANT TUMAS?

12. Wanem nao Jehovah wantim from olketa wea servim hem?

¹² Narafela Bible principle wea savvy help long way for luk aftarem famili hem stap long 2 Corinthians 7:1. Long there iumi read: “Iumi mas kamap klin from evri samting wea spoelem body and spirit.” Jehovah hem acceptim olketa wea obeyim disfela toktok, from hem wantim “worship wea klin.” (James 1:27) And famili bilong them kasem gudfela samting wea kamap from diswan.

13. Why nao way for klin hem important long way for luk aftarem famili?

¹³ For example, Bible promisim iumi hao day bae kam taem sik bae finis. Long datfela taem, “no eniwan bae say: ‘Mi sik.’” (Isaiah 33:24; Revelation 21:4, 5) But, go kasem datfela taem, evri famili mas deal withim sik samfela taem. Paul and Timothy tu kasem sik. (Galatians 4:13; 1 Timothy 5:23) But, olketa savvyman bilong medical they say for planti sik, man savvy duim samting for stopem. Olketa wise famili misstim samfela sik sapos they stap klia long way for dirty long body and long spiritual way. Letem iumi lukim hao diswan hem olsem.—Lukim Proverbs 22:3.

14. Long wanem way nao klinfela fasin savvy protectim famili from sik?

¹⁴ Way for klin long spiritual way hem meanim for garem klinfela fasin. Bible mek hae long olketa haefela mark bilong fasin and hem againstim way for duim sex taem man no marit. “Eniwan wea duim fornication, . . . or duim adultery, or eni man wea duim fasin wea no fitim man, or eni man wea lay daon withim narafela man . . . bae no kasem kingdom bilong God.” (1 Corinthians 6:9,10) For keepim olketa haefela mark hia hem barava important for olketa Kristian wea stap long world distaem wea fasin hem kamap moa worse. For duim olsem hem mekem God hapi and tu hem help for protectim famili from sik wea kamaot from dirty fasin olsem AIDS, syphilis, gonorrhea, and chlamydia.—Proverbs 7:10-23.

15. Givim wanfela example bilong way for no klin long body wea savvy mekem man sik.

¹⁵ ‘For klinim seleva from evri samting wea spoelem body’ hem help for protectim famili from otherfela sik tu. Planti sik kamap from way for no klin long body. Wanfela example hem way for smoke. Smoke hem no only spoelem lung bilong man, kaleko, and air, but hem mekem pipol sik tu. Evri year planti million pipol dae bikos they smoke-im tobacco. Tingim diswan; evri year, planti million pipol bae no sik and dae kwiktaem sapos they stap klia long datfela way for “spoelem body”!

16, 17. (a) Wanem law wea Jehovah givim nao protectim olketa Israelite from samfela sik? (b) Hao nao evri famili savvy followim principle long Deuteronomy 23:12, 13?

¹⁶ Tingim narafela example. Samting olsem 3,500 year bifor, God givim Law bilong hem long nation bilong Israel for organize-im worship bilong them and, long samfela way, evriday living bilong them tu. Datfela Law hem help for protectim datfela nation from sik from hem garem samfela important rul for stap klin. Wanfela law olsem hem for buryim siti bilong man aotsaed long camp mekem ples wea pipol stap hem no dirty. (Deuteronomy 23:12, 13) Datfela law hem still gudfela kaonsel. Distaem tu, pipol they kasem sik and dae bikos they no followim datwan.a

¹⁷ For fitim principle bilong datfela Israelite law, iu mas keepim ples for swim and toilet bilong famili—nomata hem insaed or aotsaed long haos—barava klin. Sapos ples bilong toilet hem no klin and iu no kavarem, olketa flae bae hipap long there and bae they tekem olketa germ go long otherfela part bilong haos—and long kaikai tu! And, olketa pikinini and full-grown man mas wasim hand bilong them bihaen they go long toilet. Sapos no moa, bae they bringim back olketa germ long skin bilong them. Wanfela doctor from France hem say way for wasim hand “hem best way for stopem different kaen sik long bele, way for breathe, or skin.”

