Waka Hard Long Wei for Read

OLKETA animal no savve duim samting wea iu duim distaem. Wanfala long evri 6-fala man no lane hao for read—planti taem bikos olketa no garem chance for skul—and planti wea savve read, no duim evritaem. Bat from iu savve read, diswan mekem iu savve wakabaot go long difren kantri, meetim pipol wea living bilong olketa savve mekem living bilong iu for moabeta, and kasem gudfala information wea bae helpem iu for deal witim olketa wari bilong laef.

Savve for read gud affectim haomas samting nao wanfala young wan bae kasem from skul. Taem hem lukaotem waka for selen, wei wea hem savve read maet affectim wanem kaen waka nao hem savve kasem and haomas hour nao hem mas waka for kasem inaf selen for fitim need bilong hem. Olketa haoswaef wea savve read gud bae moa fit for kea for famili bilong olketa saed long gudfala kaikai, wei for klin, and wei for protectim famili from sik. And tu, olketa mami wea read gud savve barava affectim wei wea pikinini bilong olketa growap witim savve.

Bat best samting wea kamaot from wei for read hem wei wea hem savve helpem iu for “faendem barava savve bilong God.” (Prov. 2:5) Planti long olketa difren wei wea iumi servem God needim savve for read. Iumi readim olketa scripture and pablikeson wea kam from Bible long olketa meeting. Wei wea iu readim samting barava affectim wei wea iu duim gud ministry bilong iu. And for prepare for olketa samting hia needim wei for read. Dastawe, wei wea iu grow long spiritual wei, hem barava depend long wei bilong iu for read.

Mekius Long Chance Bilong Iu

Samfala wea lane abaotem olketa wei bilong God no garem gudfala education. Maet olketa needim narawan for teachim olketa hao for read, mekem olketa savve muv ahed long spiritual wei. Or maet olketa needim samwan for helpem olketa kamap moabeta long wei for read. Sapos need hem stap, olketa kongregeson trae for organizem olketa read and raet class wea iusim disfala pablikeson Work Hard for Read And Raet. Planti thousand kasem barava gud samting from diswan. From hem important for read and raet gud, samfala kongregeson arrange for holem olketa read and raet class long taem bilong Theocratic Ministry Skul. Nomata long olketa ples wea no garem olketa class olsem, man savve muv ahed gud taem hem markem lelebet taem each day for read big and for evritaem attendim and tekpart long datfala skul.

Hem sorre samting hao olketa comic buk and video witim olketa nara samting, mekem pipol no read evritaem. Wei for evritaem lukluk video and no readim tumas samting maet holem bak wei wea man kamap moabeta long wei for read and for garem kliafala tingting, and for talem samting long kliafala wei.

“Faithful and wise slave” provaedem olketa pablikeson for helpem iumi minim Bible. Olketa hia provaedem staka information abaotem olketa important spiritual samting. (Matt. 24:45;1 Cor. 2:12, 13) And tu, olketa helpem iumi for savve wanem nao olketa important samting wea go ahed long world and mining bilong olketa, olketa helpem iumi for garem moa savve abaotem creation, and teachim iumi olketa wei for deal witim olketa samting wea mekem iumi wari. Winim evri samting, olketa deal witim hao for servem Jehovah long wei wea hem bae acceptim and appruvim iumi. Gudfala reading olsem bae helpem iu for grow olsem wanfala spiritual man.

Tru, just for savve hao for read hem no only samting wea gud. Man need for iusim savve hia long wei wea fitim. Olsem wei for kaikai, iumi mas chusim gud samting iumi readim. Why nao iumi bae kaikaim kaikai wea no mas strongim body or wea maet garem poison? Long sem wei, why nao iu bae readim samting, nomata iu no mas interest long hem, wea savve spoelem mind and heart? Olketa Bible principle shud affectim wanem iumi chus for readim. Bifor iu disaedem wanem nao iu bae readim, tingim olketa scripture olsem Ecclesiastes 12:12, 13; Ephesians 4:22-24; 5:3, 4; Philippians 4:8; Colossians 2:8; 1 John 2:15-17; and 2 John 10.

