Wanfala Strongfala Hope

“Start from datfala taem wea samwan hem born maet hem dae long eni taem; and go-go diswan mas happen.”—ARNOLD TOYNBEE, MAN FROM BRITAIN FOR RAETEM HISTORY.

1. Kam kasem distaem wanem nao olketa man mas acceptim, and wanem kwestin kamaot from diswan?

HU NAO savvy argue withim toktok on top wea tru kam kasem distaem? Kam kasem distaem evri man mas acceptim datfala nogud samting, dae. And iumi barava feel olsem iumi nating savvy duim eni samting taem samwan wea iumi love-im hem dae! Long datfala taem way for lusim samwan maet luk olsem for olowe. Waswe, iumi fit for stap moa withim olketa wea iumi love-im wea dae finis? Wanem hope nao Bible givim for olketa wea dae finis? Tingim disfala story.

‘Fren Bilong Iumi Dae Finis’

2-5. (a) Taem fren bilong hem Lazarus dae, hao nao Jesus showimaot hem willing and fit for resurrectim hem? (b) Withim way for mekem Lazarus laef back, wanem nao datfala mirakol bilong resurrection hem duim?

² Year hem 32 C.E. Long small taon bilong Bethany, wea hem three kilometer from Jerusalem, Lazarus hem stap withim tufala sista bilong hem Martha and Mary. Olketa nao klos fren bilong Jesus. Wan day, Lazarus kamap barava sik. Stret awe, tufala sista bilong hem wea worry sendem nius go long Jesus, wea stap narasaed long Jordan River. Jesus hem love-im Lazarus and tufala sista bilong hem, so hem start for wakabaot go for Bethany. Taem olketa gogo, Jesus talem olketa disaepol bilong hem: “Lazarus, fren bilong iumi hem go for rest, but mi go long there for wekapem hem from sleep.” From olketa disaepol no kwiktaem savvy long meaning bilong disfala toktok, Jesus tok stret: “Lazarus hem dae finis.”—John 11:1-15.

³ Taem hem herem Jesus bae kam long Bethany, Martha ran goaot for meetim hem. From sorry bilong Martha muvim Jesus, Jesus promisim hem: “Brata bilong iu bae raise ap.” Martha ansa: “Mi savvy hem bae raise ap long resurrection long last day.” Then Jesus talem hem: “Mi nao resurrection and laef. Man wea showimaot faith long mi, nomata hem dae, bae hem laef back moa.”—John 11:20-25.

⁴ Then Jesus go long grave and talem olketa for aotem ston wea satem front bilong hem. Bihaen hem prea big, hem givim disfala komand: “Lazarus, kamaot!” And taem evri eye lukluk long datfala grave, Lazarus barava kamaot nao. Jesus hem resurrectim Lazarus—givim back laef long wanfala man wea dae finis for fofala day!—John 11:38-44.

⁵ Martha garem faith finis long promis bilong wanfala resurrection. (John 5:28, 29; 11:23, 24) Mirakol for mekem Lazarus laef back hem barava strongim moa faith bilong hem and mekem narafala pipol garem faith. (John 11:45) But wanem nao datfala word “resurrection” hem really meanim?

“Hem Bae Raise Ap”

6. Wanem nao datfala word “resurrection” hem meanim?

⁶ Datfala word “resurrection” olketa transletem from Greek word a·naʹsta·sis, wea really meanim “way for stand ap moa.” Taem olketa transletem Greek langwis go long Hebrew langwis, olketa iusim Hebrew word techi·yathʹ ham·me·thimʹ, wea meanim “olketa wea dae laef back moa” for datfala word a·naʹsta·sis.a There nao, resurrection meanim way for raisim ap datfala person from dae—startim moa laef bilong datfala person.

