Savve Hao for Givim Ansa

SAMFALA kwestin olsem wanfala island long sea. Main part bilong hem stap andanit sea and man no lukim. Planti taem samting wea muvim man for askem samting hem moa important winim datfala kwestin seleva.

Nomata man wea ask hem barava want for kasem ansa, wei wea iu savve hao for ansa maet minim iu mas luksavve haomas samting for talem and wanem wei nao for deal witim datfala subject. (John 16:12) Olsem Jesus showim long olketa aposol, wanfala man maet ask for information wea hem no fit for kasem or wea no savve helpem hem.—Acts 1:6, 7.

Olketa Scripture kaonselem iumi for: “Letem toktok bilong iufala for evritaem hem kaenfala, garem salt, mekem iufala savve hao for givim ansa long each wan.” (Col. 4:6) So, bifor iumi ansa, iumi mas tingim no wanem nao for talem nomoa, bat hao for talem.

Luksavve Long Hao Nao Man wea Ask Ting Long Samting

Olketa Sadducee trae for trapim Jesus witim wanfala kwestin abaotem resurrection bilong wanfala woman wea maritim planti difren man. Bat, Jesus savve olketa no biliv long resurrection. So taem hem ansa, hem ansarem kwestin bilong olketa long wei wea deal witim rongfala tingting bilong olketa wea hem nao samting wea muvim olketa for askem datfala kwestin. Long wei for iusim nambawan wei for pullim tingting and wanfala story long Bible wea olketa savve long hem, Jesus hem showim samting long olketa wea olketa nating tingim bifor—kliafala pruv hao God bae resurrectim pipol wea dae finis. From ansa bilong hem barava mekem olketa wea againstim hem sapraes, olketa fraet for askem eni kwestin moa.—Luke 20:27-40.

Long sem wei, for savve long hao for givim ansa, iu mas luksavve long tingting and wari bilong olketa wea askem kwestin. Olsem example, wanfala skulfren or man wea waka witim iu maet askem iu why nao iu no celebratem Christmas. Why nao hem ask? Waswe, hem really interest long reason, or hem just laek for savve sapos biliv bilong iu letem iu for enjoyim olketa gud taem? For faendaot, maet iu need for askem hem wanem nao mekem hem ask. Then givim ansa wea fitim. And tu, maet iu iusim datfala chance for showim hao wei for followim wanem Bible talem hem protectim iumi from olketa part bilong datfala holiday wea kamap wanfala hevi for pipol and mekem olketa feel wiki.

Tingim sapos olketa invaetem iu for givim tok long wanfala grup bilong olketa student abaotem Olketa Jehovah’s Witness. Bihaen long tok bilong iu, olketa maet askem olketa kwestin. Sapos luk olsem olketa kwestin hia fitim and man wea ask hem barava laek for savve, ansa wea simpol and klia nao maet best wan. Sapos olketa kwestin showimaot wei wea pipol long community judgem diswan finis, iu savve helpem olketa sapos firstaem iu talem lelebet samting abaotem wanem nao mekem pipol garem tingting olsem, and why nao Olketa Jehovah’s Witness chus for letem Bible putim olketa mark for olketa. Hem gud for ting long olketa kaen kwestin hia, olsem samting wea pipol wari long hem, no olsem wei for challengem samting—nomata maet hem nao olketa duim. So, ansa bilong iu givim iu chance for mekem wei wea audience ting long samting kamap moa waed, givim olketa stretfala savve, and explainim olketa reason from Bible for olketa biliv bilong iumi.

Wanem nao bae iu sei long boss bilong iu sapos hem no want for givim iu taem wea iu needim for attendim wanfala convention? Firstaem, trae for minim wei wea hem ting long diswan. Waswe, bae hem help sapos iu offer for duim ovataem long narataem? Sapos iu explainim long hem hao instruction wea iumi kasem long olketa convention helpem iumi for olsem wanfala wakman wea honest and boss fit for trustim, waswe, maet datwan savve changem tingting bilong hem? Sapos iu showim hem hao iu luksavve long need bilong hem, maet hem willing tu for tingim wanem nao hem important long laef bilong iu. Bat waswe sapos hem wantem iu for duim samting wea no honest? Wei for talem hem klia iu bae no duim datwan and givim reason from Bible, bae mekem hem savve. Bat maet hem moabeta sapos firstaem iu helpem hem for minim hao wanfala man wea willing for laea or steal for hem maet laea long hem or steal from hem?

