Hao Nao Bae Iu Ansa?
1. Why nao hem gud for iumi followim example bilong Jesus taem samwan askem iumi eni kwestin?
1 Kam kasem distaem, olketa pipol gohed for tinghae long gudfala wei wea Jesus ansarem olketa kwestin. Taem pipol askem olketa difren kaen kwestin long iumi taem iumi preach, hem gud for iumi followim wei wea Jesus ansarem olketa kwestin.—1 Pet. 2:21.
2. Taem samwan askem kwestin wanem nao bae helpem iumi for givim gudfala ansa?
2 Lisin Gud Firstaem: Jesus trae for savve gud firstaem wanem nao mekem man for askem kwestin. Samfala taem hem gud for askem olketa kwestin for mekem iumi minim gud tingting bilong man wea askem kwestin. Taem samwan ask olsem, “Waswe, iu biliv long Jesus?” maet hem laek savve, why nao iumi no celebratem Christmas. Sapos iumi luksavve wanem nao man wea askem kwestin wari abaotem, datwan bae helpem iumi for story long gudfala wei.—Luke 10:25-37.
3. Wanem nao iumi garem wea savve helpem iumi faendem olketa ansa long Bible?
3 Iusim Bible for Ansarem Kwestin: Hem gud for iusim Bible evritaem for ansarem olketa kwestin. (2 Tim. 3:16, 17; Heb. 4:12) Reasoning buk and “Olketa Bible Subject For Storyim” from New World Translation of the Holy Scriptures savve helpem iumi for givim stretfala ansa. Nomata datfala man wea askem kwestin no bilivim Bible, maet iu savve showim hem long kaenfala wei, samting wea Bible teachim. Trae helpem hem for ting raonem bigfala savve long Bible. Taem iumi followim Jesus long wei for ansarem olketa kwestin, ansa bilong iumi bae olsem “olketa gold apple wea stap long olketa silver karving,” mekem samting wea iumi talem showimaot respect, hem naes tumas and garem hae price.—Prov. 25:11.
4. Long olketa wanem taem nao hem gud for iumi no ansarem evri kwestin?
4 Waswe, Iumi Mas Ansarem Evri Kwestin? Sapos iu no savve ansarem wanfala kwestin, no feel shame for talem: “Mi no savve, bat bae mi duim research and kam bak for talem wanem nao mi faendem.” Taem iumi hambol and duim olsem haosholder maet hapi for iumi kam bak moa. Sapos iu luksavve man wea askem kwestin laek argue nomoa, trae followim example bilong Jesus and talem shortfala ansa nomoa. (Luke 20:1-8) And sapos samwan wea no interest long truth trae for argue nomoa, iu savve finisim story long gudfala wei and gohed lukaotem olketa wea laek herem gud nius.—Matt. 7:6.
5. Wanem example nao Jesus showimaot long wei for ansarem olketa kwestin?
5 Jesus savve wei for depend long Jehovah hem important for finisim gud waka bilong hem for “talem olketa tru samting” and for ansarem olketa kwestin bilong olketa wea barava laek for kasem ansa. (John 18:37) Hem nambawan privilege for followim example bilong Jesus for givim ansa long olketa wea “showimaot olketa laekem laef olowe”!—Acts 13:48.