STUDY 14

Olketa Main Point Mas Klia

Hebrew 8:1

WANEM FOR DUIM: Tok bilong iu shud klia and isi for minim. Mek sure hem klia hao each main point hem join witim theme and goal bilong tok bilong iu.

HAO FOR DUIM:

Garem goal. Bifor iu redyim tok, tingim goal bilong iu. Waswe, hem for teachim samting, pruvim samting, or encouragem audience for duim samting? Then redyim tok bilong iu for fitim goal hia. Mek sure evri main point long tok bilong iu bae helpem iu for kasem datfala goal.

Ting raonem: ‘Waswe, maet audience garem samfala kwestin or difren biliv abaotem disfala subject? Long wanem order nao bae hem gud for storyim olketa kwestin or biliv hia?’ Then arrangem olketa point wea iu bae storyim long sem order mekem hem isi for audience minim and acceptim datfala information.
Mekhae long theme bilong tok. For mekhae long theme insaed tok bilong iu, iu savve repeatim olketa main word bilong theme or iusim olketa nara word wea garem sem mining.
Olketa main point shud simpol and isi for minim. Mek sure olketa main point wea iu chusim join gud witim theme and iu savve teachim gud insaed taem wea olketa markem. Iu shud garem tu-thri main point nomoa. Talem klia each main point, stop lelebet bifor iu storyim next point, and mek sure story bilong iu hem join gud mekem hem flow.

Iu savve talem olketa main point insaed introduction bilong iu for helpem audience savve wanem iu bae storyim, or talem moa olketa main point insaed conclusion for helpem audience rememberim olketa point hia.