Extemporaneous Toktok

MAET iu waka hard finis for preparem tok bilong iu. Iu garem interesting information. Hem maet followim gudfala order. Maet iu savve givim long smooth wei. Bat sapos mind bilong audience bilong iu hem go difren—olketa lisin long samfala part nomoa bikos planti taem mind bilong olketa hem wakabaot—wanem gud samting nao kamaot from tok bilong iu? Sapos hem hard tumas for olketa tingim nomoa tok bilong iu, bae hem hard for iu kasem heart bilong olketa.

Wanem nao maet kosim problem olsem? Planti difren samting maet insaed diswan. Planti taem hem from speaker hem fail for givim tok long extemporaneous wei. Hem minim, datfala speaker hem lukluk tumas long olketa note bilong hem, or hem no relax taem hem givim tok. Bat olketa problem hia kam from hao hem preparem tok.

Sapos iu raetem tok bilong iu firstaem and then bihaen iu trae for mekem hem olsem wanfala aotlaen, iu bae faendem hem hard for tok long extemporaneous wei taem iu givim datfala tok. Why nao olsem? Bikos iu chusim finis barava word wea iu plan for iusim. Nomata sapos iu followim datfala aotlaen for givim tok, bae iu trae for rememberim olketa word wea iu raetem firstaem. Taem iumi raetem samting long pepa, toktok wea iumi raetem hem difren and olketa sentence hem no isi olsem toktok bilong iumi evriday. Datwan bae showaot long tok bilong iu.

Winim wei for raetem evri smol point insaed tok bilong iu, trae duim diswan: (1) Chusim wanfala theme and olketa main point bilong datfala subject wea iu bae iusim for storyim datfala theme. For shortfala tok, maet tufala main point nomoa hem fitim. Tok wea moa long maet garem foa or faevfala. (2) Andanit each main point, raetem olketa main scripture wea iu plan for iusim, and olketa tokpiksa and pruv bilong iu. (3) Ting raonem hao iu bae startim tok bilong iu. Maet iu raetem wan or tufala sentence for diswan. And tu, planim wei for endim tok bilong iu.

Hem important tumas for prepare bifor iu givim tok. Bat no preparem information witim goal for baeheartim evri word. For toktok long extemporaneous wei, main samting iu need for tingim taem iu prepare hem olketa point, no olketa word. Iu shud reviewim olketa point hia go kasem taem iu savve gud long hao each point hem joinim next wan long mind bilong iu. Sapos wei wea iu arrangem tok bilong iu hem followim order and iu planim gud, diswan bae no hard, and taem iu givim, bae hem isi for iu rememberim olketa point.

Tingim Olketa Gud Samting wea bae Kamaot From Diswan. Taem iu toktok long extemporaneous wei, hem gud tumas bikos iu story long wei wea isi for nara pipol savve minim and acceptim. Tok bilong iu bae garem laef and datwan savve mekem audience interest.

Disfala wei for toktok minim iu savve lukluk evritaem long olketa wea lisin, and datwan savve mekem wei wea iu story witim olketa hem moabeta. From iu no depend long note for evri word insaed evri sentence, olketa wea lisin bae luksavve hao iu savve gud long subject bilong iu and iu barava bilivim samting iu talem. For givim tok long wei olsem hem naesfala wei for story wea savve kasem heart bilong audience.

For givim tok long extemporaneous wei hem minim speaker savve changem tu. Information hem no set finis, wea iu no savve changem eniting. Tingim sapos long morning bilong day wea iu bae givim tok bilong iu, wanfala important nius report hem kamap wea barava fitim subject bilong iu. Bae hem gud for iusim. Or taem iu go ahed givim tok bilong iu, iu lukim hao planti skul pikinini stap long audience. Bae hem gud tumas sapos iu changem olketa tokpiksa and wei wea iu explainim samting long wei for helpem olketa for luksavve hao datfala information hem affectim laef bilong olketa!

