Wanem Nao Iu Duim Taem Iu Givim Advaes?

Waswe, enitaem samwan askem iu for givim hem advaes? Olsem example, maet hem ask olsem: ‘Wanem nao mi shud duim? Waswe, mi shud go long datfala hapitaem? Waswe, mi shud duim disfala waka? Waswe, mi shud frenim datfala boy or gele?’

Maet samwan askem iu for helpem hem for disaedem wanfala samting. Maet datfala disison affectim wei wea hem fren witim Jehovah, olketa fren bilong hem, and olketa long famili. Waswe, bae iu givim advaes followim tingting bilong iuseleva or Bible? Wanem nao iu savve duim evritaem? Nomata iumi tingse samting wea olketa askem hem important or nomoa, hem gud for followim advaes long Proverbs 15: 28 wea sei: “Man wea raeteous hem ting raonem hao for ansa.” Bae iumi storyim faevfala Bible principle wea savve helpem iumi for givim gudfala advaes.

1 Luksavve Long Samting wea Kasem Man.

“Man hem krangge sapos hem ansarem samting bifor hem herem, and hem fit for kasem shame.”—PROV. 18:13.

Sapos iumi laek for givim samwan gudfala advaes iumi need for savve long tingting bilong hem and luksavve long samting wea kasem hem. Tingim diswan: Maet samwan ringim iu and askem wanem road nao bae hem followim mekem hem kasem haos bilong iu. Wanem nao iu need for savve long hem firstaem mekem iu helpem hem? Iu need for savve wea nao hem, mekem iu savve explainim hao for kasem haos. Long sem wei tu, bifor iumi givim advaes long samwan, iumi need for savve long tingting bilong hem and luksavve long samting wea kasem hem. So bifor iu givim advaes long man, waswe, iu savve long full story? Sapos iumi no savve long full story, maet advaes wea iumi talem mekem hem konfius.—Luke 6:39.

Waswe, Hem Duim Research? Maet hem gud for askem hem: “Waswe, iu tingim eni Bible principle wea savve helpem iu?” “Wanem nao gud and nogud saed long samting wea iu laek disaedem?” “Waswe, iu duim research finis?” “Wanem advaes nao olketa elder, mami and dadi, or man wea study witim iu talem?”

Wanem hem talem bae helpem iumi for luksavve sapos hem duim samting finis for savve long ansa, and sapos olketa narawan givim advaes long hem finis. Maet iumi luksavve tu sapos hem laekem iumi for ‘talem nomoa samting wea hem laek for herem.’—2 Tim. 4:3.

2 No Kwiktaem for Givim Advaes.

“Evriwan mas willing for lisin, no kwiktaem for toktok.” —JAS. 1:19.

Maet samfala taem iumi kwiktaem for talem advaes bikos iumi tingse datwan bae helpem man. Bat samfala taem hem no wise for kwiktaem talem advaes sapos iumi no duim research long kwestin wea hem askem. Proverbs 29:20 sei: “Waswe, iu savve long eni man wea kwiktaem for toktok? Hem isi for man wea krangge for changem wei bilong hem winim datfala man.”

Mek sure advaes wea iumi talem hem kam from Bible and no followim “tingting bilong pipol long disfala world.” (1 Cor. 2:12, 13) Taem Jesus sei hem mas safa and dae, Peter talem hem: “Lord, iu no tok olsem, bae olketa samting hia no kasem iu nomoa ia.” Wanem nao iumi lanem from samting wea Peter talem? Iumi lanem hao sapos iumi no careful maet advaes wea iumi givim no followim “tingting bilong God bat hem tingting bilong olketa man nomoa.” (Matt. 16:21-23) Iumi laek for helpem narawan bat hem gud for luksavve wisdom bilong God hem winim savve wea iumi garem. Dastawe, hem important for iumi tingting gud firstaem bifor iumi talem eni samting.—Job 38:1-4; Prov. 11:2.

3 Hambol and Followim Wanem Bible Talem.

“Mi no savve duim eni samting followim tingting bilong miseleva, bat mi storyim nomoa samting wea Dadi teachim long mi.”—JOHN 8:28.

Samfala taem maet iumi laek for sei: “Sapos mi, bae mi duim olsem . . . ” Nomata iu tingse iu savve long ansa, hem gud for followim wei bilong Jesus for hambol. Jesus garem bigfala wisdom and savve long staka samting winim eni nara man. Nomata olsem hem sei: “Mi no talem eni samting followim tingting bilong miseleva, bat mi talem nomoa samting wea Dadi . . . hem laekem mi for talem.” (John 12:49, 50) Jesus teachim and givim advaes wea followim nomoa wanem Dadi bilong hem laekem.

