Leson 2

Hu Nao God?

Hu nao trufala God, and wanem nao nem bilong hem? (1, 2)

Wanem kaen body nao hem garem? (3)

Wanem nao olketa main fasin bilong hem? (4)

Waswe, iumi mas iusim image and samfala kaen saen for worshipim hem? (5)

Wanem nao tufala way wea iumi savvy learn abaotem God? (6)

1. Pipol worshipim planti samting. But Bible talem iumi wanfala TRUFALA God nomoa stap. Hem workim evri samting long heven and long earth. From hem givim iumi laef, hem nomoa Man wea iumi mas worshipim.​—⁠1 Corinthians 8:​5, 6; Revelation 4:⁠11.

2. God hem garem planti title, but hem garem wanfala nem nomoa. Datfala nem hem JEHOVAH. Long planti Bible, olketa aotem nem bilong God and change-im withim olketa title olsem LORD or GOD. But taem olketa raetem Bible long firstaem, nem bilong Jehovah hem kamap winim 7,000 taem!​—⁠Exodus 3:15; Psalm 83:18.

3. Jehovah garem wanfala body, but hem no olsem body bilong iumi. Bible hem say: “God hem wanfala Spirit.” (John 4:24) Wanfala spirit hem wankaen laef wea barava moa hae winim iumi. No eni man hem lukim God. Jehovah hem stap long heven, but hem savvy lukim evri samting. (Psalm 11:​4, 5; John 1:18) But, wanem nao holy spirit? Hem no wanfala man olsem God. But, hem paoa bilong God for duim samting.​—⁠Psalm 104:⁠30.

4. Bible showim iumi wanem kaen God nao hem. Hem showim aot olketa main fasin bilong hem nao love, justice, wisdom, and paoa. (Deuteronomy 32:4; Job 12:13; Isaiah 40:26; 1 John 4:⁠8) Bible talem iumi hao hem garem mercy, hem kaen, savvy forgive, givim planti samting, and patient. Iumi, olsem pikinini wea obey, mas trae for followim fasin bilong hem.​—⁠Ephesians 5:​1, 2.

5. Waswe, iumi mas bow daon or prea long olketa image, piksa, or samfala kaen saen long worship bilong iumi? No moa! (Exodus 20:​4, 5) Jehovah hem say iumi mas worshipim hem nomoa. Hem bae no share-im glory bilong hem withim eniwan or eni samting. Olketa image no garem paoa for helpem iumi.​—⁠Psalm 115:​4-8; Isaiah 42:8.

6. Hao nao iumi fit for savvy gud moa long God? Wanfala way hem for lukluk gud long olketa samting wea hem workim, and ting raonem wanem nao olketa samting hia teachim iumi. Olketa samting wea God workim they showim iumi hem garem bigfala paoa and wisdom. Iumi lukim love bilong hem long evri samting wea hem workim. (Psalm 19:​1-6; Romans 1:20) Narafala way wea iumi savvy learn abaotem God hem for studyim Bible. Hem talem iumi planti samting moa abaotem wanem kaen God nao hem. Hem talem iumi tu abaotem purpose bilong hem and wanem hem laekem iumi for duim.​—⁠Amos 3:7; 2 Timothy 3:​16, 17.

[Piksa long page 5]

Iumi learn abaotem God thru long creation and long Bible