STUDY 39
Gudfala Conclusion
MAET iu duim careful research and organizem gud information for body bilong tok bilong iu. Maet iu preparem tu wanfala introduction wea mekem interest kamap. Bat, wanfala samting moa iu needim—wanfala gudfala conclusion. No ting smol long diswan. Planti taem last samting wea iu talem nao hem samting pipol bae rememberim for longfala taem. Sapos conclusion hem no mas gud, maet audience no kasem planti samting from information insaed tok.
Tingim diswan: Klosap long end long laef bilong hem, Joshua givim wanfala spesol tok long olketa older man long nation bilong Israel. Bihaen hem storyim wei wea Jehovah deal witim Israel start kam from taem bilong Abraham, waswe, Joshua just talem moa olketa interesting point? Nomoa. Witim deep feeling hem encouragem olketa: “Fraet long Jehovah and servem hem long stretfala fasin and long truth.” Readim conclusion bilong hem long Joshua 24:14, 15.
Nara spesol tok, wea aposol Peter nao givim long wanfala crowd long Jerusalem long Festival bilong Pentecost 33 C.E., hem stap long Acts 2:14-36. First samting, hem explainim hao olketa lukim wei wea profesi bilong Joel hao God bae pourimaot spirit bilong hem, hem fulfill. Next samting, hem showimaot hao diswan join witim olketa profesi long Psalms saed long Messiah wea talem hao Jesus Christ bae resurrect and kasem haefala position long raet saed bilong God. Then, long conclusion bilong hem, Peter showimaot klia kwestin wea evriwan long audience mas feisim. Hem sei: “So full Israel shud barava savve hao God mekem hem Lord and Christ, disfala Jesus wea iufala nilam.” Olketa wea stap ask: “Olketa man, olketa brata, wanem nao mifala mas duim?” Peter hem ansa: “Repent, and letem each wan long iufala baptaes long nem bilong Jesus Christ.” (Acts 2:37, 38) Long datfala day, from samting olketa herem barava muvim olketa, samting olsem 3,000 pipol long audience acceptim truth abaotem Jesus Christ.
Olketa Point for Tingim Evritaem. Samting wea iu talem long conclusion mas barava join witim theme bilong tok. Hem mas fitim olketa main point wea iu storyim finis. Nomata maet iu laek for talem samfala important word stret from theme bilong iu, hem saed bilong iu sapos iu laek talem moa full theme.
Planti taem, purpose bilong story bilong iu hem for encouragem narafala pipol for duim samting followim information wea iu storyim. Wanfala main purpose bilong conclusion hem for showim wanem for duim. Taem iu chusim theme and olketa main point bilong iu, waswe, iu ting raonem why nao datfala information hem important for audience bilong iu and wanem nao goal bilong iu for storyim datwan? Sapos olsem, iu savve finis wanem samting iu laekem olketa for duim. So, iu need for talem wanem nao datfala samting olketa mas duim and maet hao for duim datwan.
Conclusion bilong iu mas no storyim wanem for duim nomoa bat mas muvim audience tu. Hem shud givim olketa gudfala reason for duim samting and showimaot gud samting wea savve kamaot from wei for duim olsem. Sapos iu planim gud lastfala sentence bilong iu, datwan bae strongim moa full tok.
No forget hao tok bilong iu hem gogo for finis. Samting wea iu talem shud showimaot datwan. Fast bilong iu mas fitim. No tok fast go kasem end long tok then seknomoa finis wantaem. Long narasaed, no mekem laod bilong voice hem gogo daon. Laod bilong iu mas fitim, no ova tumas. Olketa last sentence bilong iu mas here olsem iu gogo for finis. Iu mas talem witim wei for biliv strong. Taem iu practicem tok bilong iu, mek sure iu practicem conclusion.
Conclusion mas hao long? Hem no depend long taeming nomoa. Conclusion shud no long tumas. Iu fit for luksavve sapos long bilong hem fitim, taem iu lukim hao nao hem affectim audience. Pipol evritaem tinghae long conclusion wea simpol, stret, and encouragem man. Sapos iu planim gud, wanfala conclusion wea moa long and storyim shortfala tokpiksa savve gud tumas tu. Markem shortfala conclusion for full buk bilong Ecclesiastes, long Ecclesiastes 12:13, 14, witim conclusion for datfala Sermon long Maunten wea barava moa short, long Matthew 7:24-27.
Long Field Ministry. Long ministry man bae need for talem conclusion evritaem. Sapos iu prepare gud and showimaot loving interest long pipol, iu savve duim planti gud samting. Iu savve iusim kaonsel long olketa page hia long gudfala wei taem iu story long man wanwan.
Wanfala story maet short nomoa. Maet man hem busy. Full visit bilong iu maet kasem wan minute nomoa. Sapos fitim, maet iu sei olsem: “Mi luksavve iu busy. Bat mi laek talem wanfala samting for encouragem iu. Bible showim hao Creator bilong iumi garem nambawan purpose—for mekem disfala earth kamap ples wea pipol savve enjoyim laef olowe. Iumi savve stap long datfala Paradaes, bat iumi mas lanem wanem nao God laekem iumi for duim.” Or maet iu askem hem sapos iu savve kam bak long taem wea fitim hem.
Nomata haosholder katem story bilong iu bikos hem no interest—or hem no kaen—iu savve duim gudfala samting. Tingim evritaem kaonsel long Matthew 10:12, 13 and Romans 12:17, 18. Kaenfala ansa bilong iu maet savve changem tingting bilong hem abaotem Olketa Jehovah’s Witness. Datwan bae gud tumas.
Long narasaed, maet iu story gud witim haosholder. Hem gud for talem moa main point wea iu laekem hem for rememberim. Talem tu samting for muvim hem for followim datfala information.
Sapos iu luksavve iu garem chance for story moa witim hem long narataem, givim reason for hem luk forward long datwan. Askem wanfala kwestin—maet wanfala wea stap insaed Reasoning From the Scriptures or wanfala buk wea olketa wakem for conductim olketa hom Bible study. Tingim evritaem goal bilong iu, olsem Jesus talem long Matthew 28:19, 20.
Waswe, iu conductim wanfala hom Bible study? Bifor iu finisim study, for talem moa theme long student bae helpem hem for rememberim samting iufala storyim. For iusim olketa kwestin for duim review bae helpem student rememberim olketa main point, especially sapos iu no hariap for duim datfala review. Wanfala kwestin abaotem hao datfala information maet helpem student or hao hem savve sharem witim narafala pipol savve helpem hem for ting raonem hao for iusim samting wea hem lanem.—Prov. 4:7.
Remember—conclusion bilong iu hem affectim wei wea tok hem helpem audience.