Iu Savve Kamap Moabeta Long Wei for Remember

JEHOVAH GOD creatim brain bilong man witim nambawan wei for savve rememberim samting. Hem wakem brain long wei wea nomata man iusim information wea hem putim insaed long hem finis, datfala information bae no lus. Jehovah wakem brain for fitim purpose bilong hem for olketa man shud stap for olowe.—Ps. 139:14; John 17:3.

Bat maet iu feelim hao staka samting wea iu putim insaed long mind bilong iu hem lus. Luk olsem hem no stap long taem wea iu wantem. Wanem nao iu savve duim for mekem memory bilong iu kamap moabeta?

Garem Wei for Interest Long Samting

Wei for interest long samting hem important part long wei for mekem memory kamap moabeta. Sapos iumi evritaem trae for luksavve long olketa samting wea stap raonem iumi, for interest long pipol and samting wea go ahed raonem iumi, diswan savve muvim mind bilong iumi. Hem bae mekem hem moa isi for garem sem interest taem iumi readim or herem samting wea important.

Planti faendem hem hard for rememberim nem bilong pipol. Bat, olsem olketa Christian, iumi savve hao pipol nao important—olketa nara Christian, olketa wea iumi witness long olketa, and olketa wea iumi meetim taem iumi duim olketa samting wea iumi mas duim long laef. Wanem nao savve helpem iumi for rememberim olketa nem wea iumi shud rememberim? Aposol Paul talem nem bilong 26 pipol bilong wanfala kongregeson wea hem raet go long hem. Wei wea hem interest long olketa hem showaot long wei wea hem savve no long nem nomoa, bat tu long information abaotem planti long olketa hia. (Rom. 16:3-16) Samfala traveling overseer bilong Olketa Jehovah’s Witness distaem savve rememberim planti nem, nomata olketa visitim niu kongregeson evri week. Wanem nao helpem olketa? Taem olketa meetim samwan for firstaem, olketa trae for talem nem bilong hem tu-thri taem. Olketa trae hard for joinim feis bilong man witim nem bilong hem. And tu, olketa spendem taem for waka witim olketa difren wan long field ministry and for kaikai witim olketa. Taem iu meetim samwan, bae iu rememberim nem bilong hem? Start long wei for garem gudfala reason for rememberim datfala nem; then traem samfala long olketa idea antap.

Wei for rememberim samting wea iu readim hem important tu. Wanem nao savve helpem iu for kamap moabeta long diswan? Wei for interest and wei for minim hem insaed diswan. For tingting strong long samting wea iu readim, iu need for really interest long hem. Bae iu no rememberim eni samting sapos iu tingim difren samting taem iu trae for read. Wei for iu minim wanem iu readim bae kamap moabeta taem iu joinim samting wea iu read abaotem witim samting wea iu bin experiencem or wea iu savve long hem finis. Askem iuseleva: ‘Long wanem wei and long wanem taem nao mi savve iusim disfala information long laef bilong mi? Hao nao mi savve iusim diswan for helpem narawan?’ Wei for minim samting bae kamap moabeta tu sapos iu readim and tingim grup bilong olketa word wea join tugeta, winim wei for readim each word wanwan. Iu bae moa isi for minim olketa idea and luksavve long olketa main point, mekem hem moa isi for rememberim olketa.

Tek-Taem for Duim Review

Olketa savveman bilong education strongim hao wei for duim review hem barava help. Long wanfala research, wanfala college professor showimaot hao wei for iusim wan minute for kwiktaem duim review, hem dabolem information wea man rememberim. So stretawe bihaen iu finisim reading bilong iu—or wanfala main part bilong hem—reviewim olketa main point insaed long mind bilong iu, mekem olketa stap strong long mind bilong iu. Ting raonem hao nao iu bae minim long narawan olketa niu point wea iu lanem. Wei for rememberim wanfala idea no longtaem bihaen iu readim bae helpem iu for rememberim datwan for longtaem.

Then insaed long next tu-thri day, lukaotem eni chance for reviewim samting wea iu readim long wei for sharem datfala information witim narawan. Maet iu duim diswan witim wanfala famili member, samwan long kongregeson, man iu waka witim, man iu skul witim, neiba, or samwan iu meetim long field ministry. Trae for talem no olketa main point nomoa bat olketa scripture wea join witim olketa tu. Iu bae kasem gudfala samting from diswan, hem bae helpem iu for keepim olketa important samting long memory bilong iu; hem bae helpem narawan tu.

Ting Raonem Olketa Important Samting

For join witim wei for reviewim samting wea iu readim and for talem long olketa narawan, bae iu faendem hem helpem iu for ting raonem olketa important samting wea iu lanem. Hem nao wanem tufala man wea raetem Bible, Asaph and David duim. Asaph hem sei: “Mi bae rememberim olketa samting wea Jah hem duim; from mi bae rememberim nambawan samting wea iu duim longtaem bifor. And mi bae ting raonem evri waka bilong iu, and evri samting wea iu duim mi bae interest long hem.” (Ps. 77:11, 12) Long sem wei David hem raet: “Long taem bilong naet gard mi ting raonem iu,” and “mi ting bak long olketa day bilong bifor; mi ting raonem evri waka bilong iu.” (Ps. 63:6; 143:5) Waswe, iu duim datwan?