7. Why nao way for resurrectim pipol no wanfala problem for Jehovah God and Jesus Kraest?

⁷ From hem barava wise evribit and rememberim samting long perfect way, hem easy tumas for Jehovah God resurrectim wanfala person. For rememberim laef bilong pipol wea dae finis—fasin bilong olketa, history, and evri samting long lukluk bilong olketa—hem no wanfala problem for hem. (Job 12:13; markem Isaiah 40:26.) Jehovah tu hem Man wea Startim laef. Dastawe, hem easy for hem mekem datfala sem person laef back moa, givim hem sem fasin insaed long wanfala niu body. And tu, olsem samting wea kasem Lazarus hem showimaot, Jesus Kraest hem willing and fit for resurrectim olketa wea dae finis.—Markem Luke 7:11-17; 8:40-56.

8, 9. (a) Why nao resurrection and idea bilong soul wea kanduit dae againstim each other? (b) Wanem nao bae stretem dae?

⁸ But, datfala Bible teaching abaotem resurrection hem barava againstim teaching hao soul kanduit dae. Sapos wanfala soul wea kanduit dae hem stap laef bihaen man dae, no eniwan bae need for resurrect, or for laef back moa. Tru nao, Martha no talem eni samting abaotem soul wea kanduit dae wea go ahed for laef long nara ples bihaen man dae. Hem no believe Lazarus go finis long wanfala spirit world for go ahed for laef long there. Nomoa nao, hem showimaot faith long purpose bilong God for changim olketa samting wea kamaot from dae. Hem say: “Mi savvy hem bae raise ap long resurrection long last day.” (John 11:23, 24) Long sem way, Lazarus seleva no talem eni story abaotem laef bihaen long dae. No eni samting stap for talem.

⁹ Hem klia tumas, olsem Bible showimaot, soul hem dae and samting wea stretem dae hem resurrection. But planti billion pipol dae finis start from taem wea firstfala man, Adam, wakabaot long earth. So hu nao bae resurrect, and long wea?

‘Evriwan Insaed Long Olketa Memorial Tomb’

10. Wanem promis nao Jesus talem abaotem olketa wea insaed long olketa memorial tomb?

¹⁰ Jesus Kraest say: “Hour bae kam wea olketa wea stap insaed long olketa memorial tomb bae herem voice bilong hem [Jesus] and kamaot.” (John 5:28, 29) Yes, Jesus Kraest promis hao evriwan wea Jehovah rememberim bae resurrect. Planti billion pipol laef and dae finis. Hu midolwan long olketa nao God rememberim, wea waitim resurrection?

11. Hu nao bae resurrect?

¹¹ Olketa wea followim raeteous way olsem olketa servant bilong Jehovah bae resurrect. But planti million pipol dae finis and no showimaot sapos olketa laek for followim olketa raeteous mark bilong God or nomoa. Olketa no savvy long olketa mark bilong Jehovah or no garem inaf taem for mekem change. God rememberim olketa hia tu and bae olketa resurrect, bikos Bible promisim: “Wanfala resurrection bae kamap for olketa wea raeteous and wea no raeteous.”—Acts 24:15.

12. (a) Wanem vision nao aposol John lukim abaotem resurrection? (b) Wanem nao olketa “torowem insaed long lake bilong fire,” and wanem nao datfala toktok hem meanim?

¹² Aposol John lukim wanfala nambawan vision abaotem pipol wea resurrect wea stand ap front long throne bilong God. Taem hem story abaotem datwan, hem raet olsem: “Sea givim kam olketa wea dae insaed long hem, and dae and Hades givim kam olketa wea dae insaed long olketa, and olketa judgim each wan fitim samting wea olketa duim. And olketa torowem dae and Hades go insaed long lake bilong fire. Diswan hem meanim mek-tu dae, lake bilong fire.” (Revelation 20:12-14) Tingim meaning bilong datwan! Evriwan wea dae finis wea God rememberim bae kamaot from Hades, or Sheol, grave bilong olketa man. (Psalm 16:10; Acts 2:31) Then “dae and Hades” bae olketa torowem insaed long samting Bible kolem “lake bilong fire,” wea meanim way for finis evribit. Grave bilong olketa man bae no stap nao.

Resurrect Long Wea?

