Showimaot Interest Long Narawan—Long Wei for Luk Long Feis
1 Taem iumi witness long pablik and long haos tu haos, staka taem iumi luk long feis bilong pipol wea iumi laek story witim bifor iumi start for story. Long taem olsem, bae iumi savve lukim long feis bilong olketa hao olketa feel abaotem kakam bilong iumi and sapos olketa stap gud or nomoa. Olsem tu, olketa bae fit for luksavve plande samting abaotem iumi. Wanfala woman hem sei olsem abaotem wanfala Witness wea visitim hem: “Mi rememberim hao smile bilong hem showimaot hem garem peace. Datwan mekem mi barava interest.” Diswan mekem wei for woman hia lisin long gud nius.
2 Wei for luk long feis bilong olketa pipol taem iumi duim street waka or taem iumi witness long olketa nara pablik ples savve lead go long wei for givim witness. Wanfala brata hem luk long feis bilong olketa wea wakabaot kam klosap long hem. Taem olketa luk kam long hem, hem smile and then offerim olketa magasin. Taem hem duim diswan, hem enjoyim staka naes story witim olketa wea hem meetim, and hem offerim staka literature.
3 Luksavve Long Feeling Bilong Narawan: Wei for gohed luk long feis bilong olketa narawan bae helpem iumi for luksavve long feeling bilong olketa. Olsem example, sapos samwan no minim samting iumi talem or no agree long hem, datwan savve showaot long feis bilong hem. Sapos hem busy or hem start for no laek lisin, bae iumi luksavve long datwan taem iumi luk long feis bilong hem. Then, iumi savve changem story bilong iumi, or mekem story hem short. Wei for luksavve long feeling bilong narawan hem gudfala wei for showimaot interest long olketa.
4 Interest and Biliv Strong: Long plande kastom, pipol ting long wei for luk long feis bilong man hem showimaot man hem interest long narawan wea hem story witim. Tingim wei wea Jesus ansarem olketa disaepol bilong hem taem olketa askem hem: “Hu nao savve sev?” Bible hem sei: “Jesus luk long feis bilong olketa, and sei: ‘Hem hard for olketa man duim diswan, bat God savve duim eni samting.’” (Matt. 19:25, 26) For sure, wei wea feis bilong Jesus showimaot hem barava bilivim datwan, hem helpem olketa for trustim samting wea hem talem. Long sem wei tu, wei for luk long feis bae helpem iumi for talemaot message bilong Kingdom witim wei for interest long pipol and witim fasin for biliv strong.—2 Cor. 2:17; 1 Thess. 1:5.