Long narasaed, maet iu wanfala student wea no want for share insaed samfala samting long skul wea againstim Bible. Remember, maet teacher no agree witim olketa wei wea iu ting long samting, and hem responsibility bilong hem for keepim order insaed long class. Olketa challenge wea iu feisim hem (1) for showim iu tingim wanem hem wari long hem, (2) for explainim witim respect why nao iu no want for duim samting, and (3) for strong for duim samting wea iu savve bae mekem Jehovah hapi. For kasem best samting, maet iu need for duim moa samting winim wei for talem hem stret wanem nao iu bilivim. (Prov. 15:28) Sapos iu young, mami and dadi bae helpem iu for preparem samting for talem.

Samfala taem, maet iu need for pruvim hao samting wea samwan wea garem paoa accusim iu long hem, hem no tru. Wanfala police man, bigman bilong gavman, or wanfala judge maet askem iu strong for ansarem olketa kwestin abaotem wei for obey long wanfala law, wei wea iu no teksaed olsem wanfala Christian, or tingting bilong iu abaotem wei for tekpart long olketa celebration for mekhae long kantri. Hao nao iu shud ansa? Bible hem sei: “Witim kwaet fasin and bigfala respect.” (1 Pet. 3:15) And tu, askem iuseleva why nao pipol wari long olketa samting hia, and long wei wea showim respect talem hao iu luksavve long datwan. Wanem moa iu savve duim? Aposol Paul storyim olketa raet bilong man wea law bilong Rome protectim, so maet iu point go long olketa law wea protectim samfala raet bilong iu wea fitim samting wea olketa ask abaotem. (Acts 22:25-29) Maet information abaotem samting wea olketa first-century Christian and Olketa Jehovah’s Witness evriwea long world duim, and why nao olsem, savve helpem datfala bigman for changem wei wea hem ting long datwan. Or iu savve minim long hem hao wei for luksavve long paoa bilong God, hem muvim pipol for moa strong for obeyim olketa law bilong man wea stret. (Rom. 13:1-14) From iu duim olsem, maet olketa acceptim olketa reason wea iu givim from Bible for why nao iu duim samting.

Wei wea Man wea Askem Kwestin Ting Long Bible

Taem iu disaed long hao for ansa, maet iu need for tingim tu hao nao man wea askem kwestin ting long Holy Bible. Hem nao samting Jesus duim taem hem ansarem kwestin bilong olketa Sadducee abaotem resurrection. From hem savve hao olketa acceptim samting wea Moses nomoa raetem, Jesus storyim wanfala part long Pentateuch (first faevfala buk bilong Bible), and hem start witim disfala toktok: “Bat Moses tu showimaot hao olketa wea dae finis bae resurrect.” (Luke 20:37) Long sem wei, maet iu faendem hem gud for storyim samfala part bilong Bible wea man wea lisin long iu acceptim and wea hem savve long hem.

Waswe sapos man wea lisin long iu hem no trustim Bible? Lukim wanem nao aposol Paul duim taem hem givim tok bilong hem long Areopagus, wea stap long Acts 17:22-31. Hem sharem olketa truth from Bible bat no talem barava toktok insaed long Bible. Long taem wea fitim, iu savve duim sem samting. Long samfala ples iu maet need for story witim man tu-thri taem bifor iu savve talem hem hao samting iu story abaotem hem kam from Bible. Taem iu start for iusim Bible, maet hem wise firstaem for talem samfala reason why nao hem fitim for man herem wanem Bible talem, winim wei for just talem hao hem Word bilong God. Bat, goal bilong iu hem for givim kliafala witness abaotem purpose bilong God and, gogo, for letem man wea lisin long iu lukim seleva wanem nao Bible talem. Paoa wea Bible garem for muvim man hem winim eni samting wea iumi wanwan maet talem.—Heb. 4:12.

“Evritaem Hem Kaenfala”

Hem barava fitim for olketa servant bilong Jehovah, wea hemseleva nao kaenfala, for kasem instruction for toktok bilong olketa mas “evritaem hem kaenfala, garem salt”! (Col. 4:6; Ex. 34:6) Diswan hem minim iumi shud story witim kaenfala fasin, nomata long wanfala man wea luk olsem hem no fit for kasem. Toktok bilong iumi shud here gud long man wea lisin, no raf, no mekem man feel nogud.

