Wei for Iusim Aotlaen

PLANTI pipol fraet tumas for givim tok from wanfala aotlaen. Olketa feel moa hapi sapos olketa raetem long pepa or baeheartim evri samting olketa bae talem.

Bat, iumi evriwan story evriday and no iusim manuscript. Iumi duim taem iumi story witim olketa fren and famili. Iumi duim taem iumi share long field ministry. And iumi duim taem iumi talem olketa prea from heart, nomata seleva or for wanfala grup.

Waswe, hem moabeta for iusim aotlaen or manuscript taem iu givim tok? Nomata wei for read from wanfala manuscript hem savve helpem iu for sure iu bae talem stret and iusim stretfala word, hem no mas gud for kasem heart bilong audience. Taem iu read winim tu-thri sentence, laod and fast bilong iu bae difren from wei bilong iu for story evriday. Sapos iu tingim tumas olketa note bilong iu and no tingim audience, planti maet no lisin gud from olketa tingse iu no interest long olketa and iu no changem information bilong iu for fitim olketa. Best wei for givim wanfala tok wea barava muvim man hem for givim long extemporaneous wei.

Purpose bilong Theocratic Ministry Skul hem for helpem iumi long evriday living. Taem iumi meetim olketa fren, iumi no holem wanfala pepa and readim tingting bilong iumi long olketa for mek sure iumi talem long best wei. Long field service, iumi no karem wanfala manuscript for readim, from iumi fraet nogud iumi forgetim samfala point wea iumi laek sharem witim pipol. Taem iu duim demonstration long skul long hao for witness long samwan, trae for toktok long wei bilong iu evriday. Sapos iu prepare gud, bae iu luksavve hao wanfala aotlaen, nomata long mind or wea iu raetem, hem inaf for mekem iu rememberim olketa main idea wea iu laek storyim. Bat hao nao iu savve mekem grow wei for trustim wanfala aotlaen?

Organizem Tingting Bilong Iu. For savve hao for iusim aotlaen taem iu givim tok, iu need for organizem tingting bilong iu. Diswan no minim iu chusim olketa word wea iu laek iusim. Hem minim nomoa for tingting firstaem bifor iu story.

Long evriday living, wanfala man wea kwiktaem duim samting and no tingting firstaem maet talem samfala toktok and bihaen hem sorre nao hem talem. Narafala man maet story nating nomoa, storyim wanfala idea then change go long difren samting. Man savve winim tufala nogud wei hia sapos hem stop lelebet for tingim wanfala aotlaen long mind bilong hem bifor hem start for story. First samting, tingim wanem nao goal bilong iu, then chusim olketa step wea iu need for duim for kasem datwan, and then start for story.

Waswe taem iu prepare for field service? No tek-taem for redyim witnessing basket bilong iu nomoa, bat organizem tu tingting bilong iu. Sapos iu disaed for iusim wanfala idea from Kingdom Ministry Bilong Iumi, readim planti taem for mekem olketa main idea klia long mind bilong iu. Talem olketa main point long wan or tufala short sentence. Changem olketa word for fitim fasin bilong iu and territory bilong iu. Bae hem helpem iu sapos iu garem aotlaen long mind bilong iu. Wanem nao maet insaed diswan? (1) For introduction, maet iu storyim samting wea planti pipol long area bilong iu wari abaotem. Askem haosholder for givim koment abaotem datwan. (2) Redyim finis samfala point wea iu savve talem abaotem datfala subject, and wan or tufala scripture wea storyim promis bilong God for stretem problem hia. Sapos iu kasem chance, strongim point hao Jehovah bae duim diswan thru long Kingdom bilong hem, gavman bilong hem long heven. (3) Encouragem datfala man for duim samting followim wanem iutufala bin storyim. Maet iu savve offerim samfala literature and/or wanfala Bible study and arrange for storyim datwan moa long nara taem.

Only aotlaen wea iu bae needim for duim olsem hem long mind bilong iu. Sapos iu laek for chekim wanfala aotlaen wea iu raetem finis bifor iu go long first haos, aotlaen olsem maet garem tu-thri word nomoa for introduction, wan or tufala scripture, and lelebet toktok for endim story bilong iu. Wei for prepare and iusim aotlaen olsem hem stopem iumi for story olabaot, hem helpem iumi for givim kliafala message wea isi for remember.