18, 19. Wanem idea nao hem gud for keepim haos klin nomata man hem poor?

¹⁸ Tru nao, way for klin hem wanfela challenge long ples wea pipol poor. Wanfela wea stap long ples olsem hem say: “Work for klinim evri samting hem hard tumas long ples wea hot tumas. Wind blowim dust evriwea long haos. . . . Way wea population long olketa taon kamap moa big and long samfela vilij tu, hem mekem olketa health problem kamap. Olketa toilet wea stap long open ples, olketa heap rabis, dirty toilet wea planti pipol iusim, olketa rat wea passim sik, cockroach, and flae they samting wea stap evriday.”

¹⁹ For stap klin long olketa ples olsem hem hard tumas. But, iu bae kasem gud samting sapos iu trae hard for duim. Soap and wata and lelebet extra work they no kostim bigfela shilling olsem medicine and way for go long hospital. Sapos iu stap long ples olsem, long way wea fitim, keepim haos and area bilong iu klin and buryim siti bilong olketa animal. Sapos road wea go for haos bilong iu savvy mud long taem bilong rain, waswe, iu savvy putim gravel or stone trae for mekem mud no go insaed long haos? Sapos evriwan iusim shoe or sandal, waswe, they savvy aotem bifor they kam insaed long haos? And tu, iu mas keepim wata supply bilong iu barava klin. Olketa report showim aot samting olsem tu million pipol dae evri year from olketa sik wea kam from dirty wata and way for no klin.

20. For keepim haos klin, hu nao mas share-im disfela responsibility?

²⁰ For garem klinfela haos hem depend long evriwan—mami, dadi, pikinini, and olketa wea visit kam. Wanfela mami long Kenya wea garem eitfela pikinini hem say: “Evriwan learn finis for duim part bilong them.” Haos wea klin and no olabaot show aot gudfela samting abaotem full famili. Wanfela toktok hem olsem: “Way for poor no meanim man bae no stap klin.” Nomata man stap insaed bigfela haos, wanfela flat, wanfela small haos, or wanfela leaf haos, way for stap klin hem wanfela key for garem famili wea healthy.

WAY FOR ENCOURAGIM MAN MEKEM IUMI HAPI

21. For fitim Proverbs 31:28, wanem nao bae help long way for bringim hapi insaed long famili?

²¹ Taem hem story abaotem gudfela waef, buk bilong Proverbs hem say: “Olketa son bilong hem talemaot way wea hem hapi; hasband bilong hem tu praisim hem.” (Proverbs 31:28) Wanem taem nao lastfela taem wea iu praisim wanfela member bilong famili bilong iu? Yes, iumi olsem olketa plant wea ready for garem flaoa sapos they kasem sun and wata. Iumi tu needim praise from samwan. Hem gud tumas taem waef hem savvy hao hasband bilong hem ting hae long hard work and loving care bilong hem, and hem no ting nating long diswan. (Proverbs 15:23; 25:11) And hem gud tumas taem waef praisim hasband bilong hem for work wea hem duim aotsaed and insaed long haos. Olketa pikinini they hapi taem dadi and mami bilong them praisim them for samting wea they duim long haos, long skul, or insaed long Kristian kongregeson. And way for ting hae olsem hem bringim gudfela samting. Waswe, hem hard tumas for say: “Thankiu”? No moa, but gudfela samting wea diswan bringim insaed long famili hem big tumas.

22. Wanem nao man needim for mekem famili “kamap strong,” and hao nao hem savvy kasem diswan?

²² For planti reason, way for luk aftarem wanfela famili hem no easy. But, man savvy duim diswan long gudfela way. Wanfela proverb bilong Bible hem say: “Thru long wisdom wanfela famili bae kamap strong, and way for meanim samting bae mekem hem stand ap strong.” (Proverbs 24:3) Famili savvy kasem wisdom and way for meanim samting sapos evriwan trae hard for learnim will bilong God and followim insaed long living bilong them. Nomata hem hard work, reward bilong diswan nao hem wanfela hapi famili!