13. Why nao God arrangim for samfala for resurrect long heven, and wanem kaen body nao Jehovah bae givim long olketa?

¹³ Smallfala namba bilong olketa man and woman bae resurrect for laef long heven. Olketa hia bae rul withim Kraest olsem king and priest and bae share for aotem evri samting wea kamaot from dae wea olketa man kasem from firstfala man, Adam. (Romans 5:12; Revelation 5:9, 10) Olsem Bible talem, namba bilong olketa hem 144,000 nomoa and God choosim olketa from midolwan long olketa follower bilong Kraest. Olketa first wan nao olketa faithful aposol. (Luke 22:28-30; John 14:2, 3; Revelation 7:4; 14:1, 3) Jehovah bae givim each wan long olketa hia wea resurrect wanfala spirit body mekem olketa savvy laef long heven.—1 Corinthians 15:35, 38, 42-45; 1 Peter 3:18.

14, 15. (a) Bigfala sekson bilong olketa wea dae bae resurrect insaed long wanem kaen living? (b) Wanem blessing nao olketa man wea obey bae kasem?

¹⁴ But, bigfala namba bilong olketa wea dae finis olketa nao pipol wea bae resurrect for laef long earth. (Psalm 37:29; Matthew 6:10) Wanem kaen earth? Earth distaem hem fulap withim raoa, way for killim dae man, pollution, and raf fasin. Sapos olketa wea dae finis kam back for laef long earth olsem, eni hapi wea olketa kasem bae for shortfala taem nomoa. But Creator hem promis hao klosap nao hem bae finisim disfala world bilong olketa man wea stap under long paoa bilong Satan. (Proverbs 2:21, 22; Daniel 2:44) Wanfala niufala raeteous sekson bilong olketa man—“wanfala niufala earth”—bae wanfala really samting. (2 Peter 3:13) Long datfala taem “no eniwan bae say: ‘Mi sik.’ ” (Isaiah 33:24) Pain bilong dae tu bae finis, from God “bae aotem evri wata from eye bilong olketa, and dae bae nomoa, sorry and fasin for krae and pain bae nomoa tu. Evri samting wea stap bifor hem finis nao.”—Revelation 21:4.

¹⁵ Insaed long niu world wea God promisim, olketa humble wan “bae hapi tumas long bigfala peace.” (Psalm 37:11) Gavman bilong Kraest Jesus and 144,000 wea rul withim hem long heven bae easyeasy mekem olketa man wea obey for kamap perfect moa, wea firstfala dadi and mami bilong iumi, Adam and Eve, lusim. Insaed diswan tu hem olketa wea resurrect long earth.—Luke 23:42, 43.

16-18. Wanem hapi nao resurrection bae bringim for olketa famili?

¹⁶ Bible story abaotem hapi wea resurrection bae bringim for olketa famili. Tingim hapi bilong widow woman bilong Nain taem Jesus stopem olketa wea go long grave and resurrectim only son bilong hem! (Luke 7:11-17) Bihaen, klosap long Sea bilong Galilee, taem Jesus mekem wanfala girl wea 12 year for laef back moa, dadi and mami bilong hem “tufala barava hapi tumas.”—Mark 5:21-24, 35-42; lukim tu 1 Kings 17:17-24; 2 Kings 4:32-37.

¹⁷ For planti million wea sleep long dae distaem, resurrection bae meanim laef insaed wanfala niu world bilong peace. Tingim nambawan hope wea diswan meanim for Tommy and datfala bisnisman, wea iumi story abaotem long firstfala sekson bilong disfala brochure! Taem Tommy wekap for laef insaed Paradaes long earth, hem bae sem Tommy wea mami bilong hem savvy long hem—but wea no garem sik. Bae mami bilong hem savvy touchim hem, holem hem, and love-im hem. Olsem tu, winim way for trap insaed way for born moa evritaem, datfala bisnisman from India garem nambawan hope for openem eye bilong hem insaed niu world bilong God and lukim olketa son bilong hem.

¹⁸ For savvy long truth abaotem soul, abaotem wanem nao happen long iumi taem iumi dae, and abaotem hope bilong resurrection savvy barava affectim olketa wea laef distaem tu. Letem iumi lukim hao nao olsem.

[Footnote]

[Piksa long page 26]

Resurrection bae bringim hapi for olowe