Wei for Stap Klin Why Nao Hem Important?

For staka thousand year, olketa trabol and sik kasem olketa man. Samfala pipol tingse olketa samting hia showimaot kros bilong God and hem iusim olketa samting olsem for panisim olketa wea duim rabis samting. Olketa wea studyim sik for plande handred year faendemaot olketa sismol animal wea stap klosap long iumi nao savve mekem iumi sik.

Olketa savveman studyim hao olketa rat, kokoros, flae, and moskito nao savve givim sik long pipol. Olketa faendemaot tu hao staka pipol kasem sik bikos olketa no stap klin. Luk olsem wei for stap klin savve helpem man for no kasem sik or dae.

Tru tumas, wei for stap klin hem difren followim kastom and living bilong pipol. Long olketa ples wea no garem wata supply or septic tank for toilet, hem hard lelebet for stap klin. Nomata olsem, taem olketa Israelite wakabaot long draefala ples wea hard for olketa stap klin, God talem olketa wanem for duim for stap klin!

Why nao God tinghae long wei for stap klin? Wanem gudfala tingting nao iu mas garem abaotem wei for stap klin? Wanem nao samfala smol samting wea iu and famili bilong iu savve duim for no kasem sik?

SMOL boy Max,a wea stap long Cameroon, hem kam bak long haos bihaen hem skul finis. Hem hangre and laek drink tu! Hem go insaed haos bilong hem wea no big tumas, holem dog bilong hem firstaem, putim basket antap tebol and sidaon and hem weitim nao kaikai bilong hem.

Mami, wea stap long kitchen, herem Max kam insaed and hem tekem kam pleit rice and bean for hem. Bat lukluk bilong hem change taem hem lukim basket bilong Max antap klinfala tebol. Hem luk stret long boy bilong hem and tok slow olsem, “Maaaax!” Boy bilong hem savve wanem mami bilong hem minim, so hem kwiktaem aotem basket bilong hem, and hem hariap go wasim hand bilong hem. Then hem kam bak for kaikai. Max tok smol olsem long mami bilong hem: “Sorre nao Mami. Mi forget nao.”

Wanfala mami savve duim staka samting for mekem famili no kasem sik and for olketa stap klin, bat evriwan long famili mas helpem hem for duim datwan. Olsem story bilong Max showimaot, gudfala training nao barava fitim bikos wei for stap klin minim man mas waka hard evritaem and olketa pikinini needim samwan for talem olketa evritaem wanem for duim.

Mami bilong Max luksavve hao staka samting nao savve spoelem kaikai. So bifor hem holem kaikai, hem mas wasim gud hand bilong hem firstaem and hem kavarem kaikai from flae. From hem kavarem gud kaikai and keepim haos gud and klin, diswan minim no staka rat and kokoros kam long haos.

Mami bilong Max barava laek mekem God hapi dastawe hem trae hard for klin olsem. Hem sei olsem: “Bible talem hao pipol bilong God mas holy bikos God hem holy.” (1 Peter 1:​16) Hem sei olsem tu: “Wei for holy hem semsem tu witim wei for klin. So dastawe mi laek for haos bilong mi hem klin and mi laek for famili bilong mi luk klin tu. Hem tru, diswan savve happen nomoa bikos evriwan insaed famili nao waka tugeta.”

Famili Mas Waka Tugeta

Olsem mami bilong Max faendemaot, for famili stap klin evriwan nao mas waka tugeta. Samfala famili savve markem taem for storyim wanem nao olketa savve duim for mekem insaed and aotsaed long haos bilong olketa for kamap klin go moa. Diswan helpem famili for stap gud tugeta and for evriwan duim waka seleva for mekem famili stap klin. Tingim diswan, Mami savve talem olketa big pikinini why nao olketa mas wasim hand bilong olketa bihaen olketa kamaot from toilet and bihaen olketa holem selen and bifor olketa kaikai. Then olketa savve helpem olketa smol pikinini for olketa tu mas duim sem samting.

Evriwan long famili savve duim olketa difren waka. Maet evriwan agree for klinim haos evri week and then for markem wan or tufala taem long wanfala year for duim bigfala klin ap. And waswe long aotsaed bilong haos? Wanfala savveman talem olsem abaotem America: “Iumi stap long kantri wea start for no luk naes, staka samting start for luk nogud and no inaf open spes hem stap and evriday ples bilong iumi kamap nogud go moa bikos long pollution, noise and enikaen rabis samting.”

Waswe, iu tu garem sem tingting abaotem ples bilong iu? Long bifor kam and long samfala taon long Central Africa distaem, wanfala wakaman bilong taon council savve go raon and singaotem pipol for klinim taon, klinim olketa drain, katem short branch bilong olketa tree, weeding, and pikimap rabis.

Wanem for duim witim rabis hem wanfala big problem evriwea long world and staka gavman no savve stretem disfala problem. Samfala taon council no savve pikimap rabis evritaem, gogo hem hipap long saed road and olketa askem pipol nao for helpem olketa. Olketa Christian nao samfala first wan for duim samting wea gavman askem and olketa no komplen. (Romans 13:​3,5-7) Olketa tru Christian hapi tumas for duim diskaen waka. Olketa laek tumas for stap long ples wea luk klin and savve klinim area evritaem and olketa no weitim taon council for talem olketa for duim datwan. Olketa luksavve hao wei for stap klin showimaot olketa kasem gudfala training and garem gudfala wei. Diswan hem start witim man wanwan and evri famili. Wei for keepim evri samting raonem haos klin bae mekem pipol no sik tumas and bae mekem olketa area long ples wea iu stap for luk gud go moa.