Olsem example, Luke 22:49 storyim hao olketa disaepol askem Jesus sapos olketa shud faetem olketa wea kam for arrestim hem. Wanfala long olketa disaepol iusim sword for protectim Jesus. Matthew 26:52-54 storyim tu hao nomata Jesus warim staka samting long datfala taem, hem helpem olketa disaepol for luksavve long wanem Jehovah laekem. Jesus savve long olketa principle long Genesis 9:6 and olketa profesi long Psalm 22 and Isaiah 53. Datwan mekem hem fit for givim gudfala advaes wea sevem laef and wea mekem Jehovah hapi.

4 Iusim Olketa Bible Pablikeson.

“Hu nao datfala wakaman wea faithful and wise wea Boss markem hem for lukaftarem olketa nara wakaman and for givim kaikai long olketa long barava taem?”—MATT. 24:45.

Jesus markem wakaman wea faithful and wise for provaedem olketa Bible pablikeson for iumi. Bifor iu givim advaes long narawan abaotem wanfala important samting, waswe, iu duim research long olketa Bible pablikeson?

Iumi savve faendem staka gud information long Watch Tower Publications Index and Watchtower Library.a Iumi shud mekius long olketa information hia! Tufala tul hia garem staka thousand topic wea storyim plande article for helpem iumi givim gudfala advaes. Waswe, iu savve helpem samwan for mekius long olketa tul hia for duim research long olketa Bible principle mekem hem disaedem stret samting? Tingim diswan, wei for lukluk long map savve helpem man for kasem ples wea hem laek go. Long sem wei tu, olketa Bible pablikeson savve helpem man for disaedem stret samting wea bae mekem hem for kasem laef olowe.

Staka elder helpem olketa pablisa for savve hao for iusim Index or Watchtower Library. Datwan helpem olketa brata and sista for faendem olketa article for duim research taem olketa mas disaedem samting. Hem helpem olketa tu for duim research seleva and for mekius long olketa spiritual tul wea Jehovah provaedem for helpem olketa long evriday laef. Wei for duim research helpem olketa pablisa for iusim “tingting bilong olketa for luksavve long samting, wea diswan mekem olketa fit for luksavve long wanem hem stret and wanem hem no stret.”—Heb. 5:14.

5 No Mekem Disison for Narawan.

“Samting wea man seleva mas duim, hem no waka bilong narawan bat hem waka bilong hemseleva nao.”—GAL. 6:5.

Jehovah givim iumi freedom for disaed seleva sapos iumi laek followim olketa Bible principle or nomoa. (Deut. 30:19, 20) Samfala taem man mas tingim tu-thri difren Bible principle wea join witim wanem hem askem, and hemseleva nao mas disaedem wanem for duim. Samfala taem iumi need for tingim tu sapos iumi fit for givim advaes. Olsem example, samfala samting hem gud for olketa elder nao shud deal witim, and sapos wanfala young wan askem iumi for advaes, maet hem gud for talem hem for story witim mami and dadi.

[Footnote]

[Box/Piksa long page 8]

Famili Worship Project

Wanfala project for duim long Famili Worship, hem for duim research and faendem ansa bilong kwestin wea wanfala brata or sista askem. Storyim olketa Bible principle and faendem olketa article wea savve helpem eniwan wea askem datfala kwestin. Olsem example, maet wanfala brata or sista askem iu kwestin abaotem wei for frenim samwan wea hem tingting for maritim. Hem gud for faendem firstaem main topic wea join witim datfala kwestin long Index or Watchtower Library. Olsem example, maet iu savve lukim main heding wea sei “Dating” or “Marriage” long Index. Then trae for faendem olketa article wea storyim datfala kwestin. Hem gud tu for chekim toktok wea sei “See also” for lukim olketa nara main heding wea maet storyim datfala kwestin.

[Box long page 9]

Iumi hapi tumas for kasem gudfala advaes from organization bilong Jehovah and datwan helpem iumi tu for givim gudfala advaes long narawan. Long Ecclesiastes 12:11 hem sei: “Toktok bilong olketa wea wise hem olsem olketa sharp stik for leadim buluka, and olketa wea laekem tumas olketa wisefala toktok olketa olsem nila wea olketa hammerim long timba. Wanfala man for lukaftarem sheepsheep nao talem olketa toktok hia.” “Stik for leadim buluka” savve mekem animal go stret. Semsem tu, gudfala advaes savve mekem man for duim stretfala samting. Olketa “nila wea olketa hammerim long timba” hem strongim haos. Long sem wei tu, wei for givim olketa gudfala advaes savve strongim man. Olketa wea wise “laekem tumas” for tingim “wisefala toktok” wea kam from Jehovah, datfala “man for lukaftarem sheepsheep.”

Taem iumi givim advaes, iumi mas mek sure hem followim tingting bilong Jehovah. Hem privilege for lisin and givim advaes for helpem narawan taem iumi fit for duim! Iumi bae givim gud advaes sapos iumi followim olketa Bible principle and maet datwan helpem narawan tu for duim samting for kasem laef olowe.