Hope for Pipol wea Dae Finis​—Olketa Bae Laef Bak

Waswe, iu bilivim promis bilong God abaotem taem wea pipol bae laef bak? Datfala promis for lukim olketa wea iumi lovem wea dae finis taem olketa laef bak hem naes tumas. Bat waswe, iumi savve trustim datfala promis? For ansarem disfala kwestin, iumi bae storyim example bilong olketa aposol bilong Jesus Christ.

Olketa aposol barava bilivim olketa wea dae bae laef bak. Why nao olsem? Tufala reason hem stap for diswan. First samting wea strongim hope bilong olketa hem bikos Jesus hem laef bak. Olketa aposol and “winim 500 brata” lukim Jesus hem laef bak. (1 Corinth 15:6) Nara samting tu, insaed fofala Gospel, staka pipol storyim and bilivim Jesus hem laef bak.​—Matthew 27:62–28:20; Mark 16:1-8; Luke 24:1-53; John 20:1–21:25.

Mek-tu samting, olketa aposol lukim taem Jesus resurrectim thrifala pipol, olsem wanfala long Nain, narawan long Capernaum, and last wan long Bethany. (Luke 7:11-17; 8:49-56; John 11:1-44) Man wea Jesus resurrectim long Bethany, hem and tufala sista bilong hem olketa gudfala fren bilong Jesus. Bae iumi storyim datwan.

‘MI NAO MEKEM OLKETA FOR LAEF BAK MOA’

Fofala day bihaen Lazarus hem dae, Jesus sei long Martha, sista bilong Lazarus: “Brata bilong iu bae laef bak.” Long firstaem Martha no minim wanem Jesus talem. Martha sei, “mi savve bae hem laef bak” bat hem tingse datwan bae happen long future. Tingim, Martha mas sapraes fogud taem Jesus sei “mi nao givim laef long pipol and mekem olketa for laef bak moa,” and then hem lukim Jesus resurrectim brata bilong hem!​—John 11:23-25.

Taem Lazarus dae, hem go long eni ples? Lazarus no storyim eni samting wea maet showimaot hem laef long nara ples taem hem dae bikos hem no garem soul wea no savve dae wea go long heven. Taem Jesus resurrectim Lazarus, Lazarus no kam bak long earth from heven and lusim chance for enjoyim laef long heven and for stap klosap long God. Sapos olsem, Lazarus stap long wea for fofala day? Hem sleep nomoa long grev.​—Ecclesiastes 9:5, 10.

Tingim, Jesus sei man wea dae hem olsem man wea sleep, and taem hem laef bak nao bae hem wekap. Bible storyim diswan olsem: “[Jesus] sei: ‘Fren bilong iumi Lazarus hem sleep nao, bat bae mi go for wekapem hem.’ So olketa disaepol sei long hem: ‘Lord, sapos hem sleep, bae hem gud bak moa ia.’ Olketa tingse Jesus minim Lazarus hem sleep mekem hem savve rest, bat wanem Jesus hem minim nao, Lazarus hem dae finis. So Jesus hem tok stret olsem long olketa: ‘Lazarus hem dae nao.’” (John 11:11-14) Taem Jesus resurrectim Lazarus, Lazarus savve duim olketa samting wea hem duim bifor and stap moa witim famili bilong hem. Datwan hem wanfala nambawan present wea Jesus givim long disfala famili!

Olketa resurrection wea Jesus duim long datfala taem showimaot samting wea Jesus, datfala King long Kingdom bilong God, savve duim long future.a Taem Jesus rulim earth, hem bae mekem olketa pipol wea sleep long grev for laef bak. Dastawe hem sei: ‘Mi nao mekem olketa for laef bak.’ Bae iumi barava hapi for lukim moa olketa wea iumi lovem! Olketa wea laef bak tu bae barava hapi tumas!​—Luke 8:56.

MAN SAVVE LAEF OLOWE

Jesus sei long Martha: “Nomata sapos man wea biliv long mi hem dae, bae hem laef bak moa, and eniwan wea hem laef and showimaot faith long mi bae hem no dae.” (John 11:25, 26) Olketa wea Jesus resurrectim insaed 1,000 year wea hem rul savve laef olowe, sapos olketa garem faith long hem.

Bihaen Jesus storyim olketa samting hia, hem askem Martha disfala kwestin: “‘Waswe, iu bilivim diswan?’ Martha sei long hem: ‘Ia, Lord, mi bilivim iu nao datfala Christ. Iu nao Son bilong God.’” (John 11:26, 27) Waswe, iu laek for garem faith olsem Martha, wea hem bilivim Jesus savve mekem man wea dae for laef bak? First samting wea iu savve duim hem for lane abaotem plan bilong God for olketa man. (John 17:3; 1 Timothy 2:4) Diswan savve helpem iu for garem faith. Iu savve askem Olketa Jehovah’s Witness for helpem iu lanem samting wea Bible teachim abaotem plan bilong God. Olketa bae barava hapi for storyim disfala nambawan hope wea hem nao olketa wea dae finis bae laef bak.