Wei for Lukluk Long Audience

EYE bilong iumi showimaot tingting and feeling bilong iumi. Hem maet showimaot sapraes or fraet. Hem maet showimaot fasin for kea or love. Long samfala taem, eye maet showimaot daot or sorre. Taem wanfala olo man storyim pipol long kantri bilong hem wea safa long bigfala wei, hem sei: “Mifala story witim eye bilong mifala.”

Hao nara pipol ting long iumi and samting iumi talem hem maet from wea nao iumi lukluk taem iumi story. Long planti ples, pipol trustim man wea long kaenfala wei, hem go ahed for luk long eye bilong olketa. Long narasaed, olketa maet daotem honest fasin or savve bilong wanfala man wea lukluk long leg bilong hemseleva or nara samting winim wei for lukluk long man wea hem story witim. Long samfala nara ples pipol ting long wei for barava luk long eye bilong man olsem wei for no showimaot respect, raf, or laek winim man. Diswan hem barava tru taem man hem story witim samwan long opposite sex or long wanfala chief or bigman. And long samfala area, sapos wanfala young wan hem lukluk long eye bilong wanfala wea olo taem hem story, pipol bae tingse hem no showimaot respect.

Bat, sapos hem fitim for duim, for lukluk long eye bilong man taem iu talem important samting savve strongim toktok bilong iu. Pipol maet tingse datwan showimaot speaker biliv strong long samting wea hem talem. Lukim ansa bilong Jesus taem olketa disaepol bilong hem showimaot bigfala sapraes and ask: “Hu nao savve sev?” Bible story olsem: “Jesus luk long feis bilong olketa, and sei: ‘Long olketa man diswan hem hard tumas, bat long God evri samting hem isi nomoa.’” (Matt. 19:25, 26) Bible showim tu hao aposol Paul interest tumas for lukim feeling bilong audience bilong hem. Wantaem, wanfala man wea born kam cripple hem stap taem Paul hem story. Acts 14:9, 10 talem: “Disfala man hem lisin taem Paul hem story, and taem Paul lukluk strong long hem and lukim hem garem faith for gud bak moa, hem sei long bigfala voice: ‘Standap stret long leg bilong iu.’”

Olketa Idea for Field Ministry. Taem iu share insaed field service, showimaot feeling and kaenfala fasin long pipol wea iu meetim. Sapos hem fitim, for startim story iusim olketa kwestin wea pullim interest bilong haosholder abaotem samting wea maet iutufala evriwan interest long hem. Taem iu duim diswan, trae for lukluk long eye bilong hem—or lukluk long feis bilong hem long kaenfala wei wea showimaot respect. Wanfala kaenfala smile long feis bilong man wea eye bilong hem showimaot hapi, hem luk naes tumas. Kaen lukluk olsem maet mekem datfala man luksavve wanem kaen man nao iu and helpem hem for feel moa isi taem iufala story tugeta.

Long taem wea fitim, wei for lukim wanem nao showaot long eye bilong datfala man, maet mekem iu savve wanem nao best samting for duim. Sapos man hem kros or barava no interest, iu maet fit for lukim datwan. Sapos hem no minim iu, iu maet luksavve long datwan. Sapos hem start for no patient, iu shud fit for luksavve. Sapos hem barava interest, diswan tu bae showaot. Lukluk long eye bilong hem maet mekem iu luksavve iu need for changem fast bilong toktok bilong iu, for trae moa hard for mekem hem join insaed datfala story, for finisim datfala story, or maet, for duim demonstration long hao for studyim Bible.

Nomata iu duim pablik witnessing waka or iu conductim wanfala hom Bible study, long wei wea showimaot respect trae for go ahed lukluk long eye bilong man wea iu story witim. Bat, no lukluk strong long hem, from datwan bae mekem hem feel shame. (2 Ki. 8:11) Bat long kaenfala wei, planti taem lukluk long feis bilong datfala man. Long planti kantri, diswan showimaot feeling bilong trufala interest. Hem tru, taem iu readim Bible or narafala pablikeson, eye bilong iu bae lukluk long page bilong datfala buk. Bat for strongim wanfala point, iu savve luk stret long datfala man, bat no for longfala taem. Sapos iu luk ap samfala taem, diswan bae mekem iu fit for lukim hao nao hem feel abaotem samting wea iu readim.