Sapos wanfala kwestin or toktok for stopem story hem kamap evritaem long territory bilong iu, maet hem helpem iu for duim research long datwan. Planti taem, iu needim tu-thri main point nomoa and olketa scripture wea pruvim. “Olketa Bible Subject for Storyim” or olketa subheding long raeting wea moa blak insaed Reasoning From the Scriptures maet barava provaedem aotlaen wea iu needim. Maet iu faendem toktok wea fitim wea iu want for iusim insaed narafala buk. Raetem wanfala shortfala aotlaen, and datfala extra toktok, and keepim diswan long basket bilong iu for field service. Taem haosholder hem askem datfala kwestin or hem no agree, talem hem iu bae hapi for kasem chance for showim reason for biliv bilong iu. (1 Pet. 3:​15) Iusim datfala aotlaen for storyim ansa bilong iu.

Taem iu offerim prea for famili bilong iu, wanfala buk study grup, or kongregeson, hem gud tu for redyim tingting bilong iu firstaem. Luke 11:​2-4 showim hao Jesus givim simpol aotlaen long olketa disaepol bilong hem for prea wea garem mining. Solomon talem longfala prea long dedication bilong temple long Jerusalem. Hem klia hao hem mas tingting raonem datfala subject firstaem. Hem storyim firstaem Jehovah and promis bilong Hem long David; then long datfala temple; and then, long samfala samting wea happen and samfala grup pipol. (1 Ki. 8:​22-​53) Iumi savve kasem gud samting from olketa example hia.

Keepim Tok Aotlaen Bilong Iu Simpol. Waswe taem iu mekem aotlaen for wanfala tok? Haomas samting nao mas insaed long hem?

Remember, wanfala aotlaen hem for helpem iu rememberim olketa point. Maet hem gud sapos iu raetem tu-thri sentence for iusim olsem introduction. Bat bihaen datwan, tingim olketa point, no olketa word. Sapos iu raetem sentence wea talem olketa point hia, hem moabeta sapos hem shortfala. Tu-thri main point wea iu plan for storyim shud showaot klia long aotlaen bilong iu. Iu savve duim diswan long wei for raetem olketa long big raeting, andalaenem, or putim color mark long olketa. Anda long each main point, listim olketa idea wea iu want for iusim taem iu storyim datwan. Raetem nem bilong olketa scripture wea iu plan for readim. Klosap evritaem hem best for readim from Bible. Raetem note abaotem olketa tokpiksa wea iu laek for iusim. Maet iu garem samfala important toktok from nara man or buk tu wea fitim. Aotlaen bilong iu mas long inaf for talem olketa point wea important. Datfala aotlaen bae moa isi for iusim sapos iu raetem klia.

Samfala iusim olketa aotlaen wea barava simpol. Wanfala aotlaen maet garem tu-thri important word, olketa scripture wea speaker baeheartim, and samfala piksa wea hem drawim for helpem hem rememberim samfala idea. Taem hem iusim simpol note olsem, wanfala speaker savve givim datfala information long wei wea followim gudfala order and long wei wea hem story evriday. Hem nao goal bilong disfala leson.

Long page 39 go kasem 42 long disfala buk, hem storyim “Wakem Wanfala Aotlaen.” Bae hem helpem iu tumas sapos iu readim datfala information taem iu waka long disfala study, “Wei for Iusim Aotlaen.”

Hao for Iusim Aotlaen. Bat goal bilong iu long disfala taem hem no for just preparem tok bilong iu olsem wanfala aotlaen nomoa. Hem for iusim datfala aotlaen long gudfala wei.

First step for iusim aotlaen bilong iu hem for preparem wei for givim datfala tok. Lukluk long theme, readim evri main point, and talem iuseleva hao nao evri main point hia hem join witim theme. Raetem daon haomas taem nao iu savve iusim for storyim each main point. Then go bak moa for studyim firstfala main point. Reviewim olketa pruv, scripture, tokpiksa, and olketa example wea iu plan for iusim for storyim datfala point. Duim diswan planti taem go kasem taem datfala sekson long tok hem klia long mind bilong iu. Duim sem samting witim evri nara main point. Tingim wanem nao iu savve leavim, sapos need kamap, for mekem iu finisim tok long taem wea olketa markem. Then reviewim full tok. Ting long olketa idea, no olketa word. No baeheartim datfala tok.

Taem iu givim datfala tok, iu shud fit for lukluk long audience bilong iu taem iu story. Planti taem, bihaen iu readim wanfala scripture, iu shud fit for iusim Bible for story raonem and no need for lukluk moa long olketa note bilong iu. Long sem wei, sapos iu iusim wanfala tokpiksa, storyim datwan long sem wei olsem iu talem long olketa fren bilong iu winim wei for readim followim note. Taem iu toktok, no luk long olketa note bilong iu for evri sentence. Story from heart, and bae iu kasem heart bilong olketa wea lisin long iu.

Taem iu savve tumas for toktok followim wanfala aotlaen, iu duim wanfala important step for kamap wanfala gudfala pablik speaker.