Garem Stretfala Reason for Readim Samting

Wei wea hem important for garem stretfala reason for readim samting hem showaot klia taem iumi lukluk gud long olketa Gospel. Olsem example, long Gospel bilong Matthew, Jesus askem olketa bigman bilong religion wea savve gud long olketa scripture, olketa kwestin olsem “Waswe, iu no readim?” and “Waswe, iu no enitaem readim diswan?” bifor hem ansarem from Bible olketa kwestin wea olketa askem for trikim hem. (Matt. 12:3, 5; 19:4; 21:16, 42; 22:31) Wanfala leson wea iumi lanem from diswan hem hao sapos reason bilong iumi for readim samting hem no stret, iumi savve kasem rong mining or barava missim point bilong hem evribit. Olketa Pharisee readim olketa scripture bikos olketa tingse wei for duim olsem bae mekem olketa kasem laef olowe. Datfala reward, olsem Jesus hem talem, hem no for olketa wea no lovem God and no acceptim samting wea Hem provaedem for salvation. (John 5:39-43) Olketa Pharisee garem selfish goal; dastawe, planti wei wea olketa minim samting hem rong.

Love for Jehovah hem best reason iumi savve garem for readim Word bilong hem. Kaen love olsem muvim iumi for lanem will bilong God, bikos love “hem hapi long truth.” (1 Cor. 13:6) Nomata sapos iumi no enjoyim wei for read bifor, wei for lovem Jehovah witim “full mind” bae muvim iumi for waka hard witim mind bilong iumi for kasem savve bilong God. (Matt. 22:37) Love mekem iumi interest, and interest muvim iumi for lane.

Tingim Hao Fast Iu Read

Reading hem join witim wei for luksavve long olketa word. Nomata taem iu readim disfala sentence, iu go ahed for luksavve long olketa word and rememberim mining bilong olketa. Iu bae read moa fast sapos iu luksavve long olketa sekson bilong olketa word. Winim wei for stop and lukim each word, trae for lukim tu-thri word tugeta long wantaem. Taem iu kamap moabeta for duim diswan, iu bae faendem hao iu minim samting wea iu readim long wei wea moa klia.

Bat, taem iu readim samting wea moa deep, maet iu kasem moa samting taem iu iusim narafala wei for read. Taem Jehovah hem givim kaonsel long Joshua abaotem wei wea hem readim olketa scripture, hem sei: “Disfala buk bilong law shud no lusim mouth bilong iu, and iu mas readim smol.” (Josh. 1:8) Planti taem, man story long hemseleva long kwaet wei taem hem ting raonem samting. Dastawe, Hebrew toktok wea olketa transleitim “readim smol” olketa savve transleitim olsem “ting raonem” tu. (Ps. 63:6; 77:12; 143:5) Taem wanfala man hem ting raonem samting, hem ting deep long hem; hem no hariap long hem. Wei for tingting taem iu read hem letem Word bilong God for affectim mind and heart long wei wea moa big. Insaed long Bible hem garem profesi, kaonsel, olketa proverb, poetry, toktok bilong olketa judgment bilong God, information abaotem purpose bilong Jehovah, and staka really laef example for iumi—wea evriwan important long olketa wea want for followim wei bilong Jehovah. Iumi kasem barava gud samting taem iumi readim Bible long wei wea mekem wanem iumi readim go deep insaed mind and heart!

