Isi for Narawan Minim

TAEM iu story, duim moa samting winim wei for givim information. Trae for mekem mining bilong samting wea iu talem hem klia long olketa wea lisin. Diswan savve helpem iu for story gud, nomata long kongregeson or long pipol wea no Witness.

Planti samting hem insaed wei for toktok wea narawan isi for minim. Samfala stap long Study 26, “Arrangem Information Followim Order wea Fitim.” Samfala narawan stap long Study 30, “Interest wea Iu Showimaot Long Nara Man.” Long disfala study, iumi bae storyim samfala nara point.

Olketa Simpol Word, Simpol Wei. Tufala tul for story wea garem paoa hem olketa simpol word and shortfala sentence. Sermon bilong Jesus long Maunten hem nambawan example bilong wanfala tok wea pipol isi for minim, nomata hu nao olketa or wanem kaen living olketa garem. Maet olketa idea niu long olketa. Nomata olsem, olketa minim samting wea Jesus talem bikos hem storyim samting wea iumi evriwan interest long hem: hao for hapi, hao for fren gud witim nara pipol, hao for deal witim olketa wari, and hao for garem purpose long laef. And hem storyim olketa idea bilong hem long toktok wea pipol isi for minim. (Matt., chap. 5-7) Hem tru, planti example long hao for story stap insaed Bible. Main goal bilong iu hem for storyim olketa point long wei wea klia and isi for minim.

Nomata taem iu storyim information wea moa deep, for duim long simpol wei savve help mekem datwan isi for minim. Hao nao iu savve mekem hem simpol? No talem evri smol point wea no important long audience. Organizem information bilong iu long wei wea hem join gud witim olketa main point. Chusim gud olketa main scripture bilong iu. Winim wei for kwiktaem storyim wanfala then narawan, readim and storyim gud each wan. No storyim wanfala point tumas gogo hem no klia nao.

Followim olketa sem principle hia taem iu conductim wanfala hom Bible study. No trae for explainim evri smol point. Helpem student for minim klia olketa main idea. Bihaen, bae hem lanem moa samting taem hem duim study seleva and long olketa kongregeson meeting.

For storyim information long simpol wei, iu mas prepare gud. Iu mas savve gud long subject bilong iu sapos iu laek for storyim long wei wea isi for narawan minim. Taem iu barava minim samting, iu fit for explainim gud. Iu bae fit tu for storyim long toktok bilong iuseleva.

Explainim Eni Niu or Hard Word. Samfala taem, for mekem audience minim samting iu mas explainim eni niu or hard word long olketa. No tingse audience garem bigfala savve, bat tu, no tingse olketa bae hard for minim samting. From iu bin studyim Bible, maet iu iusim samfala toktok wea narafala pipol bae no minim. Sapos iu no explainim, pipol wea no kaban witim Olketa Jehovah’s Witness bae no minim hao “remnant,” “faithful and wise slave,” “nara sheep,” and “bigfala crowd” hem olketa difren grup pipol. (Rom. 11:5; Matt. 24:45; John 10:16; Rev. 7:9) Olsem tu, sapos man no savve long organization bilong Olketa Jehovah’s Witness, maet hem no minim olketa toktok olsem “pablisa,” “pioneer,” “circuit overseer,” and “Memorial.”

Maet iu need for explainim tu samfala toktok from Bible wea pipol wea no Witness iusim. Long planti pipol, “Armageddon” minim wanfala nuclear war. Maet olketa tingim Kingdom bilong God olsem heven or wanfala samting long heart bilong man, bat no olsem wanfala gavman. Sapos olketa herem word “soul” maet olketa tingim wanfala spiritual part bilong man wea stap laef taem body hem dae. Planti million pipol lanem hao “holy spirit” hem wanfala man, part bilong wanfala Trinity. From planti pipol lusim olketa standard bilong Bible saed long fasin, olketa maet needim help tu for minim disfala toktok from Bible: “Ranawe from fornication.”—1 Cor. 6:18.

Sapos pipol no readim Bible evritaem, maet olketa no minim iu sapos iu sei, “Paul raetem . . . ” or “Luke hem sei . . . ” Maet olketa garem olketa fren or neiba wea garem sem nem. Maet iu need for talem hao hem wanfala Christian aposol or man wea raetem Bible.

Planti taem audience needim help for minim olketa scripture wea storyim hao big nao samting or olketa kastom from bifor kam. Olsem example, olketa bae no minim sapos iu talem hao ark bilong Noah hem 300 cubit long, 50 cubit waed, and 30 cubit hae. (Gen. 6:15) Bat sapos iu storyim big bilong ark long wei for markem witim samting wea audience savve long hem, olketa bae stretawe minim big bilong hem.

Explainim Gud. For mekem samting klia long audience bilong iu, maet iu need for duim moa samting winim wei for talem mining bilong wanfala toktok. Long Jerusalem long taem bilong Ezra, taem olketa readim Law, olketa explainim tu. For helpem pipol minim gud, olketa Levite explainim and minim hao for followim datfala Law fitim living wea pipol feisim long datfala taem. (Neh. 8:8, 12) Long sem wei, tek-taem for explainim and storyim olketa scripture wea iu readim.

Bihaen hem dae and resurrect, Jesus explainim long olketa disaepol bilong hem hao datwan fulfillim olketa scripture. Hem strongim tu responsibility bilong olketa from olketa lukim olketa samting hia. (Luke 24:44-48) Taem iu helpem pipol for luksavve hao samting olketa lanem shud affectim laef bilong olketa seleva, hem bae helpem olketa minim samting olketa lanem.

Wei wea Heart Join Witim Diswan. Hem tru, nomata iu explainim gud, samfala samting bae affectim wei wea man minim or nomoa. Taem heart bilong man no willing, hem olsem wanfala wall stopem hem for minim samting hem herem. (Matt. 13:13-15) For olketa wea strong for lukluk long samting long physical wei nomoa, olketa spiritual samting hem krangge. (1 Cor. 2:14) Taem man showaot hem garem tingting olsem, maet hem wise for finisim datfala story.

Bat, samfala taem heart hem no acceptim from hard taem wea man kasem long laef bilong hem. Sapos man olsem kasem chance for herem truth bilong Bible planti taem, gogo heart bilong hem maet acceptim. Taem Jesus talem olketa aposol bilong hem hao olketa bae whipim hem and killim hem dae, olketa no minim. Why nao olsem? Hem samting wea olketa nating expectim and barava no hapi long hem! (Luke 18:31-34) Nomata olsem, gogo, 11-fala long olketa aposol hia minim, and olketa showimaot datwan taem olketa duim samting followim wanem Jesus teachim olketa.

Samting wea Kamaot From Gudfala Example. Iumi helpem pipol for minim samting no thru long toktok bilong iumi nomoa bat samting iumi duim tu. Planti pipol rememberim love wea olketa lukim, and no samting wea olketa herem long firstaem wea olketa go long wanfala Kingdom Hall. Olsem tu, hapi wea iumi showimaot hem help for mekem planti haosholder willing for herem truth bilong Bible. Taem samfala pipol lukim loving-kaeness wea pipol bilong Jehovah showimaot long each other and wei wea olketa kaen long nara pipol wea feisim hard taem, hem mekem olketa luksavve olketa Witness garem trufala religion. So taem iu trae for helpem pipol minim truth bilong Bible, ting strong long wei wea iu explainim and example bilong iu.