Tok Long Wei wea Iu Story Evriday

PIPOL savve feel relax taem olketa story witim olketa fren. Toktok bilong olketa hem natural nomoa. Samfala story gud tumas; samfala narawan hol bak lelebet. Nomata olsem, natural wei bilong pipol for story hem naes tumas.

Bat taem iu toktok long wanfala stranger, hem no fitim for story long wei wea luk olsem iu savve gud long hem or no showimaot respect. Tru nao, long samfala ples, wei for story witim wanfala stranger hem mas start long wanfala set wei followim kastom bilong ples. Taem iu duim diswan for showimaot respect, then maet hem gud for story olsem wei wea iu story evriday.

Iu mas careful tu taem iu givim tok long platform. Sapos iu ova tumas for story long wei wea iu duim evriday, datwan bae no showimaot respect wea fitim wanfala Christian meeting and spoelem wei wea samting iu talem hem serious. Long samfala languis, man mas iusim samfala spesol toktok taem hem story long wanfala man wea moa olo winim hem, wanfala teacher, bigman, or dadi or mami. (Lukim toktok wea olketa iusim long Acts 7:2 and 13:16.) Taem hem story long marit partner or klos fren bilong hem, man bae iusim samfala difren toktok. Nomata toktok bilong iumi mas no ova tumas for serious taem iumi long platform, hem mas showimaot respect.

Nomata olsem, samfala samting maet mekem toktok bilong wanfala man here olsem hem hol bak or hem no relax. Wanfala samting hem olketa sentence wea hem iusim. Problem savve kamap taem speaker hem trae hard tumas for talem samfala toktok long barava sem wei olsem hem stap long pepa. Wei wea man raetem samting hem savve barava difren from wei wea hem talem. Hem tru, taem man duim research for preparem wanfala tok, hem bae lukluk insaed samfala buk. Maet datfala tok kam from wanfala aotlaen wea print finis. Bat sapos iu talem olketa idea hia barava followim datfala raeting or iu readim stret from datfala aotlaen taem iu givim tok, toktok bilong iu bae no here olsem wei wea iu story evriday. For keepim wei wea iu story evriday, talem olketa idea long toktok bilong iuseleva and stap klia long wei for iusim olketa hardfala sentence.

Nara samting hem wei for changem fast bilong toktok. Planti taem toktok wea no smooth hem followim set wei for talem olketa word wea here semsem olowe. Taem iumi story witim pipol, iumi changem fast bilong toktok and planti taem stop lelebet.

Taem iu story long wanfala bigfala audience, iu shud joinim wei wea iu story evriday witim wei for apim laod, feeling and strong for mekem olketa go ahed for interest.

For tok long wei wea iu story evriday and wea fitim ministry, iu need for iusim gudfala toktok evriday. Diswan no minim iu mas garem bigfala education. Bat hem gud for mekem grow fasin for toktok wea bae mekem narafala pipol lisin witim respect long wanem iu talem. Tingim sapos iu need for waka long olketa point long daon taem iu story evriday.

1. Stap klia long wei for toktok wea no followim gudfala grammar or wea maet mekem pipol tingse iu garem living wea no followim olketa standard bilong God. For fitim kaonsel long Colossians 3:​8, barava stap klia from raf or dirty toktok. Long narasaed, kaen toktok wea man iusim evriday hem olraet nomoa. Pipol acceptim kaen toktok wea olketa herem evriday.

2. Stap klia long wei for iusim sem toktok or word for talem evri difren idea wea iu garem. Lane for iusim olketa word wea talem klia mining bilong samting wea iu laek talem.

3. Stap klia long wei for talem moa samting wea iu talem finis long wei for ting raonem firstaem samting wea iu laek for talem; then start for tok.

4. Stap klia long wei for haedem olketa gudfala idea from iu iusim staka word tumas. Evritaem talem olketa point wea audience need for rememberim long klia, simpol toktok.

5. Story long wei wea showimaot respect for nara pipol.