Lane for Ting Strong

Taem iu read, tingim olsem iu nao barava insaed long samting wea iu read abaotem. Trae for olsem iu barava lukim pipol wea iu read abaot, and trae for garem feeling long samting wea happen long olketa. Diswan hem isi lelebet taem iu readim wanfala story olsem David and Goliath, wea stap long 1 Samuel chapter 17. Nomata information long Exodus and Leviticus abaotem taem olketa wakem tabernacle or taem olketa appointim olketa priest bae moa interesting sapos iu lukim long mind bilong iu big bilong hem and olketa material wea olketa iusim, or tingim hao nao smel bilong incense, grain wea olketa kukim long oven, and olketa animal wea olketa givim olsem bone offering. Tingim hao hem mas barava spesol samting tumas for duim waka bilong priest! (Luke 1:8-10) Wei for tingim iuseleva olsem iu barava insaed and feelim samting wea iu read abaotem bae helpem iu for kasem full mining bilong samting wea iu readim and bae helpem iu for remember.

Bat sapos iu no careful, mind bilong iu savve go difren taem iu read. Eye bilong iu lukim page, bat iu tingim difren samting. Waswe, music hem plei? Television hem on? Olketa famili member story tugeta? Sapos iu savve duim, hem moabeta for read long wanfala kwaet ples. Bat iumiseleva nao savve kosim mind bilong iumi for go difren. Maet iu duim staka samting long datfala day. So hem barava isi for tingim moa olketa samting hia! Hem gud for tingim moa olketa samting hia—bat no long taem wea iu read. Maet firstaem mind bilong iu barava followim gud samting wea iu readim, or maet iu startim reading bilong iu witim wanfala prea. Bat then taem iu read, mind bilong iu start for go difren. Trae moa. Bossim iuseleva for keepim mind bilong iu followim samting wea iu readim. Gogo, bae iu lukim hao iu kamap moabeta long diswan.

Wanem nao iu duim taem iu faendem wanfala word wea iu no minim? Maet disfala reading minim kam or story raonem samfala word olsem. Or maet iu fit for luksavve long mining from wanem reading hem story abaotem. Sapos nomoa, tek-taem for faendem word hia long dictionary sapos iu garem, or andalaenem word hia, mekem iu savve askem samwan wanem nao hem minim bihaen. Diswan bae mekem grow namba bilong olketa word wea iu savve long hem and wei wea iu minim samting wea iu readim.

Pablik Reading

Taem aposol Paul talem Timothy for go ahed for waka hard long wei for read, Paul tok abaotem kaen reading wea savve helpem olketa narawan. (1 Tim. 4:13) Gudfala pablik reading needim moa samting winim wei for read big nomoa from wanfala buk. Man wea read hem need for minim olketa word and olketa idea wea olketa word talem. Diswan nomoa savve mekem hem fit for talem go olketa idea long stretfala wei and putim stretfala feeling insaed. Diswan barava needim man for prepare gud and practice. Dastawe, Paul givim encouragement: “Go ahed for waka hard long wei for read long pablik.” Iu bae kasem gud training for duim diswan long Theocratic Ministry Skul.

Markem Taem for Read

“Olketa plan bilong man wea trae hard bae kasem reward, bat evriwan wea kwiktaem tumas bae garem need.” (Prov. 21:5) Diswan hem barava tru saed long wei wea iumi want for read! For win long diswan, iumi need for barava plan gud, mekem olketa nara samting no iusim taem wea iumi needim for read.

Wanem taem nao iu read? Waswe, iu kasem gud samting taem iu read long early morning? Or iu faendem hao narataem long day hem fitim iu? Sapos iu savve markem 15 or 20 minute each day for duim reading, bae iu sapraes long haomas nao iu savve readim. Key hem for duim evritaem.

Why nao Jehovah chus for raetem daon olketa nambawan purpose bilong hem insaed long wanfala buk? For mekem pipol savve luk long Word bilong hem. Diswan helpem olketa for ting raonem olketa nambawan waka bilong Jehovah, for storyim long olketa pikinini, and for rememberim olketa fasin bilong God. (Ps. 78:5-7) Best wei for iumi savve showimaot iumi tinghae long kaenfala fasin bilong Jehovah long diswan hem wei for waka hard for readim Word bilong hem wea givim laef.