Narafala gud samting wea kamaot from extemporaneous toktok hem wei wea hem mekem iu tingting gud. Taem audience bilong iu willing for lisin and tinghae long tok, datwan encouragem iu and then iu savve strongim go moa or talem moa samfala point for helpem olketa. Sapos iu luksavve interest bilong audience hem go daon, iu savve duim samfala samting for winim datfala problem winim wei for go ahed story long pipol wea mind bilong olketa wakabaot.

Missim Olketa Danger. Hem gud for iu luksavve hao extemporaneous toktok garem samfala danger tu. Wanfala hem wei for ovataem. Sapos iu storyim tumas extra idea taem iu givim tok, taeming maet kamap wanfala problem. Iu savve deal witim diswan long wei for raetem long aotlaen bilong iu haomas taem nao iu savve iusim for each sekson bilong datfala tok. Then followim klos datfala schedule.

Narafala danger, especially for man wea garem savve olsem speaker, hem for ova tumas for trustim hemseleva. From samfala getius for givim tok long pablik, maet hem isi for olketa for kwiktaem redyim samfala information and givim tok long datwan insaed taem wea olketa markem. Bat hambol fasin and wei for tinghae long waka bilong iumi insaed wanfala program for teach wea Jehovah nao hem Barava Nambawan Teacher, shud muvim iumi for prea and preparem gud evri assignment wea iumi kasem.—Isa. 30:20; Rom. 12:6-8.

Maet samfala speaker wea no garem savve for givim tok long extemporaneous wei wari nogud olketa forgetim samting wea olketa laek for talem. No letem diswan mekem iu hol bak for duim disfala important step for kamap gudfala speaker. Preparem gud, and depend long Jehovah for help bilong spirit bilong hem.—John 14:26.

Samfala nara speaker hol bak from olketa wari tumas long olketa word. Tru, wanfala extemporaneous tok maet no garem olketa spesol word and stretfala grammar olsem wanfala manuscript tok, bat pipol barava hapi long naesfala wei for story. Pipol willing for acceptim olketa idea sapos olketa herem long toktok wea garem olketa word and sentence wea isi for minim. Sapos iu prepare gud, bae iu talem long wei wea fitim, no from iu baeheartim, bat from iu reviewim gud olketa idea. And sapos iu iusim gudfala toktok taem iu story evriday, bae hem olsem taem iu long platform.

Kaen Note for Iusim. Sapos iu practice, gogo maet iu fit for iusim smolfala aotlaen wea garem tu-thri word nomoa for each point long tok bilong iu. Maet iu savve listim long pepa olketa point hia and olketa scripture wea iu plan for iusim mekem iu isi for rememberim olketa point. Saed long field ministry, klosap evritaem iu bae baeheartim wanfala simpol aotlaen. Sapos iu duim finis research long wanfala subject for wanfala return visit, maet iu garem samfala smol note long pepa wea iu putim insaed long Bible bilong iu. Or maet iu iusim aotlaen from “Bible Subject for Storyim” or information insaed Reasoning From the Scriptures for story bilong iu.

Bat, sapos iu kasem assignment for duim tu-thri meeting part insaed tu-thri week and maet samfala pablik tok tu, iu maet needim olketa note wea moa long. Why nao olsem? For strongim datfala information moa long mind bilong iu bifor iu givim each tok hia. Nomata olsem, sapos iu depend tumas long olketa note long tok bilong iu—long wei for luk long olketa long klosap evri sentence—iu bae lusim gud samting wea shud kamaot from extemporaneous toktok. Sapos iu iusim note wea moa long, putim mark long olketa mekem iu savve luk nomoa long olketa word and scripture wea iu plan for iusim.

