Hao for Duim Research
KING SOLOMON hem “ting raonem and barava lukaotem, mekem hem savve putim olketa proverb followim order.” Why nao olsem? Bikos hem interest for raetem olketa “stretfala toktok bilong truth.” (Eccl. 12:9, 10) Luke hem “lukluk gud long evri samting long stretfala wei from taem wea olketa start” mekem hem savve talem olketa samting wea happen insaed laef bilong Christ followim order wea olketa happen. (Luke 1:3) Tufala servant bilong God hia duim research.
Wanem nao research? Hem wei for lukaotem information abaotem samting long careful wei. Insaed long diswan hem reading, and hem needim wei for followim olketa principle bilong study. Insaed diswan maet hem for interviewim pipol tu.
Wanem nao samting wea needim research? Iumi lukim samfala example. Bible reading bilong iu maet mekem iu garem samfala kwestin wea hem important long iu. Maet samwan wea iu witness long hem askem kwestin wea iu bae laek for ansarem witim information wea barava fitim. Maet iu kasem assignment for givim wanfala tok.
Tingim assignment for givim wanfala tok. Maet information bilong datfala tok hem no barava targetim eni samting. Hao nao iu savve mekem information hia for fitim wanfala need long ples bilong iu? Mekem hem kamap moabeta long wei for duim research. Taem iu saportim information hia witim tu-thri samting wea barava happen or witim wanfala example wea fitim datfala information and wea olketa long audience interest long hem, wanfala point wea maet olketa savve finis long hem savve kamap samting for barava helpem and muvim olketa. Maet information wea iu iusim hem for evri pipol raonem world, bat iu need for strongim, givim example, and mekem olketa point hia for fitim wanfala kongregeson or wanfala person. Hao nao for duim?
Bifor iu startim research bilong iu, ting raonem audience bilong iu. Wanem nao olketa savve finis long hem? Wanem nao samting wea olketa need for savve long hem? Then luksavve long goal bilong iu. Waswe, hem for explainim? Mekem man bilivim? pruvim hem no tru? or for muvim olketa? For explainim samting iu need for provaedem moa information for mekem klia. Nomata maet olketa minim olketa main point, maet iu need for talem moa samting abaotem wanem taem and hao nao for duim samting hia. For mekem man bilivim, iu need for givim olketa reason why nao samting hem olsem, witim olketa pruv. For pruvim samting hem no tru, iu need for savve gud long tufala saed bilong datfala kwestin witim wei for lukluk gud long olketa pruv. Bat, wanem iumi trae for duim, hem no for pruvim samting nomoa, bat for lukaotem olketa difren wei for talem information hia long kaenfala wei. For muvim man, iu need for kasem heart. Hem minim for givim audience olketa reason for duim samting, and buildimap wei wea olketa want for duim samting followim wanem iu storyim. Olketa really example bilong olketa wea duim samting wea iu storyim, nomata olketa feisim hardfala samting, savve helpem iu for kasem heart.
Waswe, iu redy for start? No yet. Ting raonem haomas information nao iu needim. Taem hem important. Sapos iu bae sharem information witim narawan, haomas taem nao iu garem for datwan? Faev minute? Foti-faev minute? Waswe, olketa markem haomas taem, olsem long olketa meeting, or iu nao savve disaed, olsem long wanfala Bible study or wanfala shepherding kol?
Last samting, wanem nao olketa research tul wea stap for iu iusim? Witim olketa buk wea iu garem long haos, waswe, samfala moa stap long Kingdom Hall library bilong iu? Waswe, bae olketa brata wea bin servem Jehovah for planti year willing for letem iu for iusim olketa research tul bilong olketa? Waswe, pablik library stap long area bilong iu wea mekem iu savve iusim olketa reference buk sapos iu needim?
Iusim Main Research Tul Bilong Iumi—Bible
Sapos research project bilong iu hem for minim wanfala scripture, start witim Bible.
Tingim Olketa Verse wea Stap Raonem. Askem iuseleva: ‘Scripture hia hem for hu nao? Wanem nao olketa verse wea stap raonem showim abaotem olketa samting wea lead go long datfala toktok or wei for tingting bilong olketa wea insaed datwan?’ Kaen information olsem savve planti taem helpem iumi for minim wanfala scripture, and savve mekem tok interesting.