Sapos fasin for shame mekem hem hard for iu luk long audience, no givap. Sapos iu practice, for luk long audience long wei wea fitim savve kamap isi for duim, and hem maet mekem wei wea iu story witim narafala pipol kamap moabeta.

Taem Iu Givim Tok. Bible talem iumi hao bifor Jesus start for talem Sermon long Maunten, “hem luk go long olketa disaepol bilong hem.” (Luke 6:20) Lane from example bilong hem. Sapos iu bae givim tok front long wanfala grup, feisim olketa and then weit lelebet bifor iu start for story. Long planti ples diswan minim iu bae lukluk long eye bilong samfala long audience. For weit lelebet maet helpem iu for winim wei wea iu fraet. Bae hem helpem audience tu for redy for followim feeling or wei for tingting wea showaot long feis bilong iu. And tu, wei for duim olsem bae givim chance for audience for redy for lisin gud long iu.

Insaed long tok bilong iu, lukluk long audience. No lukluk long full grup nomoa. Trae for lukluk long olketa man wanwan. Long klosap evri ples, hem stret for wanfala pablik speaker for lukluk long eye bilong audience.

For luk long audience hem minim moa samting winim wei for luk raon nating nomoa. Long wei wea showimaot respect, lukluk long samwan long audience, and sapos fitim, talem wanfala full sentence long hem. Then lukluk long nara man, and talem wan or tufala sentence long hem. No lukluk long wanfala man for longfala taem tumas gogo hem feel shame, and no chusim nomoa tu-thri pipol long full audience for story go long olketa. Go ahed for lukluk long audience long disfala wei, bat taem iu story long wanfala man, barava story long hem and luksavve long feeling bilong hem bifor iu luk go long narawan.

Aotlaen bilong iu shud stap long speaker stand, long hand bilong iu, or insaed long Bible, mekem iu need for muvim eye nomoa for lukim. Sapos iu need for muvim full hed bilong iu for lukluk long aotlaen, bae iu hard for lukluk long audience. Iu shud tingim tu haomas taem iu lukluk long aotlaen and wanem taem iu duim datwan. Sapos iu lukluk long aotlaen taem iu storyim hae point long tok, datwan bae stopem iu for lukim feeling bilong audience and tu, bae hem spoelem paoa bilong tok bilong iu. Long sem wei, sapos iu evritaem lukluk long aotlaen, iu bae lusim wei for lukluk long audience.

Taem iu torowem ball long samwan, iu lukluk for savve sapos hem kasholem datwan. Evri point insaed tok bilong iu hem olsem iu “torowem” wanfala samting long audience. Iu maet luksavve sapos olketa “kasholem” from lukluk bilong olketa—wei for muvim hed, smile, or lukluk wea showimaot interest. Sapos iu keepim gudfala wei for lukluk long audience, diswan savve helpem iu for mek sure olketa “kasholem” olketa idea wea iu talem.

Sapos iu kasem assignment for read long kongregeson, waswe, iu shud trae for lukluk long audience taem iu read? Sapos audience luk followim reading bilong iu insaed Bible, planti long olketa bae no savve sapos iu luk ap or nomoa. Bat for lukluk long audience savve help for strongim reading bilong iu bikos bae iu luksavve long feeling bilong audience. And sapos eniwan long audience no iusim Bible and mind bilong olketa hem wakabaot, hem maet helpem olketa for ting strong moa long datfala reading taem speaker hem lukluk long olketa. Bat, bae iu fit for luk ap for lelebet taem nomoa, and iu mas no duim long wei wea spoelem reading bilong iu. For fitim datwan, best wei nao hem for holem Bible long hand and for keepim hed ap, no hangem hed long chest.

Samfala taem, olketa elder kasem assignment for givim tok long convention from wanfala manuscript. For duim long gudfala wei needim savve, wei for prepare gud, and staka practice. Hem tru, for givim tok from wanfala manuscript, hem katem daon wei for lukluk long audience. Bat sapos speaker hem prepare gud, hem shud fit for lukluk long audience samfala taem and no missim eni samting. For duim olsem bae help for keepim audience interest and bae mekem olketa fit for kasem evri gudfala samting from datfala important spiritual instruction.