Wei for Keepim Body Klin Mekhae Long God wea Iumi Worshipim

Wei for swim gud and werem kaleko wea showimaot respect hem part long worship bilong iumi and savve mekem pipol for luksavve iumi difren. Fiftin young man and woman go insaed wanfala ples for kaikai long Toulouse, France wea olketa hipap for wanfala convention bilong Olketa Jehovah’s Witness. Wanfala hasband and waef wea sidaon klosap long grup hia tingse bae olketa mek-noise and mek trabol. Bat tufala sapraes for lukim hao disfala grup garem gudfala wei and story bilong olketa no olobaot and olketa werem kaleko wea showimaot respect. Taem disfala grup redi for go aot, hasband and waef hia praisem olketa for gudfala wei wea olketa showimaot and tufala talem hao distaem, no staka pipol showimaot kaen wei olsem.

Pipol wea visitim olketa branch office bilong Olketa Jehovah’s Witness and ples for wakem buk and ples wea olketa wakaman stap, sapraes for lukim hao olketa ples hia luk klin. Olketa wea waka long olketa ples hia mas werem klin kaleko, wasim kaleko evritaem and swim tu. Wei for iusim olketa samting for mekem body smel naes bae no savve mekem iu smel gud sapos iu no swim gud. Taem olketa volunteer hia go preach long pipol long evening or long weekend, wei wea olketa luk klin helpem pipol for tinghae long message wea olketa talemaot.

“Followim Wei Bilong God”

Olketa Christian mas “followim wei bilong God.” (Ephesians 5:⁠1) Profet Isaiah storyim wanfala vision wea olketa angel storyim Creator olsem: “Holy, holy, holy.” (Isaiah 6:⁠3) Disfala toktok mekhae long wei wea God hem perfect and barava klin. Dastawe nao God laekem olketa wea worshipim hem for mas holy and klin. Hem talem olketa olsem: “Iufala mas holy bikos mi nao holy.”​—1 Peter 1:​16.

Bible talem olketa Christian for “werem kaleko wea showimaot respect.” (1 Timothy 2:9) Iumi no sapraes for lukim hao long Bible buk Revelation, hem storyim stretfala samting wea pipol duim wea God sei hem holy olsem ‘naesfala white kaleko wea klin and braet.’ (Revelation 19:⁠8) And Bible storyim sin olsem wanfala mark-mark or dirty.​—Proverbs 15:26; Isaiah 1:​16; James 1:​27.

Distaem, staka million pipol stap long ples wea olketa mas trae hard evritaem for stap klin long body, long wei bilong olketa and klin long worship. God bae finisim diskaen problem for olowe taem hem ‘mekem evri samting luk niu.’ (Revelation 21:⁠5) Taem datfala promis kamap tru, evri samting wea no klin bae nomoa nao.

[Footnote]

[Box long page 18]

God Laekem Evri Samting for Mas Klin

Taem olketa Israelite wakabaot long drae ples, God talem olketa stret wanem for duim taem olketa go toilet. (Deuteronomy 23:​12-​14) Hem wanfala big waka for bigfala grup for duim, bat hem mas helpem olketa for no kasem olketa big sik olsem typhoid fever and cholera.

God talem olketa for wasim or torowem eni samting wea tasim dead body. Nomata maet olketa no minim gud, diswan helpem olketa for no kasem sik.​—Leviticus 11:​32-​38.

Olketa priest mas wasim hand and leg bilong olketa bifor olketa duim waka long temple. Hem bigfala waka tu for fulimap wata insaed copper basin, bat hem samting wea olketa mas duim.​—Exodus 30:17-​21.

[Box long page 19]

Samting wea Wanfala Doctor Talem

For man stap laef hem mas garem wata, bat sapos wata no klin, datwan savve mekem man sik and dae. Dr. J. Mbangue Lobe, bigman long medical long port of Douala, Cameroon, talem samfala gud idea taem olketa interviewim hem.

Hem sei olsem: “Boelem wata bilong iu for drink sapos iu no savve hem klin or nomoa.” Bat hem talem wanfala warning tu olsem: “Wei for iusim bleach or olketa narafala chemical hem gud nomoa, bat sapos iu no putim gud samfala problem savve kamap. Wasim hand bilong iu witim soap and wata evritaem bifor iu kaikai and bihaen iu toilet. For baem wanfala soap hem no kost tumas, so nomata pipol wea no garem staka selen savve baem tu. Wasim kaleko bilong iu evritaem and sapos iu garem eni sik long skin, iusim hot wata.”

Doctor hia gohed sei olsem: “Evriwan insaed famili mas duim samting for klinim insaed and aotsaed long haos. Staka taem pipol no klinim gud olketa toilet and olketa kokoros and flae savve hipap.” Hem talem tu disfala toktok for olketa pikinini keakea long hem: “No swim insaed smol wata wea ran klosap long haos bilong iufala. Wata olsem garem olketa germ wea savve mekem iu sik. Bifor iu go sleep, iu mas swim, klinim teeth gudfala, and sleep long moskito net.” Main point from olketa toktok wea datfala doctor talem hem for tingting gud firstaem, duim samting and no kasem tumas sik.

[Piksa long page 18]

Wei for wasim kaleko bae helpem iu for no kasem sik long skin and narakaen sik

[Piksa long page 18]

Olketa Christian waka hard evritaem for klinim ples wea olketa stap

[Piksa long page 18]

Gudfala mami savve duim staka samting for helpem famili stap klin