Nomata speaker wea garem savve shud klosap evritaem givim tok long extemporaneous wei, samfala gud samting savve kamaot sapos hem iusim tu samfala nara wei for givim tok. Long introduction and conclusion bilong tok, wea iu need for lukluk long audience and iusim samfala important toktok wea iu planim gud, hem bae gud for iusim tu-thri sentence wea iu baeheartim firstaem. Taem iu iusim pruv, olketa namba, talem toktok bilong samwan, or olketa scripture, hem gud for readim.

Taem Nara Pipol Strong for Askem Iumi for Explainim Samting. Samfala taem iumi need for explainim biliv bilong iumi bat iumi no garem chance for prepare firstaem. Diswan maet kamap taem samwan iumi meetim long field service hem askem kwestin from hem no agree witim iumi. Semkaen samting maet happen taem iumi witim olketa relative, long ples iumi waka, or long skul. Olketa bigman long gavman tu maet askem iumi for explainim biliv and wei bilong laef bilong iumi. Bible givim disfala encouragement: “Evritaem [stap] redy for givim ansa long eniwan wea askem reason for hope wea iufala garem, bat duim datwan witim kwaet fasin and bigfala respect.”—1 Pet. 3:15.

Lukim ansa bilong Peter and John long datfala Jew Sanhedrin long Acts 4:19, 20. Insaed tufala sentence nomoa, olketa talemaot klia wanem olketa bae duim. Olketa duim diswan long wei wea fitim datfala audience—olketa talem klia hao datfala kot feisim sem kwestin wea tufala aposol hia feisim. Bihaen, olketa giaman for accusim Stephen, and hem tu feisim datfala sem kot. Readim long Acts 7:2-53 barava strong ansa wea hem no preparem firstaem. Long wanem wei nao hem organizem information bilong hem? Hem talem olketa samting wea happen long order wea followim history. Taem hem kasem point wea fitim, hem strongim hao nation bilong Israel garem bighed spirit. Long end, hem showim hao datfala Sanhedrin showimaot semkaen spirit from olketa killim dae Son bilong God.

Taem samwan askem iu for explainim wanem nao iu bilivim, wanem nao savve helpem iu for ansa long gudfala wei? Followim example bilong Nehemiah wea prea long kwaet wei bifor hem ansarem kwestin bilong King Artaxerxes. (Neh. 2:4) Next samting, kwiktaem formimap wanfala aotlaen long mind bilong iu. Iumi maet listim olketa step olsem: (1) Chusim wan or tufala point wea shud insaed ansa bilong iu (iu maet disaed for iusim olketa point insaed Olketa Bible Subject for Storyim). (2) Chusim olketa scripture wea iu bae iusim for saportim olketa point hia. (3) Planim hao for startim story bilong iu long wei wea tingim feeling bilong narawan mekem hem willing for lisin. Then start for story.

Taem need hem kamap, waswe, bae iu remember hao for duim diswan? Jesus talem olketa disaepol bilong hem: “No wari long hao or wanem nao iufala bae talem; from samting wea iufala bae talem bae kam long iufala long datfala hour; from no iufala seleva nomoa olketa wea toktok, bat datfala spirit bilong Father bilong iufala wea tok thru long iufala.” (Matt. 10:19, 20) Diswan no minim iu bae kasem mirakol “toktok bilong wisdom” wea olketa Christian long first century kasem. (1 Cor. 12:8) Bat sapos iu evritaem mekius long education wea Jehovah provaedem for olketa servant bilong hem long Christian kongregeson, holy spirit bae mekem iu rememberim datfala information taem iu needim.—Isa. 50:4.

Tru tumas, extemporaneous toktok savve gud tumas. Sapos iu practice for duim diswan evritaem iu kasem assignment long kongregeson, then for givim ansa taem need hem kamap bae no hard tumas bikos iu bae followim semkaen wei. No hol bak. For lane for toktok long extemporaneous wei bae helpem iu for mekem field ministry bilong iu moabeta. And sapos iu garem privilege for givim olketa tok long kongregeson, bae iu win for mekem audience interest and for kasem heart bilong olketa.