Olsem example, pipol planti taem iusim Hebrews 4:12 for showim hao Word bilong God hem garem paoa for muvim heart and affectim laef bilong man. Olketa verse wea stap raonem savve mekem wei wea iumi minim diswan kamap moa deep. Hem storyim olketa experience bilong Israel insaed datfala 40 year wea olketa stap long wilderness, bifor olketa go insaed long land wea Jehovah promisim long Abraham. (Heb. 3:7–4:13) “Word bilong God,” promis bilong hem for tekem olketa go insaed long wanfala ples bilong rest olsem covenant talem wea hem mekem witim Abraham, hem no dae finis; hem laef and hem gogo for fulfill. Olketa Israelite garem evri reason for showimaot faith long datwan. Bat, taem Jehovah leadim olketa from Egypt go long Maunt Sinai and go moa for kasem Promis Land, olketa evritaem showimaot hao olketa short long faith. So, wanem olketa duim bihaen Jehovah duim samting saed long word bilong hem showimaot wanem nao insaed long heart bilong olketa. Long wei wea klosap semsem long taem bilong iumi, olketa promis bilong God mekem samting wea insaed long heart bilong olketa man showaot.
Chekim Olketa Cross-Reference. Samfala Bible garem olketa cross-reference. Waswe Bible bilong iu? Sapos hem garem, maet olketa helpem iu. Tingim wanfala example from New World Translation of the Holy Scriptures. Wan Peter 3:6 storyim Sarah olsem wanfala example wea olketa Christian waef fit for followim. Wanfala cross-reference long Genesis 18:12 hem saportim datwan bikos hem storyim hao “insaed long hemseleva” Sarah kolem Abraham lord. So wei wea hem stap anda, hem from heart bilong hem. For join witim kaen information olsem, olketa cross-reference scripture maet showim iu hao wanfala Bible profesi hem fulfill or wei wea Law covenant point go long samting. Bat, luksavve hao samfala cross-reference no givim kaen wei for minim samting olsem. Olketa storyim nomoa samting wea semsem or information abaotem laef bilong wanfala man or wanfala ples.
Lukaotem Samting Witim Wanfala Bible Concordance. Bible concordance hem wanfala alphabetic index bilong olketa word wea insaed long Bible. Hem savve helpem iu for faendem olketa scripture wea join witim subject wea iu duim research long hem. Taem iu readim olketa hia, bae iu lanem olketa nara information wea bae helpem iu. Iu bae lukim pruv bilong “datfala plan” bilong truth wea insaed long Word bilong God. (2 Tim. 1:13) New World Translation garem list bilong “Bible Words Indexed.” Datfala Comprehensive Concordance hem garem staka moa word. Sapos iu garem diswan long languis bilong iu, hem bae helpem iu for faendem evri scripture wea garem each wan long olketa main word insaed long Bible.
Lane for Iusim Olketa Nara Research Tul
Box long page 33 hem listim samfala nara research tul wea “faithful and wise slave” provaedem. (Matt. 24:45-47) Planti long olketa hia garem list bilong olketa subject wea insaed, and planti garem wanfala index long bihaen, wea savve helpem iu for faendem information wea iu needim. Long end bilong each year, olketa pablisim olketa subject index insaed long Wastaoa and Awake! for evri article bilong datfala year.