Planti pipol garem bigfala hevi, and evriday olketa narawan tok spoelem olketa. Taem iumi go long olketa, maet olketa tok raf long iumi. Wanem nao iumi shud duim? Bible hem sei: “Kwaet ansa hem stopem kros.” Kaen ansa olsem savve muvim man wea bilivim difren samting for lisin. (Prov. 15:1; 25:15) For pipol wea mas deal witim raf samting evriday, kaenfala wei and voice bilong iumi maet savve mekem man willing for lisin long datfala gud nius wea iumi tekem kam.

Iumi no interest for argue witim pipol wea showimaot olketa no respectim truth. Bat, iumi want for iusim Bible for helpem pipol wea bae letem iumi duim datwan. Nomata wanem nao iumi mas feisim, iumi remember hao iumi shud ansa witim kaenfala fasin and witim fasin for biliv strong hao olketa spesol promis bilong God bae fulfill.—1 Thess. 1:5.

Samting Man Seleva Disaedem and Samting Saed Long Conscience

Taem wanfala Bible student or samwan wea garem sem biliv askem iu wanem nao hem shud duim abaotem wanfala samting, hao nao iu shud ansa? Maet iu savve long wanem iuseleva bae duim. Bat evri man mas givim ansa for olketa samting wea hem disaedem long laef bilong hem. (Gal. 6:5) Aposol Paul explainim hao hem encouragem “wei for obey thru long faith” long pipol wea hem preach long olketa. (Rom. 16:26) Datwan hem gudfala example for iumi followim. Man wea mekem olketa disison for mekem Bible teacher or nara man hapi nomoa hem servem olketa man, hem no live followim faith. (Gal. 1:10) So for givim ansa wea simpol and short maet no really helpem datfala man wea ask.

Hao nao iu savve ansa long wei wea followim olketa instruction insaed long Bible? Maet iu point go long olketa principle and example wea insaed long Bible. Long taem wea fitim, maet iu showim hem hao for duim research mekem hem savve faendem olketa principle and example seleva. Iu savve storyim olketa principle and wei wea olketa example savve helpem man, bat no joinim datwan witim samting wea man hem ask abaotem. Askem hem sapos hem lukim long olketa hia samting wea maet helpem hem for mekem disison wea wise. Taem hem tingim olketa principle and example hia, encouragem hem for ting raonem wanem nao Jehovah bae hapi long hem. Long disfala wei, iu helpem hem for ‘trainim paoa bilong hem for luksavve long olketa samting wea stret and rong.’—Heb. 5:14.

Givim Koment Long Olketa Kongregeson Meeting

Olketa meeting bilong Christian kongregeson planti taem givim chance for iumi talemaot faith bilong iumi long pablik. Wanfala wei wea iumi duim olsem hem for ansarem olketa kwestin. Hao nao iumi shud givim koment? Witim feeling for want for blessim, or talem gud samting abaotem Jehovah. Hem nao David wea raetem olketa psalm duim taem hem stap “midolwan olketa pipol wea hipap tugeta.” (Ps. 26:12) Iumi shud koment tu, long wei wea encouragem olketa wea garem sem biliv, muvim olketa “for showimaot love and gudfala waka,” olsem aposol Paul barava encouragem. (Heb. 10:23-25) Wei for studyim olketa leson firstaem savve helpem iumi for duim diswan.

Taem olketa askem iu for givim koment bilong iu, talem long wei wea simpol, klia, and short. No talem evri samting long paragraf; storyim wanfala point nomoa. Sapos iu no talem evri part bilong datfala ansa, hem savve givim chance for narawan givim koment tu. Hem barava help for storyim olketa scripture wea insaed long datfala information. Taem iu duim olsem, trae for strongim part bilong scripture wea saportim point wea insaed long paragraf. Lane hao for givim koment long toktok bilong iuseleva winim wei for readim samting from paragraf. No wari sapos iu no talem stret koment bilong iu. Datwan savve happen long evriwan wea givim koment samfala taem.

Hem klia hao for savve hao iumi shud givim ansa hem needim moa samting winim wei for savve long datfala ansa seleva. Iumi needim fasin for luksavve. Bat iumi barava feel satisfae taem iumi givim ansa wea kam from heart bilong iumi and wea tasim heart bilong olketa narawan!—Prov. 15:23.