Kaen deep wei for ting raonem olketa samting wea Jehovah duim, olketa fasin bilong hem, and wei wea will bilong hem showaot hem duim moa samting for helpem iu winim wei for rememberim information nomoa. Sapos iu mekem hem wei bilong iu for ting raonem samting olsem, diswan bae strongim long heart bilong iu olketa barava important samting. Hem bae sheipim wanem kaen man nao iu. Olketa samting wea iu rememberim bae stand for barava deep tingting bilong iu.—Ps. 119:16.

Part wea Spirit Bilong God Hem Duim

Taem iumi trae for rememberim olketa truth abaotem olketa samting wea Jehovah duim and olketa samting wea Jesus Christ hem talem, iumi bae kasem help. Long naet bifor hem dae, Jesus talem olketa follower bilong hem: “Taem mi stap witim iufala mi talem olketa samting hia long iufala. Bat datfala helper, datfala holy spirit, wea Father bae sendem kam long nem bilong mi, dat wan bae teachim iufala evri samting and mekem iufala rememberim evri samting wea mi talem long iufala.” (John 14:25, 26) Matthew and John nao tufala long olketa wea stap. Waswe, holy spirit kamap wanfala helper for olketa? Barava nao! Samting olsem eitfala year bihaen, Matthew hem finis for raetem firstfala buk wea storyim laef bilong Christ, wea hem rememberim spesol samting olsem Sermon long maunten and information abaotem saen wea garem planti part for taem wea Christ bae stap moa and end bilong disfala system. Sixti-faev year bihaen Jesus hem dae, aposol John raetem Gospel bilong hem, wea garem information abaotem wanem nao Jesus hem talem long last naet wea olketa aposol spendem witim Lord bilong olketa bifor hem dae. Iumi sure hao Matthew and John rememberim klia olketa samting wea Jesus hem talem and duim taem olketa stap witim hem, bat holy spirit garem important part for duim for mek sure olketa no forgetim olketa important information wea Jehovah hem wantem for stap insaed long Bible.

Waswe, holy spirit hem helpem olketa servant bilong Jehovah distaem? Barava nao! Hem tru, holy spirit no savve putim insaed long mind bilong iumi olketa samting wea iumi no lanem yet, bat olsem wanfala helper hem savve mekem iumi rememberim olketa important samting wea iumi studyim finis. (Luke 11:13; 1 John 5:14) Then, taem need hem kamap, hem savve muvim mind bilong iumi for “rememberim toktok wea olketa holy profet talem bifor and komandment bilong Lord and Man wea Sevem” iumi.—2 Pet. 3:1, 2.

‘Iu Mas No Forget’

Jehovah evritaem warnim Israel: ‘Iu mas no forget.’ Hem no minim hem expectim olketa for rememberim evriting long perfect wei. Bat olketa mas no busy tumas for aftarem samting bilong olketa seleva gogo olketa no rememberim olketa samting wea Jehovah duim finis. Olketa mas keepim strong memory bilong olketa abaotem wei wea Jehovah sevem olketa taem angel bilong hem killim dae olketa firstborn bilong Egypt and tu wei wea hem divaedem Red Sea and then klosim moa for draonem Pharaoh and army bilong hem. Olketa Israelite mas rememberim hao God givim Law bilong hem long olketa long Maunt Sinai and hem leadim olketa thru long wilderness and go insaed long Promis Land. Olketa mas no forget long wei wea olketa memory hia mas go ahed for barava affectim evriday living bilong olketa.—Deut. 4:9, 10; 8:10-18; Ex. 12:24-27; Ps. 136:15.

Iumi tu shud careful for no forget. Taem iumi deal witim olketa hevi bilong laef, iumi need for rememberim Jehovah, evritaem tingim wanem kaen God nao hem and love wea hem showimaot taem hem givim olsem present Son bilong hem, wea provaedem wanfala ransom for olketa sin bilong iumi mekem iumi maet garem perfect laef for olowe. (Ps. 103:2, 8; 106:7, 13; John 3:16; Rom. 6:23) Wei for readim Bible evritaem and for tekpart long olketa meeting and long field ministry bae keepim olketa spesol truth hia strong long iumi.

Taem iumi mas disaedem samting, big or smol, rememberim olketa important truth, and letem olketa for affectim tingting bilong iu. No forget. Luk long Jehovah for help. Winim wei for ting long samting long physical wei or for trustim samting wea heart wea no perfect kwiktaem for wantem, askem iuseleva, ‘Wanem nao kaonsel or olketa principle from Word bilong God wea savve affectim disison bilong mi?’ (Prov. 3:5-7; 28:26) Iu no savve rememberim samting wea iu nating readim or herem yet. Bat taem iu go ahed for grow long stretfala savve and love for Jehovah, savve wea holy spirit bae helpem iu for rememberim bae kamap moa big, and love for Jehovah wea grow bae muvim iu for followim datfala savve.