Natural Wei

TAEM iu toktok long natural wei hem helpem nara pipol for trustim iu. Waswe, bae iu trustim samting wea man talem sapos hem werem mask for mekem iu no luksavve long hem? Waswe, bae iu trustim hem moa sapos datfala mask hem luk moa naes winim feis bilong datfala man? Maet nomoa. So winim wei for act olsem narawan, act normal nomoa.

Iumi mas no konfiusim natural wei witim wei for no kea. For iusim grammar wea no mas stret, wei for talem olketa word rong, and toktok wea no klia, hem no fitim. Mas stap klia tu long lesy wei for toktok. Iumi shud evritaem showimaot respect wea fitim, long toktok and wei bilong iumi. Samwan wea showimaot kaen natural wei olsem hem no serious tumas and hem no ova tumas for trae mekem nara pipol laekem hem.

Long Field Ministry. Taem iu go long wanfala haos or wanfala man long pablik ples for witness long hem, waswe, iu fraet? Planti long iumi olsem, bat for samfala datfala feeling hem moa strong. Fraet maet kosim voice for here nogud or seksek, or maet showaot long wei wea man no isi for muvim hand or hed bilong hem.

Samfala difren reason stap wea maet mekem wanfala pablisa garem disfala problem. Maet hem tingting abaotem wei wea nara man maet ting long hem or sapos story bilong hem gudfala. Planti maet duim diswan, bat problem kamap taem man tingting tumas long olketa samting olsem. Sapos iu feel fraet bifor iu share insaed ministry, wanem nao savve helpem iu? Wei for prepare gud and strongfala prea long Jehovah. (Acts 4:29) Ting raonem bigfala mercy bilong Jehovah for invaetem pipol for enjoyim perfect health and laef olowe long Paradaes. Ting abaotem olketa wea iu trae for helpem and wei wea olketa need for herem datfala gud nius.

Remember, tu, hao pipol free for chus, so olketa savve acceptim or rejectim datfala message. Hem olsem taem Jesus hem witness long Israel bifor. Assignment bilong iu hem for preach. (Matt. 24:14) Nomata taem pipol no letem iu for story, wei wea olketa lukim iu nomoa givim witness long olketa. From iu letem Jehovah iusim iu for duim will bilong hem, iu win. Long taem wea iu garem chance for toktok, hao nao toktok bilong iu? Sapos iu lane for tingim olketa need bilong nara pipol, toktok bilong iu bae naes tumas and bae natural.

Taem iu givim witness, sapos iu act and toktok olsem wei bilong iu evriday, diswan bae mekem olketa wea lisin long iu feel isi. Olketa maet moa willing for herem olketa scripture wea iu want for sharem witim olketa. Winim wei for givim tok long olketa, story witim olketa. Showimaot wei for fren. Showimaot interest, and willing for herem wanem olketa laek for talem. Long ples wea languis or kastom minim iu mas followim olketa rul for showimaot respect taem iu story long olketa stranger, hem gud for duim olsem. Nomata wanem, iu savve redy evritaem witim naesfala smile long feis bilong iu.

Long Platform. Taem iu story long wanfala grup, planti taem natural wei for story gud hem best wei. Hem tru, taem audience hem bigfala, iu need for tok moa big. Sapos iu trae for baeheartim tok bilong iu or iu garem tumas note, maet hem minim iu wari tumas abaotem hao nao for talem or olketa wanem word hem fitim for iusim. For iusim olketa word wea fitim hem important, bat taem man wari tumas long diswan, wei wea hem givim tok bae no smooth. Man no act normal nao. Iu mas tingting gud firstaem long olketa idea wea iu bae iusim, no warim hao nao for talem.

Sem samting hem tru taem samwan interviewim iu long wanfala meeting. Iu mas prepare gud, bat no readim or baeheartim olketa ansa bilong iu. Story long wei wea saond natural mekem koment bilong iu here gud, no olsem iu baeheartim.

Nomata gudfala wei for toktok tu maet here nogud long audience sapos hem ova tumas. Olsem example, iu mas toktok long kliafala wei and talem olketa word stret, bat no long wei wea mekem toktok bilong iu no here smooth or natural, olsem iu act nomoa. Taem iu duim long gudfala wei, olketa akson for strongim point or for minim samting savve mekem tok bilong iu garem laef, bat olketa akson wea no smooth or wea ova tumas savve spoelem samting wea iu talem. Mas tok big long wei wea fitim, bat mas no ova tumas. Hem gud for tok long wei wea iu strong for showimaot interest, bat iu mas stap klia long wei for toktok olsem man wea show-off nomoa. Mas no iusim wei for changem voice, strong for showimaot interest, and feeling long wei wea mekem audience tingim iu nomoa or mekem olketa feel nogud.

Hem wei bilong samfala pipol for talem samting long barava stretfala wei evritaem, no long taem wea olketa givim tok nomoa. Olketa narawan no olsem. Important samting nao hem for iusim gudfala wei for toktok evriday and for garem fasin wea fitim wanfala Christian. Then taem iu long platform, hem bae moa isi for iu toktok and duim samting long natural wei wea luk and here gud tumas.

Taem Iu Read Long Pablik. Man need for waka hard for savve hao for read long natural wei long pablik. For duim diswan, luksavve long olketa main idea insaed information wea iu bae readim, and lukim hao datfala information storyim olketa point hia. Keepim olketa point hia long mind bilong iu; sapos nomoa, bae iu read nating nomoa. Chekim stretfala wei for talem olketa word wea iu no savve long olketa. Practicem wei for read big for mek sure iu changem voice long stretfala wei and for readim olketa word tugeta long wei wea mekem mining showaot klia. Duim diswan planti taem go kasem taem iu savve read long smoothfala wei. Savve gud long datfala information mekem taem iu readim big, reading bilong iu hem here olsem iu story gud. Hem nao natural wei.

Hem tru, klosap evri reading wea iumi duim long pablik, hem kam from olketa Bible pablikeson bilong iumi. Iumi kasem reading assignment long Theocratic Ministry Skul, and tu iumi readim olketa scripture long field ministry and taem iumi givim tok long platform. Olketa brata kasem assignment for readim information iumi iusim long Wastaoa Study and long Kongregeson Buk Study. Samfala brata wea fit kasem assignment for readim olketa manuscript front long audience long convention. Nomata iu readim Bible or nara samting, readim olketa sekson wea talem toktok bilong man long wei wea mekem datfala information laef. Sapos hem talem toktok bilong samfala difren man, changem voice bilong iu lelebet for each wan. Careful: No ova tumas, bat mekem datfala reading garem laef long natural wei.

Reading wea man duim long natural wei hem olsem hem story long gudfala wei. Hem no here olsem hem act bat hem showimaot hem biliv strong.