Hao Iu Savve Lane Abaotem God

Iu savve lane abaotem Jehovah taem iu readim Bible. Longtaem go finis, God chusim samfala man for raetem samting wea hem tingim. Olketa kolem olketa raeting hia Bible. Tuday iumi lane abaotem God taem iumi readim Bible. Bikos Bible hem garem toktok, or message, bilong Jehovah, olketa kolem Word bilong God tu. Iumi savve bilivim wanem Bible talem bikos Jehovah no savve laea. “God kanduit for laea.” (Hebrews 6:​18) Word bilong God hem tru evribit.—John 17:17.

Bible hem wanfala barava spesol present bilong God for iumi. Hem olsem leta from wanfala dadi wea garem love go for olketa pikinini bilong hem. Bible talem iumi abaotem promis bilong God for changem earth for kamap wanfala naes ples for stap​​—wanfala paradaes. Bible talem iumi wanem God duim finis long bifor, wanem hem duim distaem, and wanem bae hem duim long future for olketa faithful pikinini bilong hem. Bible helpem iumi tu for stretem olketa problem bilong iumi and for kasem hapi.—2 Timothy 3:​16, 17.

Olketa Jehovah’s Witness nao fren bilong God; olketa bae helpem iu for minim wanem Bible hem teachim. Talem olketa iu laek for studyim Bible. Olketa no askem selen for diswan. (Matthew 10:8) And tu, iu savve attendim olketa Christian meeting. Olketa holem diswan long ples for worship wea olketa kolem Kingdom Hall. Sapos iu attendim olketa Christian meeting, savve bilong iu abaotem God bae grow kwiktaem.

Iu savve lane abaotem God from olketa samting wea hem mekem. Olsem example, Bible hem sei: “God creatim heven and earth.” (Genesis 1:1) Taem Jehovah creatim “heven,” hem wakem sun. So wanem nao datwan talem iumi abaotem God? Hem talem iumi hao Jehovah garem bigfala paoa. Hem nomoa savve mekem samting wea garem big paoa olsem sun. Hem talem iumi tu hao Jehovah garem wisdom, bikos iu needim wisdom for wakem sun, wea savve givim hot and laet and no short long paoa.

Olketa creation bilong Jehovah showimaot hem lovem iumi. Tingim evri difren kaen frut wea stap long earth. Sapos Jehovah laekem, hem savve givim iumi wankaen frut nomoa​—or no eni frut. Bat, Jehovah givim iumi planti difren kaen frut wea garem difren sheip, size, color, and teist. Diswan showimaot Jehovah hem wanfala God wea garem love, and tu, hem barava willing for give and hem tingim narawan and hem kaen.—Psalm 104:24.