For savve long kaen information wea insaed long olketa Bible study pablikeson hia savve helpem iu for duim research long wei wea moa fast. Olsem example, sapos iu want for savve abaotem profesi, teaching, Christian fasin, or hao for followim olketa Bible principle. Wastaoa maet garem information wea iu lukaotem. Wekap! hem deal witim olketa samting wea go ahed for happen, olketa problem bilong distaem, religion, science, and pipol bilong olketa difren kantri. Story abaotem each wan long olketa Gospel wea followim taem wea olketa samting happen, hem stap insaed long Nambawan Man Wea Winim Evri Otherfala Man. Wei for storyim evri verse bilong samfala full buk bilong Bible stap insaed long olketa pablikeson olsem Revelation—Its Grand Climax At Hand!, Tingting Strong Long Profesi Bilong Daniel!, and tufala volume bilong Isaiah’s Prophesy—Light For All Mankind. Insaed long Reasoning From the Scriptures, bae iu faendem olketa ansa wea mekem man satisfae for planti handred Bible kwestin wea pipol long territory askem. For minim long wei wea moa klia olketa nara religion, samting olketa teachim, and history bilong olketa, lukim Mankind’s Search for God. Samfala information abaotem history bilong Olketa Jehovah’s Witness distaem stap insaed brochure Olketa Jehovah’s Witness— Wan Mind for Duim Will Bilong God Evriwea Long World. For kasem report abaotem wei wea waka for preachim gud nius raonem full world hem muv ahed distaem, chekim Wastaoa wea garem date January 1. Insight on the Scriptures hem wanfala Bible encyclopedia and atlas. Sapos iu needim information abaotem pipol, olketa ples, samfala samting, olketa languis, or samting wea happen bifor wea join witim samting insaed long Bible, disfala buk garem staka information.
“Watch Tower Publications Index.” Disfala index wea olketa pablisim long winim 20 languis, bae leadim iu go long information insaed planti difren pablikeson bilong iumi. Hem garem subject index and scripture index. For iusim subject index, faendem wanfala word wea olsem main word bilong subject wea iu studyim. For iusim scripture index, faendem scripture wea iu laek for garem moa information abaotem insaed list bilong olketa scripture. Sapos olketa pablisim wanfala buk long languis bilong iu wea storyim datfala subject or scripture, and index kavarem datfala buk, bae iu faendem list long olketa point for iu savve luk long hem. Iusim key long front bilong index for minim nem bilong olketa pablikeson. (Olsem example, witim help bilong diswan, iu bae lanem hao w99 3/1 15 hem minim The Watchtower bilong 1999, March 1 issue, page 15.) Olketa main heding olsem “Field Ministry Experiences” and “Life Stories of Jehovah’s Witnesses” savve help taem iumi preparem olketa tok for kongregeson wea savve muvim man.
From wei for duim research hem savve barava mekem man interest, mas careful for no forgetim goal bilong iu. Tingim evritaem goal bilong iu for lukaotem nomoa information wea iu needim for project bilong iu. Sapos long Index iu faendem wanfala buk wea fitim, tan go long olketa page wea Index markem, then iusim olketa subheding and olketa sentence long start bilong olketa paragraf for leadim iu go long information wea fitim need bilong iu. Sapos iu lukaotem mining bilong wanfala Bible scripture, faendem firstaem wea nao scripture hia insaed long page wea Index markem. Then lukluk gud long information wea stap raonem datwan.
“Watchtower Library” on CD-ROM. Sapos iu garem chance for iusim computer, iu savve kasem gud samting taem iu iusim Watchtower Library long CD-ROM, wea garem staka long olketa pablikeson bilong iumi. Datfala program for lukaotem samting wea isi for iusim helpem iu for lukaotem wanfala word, samfala word wea stap tugeta, or wanfala scripture insaed eniwan long olketa pablikeson insaed long Watchtower Library. Nomata sapos iu no garem disfala tul for research long languis bilong iu, maet iu savve iusim wanfala long olketa languis wea iu savve lelebet long hem.
Olketa Nara Theocratic Library
Long mek-tu leta wea spirit muvim Paul for raetem long Timothy, hem askem disfala young man for tekem kam “olketa scroll, main wan nao olketa parchment,” long hem long Rome. (2 Tim. 4:13) Paul hem tinghae long samfala long olketa raeting and keepim olketa. Iu savve duim sem samting. Waswe, iu keepim olketa copy bilong Wastaoa, Wekap!, and Kingdom Ministry Bilong Iumi nomata bihaen iumi studyim finis long olketa meeting? Sapos olsem, olketa bae stap redy for iu iusim olsem olketa reference tul, witim olketa nara Christian pablikeson wea iu garem. Klosap evri kongregeson keepim olketa theocratic pablikeson long wanfala library long Kingdom Hall. Olketa buk hia hem for helpem evriwan long kongregeson, and olketa savve iusim long taem olketa stap long Kingdom Hall.
Keepim Olketa File Bilong Iuseleva
Evritaem luksavve long eni information wea iu savve iusim taem iu givim tok and teach. Sapos iu faendem insaed long niuspepa or magasin wanfala nius, information, or example wea iu savve iusim long ministry bilong iu, katemaot or copyim datwan. Mek sure iu garem date, title bilong datfala niuspepa, and maet nem bilong man wea raetem or pablisim. Long olketa meeting, raetem daon olketa point wea savve helpem narawan for minim samting and tokpiksa wea maet helpem iu for minim truth long narawan. Waswe, iu enitaem tingim gudfala tokpiksa bat no garem chance for iusim datwan stretawe? Raetem daon, and keepim insaed long wanfala file. Bihaen iu bin insaed long Theocratic Ministry Skul for lelebet taem, iu bae garem olketa tok wea iu givim finis. Winim wei for torowem olketa tok hia, keepim olketa. Maet iu savve iusim research wea iu duim long narataem.
Story Witim Pipol
Pipol nao savve givim staka information. Taem Luke hem raetem Gospel bilong hem, luk olsem hem kasem planti information, from hem interviewim olketa man wea barava lukim samting. (Luke 1:1-4) Maet narafala Christian savve helpem iu for minim samting wea iu bin duim research long hem. Olsem Ephesians 4:8, and 11-16 talem, Christ hem iusim olketa “present olsem man” for helpem iumi grow long “stretfala savve bilong Son bilong God.” For interviewim olketa wea garem experience for servem God maet helpem iu for garem olketa gudfala idea for iusim. For story witim pipol tu maet showimaot wanem nao olketa tingim, and diswan savve helpem iu for preparem information wea barava helpem pipol.
Ting Raonem Olketa Samting wea Iu Faendem
Bihaen olketa harvestim wheat, olketa mas separatem grain from skin bilong hem. Hem semsem witim frut bilong research bilong iu. Bifor hem redy for iu iusim, iu need for separatem wanem nao iu savve iusim from staka information hia.
Sapos iu bae iusim disfala information insaed wanfala tok, askem iuseleva: ‘Waswe, bae point wea mi plan for iusim barava helpem tok bilong mi? Or, nomata diswan hem interesting information, waswe, bae hem mekem audience tingim difren samting from hem no really join witim subject wea mi shud storyim?’ Sapos iu ting for iusim olketa samting wea happen distaem or information abaotem science or medicine wea hem evritaem change, mek sure information bilong iu hem stret fitim disfala taem. Luksavve tu hao distaem samfala point insaed olketa olo pablikeson bilong iumi hem change, so iusim latest information abaotem datfala subject wea olketa pablisim.
Iu need for barava careful sapos iu chus for tekem information from olketa buk wea world pablisim. No forgetim hao Word bilong God nomoa hem truth. (John 17:17) Jesus garem main part for duim, insaed wei wea purpose bilong God hem fulfill. Dastawe Colossians 2:3 hem sei: “Evri rich samting bilong wisdom and savve hem stap haed witim hem.” Tingim datwan taem iu disaedem sapos information iu kasem from research bilong iu hem fitim or nomoa. Long saed bilong information wea world pablisim, askem iuseleva: ‘Waswe, information hia hem ova tumas, no garem pruv, or no tingim samting wea bae kamap bihaen? Waswe, selfish goal or for sellim samting nao muvim man for raetem? Waswe, olketa nara information wea pipol respectim agree witim datwan? Winim evri samting, waswe, hem agree witim Bible?’
Proverbs 2:1-5 hem encouragem iumi for go ahed for lukaotem savve, wei for minim samting, and fasin for luksavve “olsem for silver, and olsem riches wea haed.” Datwan hem minim hard waka and for kasem olketa richfala reward. Research hem needim hard waka, bat for duim bae helpem iu for faendemaot tingting bilong God long olketa samting, for stretem rong idea, and for strongim wei wea iu minim truth. And tu, hem bae mekem tok bilong iu moa interesting, garem moa mining, iu bae hapi for givim and pipol bae barava enjoyim.